Дила
19 Пока о Апало́со сас андо Кари́нфо, о Павло жыля андо Ефе́со дромэса, саво сас дур ла морятар. Котэ во диқляпэ дэсавэ учениконэнца 2 и пушля лэндар: «Тумэнди сас дино о свынто зор, кала тумэ патяе*?» Вонэ ԥэндэ лэсти: «Амэ нисо на ашундям пала свынто зор». 3 Тоди во пушля: «Сар жэ тумэ болделэ?» Вонэ ԥэндэ: «Кадя, сар сытярэлас о Иоа́но». 4 О Павло ԥэндя: «О Иоа́но болэлас лэ манушэн сар знако, кай вонэ каинпэ, и ԥэнэнас тэ патян андо мануш, саво жалас пала лэстэ, — андо Исусо». 5 Кала кадэла мануша ашундэ када, вонэ прижанглэ лэ Барэ Хуласко лэ Исусоско зор* и болделэ. 6 Кала о Павло стодя пэр лэндэ и вас, лэнди сас дино о свынто зор и вонэ линэ тэ дэн дума пэ разни шыба и тэ пэрэдэн и дэвликунэ алава. 7 Лэн сас варикай 12 мануша*.
8 Трин шон о Павло смило дэлас дума пала Дэл андэ синагога: во ԥэнэнас речи и старыияспэ тэ доандярэл лэ манушэнди о чачимос пала лэ Дэвлэско Царство. 9 Но дэсавэ мануша нисар на камэнас тэ патян и англа всаворэ старыинаспэ тэ мэлярэн о Дром. Важ када во ужыля лэндар, заля пэса лэ учениконэн и ля кажно дес тэ ԥэнэн речи андэ лэ Тираностири школа. 10 Кадя во сытярэлас дуй бэрш, и всаворэ, ко жувэл андэ Азия*, — и евреёря, и грекоря — ашундэ о алав лэ Барэ Хуластар.
11 О Дэл терэлас удивительни чудеса через о Павло. 12 Дажэ если лэ насвалэнди анэнас кати лэстирэ қоснорэ и зависки, вонэ вилечинаспэ, и анда мануша вижанас и найвужэ. 13 Дэсавэ евреёря-кочевникоря, савэ видаравэнас лэ найвужэн, тожэ старыинаспэ тэ стерэн када лэ Барэ Хуластирэ лэ Исусостирэ зорэса*. Вонэ ԥэнэнас кодэлэнди, андэр кастэ сас и найвужэ: «Лэ Исусостирэ зорэса, пала саво росԥэнэн о Павло, приԥэнав тумэнди тэ вижан». 14 Кадя терэнас лэ еврейсконэ барэ рашастирэ лэ Скевастирэ семь шавэ. 15 Но о найвужо ԥэндя лэнди: «Лэ Исусос ӷанав, и лэ Павлос тожэ, ай тумэ касти сынэ?» 16 И о мануш, андэ саво сас о найвужо, дя пэр лэндэ и ек пала ек халя жызнятар лэн всаворэн, и вонэ винашлэ анда кодэва цэр нангэ и помардэ. 17 Пала када уӷанглэ всаворэ, ко жувэл андо Ефе́со: и евреёря, и грекоря. Лэн ля и дар, и вонэ линэ тэ стон инке май бари патив пэ лэ Барэ Хуласко лэ Исусоско алав. 18 Бут мануша, савэ патяе андо Баро Хулай, прижанэнас пэско бэзэх, кала англа всаворэ росԥэнэнас пала кода, со стердэ. 19 Чимало мануша, савэ драбатярэнас, стидэ́ пэстирэ книжки и англа всаворэ сԥабардэ лэн. Кала подадиносардэ, со вонэ ашэн, вижыля, кай вонэ ашэнас 50 000 рупунэ манеты. 20 Кадя о алав лэ Иеговастар* розжаласпэ и ашундёлас май фартэ.
