Римо
5 Акана, кала амэ ашэлям найдошалэ важ кода, кай патяям, терам вся, кай тэ примирисавас лэ Дэвлэса. Када возможно через амаро Баро Хулай о Исусо Христос. 2 Амэ патяс андо Исусо и кочай можэм тэ ашас май пашэ каринг о Дэл и тэ диқас, сар во здиқэл пар мэндэ па пэско баро ковло ди. Амэ ласа тэ лошавас, важ кода кай надеисавас через о Дэл тэ ашас ашунглэ. 3 Амэ ласа тэ лошавас, дажэ кала пэрэандярас и ԥари время, важ кода кай андэ ԥари время сытювас тэ авас састэ. 4 Если амэ ашаспэ састэ, кадя амэ ашас уӷодни лэ Дэвлэсти, если амэ уӷодни лэ Дэвлэсти, тоди можэм тэ надеисавас, 5 если надеисавас, амэ на умэкаса и вас, важ кода кай о Дэл через пэско свынто зор, саво во дя амэнди, сыкадя, кай любий амэн.
6 Кала амэ инке самас би зорэстирэ, о Христос андэ время, сави стодя о Дэл, муля важ лэ бэзэхэстирэ мануша. 7 Здэлпэ, нико на мэрэла пала мануш, саво андэ вся правильно, ай акэ пала мануш, саво терэл лашымос, файма, варико и закамэла тэ мэрэл. 8 Ай о Дэл сыкадя, кай любий амэн, кала о Христос муля пала амэндэ, сар амэ инке самас бэзэхэстирэ мануша. 9 Кочай акана, кала амэ ашэлям найдошалэ через лэ Исусоско рат, амэ можэм тэ патяс, кай через лэстэ спасысаваса лэ Дэвлэстиря холятар. 10 Хоть амэ самас лэ Дэвлэстирэ вороӷоря, амэндэ вижыля тэ поладисарас лэса через кода, кай муля лэско Шаво. И амэ инке май фартэ патяс, кай акана, кала ужэ поладисардям лэса, амэ спасысаваса, важ кода кай о Исусо жундо. 11 Но када инке най вся. Кода, со стердя о Дэл через о Баро Хулай о Исусо Христос, радуий амэн, важ кода кай кати через лэстэ амэндэ вижыля тэ поладисарас лэ Дэвлэса.
12 О бэзэх зажыля андэ люма через ек мануш, ай о бэзэх заандярдя и смэрть. Кадя и смэрть пэрэдяпэ всаворэ́ манушэнди, важ кода кай всаворэ стердэ бэзэх...* 13 О бэзэх зажыля андэ люма, кала инке на сас дино о законо, но и мануша найдошалэ андо бэзэх, если нинай законо. 14 Лэ Адамостар жы каринг о Маисеё и смэрть хулаияс пэ мануша. Вой хулаияс дажэ пэ кодэла, ко на стердя кацаво жэ бэзэх, сар о Адамо. Ай о Адамо шоласпэ пэ кодэва, ко трэбуй сас тэ авэл.
15 Но лэ Дэвлэско лашымос най кацаво, сар лэ Адамоско бэзэх. Бут миро муля через еқэ манушэско бэзэх. Но о Дэл здиқля пар мэндэ па пэско баро ковло ди и дя пэско лашымос, саво амэндэ исин через кода, кай ек мануш, о Исусо Христос, здиқля пар мэндэ па пэско баро ковло ди, и када андя бутэ манушэнди фартэ бут блаӷословении. 16 Исин инке васо лэ Дэвлэско лашымос най кацаво, сар лэ Адамоско бэзэх. Важ ек бэзэх лэ манушэс прижанэн дошалэса, но посли кода, сар бут мануша стердэ бэзэх, лэ манушэс моӷут тэ прижанэн найдошалэса через лэ Дэвлэско лашымос. 17 И смэрть хулаияс через еқэ манушэско бэзэх. Но амэ патяс, кай кодэла, пэр кастэ о Дэл на парашэл тэ здиқэл па пэско баро ковло ди и касти дэл пэско лашымос, лэна тэ жувэн и тэ правин через ек мануш, о Исусо Христос.
18 Важ када, сар через ек бэзэх всаворэ мануша ашэлэ дошалэ, кадя через ек правильно дила со май разни мануша ашэн найдошалэ и моӷут тэ жувэн. 19 И сар ек мануш на кангля и бутэнди пэрэдяпэ о бэзэх, кадя ек мануш кангля и бут ашэна найдошалэ. 20 О законо сас трэбуй, кай тэ сыкавэл, кай и мануша фартэ бэзэхэстирэ. Но кала и мануша стердэ бут бэзэха, инке май драго дицэля, саво дэ баро ди кай о Дэл. 21 О бэзэх ля тэ хулаий, и кадэлэстар бут мануша мулинэ. Но кадя жэ ля тэ хулаий и лэ Дэвлэско баро ковло ди, кала во ля тэ прижанэн лэ манушэн найдошалэнца. Вся када важ кода, кай и мануша тэ жувэн вечно через амаро Баро Хулай о Исусо Христос.