Иоано

19 Тоди о Пила́то ԥэндя тэ марэн лэ Исусос чукняса. 2 Ай и халавдэ анқудэ анда калючки винко, стодэ лэ Исусости по шэро и шутэ пэр лэстэ фиалетаво жылетка. 3 Вонэ поджанас каринг лэстэ и ԥэнэнас: «Тэ авэл зорало о иудейско царё!» — и марэнас лэс пар мостэ. 4 О Пила́то упалэ вижыля каринг и толпа и ԥэндя: «Диқэн! Мэ виандярав лэс каринг тумэндэ, кай тумэ тэ ӷанэн: мэ на диқав лэстири дош». 5 И о Исусо вижыля андэ фиалетаво жылетка и по шэро лэстэ сас о винко анда калючки. О Пила́то ԥэндя лэ мирости: «Акэ мануш!» 6 Но и барэ рашая и охраникоря, кала додиқлэ лэс, линэ тэ цыпин: «Казнисар лэс! Казнисар!*» О Пила́то ԥэндя лэнди: «Залэн лэс и казнин* екжэнэ. Мэ на диқав лэстири дош». 7 И иудеёря ԥэндэ лэсти: «Амэндэ исин законо, и па амаро законо во трэбуй тэ мэрэл, важ кода кай ԥэнэнас пэр пэстэ лэ Дэвлэско шаво».

8 Кала о Пила́то ашундя када, во пэрэдарайля инке май фартэ. 9 Во упалэ зажыля андо дворецо и пушля лэ Исусостар: «Катар ту?» Но о Исусо ашэлас мулком. 10 Тоди о Пила́то ԥэндя лэсти: «На камэс манца тэ дэс дума? Хэба на ӷанэс, кай мандэ исин право тэ одмэкав тут или тэ казнисарав?» 11 О Исусо ԥэндя лэсти: «Тэ на диноп тути о Дэл кадэва право, ту нисо манди на стердоп. Важ када май баро бэзэх пэ кодэва, ко отдя ман тути».

12 О Пила́то упалэ ля тэ гиндой, сар тэ одмэкэл лэ Исусос, но и иудеёря цыпинас: «Если ту лэс одмэкэса, ту авэса вороӷо лэ ӷлавнонэ правителёсти. Ко вистол пэс царёса, во жал* против о римско правителё». 13 Кала о Пила́то ашундя када, во виандярдя лэ Исусос и бэшля по ҭан, кай прожалас о сындо, пэ Баруни площадка (пэ еврейско шыб Габа́та). 14 Када сас важ десэстэ жы кай и Патради, варикай в 12 часов дня*. О Пила́то ԥэндя лэ иудеёнэнди: «Акэ тумаро царё!» 15 Но вонэ зацыписайлэ: «Виандяр лэс! Виандяр! Казнисар лэс!» Во ԥэндя лэнди: «Тэ казнисарав тумарэ царёс?» И барэ рашая ԥэндэ лэсти: «Амэ прижанас ек лэ римсконэ царёс*». 16 Тоди о Пила́то отдя лэ Исусос, кай лэс тэ казнин по столбо.

Лэ Исусос ундярдэ. 17 Во андярэлас о столбо жы каринг о ҭан, пэ саво ԥэнэнас Черепо (пэ еврейско шыб Галго́фа). 18 Котэ лэс примардэ карфянца каринг о столбо. Паша лэстэ, па лэдуй рига, амбладёнас пэ столборя инке дуй мануша, ай о Исусо сас помашкар. 19 О Пила́то примардя каринг о столбо досточка, пэ сави сас пистромэ: «О Исусо анда Назаре́то, иудейско царё». 20 Кадэла алава проадиносардэ бут евреёря, важ кода кай о ҭан, кай казнисардэ лэ Исусос, сас найдур лэ форостар, ай и алава сас пистромэ пэ еврейско, пэ латинцко и пэ греческо шыб. 21 И иудейски барэ рашая ԥэндэ лэ Пилатости: «На́ пистросар, кай во иудейско царё. Пистросар, кай во ԥэнэнас пэр пэстэ иудейско царё». 22 Но о Пила́то ԥэндя: «Сар пистросардэм, мэк кадя и ашэлпэ».

