Иуда

1 Мэ, о Иуда, лэ Исусоско лэ Христоско рабо и лэ Иаковоско ԥрал, пистросарав кодэлэнди, ко сас витидо*, кас любий о Дэл, амаро Дад, и кас во фэрий важ кода, кай тумэ тэ авэн лэ Исусоса лэ Христоса.

2 Мэк о Дэл авэл инке май одяло каринг тумэндэ, инке май фартэ любий тумэн и мэк во дэл тумэнди инке май бут мирно жызня.

3 Кучутнэ ԥрала, спэрва мэ фартэ камавас тэ пистросарав тумэнди пала амари спасения, но потом мэ закамлэм андэ пэско письмо тэ шав сама пэ кода, кай тумэ анда вся зор тэ боринпэ важ о патяимос, саво пэ вся и время сас пэрэдино лэ свынтонэнди. 4 Важ кода кай каринг тумэндэ проӷульдэ и мануша, савэнди, сар пистромэ андэ Свынти Лила, ужэ дэлмут виандярдо о приӷоворо. Кадэла мануша на даран лэ Дэвлэстар, вонэ пользуюца кодэлэса, кай лэстэ баро ковло ди, и через када старыинпэ тэ виправинпэ, кай бесовестно* пэс андярэн. Пэстиря диласа вонэ отԥэндён кодэлэстар, касти амэ прижас, и амарэ Барэ Хуластар, лэ Исусостар лэ Христостар.

5 Камав, кай тумэ тэ на бистрэн, — хоть тумэ и кадя вся када ӷанэн, — кай о Иегова*, посли кода сар спасысардя пэстирэ народос анда Египто, умардя кодэлэн, кастэ на сас патяимос. 6 И пэ анӷелоря, савэ на фэрисардэ пэско ҭан по небо, но ашадэ пэско цэр, во шутя вечни цэпоря и ритярэл лэн андэ бари тэмнота важ о сындо по особо дес. 7 Точно кадя жэ о Садо́мо, и Гамо́ра и пашутнэ фороря потасылэ андэ бари билажаварди дила* и дажэ терэнас гряцаливо билажавардимос*. О Дэл спушля лэндар, кала бишалдя пэр лэндэ вечно яг, и кадя вонэ ашэлэ важ амэндэ примеро, кай тэ авас осторожни.

8 И всаек кадэла мануша* тожэ любин тэ гиндон пала найлашымос, маӷрин пэстири тила, на стон патив пэ кодэла, кастэ исин право тэ хулаий, и найпативалэс дэн дума пала кодэла, кас о Дэл стердя тэ авэн ашунглэ. 9 Дажэ о ӷлавно анӷело* о Михаило, кала спорисайля лэ Бэнгэса пала лэ Маисеёстири тила, на ля тэ сындой лэс найпативалэ алавэнца, но ԥэндя: «Мэк о Иегова сындой тут». 10 Но кадэла мануша найпативалэс дэн дума пала вся, со па чачимастэ на полэн. Ай со вонэ полэн неосознано, сар и дилэ жывотни, кода вонэ и терэн, и кадя ашэн инке май розвратни.

11 Бида лэнди, важ кода кай вонэ линэ тэ терэн па лэ Каиноско примеро, витидэ тэ жан па лэ Валаамоско неправильно дром, кай тэ барвадён, и цырдэ бида пэ пэско шэро, кала пэрэлинэ лэ Кареёстири дума, саво жыля против кодэла, кастэ сас власть. 12 Кадэла мануша бэшэн тумэнца пала ек столо и хан и пэн пэ тумарэ мисяйли, но вонэ — опасни плая тала паи, пастухоря, савэ на лажан тэ замарэн пэсти пор. Вонэ — бипаестирэ тучи, савэн андярэл и балвал, витки, пэ савэ каринг и восэнь нисо на вибарёл и савэ зашукэ* и вишындэ ку корнё. 13 Вонэ — дыки волны андэ моря, савэ марэн и пена пэстиря найлащя* дилатар, заблудимэ звёзды, савэн аштярэл вечно бари тэмнота.

14 Кадяжэ лэ Дэвлэско особо мануш о Ено́хо, саво сас седьмо мануш лэ Адамостар, ԥэнэнас пала лэндэ лэ Дэвлэстар: «О Иегова авеля фартэ бутэ* свынтонэ анӷелонэнца, 15 кай тэ сындой всаворэ манушэн и тэ спушэл кодэлэндар, ко на дарал лэ Дэвлэстар, важ лэндири найлащи дила, сави вонэ стердэ, и важ всаворэ бесовестни алава, савэнца кадэла бэзэхэстирэ мануша найпативалэс дэнас дума пала лэстэ».

16 Кадэла мануша найлошалэ, савэ ровэнпэ пэ пэстири жызня и терэн кода, каринг со лэн цырдэл лэнго ди. Вонэ путён и на ӷанэн пэсти мера андэ када и важ пэстири выӷода вихвалин аврэн.

17 Ай тумэ, кучутнэ ԥрала, на́ бистрэн и алава, савэ ԥэндэ лэ Исусостирэ лэ Христостирэ апосталоря, амарэ Барэ Хуластирэ. 18 Вонэ ԥэнэнас тумэнди: «Андэ послиднё время авэна мануша, савэ лэна тэ приасанпэ и тэ терэн кода, каринг со цырдэлпэ лэнго бэзэхэско ди». 19 Кацавэ мануша терэн розладо, андярэн пэс сар жывотни и лэндэ нинай лэ Дэвлэско свынто зор. 20 Но тумэ, кучутнэ ԥрала, ашэн май састэ через тумаро свынто патяимос и мангэнпэ кадя, сар андярэл о свынто зор, 21 кай о Дэл тэ на парашэл тумэн тэ любий*, пока тумэ аштярэн, кала амаро Баро Хулай о Исусо Христос авэла одяло каринг тумэндэ и тумэнди дорэсэлапэ вечно жызня. 22 Ай инке, на́ парашэн тэ авэн одялэ каринг кодэла, ко на допатял. 23 Вихутилэн лэн анда яг, кай тэ спасын. На́ парашэн тэ авэн одялэ и каринг авэр, но мэк тумэндэ авэл дар и вэрыцын дажэ ӥда, сави вимақли лэ бэзэхэстар.

24 Ай кодэлэстар, ко можэт тэ фэрий тумэн, кай тумэ тэ на дэнпэдап, и тэ поможый тумэнди тэ тердён бидошатирэ англа лэстэ и тэ лошавэн, 25 амарэ еқэ чачунэ Дэвлэстар, кодэлэстар, ко спасый амэн через о Исусо Христос, через амаро Баро Хулай, мэк лэстар марэл и бах, и патив и о зор и мэк во правий вся и вечность — дэлмут, акана и англэ. Аминь.