Свынто тайна
21 Мэ додиқлэм нэво небо и нэви ԥув, важ кода кай о пурано небо и пурани ԥув будэр на сас, и на ашэля и моря. 2 Кадяжэ мэ додиқлэм о свынто форо, о Нэво Иерусалимо, саво змэкэлпэ па небо лэ Дэвлэстар. Во сас вурядо, сар и тэрни, сави ӷотово тэ диқэлпэ лэ тэрнэса. 3 Мэ ашундэм, сар варико па троно ӷромко ԥэндя: «Лэ Дэвлэстири катуна тердёл машкар и мануша, и во лэла тэ жувэл лэнца. Вонэ авэна лэстирэ народоса, и во авэла лэнца. 4 О Дэл виқосэла и ясва па лэ манушэндирэ яқа, и будэр нико на мэрэла, на лэла тэ умардёл бидатар и тэ ровэл, и будэр нисо на лэла тэ дуқал. Вся, состар сас ԥарэс, ужэ нинай».
5 Кодэва, ко бэшэл по троно, ԥэндя: «Мэ терав вся нэво!» — и инке ԥэндя: «Запистросар, важ кода кай кадэла алава чачунэ и лэнди исин патяимос». 6 Потом во ԥэндя манди: «Вся ашэля кадя, сар сас ԥэндо! Мэ А́льфа и Аме́га, пэрво и послиднё. Всаворэнди, ко камэл тэ пэл паи, мэ подарисарава паи котар, кай питяла о паи, саво дэл жызня. 7 Вся када дорэсэлапэ кодэлэсти, ко победия. Мэ ашава лэстирэ Дэвлэса, и во ашэла мэрнэ шавэса. 8 Ай всаворэ даранэ, найверущи, кодэла, кастири дила гряцаливо и мэлали, кодэла, ко умарэл, шалыийпэ*, драбатярэл, полэл аврэ дэвлэн и хохавэл, авэна шутэ андо ягано возери, саво фартэ ԥабол. Када — дуйто смэрть».
9 Посли када авеля ек анда семь анӷелоря — када лэндэ сас семь чарэ, савэ сас ԥэрди семь послидни биды, — и ԥэндя манди: «Авэн, мэ сыкавава тути ла тэрня, лэ Бакрорэстиря хулая́». 10 Лэ свынтонэ зорэса во пэрэандярдя ман по баро и вучо плай и сыкадя манди о свынто форо Иерусалимо, саво змэкэлпэ па небо лэ Дэвлэстар 11 и савэстар марэлас лэ Дэвлэстири бах. Во светияспэ кадя, сар ԥэнэса светийпэ кучутно бар, саво шолпэ пэ я́шма, вужо, сар хрусталё. 12 Кай о форо сас састи, вучи стина и 12 вороты, паша савэ тердёнас 12 анӷелоря. Пэ вороты сас пистромэ, сар ақарэн лэ Израилёстирэ 12 шавэн. 13 Трин вороты сас пэ восточно риг, трин вороты — пэ северно риг, трин вороты — пэ южно риг, и трин вороты — пэ западно риг. 14 И стина круӷом форо тердёлас пэ 12 бара, пэ савэ сас пистромэ, сар ақарэн лэ Бакрорэстирэ 12 апосталонэн.
15 Кодэва, ко дэлас дума манца, ритярэлас сомнакуни рувли, кай тэ измерий о форо, и вороты, ай кадяжэ и стина. 16 О форо сас квадратно: андо лунгимос во сас кацаво жэ, сар андо буӷлимос. Во измерисардя о форо ла рувляса, и вижыля 2 220 километроря; лэско лунгимос, о буӷлимос и о вучимос сас еқэндар. 17 О анӷело кадяжэ измерисардя и стина, лако вучимос сас 64 метроря. Во измерияс кадя, сар измерин и мануша. 18 Лэ форостири стина сас анда бар я́шма, ай о форо — анда сомнак, саво вужо, сар прозрачно стэкла. 19 О фундаменто тала стина сас вистодо анда разни кучутнэ бара. Пэрво бар — я́шма, дуйто — сапфи́ро, трито — халцэдо́но, штарто — изумру́до, 20 панчто — сардани́ксо, шовто — сердали́ко, седьмо — хризали́то, восьмо — бери́ло, девято — тапа́зо, дэшто — хризапра́зо, одинацато — гиаци́нто, двенацато — амети́сто. 21 Ай и 12 вороты — када 12 жэмчужыны; и вороты сас стердэ анда ек цыло жэмчужына. Лэ форостири ӷлавно вулица сас анда сомнак, саво вужо, сар прозрачно стэкла.
22 Мэ на диқлэм, кай андо форо тэ авэл и қандири. Лэстири қандири — о Само Зорало Дэл о Иегова* и о Бакроро. 23 Лэ форости на трэбуй сас, кай тэ светий о қам и о шон, важ кода кай во светияспэ лэ Дэвлэстиря бахтатар и лэстири лампа сас о Бакроро. 24 Андэ кадэва свето лэна тэ ԥирэн и народоря, и ла ԥувьятирэ царёря лэна драго тэ дэн дума пала лэстэ. 25 Лэ форостирэ вороты десэ на ԥандадёна, ай и рят котэ на авэла. 26 И царёря авэна интя и лэ народонэндар лэла тэ марэл лэндири бах и патив. 27 Андэ кадэва форо на попэрэла нисо маӷримэ, и интя на зажана кодэла, ко терэл гряцаливо дила и хохавэл. Интя зажана кати кодэла, ко запистромэ андэ ла жызняко лил кай о Бакроро.