Матфеё
17 Через шов дес о Исусо ля пэса лэ Петрос, лэ Иаковос и лэ Иоанос и андярдя лэн по вучо плай. Будэр лэнца нико на сас. 2 Котэ вонэ диқлэ, сар паруделя о Исусо*: лэско муй ля тэ светийпэ, сар о қам, ай и ӥда ашэля кацави парни, кай аж ля тэ хал и яқа, сар ярко свето. 3 И акэ англа лэндэ появисайлэ о Маисеё и о Илья и линэ тэ дэн дума лэ Исусоса. 4 Тоди о Пётро ԥэндя лэ Исусости: «Учителё*, амэнди катэ кадя драго! Давай мэ става катэ трин катуны: ек важ тутэ, ек важ о Маисеё и ек важ о Илья». 5 Пока во дэлас дума, лэн ушарадя ярко туча, и о ӷолосо анда туча ԥэндя: «Када мэрно любимо Шаво, саво уӷодно манди. Ашунэн лэс». 6 Кала и ученикоря ашундэ када, вонэ пэлинэ пэ ԥув тэлэ моса. Вонэ фартэ пэрэдарайлэ. 7 О Исусо пашэля, ляпэ каринг лэндэ и ԥэндя: «Ущен, на́ даран». 8 Вонэ обдиқлэпэ, но никас на додиқлэ — паша лэндэ сас кати о Исусо. 9 Ай кала вонэ змэкэнаспэ па плай, о Исусо приԥэндя лэнди: «Никасти на́ росԥэнэн пала кода, со тумэ диқлэ, пока лэ манушэско Шаво на жундёла».
10 И ученикоря пушлэ лэстар: «Васо и законикоря ԥэнэн, кай спэрва трэбуй тэ авэл о Илья?» 11 Пэ када во ԥэндя: «Чаче, о Илья трэбуй тэ авэл и тэ рий вся, сар сас. 12 Но ԥэнав тумэнди, кай о Илья ужэ авеля, но лэс на ӷатярдэ, ай стердэ андар лэстэ, со камлэ. Кадя и лэ манушэстирэ Шавэсти прижалапэ тэ пэрэандярэл лэндар бида». 13 Тоди и ученикоря полинэ, кай во дэлас дума пала Иоа́но Крестителё.
14 Кала вонэ рисайлэ каринг о народо, лэ Исусостэ пашэля ек мануш, пэля англа лэстэ пэ чанга и ԥэндя: 15 «Учителё*, здик пэ мэрно шаво: лэстэ ипилепсия и лэсти фартэ наймишто. Часто терэлпэ кадя, кай во пэрэл андэ яг или андо паи. 16 Мэ андэм лэс каринг тирэ ученикоря, но лэндэ на вижыля лэс тэ исцэлин». 17 Тоди о Исусо ԥэндя: «Неӷожо миро, савэстэ нинай патяимос! Скати инке мэ тэ авав тумэнца? Скати инке мэ тэ тэрписарав тумэн? Анэн лэс мандэ». 18 О Исусо приԥэндя* лэ найвужэсти тэ вижал анда бэято. О найвужо вижыля, и о бэято сразу ашэля зорало. 19 Тоди, кала паша Исусо нико на сас, и ученикоря поджылэ каринг лэстэ и пушлэ: «Васо амэндэ на вижыля лэс тэ видаравас?» 20 Во ԥэндя лэнди: «Важ кода кай тумэ на допатян. Чаче ԥэнав тумэнди: если тумэндэ авэла патяимос дажэ сар о само цынёнё* зэрницо, тоди тумэ ԥэнэна кадэлэ плаести: „Пэрэжа катар пэ авэр ҭан“, и во пэрэжала, и важ тумэндэ на авэла нисо невозможно». 21 ——*
22 Кала о Исусо лэ учениконэнца сас андэ Галиле́я, во ԥэндя лэнди: «Лэ манушэстирэ Шавэс придэна и отдэна андэ вас лэ манушэнди. 23 Вонэ лэс умарэна, ай по трито дес во жундёла». Кадэлэстар лэ учениконэнди ашэля фартэ ԥарэс по ди.
24 Посли кода сар вонэ авелэ андо Капернау́мо, каринг о Пётро поджылэ и мануша, савэ стидэнас о налоӷо важ и қандири*, и пушлэ: «Ай тумаро учителё потинэл о налоӷо важ и қандири?» 25 Во ԥэндя: «Потинэл». Но кала во зажыля андо цэр, о Исусо пэрво задя дума лэса и пушля: «Сар ту гиндос, Си́мано, пар кастэ и царёря лэн о налоӷо: па пэстирэ шавэ или па чужи мануша?» 26 Во ԥэндя: «Па чужи мануша». Тоди о Исусо ԥэндя лэсти: «Вижал, и шавэ на трэбуй тэ потинэн о налоӷо. 27 Но кай лэндэ тэ на авэл, васо тэ холявэн пар мэндэ, жа каринг и моря и зашув о крючко. И тоди кай о пэрво мащё, саво ту астарэса, андо муй ту виарақэса рупуни манетка*. Вилэ ла и отдэ лэнди важ мандэ и важ пэстэ».