Евреёря

8 И акэ со мэ камлэм тэ ԥэнав: амэндэ кацаво ӷлавно рашай; во бэшля справа лэ Барэ Дэвлэстар, саво бэшэл по троно, 2 и во терэл дила андэ ла чачуня катунако свынто ҭан; кадэя катуна стодя о Иегова*, ай най о мануш. 3 Кажно ӷлавно рашай трэбуй тэ анэн и тэ сԥабарэл и жэртвы, важ када и во трэбуй сас тэ анэн жэртва. 4 Тэ авелоп во пэ ԥув, во на ашэлоп рашай, важ кода кай катэ ужэ исин кодэла, ко па законо анэн и жэртвы. 5 Вонэ терэн и дила, сави, сар тень, шолпэ пэ кода, со исин по небо. Када дицол анда алава, савэ о Дэл ԥэндя лэ Маисеёсти англа кода, сар о Маисеё тэ лэл тэ терэл и катуна: «Стер вся точно кадя, сар сас сыкадо тути по плай». 6 Инке через о Исусо о Дэл стердя май лашо доӷоворо. И во стердя када па законо, кала солахадя, кай дэла со май лашэ блаӷословении. Акэ васо о Исусо, сар рашай, терэл пэ бутэстэ май лащи дила.

7 Тэ авелоп о пэрво доӷоворо идеально, тоди на прижылопэ тэ терэн о дуйто. 8 Но во, кала диқэл лэ народостири дош, ԥэнэн: «Пашол и время, — ԥэнэн о Иегова, — кала мэ стерава лэ Израилёса и лэ Иудаса нэво доӷоворо. 9 Када авэла най кацаво доӷоворо, саво мэ стердэм лэндирэ ԥурэнца андэ кодэва дес, кала виандярдэм* лэн анда Египто: „Кодэва доӷоворо вонэ ԥаглэ, и важ када мэ парашэлэм тэ заботисавав пала лэндэ“, — ԥэнэн о Иегова.

10 „Акэ о доӷоворо, саво мэ стерава лэ Израилёса посли кодэя время, — ԥэнэн о Иегова. — Мэ става мэрно законо лэнди андэ годи и пистросарава лэс пэ лэнго ди. Мэ ашава лэндирэ Дэвлэса, ай вонэ ашэна мэрнэ народоса.

11 И вонэ будэр на лэна тэ сытярэн пэстирэ чачес и пэстирэ ԥралэс кацавэ алавэнца: ‚Уӷанэн лэ Иеговас!‘ Всаворэ вонэ лэна тэ ӷанэн ман — и о просто, и о ашунгло. 12 Мэ простисарава лэндири неправильно дила и манди по гиндо будэр на авэла лэнго бэзэх“».

13 Кала о Дэл ԥэнэн «нэво доӷоворо», во сыкавэл, кай ашэля пурано кодэва, саво сас. Ай кода, со ашэля пурано и сԥиряделя, ӥто парашэла тэ авэл.