23 Ай и халавдэ, кала примардэ лэ Исусос каринг о столбо, линэ лэстири жылетка и розделисардэ ла пэ штар котора, пок ек кажнонэсти. Кадяжэ вонэ линэ лэско лунго гад, но о гад сас найсудо, пэр лэстэ на сас ни ек шово. 24 Тоди вонэ ԥэндэ ек еқэсти: «На ласа тэ шынас о гад, ай росцэласа машкар пэстэ* и диқаса, касти во дорэсэлапэ». Тоди ашэля кадя, сар пистромэ андэ Свынти Лила: «Делинас машкар пэстэ мэрни ӥда и росцэлэнас ла». Акэ када и стердэ и халавдэ.

25 Паша лэ Исусоско столбо тердёнас лэстири дэй и лэстиря датири ԥэй, ай кадяжэ и Мария, лэ Клопасостири хулаи, и инке и Мария Магдали́на. 26 О Исусо, кала додиқля ла да и паша латэ лэ ученикос, саво лэсти сас куч*, ԥэндя ла дати: «Манушни, акэ тиро шаво!» 27 Потом во ԥэндя лэ ученикости: «Акэ тири дэй!» И о ученико заля ла каринг пэстэ.

28 Посли када о Исусо, кала ужэ полэлас, кай стердя вся, со мангля лэстар о Дад, ԥэндя: «Тэ пав» — и тоди ашэля кадя, сар сас пистромэ андэ Свынти Лила. 29 Андэ кодэва ҭан тердёлас кувшыно шуклэ виноса. Кодэла, ко сас найдур, стодэ пэ исопово виточка и ӷубка, сави сас тиндярди андо шукло вино, и подындярдэ каринг лэстирэ вуш. 30 Кала о Исусо чуть отпиля о шукло вино, во проԥэндя: «Мэ стердэм вся!» Посли када во умэкля о шэро и муля.

31 Када сас важ десэстэ жы кай и субота, ай и иудеёря на камэнас, кай и мулэ тэ ашэнпэ пэ столборя в суботу (ай кодэя субота сас особо). Кочай вонэ манглэ лэ Пилатос, кай кодэлэнди, ко амбладёлас пэ столборя, тэ пэрэмарэн и пэрнэ и тэ злэн. 32 Тоди авелэ и халавдэ и пэрэмардэ и пэрнэ спэрва еқэ манушэсти, саво амбладёлас паша Исусо, ай потом аврэсти. 33 Кала вонэ поджылэ каринг о Исусо, то додиқлэ, кай во ужэ муля, и на линэ тэ пэрэмарэн лэсти и пэрнэ. 34 Ек халавдо пропусадя лэсти лэ тилэса и риг, и котар сразу тай питял о рат и о паи. 35 Када потвердий кодэва, ко вся када диқля, и лэстирэ алавэнди исин патяимос. Во ӷанэн, кай ԥэнэн чачимос, и росԥэнэн када, кай и тумэ тэ патян. 36 Вся када тердяпэ, кай тэ ашэл кадя, сар пистромэ андэ Свынти Лила: «Ни ек лэско кокали на авэла ԥаго». 37 Ай аврэ ҭанэстэ андэ Свынти Лила пистромэ: «Вонэ лэна тэ диқэн пэ кодэва, кас пропусадэ».

38 Посли када о Ёсифо анда Аримафе́я, саво сас лэ Исусоско ученико, но на сыкавэлас када через и дар англа иудеёря, жыля кай о Пила́то. Во мангля лэстар тэ дэл лэсти тэ залэл лэ Исусостири тила. О Пила́то домэкля када лэсти, и во жыля и заля и тила. 39 Кадяжэ авеля о Никади́мо, саво еқвар сас кай о Исусо и рят, и андя зӷамимэ чаря*, варикай 33 килоӷраморя*. 40 Вонэ обмотысардэ лэ Исусостири тила андэ лёново кирпа чарянца, савэ драго қандэнас, сар када терэласпэ кай и иудеёря, кала притидэн лэ мулэн. 41 Паша кодэва ҭан, кай лэс казнисардэ, сас садо, и котэ — нэви моӷилка, андэ сави инке нико на сас гарадо. 42 Кай и иудеёря када сас важ десэстэ жы кай и субота, ай кадэя моӷилка сас найдур, кочай лэ Исусос стодэ интя.