Калосы

3 Ай если тумэ жунделэ лэ Христоса, тоди на́ парашэн тэ цырдэнпэ каринг кода, со по небо, кай о Христос бэшэл справа лэ Дэвлэстар. 2 Гиндон пала кода, со по небо, ай най со пэ ԥув. 3 Важ кода кай тумэ мулинэ и тумари жызня акана прижал лэ Христости, савэстэ ек гиндо лэ Дэвлэса. 4 Кала о Христос — амари жызня — сыкавэла пэско зор, тоди драго дицола, кай тумэ ашэна кацавэ жэ ашунглэ, сар и во.

5 Важ када мулярэн вся о вэрытимос, саво исин андэ тумари тила*: када кай тэ цырдэнпэ каринг о билажавардимос и каринг и мэлали дила, тэ тинонпэ пала кода, пала со здрал и цыпа, тэ любин и вэрыто дила и тэ авэн чорымастирэ, ай када еқэндар кодэлэса, кай тэ тэлён аврэ дэвлэнди*. 6 Важ кода кай вся кадэя дила холярэл лэ Дэвлэс. 7 Кадя варикала терэнас и тумэ. 8 Но акана отԥэндён кодэлэстар, кай тэ вижан андар пэстэ, тэ холявэн, тэ терэн найлашымос, тэ дэн дума найпативалэс и тэ акушэнпэ*. 9 На́ хохавэн ек еқэсти. Злэн пар пэстэ о пурано характеро и будэр на́ терэн и дила, сави тумэ терэнас. 10 Лэн пэр пэстэ о нэво характеро, саво, кала точно уӷанэн о чачимос, парудёл и лэл инке май фартэ тэ шолпэ по характеро кодэлэско, ко лэс создал. 11 И тоди важ кодэва, кастэ исин нэво характеро, всаворэ еқэндар — о греко и о евреё, о опшындо и о найопшындо, ай кадяжэ о чужо, о дыко*, о рабо и о свободно. Но о Христос исин андэ вся, и амэ всаворэ стидэ́ лэса.

12 Тумэ — лэ Дэвлэско особо народо и лэстирэ свынти и любими бэяцэ. Важ када тумэ трэбуй, ԥэнэса тэ утидэнпэ, — када тэ старыинпэ всаворэ одеса тэ жалуин, драго тэ обжанпэ аврэнца, тэ на гиндон пала пэстэ фартэ бут, тэ андярэн пэс ковлэс и тэ тэрпин. 13 Старыинпэ сар исин тэ прилэн ек еқэско характеро и анда ди простин ек еқэс, дажэ если тумэндэ исин васо тэ холявэн. Сар о Иегова* анда ди простисардя тумэн, кадя простин и тумэ. 14 Ай инке тумэ трэбуй, ԥэнэса тэ утидэнпэ, — када тэ пристон вся о зор, кай тэ любин, важ кода кай, если любисарас, амэ ашас май пашэ ек еқэсти.

15 Мэк пэ тумаро ди хулаий о Христос, саво дэл спокойно жызня. Важ кода кай о Дэл витидя тумэн, кай тумэндэ тэ авэл кадэя спокойно жызня. Кадя тумэ ашэн еқа тиласа. И авэн блаӷодарни. 16 Мэк вся, сости сытярэлас о Христос, авэл тумэндэ андо ди и поможый тумэнди тэ ашэн годявэрнэ. Кай тэ сытярэн и тэ подритярэн ек еқэс, дилабэн стихонэнца, андярэн лашо алав по Дэл и дилабэн дэвликунэ диля. Кала терэн када, сыкавэн, кай тумэ блаӷодарни. Дилабэн лэ Иеговасти анда вся ди. 17 Вся, со тумэ ԥэнэн и терэн, трэбуй тэ авэл пативаса каринг о Баро Хулай о Исусо, и блаӷодарин через лэстэ лэ Дэвлэс, амарэ Дадэс.

18 Жувля, кандэн пэстирэ хулан — када аштярэл тумэндар о Баро Хулай. 19 Мурша, любин пэстирэ хулаян и на́ обжанпэ лэнца холяса. 20 Бэяцэ, вся и время кандэн лэ родителёнэн — када уӷодно лэ Барэ Хуласти. 21 Дада, на́ холярэн пэстирэ бэятонэн, кай вонэ тэ на умэкэн и вас. 22 Раборя, вся и время кандэн пэстирэ хулан, най кай авэр тэ диқэн, ԥэнэса камэн тэ уӷодин лэ мирости, ай терэн када всаворэ́ одеса, важ кода кай пативаса даран лэ Иеговастар. 23 Старыинпэ, кай вся, со тумэ терэн, тэ авэл анда вся ди, сар важ о Иегова, ай най важ о миро. 24 Тумэ ӷанэн, кай тумэнди дорэсэлапэ лэ Иеговастар и блаӷословения. Уӷодин пэстирэ Хуласти, лэ Христости. 25 Ай ко терэл найлашымос, лэстар спушэна пала када, важ кода кай о Дэл всаворэнца обжалпэ еқэндар.