Дила
2 Кала авеля лэ Куртенго празнико*, всаворэ вонэ стидэ́пэ вместе. 2 И акэ па небо ашунделя кацаво шумо, ԥэнэса ԥурдя фартэ бари балвал, и во ашундёлас па вся цэр*. 3 Вонэ додиқлэ варисо кацаво, со шоласпэ пэ найбарэ ягора, савэ отделисайлэ ек еқэстар и пок ек змэклэпэ пэ кажно андар лэндэ. 4 Тоди всаворэнди, ко котэ находияспэ, сас дино о свынто зор, и вонэ задинэ дума пэ разни шыба; када лэнди сас дино через о свынто зор.
5 Андэ кодэя время андо Иерусалимо сас фартэ верущи иудеёря анда разни страны. 6 Кала ашунделя кадэва шумо, стидяпэ бут миро, и всаворэ нисо нащи полэнас, важ кода кай кажно ашунэлас, кай и ученикоря дэн дума пэ лэстири чачи шыб. 7 О миро фартэ удивияспэ и ԥэнэнас: «Всаворэ вонэ — галилейски мануша. 8 Васо тоди кажно андар мэндэ ашунэл и дума пэ пэстири шыб? 9 И парфя́норя, и мидя́норя, и еламитя́норя, о миро анда Месапата́мия, анда Иуде́я и анда Кападо́кия, анда По́нто и анда Азия, 10 анда Фри́гия и анда Памфи́лия, анда Египто и анда ливийски краёря паша Кире́на, ай кадяжэ кодэла, ко авеля анда Ри́мо, сар евреёря, кадя и кодэла, ко приля иудейско вера, 11 и критя́норя и аравитя́норя — всаворэ амэ ашунас, сар вонэ дэн дума пэ амарэ шыба пала бари лэ Дэвлэстири дила». 12 Нико нисо нащи полэлас и всаворэ пушэнас ек еқэстар: «Сар када тэ полас?» 13 Но дэсавэ приасанаспэ и ԥэнэнас: «Вонэ мателэ лэ виностар*».
14 Тоди вижыля* о Пётро и лэса 11 апосталоря, и во ӷромко ԥэндя: «Иудейски мануша и вся о Иерусалимо, внимательно ашунэн, со мэ ԥэнава. 15 На́ гиндон, кай кадэла мануша матэ, важ кода кай щас кати девять часов утра*. 16 Но акана тумэ диқэн, кай ашэля, сар ԥэндя лэ Дэвлэско особо мануш о Яи́лё: 17 „Андэ послидни деса, — ԥэнэн о Дэл, — мэ дава мэрно свынто зор всаворэ́ манушэнди, и тумарэ шавэ и щея лэна тэ пэрэдэн мандар о алав*, тумарэ шаворэнди лэла дэсо тэ сыкадёл, и тумарэ ԥурэнди лэна тэ снинпэ и сунэ. 18 Дажэ лэ слуӷонэнди и лэ служанкэнди мэ дава мэрно свынто зор андэ кодэя время, и вонэ лэна тэ пэрэдэн мандар о алав*. 19 Мэ стерава чудеса по небо и удивительно дила* пэ ԥув: рат, яг и баро ҭув. 20 О қам тэмноя, ай о шон ашэла ратвало, англа кода сар авэла о баро и ашунгло лэ Иеговаско* дес. 21 Кажно, ко взвийпэ каринг о Иегова па алавэстэ, спасыяпэ“.
22 Израильтяноря, ашунэн! О Дэл ворта сыкадя, кай када во бишалдя лэ Исусос анда Назаре́то, кала через лэстэ стердя машкар тумэндэ бут удивительно дила и чудеса, и тумэ екжэнэ ӷанэн пала када. 23 Кадэва мануш сас отдино тумэнди андэ вас, и о Дэл ӷанэнас, кай кадя авэла, важ кода кай во приля кацави решэния. Тумэ казнисардэ лэс по столбо лэ бэзэхэстирэ манушэндирэ вастэнца. 24 Но о Дэл жундярдя лэс, и кадя и смэрть хасардя о право тэ хулаий пэр лэстэ, и латэ ужэ на сас зор тэ уритярэл лэс. 25 О Давидо ԥэнэн пала лэстэ: „Мэ вся и время диқав англа пэстэ лэ Иеговас. Во па право вас мандар, кай мэ нисостар тэ на дарав. 26 Важ када мэрно ди лошавэл и андэ мэрни дума ек и радость. Мэ вся и жызня лава тэ надеисавав, 27 важ кода кай ту на ашавэса ман* андэ моӷилка* и на домэкэса, кай о мануш, саво отдя тути пэско ди, тэ стернёл. 28 Ту сыкадян манди о дром, саво андярэл каринг и жызня. Кала мэ авава паша тутэ, ту дэса манди тэ радосавав анда вся ди“.
