1 Фесалоники
2 Ԥрала, тумэ екжэнэ ӷанэн, кай амэ авелям каринг тумэндэ най евья. 2 Сар тумэ ӷанэн, амэнца тердяпэ бида андэ Фили́пы и котэ амэн мардэ, но о Дэл поможысардя амэнди тэ ашас смили, кай тэ росԥэнас тумэнди лэ Дэвлэстири лащи новость, хоть против амэндэ фартэ звазгляпэ о миро. 3 Амэ дас дума най важ кода, кай на дополас варисо или кай оди амэндэ найвужо, и кадяжэ най важ кода, кай камас тэ обдилярас тумэн. 4 Но екжэно о Дэл домэкэл амэнди тэ росԥэнас и лащи новость, кочай амэ, кала дас дума, старысавас тэ уӷодисарас най лэ мирости, ай лэ Дэвлэсти, саво росполэл, со амэндэ андо ди.
5 Тумэ ӷанэн, кай амэ никала на старысавасас тэ замалисарас тумэн и никала тумэнди на хохавасас, кай варисо тэ затерас пэр тумэндэ. О Дэл потвердия када! 6 И амэ на старысавасас тэ затерас патив англа миро — ни англа тумэндэ, ни англа аврэндэ, хоть амэндэ, сар кай лэ Христостирэ апосталоря, сас право тэ аштярас, кай тумэ лэна тэ потинэн важ вся, со амэнди трэбуй. 7 Но амэ пэстисарасас тумэн, сар и дэй, сави пэстимаса заботийпэ пала пэско цынёнё бэято. 8 Амэ закамлям най кати тэ росԥэнас тумэнди лэ Дэвлэстири лащи новость, но и тэ отдас пала тумэндэ пэстири жызня, важ кода кай амэ глаба пала тумэндэ и тумэ ашэлэ фартэ куч амарэ одести.
9 Ԥрала, тумэ сэрэн, сар дэ бут зор амэ пристас. Кала амэ росԥэнасас тумэнди лэ Дэвлэстири лащи новость, амэ о дес и рят терасас бути, кай екжэнэ тэ затерас пэсти по котор марно и тэ на авас важ тумэндэ покута. 10 Тумэ и о Дэл можэте тэ потвердин, кай, кала амэ самас паша тумэндэ, паша кодэла, ко полэл лэ Дэвлэс, амэ отдям важ тумэндэ пэско ди, старысайлям тэ терас вся правильно и андярдям пэс кадя, кай пала амэндэ тэ на авэл дош. 11 Тумэ драго ӷанэн, кай амэ обжасаспэ тумэнца кадя, сар о дад обжалпэ пэстирэ бэятонэнца: кажнонэсти андар тумэндэ амэ придасас зор, терасас по ди май вушэро и сытярасас. 12 Амэ када терасас, кай тумэ тэ андярэн пэс кадя, сар прижал лэ Дэвлэстирэ манушэнди, саво ақарэл тумэн тэ попэрэн андо Царство и тэ ашэн ашунглэ.
13 Амэ вся и время блаӷодарисарас, кай тумэ, кала ашундэ амэндар о алав лэ Дэвлэстар, прилинэ лэс най сар о алав лэ манушэстар, ай сар о алав лэ Дэвлэстар, саво во исин па чачимастэ. Кадэва алав парувэл и жызня тумэнди, кодэлэнди, ко полэл лэ Дэвлэс. 14 Ԥрала, тумэндэ сас кацави жэ ԥари время, сар и кай и ӷурторя андэ Иуде́я, савэ андярэн лэ Христостири лэ Исусостири время. Тумэ пэрэандярдэ ԥаримос пэстирэ народостар, кадя жэ сар и ԥрала андэ Иуде́я лэ иудеёнэндар, 15 савэ умардэ лэ Барэ Хулас лэ Исусос и лэ Дэвлэстирэ особонэ манушэн, и ӷонинас амэн. Вонэ на уӷодин лэ Дэвлэсти, ай кати терэн всаворэнди вэрыто, 16 кала на мэкэн амэн тэ росԥэнас лэ манушэнди анда авэр народоря, кай кадэла мануша тэ спасынпэ. Кадя вонэ терэн инке май бут бэзэх. Но ӥто о Дэл вишола пэр лэндэ пэстири холи.
17 Ԥрала, кала найпэдолӷонэстэ тумэн залинэ амэндар (хоть лэ одеса амэ самас тумэнца), амэ пристасас вся о зор, кай тэ диқас тумэн, важ кода кай фартэ камасас када. 18 Амэ камлям тэ авас каринг тумэндэ. Мэ, о Па́вло, старысайлэм тэ домардював када най еқвар, ай дувар. Но о Сатана пэрэԥандавэлас амэнди о дром. 19 Пэр кастэ амэ надеисавас, ко амэн радуий или ко амари блаӷословения*, савяса амэ ласа тэ абуросавас англа амаро Баро Хулай о Исусо, кала во рияпэ? Хэба амэ ԥэнас када най пала тумэндэ? 20 Тумэ — амари бах и амари лош.