Марко
8 Андэ кодэла деса упалэ стидяпэ бут миро, и лэндэ на сас тэ хан. Важ када о Исусо подақардя лэ учениконэн и ԥэндя лэнди: 2 «Манди жалко лэ манушэн, вонэ манца ужэ трин дес и лэнди найсо тэ хан. 3 Если мэ бишалава лэн цэрэ боқалэн, вонэ авэна би зорэско андо дром. Важ кода кай дэсавэ авелэ дурал». 4 Но и ученикоря ԥэндэ лэсти: «Амэ дур лэ гавэндар. Кай амэ тэ лас скати марно, кай всаворэн тэ праварас?» 5 О Исусо пушля лэндар: «Скати тумэндэ марно?» Вонэ ԥэндэ: «Семь марнэ». 6 О Исусо мангля лэ мирос тэ бэшэн пэ ԥув, ля и семь марнэ, поблаӷодарисардя лэ Дэвлэс, росԥагля лэн и ля тэ дэл лэ учениконэнди, кай вонэ тэ роздэн лэ манушэнди. И ученикоря роздинэ о марно. 7 Инке лэндэ сас набут мащё. Во мангляпэ* и ԥэндя тэ роздэн и о мащё. 8 И мануша халэ и чалелэ. Кала стидэ́ о марно, саво ашэляпэ, вижылэ семь ԥэрди барэ корзины. 9 Ай котэ сас варикай 4 000 мурш. Потом во одмэкля лэ мирос.
10 Сразу посли када о Исусо лэ учениконэнца бэшля андэ лодка и авеля андэ гава по краё Далману́фа. 11 Котэ каринг лэстэ поджылэ и фарисеёря и линэ лэса тэ споринпэ. Вонэ закамлэ тэ випушэн лэс годятар и важ када манглэ лэс тэ сыкавэл лэнди чуда па небо. 12 Во ԥарэс пэрэԥурдяпэ и ԥэндя: «Васо тумэ* мангэн чуда па небо? Чаче ԥэнав тумэнди: тумэ на диқэна нисави чуда». 13 Во ужыля лэндар, упалэ бэшля андэ лодка и пэрэплывисардя пэ авэр береӷо.
14 Лэстирэ ученикоря бистэрдэ тэ лэн пэса марно, и лэндэ андэ лодка на сас нисаво хамос — кати котор марно. 15 О Исусо ԥэндя лэнди: «Диқэн, фэринпэ, кай тэ на римой тумэн лэ фарисеёнэндири опара и лэ Ирадостири опара». 16 И вонэ линэ тэ споринпэ пала кода, васо нико на ля марно. 17 Кала во додиқля када, во пушля лэндар: «Васо тумэ споринпэ пала кода, кай тумэндэ нинай марно? Хэба тумэ идоси на полэн, со мэ камав тэ ԥэнав? Хэба тумаро ди на полэл? 18 „Хоть тумэндэ исин яқа, тумэ на диқэн. Хоть тумэндэ исин кан, тумэ на ашунэн“. Хэба тумэ на сэрэн, 19 скати корзины лэ марнэса, саво ашэлясаспэ, тумэ стидэ́, кала мэ правардэм панчже марнэнца 5 000 муршэн?» Вонэ ԥэндэ лэсти: «12 корзины». 20 «Ай скати барэ корзины лэ марнэса, саво ашэлясаспэ, тумэ стидэ́, кала мэ лэм семь марнэ и правардэм лэнца 4 000 муршэн?» Вонэ ԥэндэ: «Семь корзины». 21 Тоди во ԥэндя лэнди: «И тумэ идоси на полэн?»
22 Вонэ авелэ андо форо Вифсаи́да. Катэ каринг о Исусо андэ́ корэ манушэс и линэ тэ мангэн, кай во тэ исцэлий лэс. 23 Во ля лэ корэс вастэстар и виандярдя лэс анда гав. Во шунгардя лэсти пэ яқа, стодя пэр лэстэ и вас и пушля: «Диқэс варисо?» 24 Кадэва мануш подиқля круӷом и ԥэндя: «Мэ диқав манушэн. Вонэ шонпэ пэ витки, кати ԥирэн». 25 О Исусо упалэ стодя и вас каринг лэстирэ яқа, и кодэва мануш исцэлисайля и ля тэ диқэл вся чотко и драго. 26 Тоди о Исусо бишалдя лэс цэрэ и ԥэндя: «Кати на́ зажа андо гав».
27 О Исусо и лэстирэ ученикоря жылэ андэ гава, савэ сас паша Фили́повско Кеса́рия. Па дром во ля тэ роспушэл кай и ученикоря: «Со о миро пала мандэ дэл дума? Со во гиндой пала мандэ?». 28 Вонэ ԥэндэ лэсти: «Дэсавэ ԥэнэн, кай ту о Иоа́но Крестителё, авэр ԥэнэн — о Илья, ай инке ԥэнэн — ек анда лэ Дэвлэстирэ особи мануша». 29 Тоди во пушля лэндар: «Ай тумэ сар гиндон, ко мэ?» О Пётро ԥэндя: «Ту — Христос». 30 Но о Исусо приԥэндя лэнди тэ на росԥэнэн пала лэстэ. 31 Посли када во ля тэ ԥэнэн* лэнди, кай лэ манушэско Шаво трэбуй тэ пэрэандярэл бут ԥаримос, ай кадяжэ кай и барэдэра, и барэ рашая и законикоря на прилэна лэс и кай лэс умарэна и по трито дес во жундёла. 32 Во дэлас дума пала када ворта. Тоди о Пётро одындярдя лэ Исусос андэ риг и ля тэ мустрий лэс. 33 О Исусо обрисайля, диқля пэ ученикоря и строӷо ԥэндя лэ Петрости: «Вижа мандар*, Сатана! Ту гиндос най пала лэ Дэвлэстири время, ай пала лэ манушэндири время».
34 Потом о Исусо подақардя каринг пэстэ лэ мирос и лэ учениконэн и ԥэндя: «Ко камэл тэ ԥирэл пала мандэ*, мэк отԥэндёл пэстар, андярэл пэско ԥаро столбо и ԥирэл пала мандэ*. 35 Кодэва, ко камэл тэ спасый пэстири жызня, хасарэла ла, ай кодэва, ко хасарэла пэстири жызня важ мандэ и важ лащи новость, спасыяпэ. 36 Чаче, саво лашымос авэла лэ манушэсти, если лэстэ андэ вас авэла вся и люма, но во хасарэла и жызня? 37 И пэр со о мануш можэт тэ парувэл пэстири жызня? 38 Ко лажала мандар и мэрнэ алавэндар англа кадэва найлашо миро, саво найкандино лэ Дэвлэсти, кодэлэстар лажала и лэ манушэско Шаво, кала авэла пэстирэ Дадэстирэ зорэса и лэ свынтонэ анӷелонэнца».