21 О Павло приля решэния, кай посли Македо́ния и Аха́я жала андо Иерусалимо. Во ԥэндя: «Посли кода сар авава интя, мэ трэбуй тэ диқав и о Ри́мо». 22 О Павло бишалдя андэ Македо́ния дуе пэстирэ помошниконэн, лэ Тимафеёс и лэ Ерастос, ай екжэно заритярделя андэ Азия.
23 Андэ кодэя время через о Дром о миро ля фартэ тэ ӷудий. 24 Ек мануш о Дими́триё, саво сас мастеро по руп, терэлас анда руп ла Артемидатирэ цынёне қандиря. Через лэстэ и мануша, савэ залэнаспэ кадэла диласа, затерэнас барэ ловэ. 25 Во стидя лэн, ай кадяжэ аврэ мастеронэн и ԥэндя: «Тумэ драго ӷанэн, кай кадэла дилатар зависит амари блаӷополучия. 26 Тумэ кадяжэ диқэн и ашунэн, со терэл кадэва Павло. Во ԥэнэн, кай и дэвла́, савэ стердэ лэ манушэндирэ вастэнца, — най дэвла, и андэ када патяе бут мануша най кати андо Ефе́со, но почти па вся Азия. 27 Кадэлэстар пала амари дила можэт тэ жал найлащи дума и дажэ ла ашунгля баӷинятири ла Артемидатири қандири никасти на авэла трэбуй и ужэ парашэна тэ стон патив пэ кодэя, касти тэлёл вся и Азия и вся и люма». 28 Кала вонэ када ашундэ, лэн ля бари холи, и вонэ линэ тэ цыпин: «Тэ авэл ашунгли и Ефе́ско Артеми́да!».
29 Андо форо звазгляпэ о миро, всаворэ динэ андо театро* и цырдэ пала пэстэ лэ Гаёс и лэ Аристархос, савэ сас македо́нцоря и сопроводинас лэ Павлос. 30 О Павло камля тэ жал интя, кай тэ обратийпэ каринг и мануша, но и ученикоря лэс на мэклэ. 31 Дажэ дэсавэ мануша, савэ терэн празникоря и иӷры и савэ драго обжанаспэ лэ Павлоса, бишалдэ каринг лэстэ лэ манушэн, кай тэ мангэн лэс тэ на жал интя и тэ на попэрэл андэ бида. 32 Ай андэ кодэя время машкар о миро, саво стидяпэ, на полэса со терэласпэ: дэко цыпияс ек, ай варико цыпияс авэр, и бут ко на ӷанэнас, состэ стидэ́пэ. 33 Англа толпа очутисайля о Алекса́ндро — и евреёря витолкисардэ лэс англэ. Во подя знако лэ вастэса, кай тэ взвийпэ каринг и мануша, савэ стидэ́пэ, 34 но кала и мануша полинэ, кай во евреё, вонэ линэ тэ цыпин андэ ек ӷолосо: «Тэ авэл ашунгли и Ефе́ско Артеми́да!» — и цыпинас варикай дуй часоря.
35 Через дэсави время о форицко барэдэр уля лэ мирос. Во ԥэндя: «Ефе́ски мануша, хэба исин миро, саво на ӷанэн, кай о форо Ефе́со диқэл пала ла ашунгля Артемидатири қандири и пала лако облико, саво пэля па небо? 36 И катэ алав нинай, важ када тумэнди трэбуй тэ ашэнпэ спокойни и андэ холи тэ на терэн бида. 37 Тумэ кардэ андэ́ лэ манушэн, савэ ни и қандири на опчордэ, ни пала амаро дэл на динэ дума найпативалэс. 38 Ай если о Дими́триё и авэр мастероря камэн варикас андэ варисостэ тэ дошалярэн, тоди исин время* важ о сындо и барэдэра пэ области* — мэк дошалярэн ек еқэс по сындо. 39 Но если тумэ камэн варисо авэр, тоди када трэбуй тэ решыйпэ пэ обычно собрания, сави стидэн и форицки барэдэра. 40 А то через вся када амэн моӷут тэ дошалярэн, кай амэ камас тэ зваздас лэ мирос, важ кода кай амэндэ нинай нисаво право кадя тэ стидаспэ». 41 Посли кадэла алава во всаворэн одмэкля.