29 Ԥрала, камав тэ ԥэнав тумэнди ворта: о Давидо, ӷлава андэ пэско колено, муля и сас притидо, и лэстири моӷилка идоси тердёл. 30 О Давидо сас лэ Дэвлэско особо мануш, и о Дэл солахадя лэсти, кай лэско бэято* бэшэла пэ лэско троно. О Давидо ӷанэнас пала када, 31 и во май данглал поля, кай о Христос жундёла, и ԥэндя, кай о Дэл на ашавэла лэ Христос андэ моӷилка* и кай лэстири тила на стернёла. 32 О Дэл жундярдя кадэлэ Исусос, и амэ всаворэ када диқлям. 33 И важ кода, кай во ашэля ашунгло, бэшля справа лэ Дэвлэстар и лэсти дорэсляпэ лэ Дадэстар о свынто зор, пала саво лэсти сас дино алав, амэнди сас дино кадэва свынто зор. Акэ када тумэ акана диқэн и ашунэн. 34 О Давидо на вазгляпэ по небо, но во ԥэнэн: „О Иегова ԥэндя мэрнэ Барэ Хуласти: ‚Бэш справа мандар, 35 пока мэ на става тирэ вороӷонэн тути тала пэрнэ‘“. 36 Важ када мэк вся о Израилё драго ӷанэн, кай лэ Исусос, савэс тумэ казнисардэ по столбо, о Дэл стодя тэ авэл Баро Хулай и Христос».
37 Кадэла алава фартэ линэ лэн лэ одестар, и вонэ пушлэ лэ Петростар и аврэ апосталонэндар: «Ԥрала, со жэ амэнди тэ терас?» 38 О Пётро ԥэндя лэнди: «Каинпэ и мэк болдёл кажно, ко прижанэн лэ Исусос лэ Христос, кай тумаро бэзэх тэ простийпэ, и тоди о Дэл дэла* тумэнди о свынто зор. 39 Важ кода кай кадэя обещания сас дини тумэнди и тумарэ бэятонэнди, ай кадяжэ кодэлэнди, ко дур, — всаворэнди, кас амаро Дэл о Иегова ақарэла каринг пэстэ». 40 О Пётро драго обиснияс лэнди бут авэр маменторя* и ԥэнэнас лэнди: «Спасынпэ, кай тэ на похындён кадэлэ найлашэ мироса». 41 Кодэла, ко сас ради тэ прилэн лэ Петростирэ алава, болделэ, и андэ кодэва дес варикай 3 000 мануша ашэлэ ученикоря. 42 Вонэ на парашэнас тэ сытён кай и апосталоря и тэ проандярэн и время* ек еқэса, ханас пала ек столо и вместе мангэнаспэ.
43 Всаворэн ля и пативали дар англа Дэл, важ кода кай и апосталоря терэнас бут удивительно дила и чудеса. 44 Всаворэ, ко патяе андо Исусо, ритярдёнас вместе и делинаспэ ек еқэса всаворэса, со лэндэ сас. 45 Вонэ битинэнас пэско мищимос и маля и роспределинас кадэла ловэ пэ всаворэ, ко пэскати нуждался. 46 Кажно дес и ученикоря стидэнаспэ андэ қандири; вонэ ақарэнас ек еқэс пэстэ цэрэ тэ хан тэ пэн, и баря лошаса, анда вся ди делинаспэ хамаса. 47 Кадя вонэ драго дэнас дума пала Дэл и затерэнас лашо алав англа вся о народо. Ай о Иегова кажно дес стидэлас каринг лэндэ кодэлэн, ко витидэлас тэ жал па правильно дром, кай тэ спасыйпэ.