Пистромэ каринг и христиански дада и дэя

Кучутнэ дада и дэя! Тумэ камэн, кай тумарэ бэяцэ тэ полюбин лэ Иеговас и тэ болдён. Сар тумэ можэте тэ поможын лэнди, кай вонэ тэ болдён? Кала вонэ моӷут тэ болдён?

О Иисусо ԥэндя пэстирэ учениконэнди: «Сытярэн лэ манушэн, кай вонэ тэ авэн ученикоря. Болэн лэн» (Матф. 28:19). Анда лэстирэ алава дицол, кай ӷлавно, важ кода кай о мануш тэ болдёл, во трэбуй тэ ашэл лэ Иисусоско ученико. Во трэбуй най кати тэ полэл, сости сытярэл о Иисусо и тэ патял андэ када, но и тэ жувэл кадя. И када моӷут тэ терэн дажэ и бэяцэ.

Андярэн пэс кадя, кай и бэяцэ тэ сытён тумэндар лашимасти, и вся и время сытярэн лэн кодэлэсти, сости сытярэл о Иегова (Втор. 6:6—9). Сытярэн лэ бэятонэн кодэлэсти, со ӷлавно андэ Библия па книжка «Жувэн вечно пэ бахтатэ!». Кадяжэ поможын лэнди тэ погиндон пала библейски принцыпоря и поможын лэ бэятонэнди тэ жувэн пар лэндэ. Сытярэн пэстирэ бэятонэн, кай вонэ най па книжки, ай пэстирэ алавэнца тэ росԥэнэн кода, андэр со вонэ патян (1 Пет. 3:15). Со поможыя лэ бэятонэнди, кай вонэ тэ болдён? Лэнди трэбуй май бут тэ уӷанэн анда Библия. Андэ када лэнди поможыя, кала вонэ екжэнэ изучают и Библия, кала авэн пэ семейно изучения, ай кадяжэ, кала авэн пэ собрании и кала проандярэн и время тумэнца и аврэ христианонэнца, савэ фартэ патян андо Иегова. Поможын лэнди, кай вонэ всегда тэ старыинпэ тэ полэн лэ Иеговас май драго и май фартэ тэ патян лэсти.

Андэ Притчи 20:11 пистромэ: «Лэ шаворэс можно инке тэ полэс, саво во, па лэстири дила, вужэс и найхохавнэс ли во пэс андярэл». Па сави дила можно тэ ӷатярэн лэ бэятос, сар лэ Иисусостирэ ученикос и тэ полэн, кай во ужэ можэт тэ болдёл?

О бэято, саво камэл тэ болдёл, трэбуй тэ кандэл пэстирэ дадэс и ла да (Деян. 5:29; Кол. 3:20). Пала Иисусо, кала лэсти сас 12 бэрш, андэ Библия пистромэ, кай во «на парашэлас тэ кандэл» пэстирэ дадэс и ла да (Луки 2:51). Нащи тэ аштярас, кай о бэято тэ авэл совершэно. Но всаек кодэлэсти, ко камэл тэ болдёл, трэбуй тэ старыийпэ тэ терэл кадя, сар о Иисусо и кай пала лэстэ драго тэ дэн дума авэр.

Ай инке, па бэято трэбуй тэ дицол, кай лэсти чалёл тэ уӷанэн пала кода, со пистромэ андэ Библия (Луки 2:46). Чалёл лэ бэятости тэ авэл пэ собрании и тэ дэл атветоря котэ чи най? (Пс. 122:1). Камэл во чи най кажно дес тэ адиной и Библия и екжэно тэ изучает и Библия? (Матф. 4:4).

О бэято, саво камэл тэ болдёл, по пэрво ҭан андэ пэстири жызня стол лэ Дэвлэско Царство (Матф. 6:33). О бэято полэл, кай важно тэ росԥэнэн пала кода, андэр со во патял, аврэнди. Во участвует андэ разни виды служэния. Во на лажал тэ ԥэнэн лэ учителёнэнди и кодэлэнди, каса сытёл андо ек класо, кай во лэ Иеговаско свидетелё. Кала лэсти дэн и задания пэ собрания «Дром и служэния», во старыийпэ тэ терэл ла драго.

Кадяжэ о бэято трэбуй тэ стол зор, кай тэ на замэлярдёл ни андэ саво найлашимос. Во када терэл, кала старыийпэ тэ на проандярэл и время кодэлэнца, кастар во можэт тэ сытёл лэ найлашимасти (Прит. 13:20; 1 Кор. 15:33). Када дицола, савэ диля во ашунэл, савэ и видео и проӷраммы диқэл, андэ савэ иӷры цэлэлпэ и со диқэл андо интэрнэто.

Бут бэяцэ лэн тэ полэн лэ Иеговас и болдён через кода, кай и дада и дэя стон бут зор. Мэк о Иегова блаӷословий кода, со тумэ терэн, кай тумарэ бэяцэ тэ витидэн тэ служын лэ Иеговасти.

Пистромэ каринг о некрещённо вазвещятелё

Тэ служыс, сар о некрещённо вазвещятелё ла собранияса, када бари бах. Па тири дила дицол, кай ту ужэ май драго полэс лэ Иеговас и камас тэ похвалисарас тут важ када. Ту уӷанглян важ о Дэл, важ кода кай сытёсас па Библия и патяян андэ кода, пала со о Иегова дя алав (Иоан. 17:3; Евр. 11:6).

Можэт англа кода, сар ту залян тэ сытёс па Библия лэ Иеговастирэ свидетелёнэнца, тутэ сас авэр вера. Ай можэт ту совсем на патясас андо Дэл и залэсаспэ кодэлэса, со па Библия нащи. Но важ кода кай ту патяян, ту каисайлян. Тути ашэля фартэ ԥарэс и лажаво пала тирэ ӷрехоря, савэ ту ужэ тердян. Ту паруделян, ту отԥэнделян тэ терэс о найлашимос и камэс тэ терэс драго англа лэ Дэвлэстирэ яқа (Деян. 3:19).

Можэт «жы цынёнестар» ту ӷанэс и Библия. Када фэрисардя тут барэ ӷрехонэндар и ту на лян тэ андярэс пэс, сар и мануша, савэ на полэн лэ Иеговас (2 Тим. 3:15). Ту сытелян тэ на терэс кадя, сар ԥэнэн тирэ ровэсникоря. Кадяжэ сытелян тэ тердёс против кода, со отцырдэл тут лэ Иеговастар. Кай ту патяс андо Дэл, дицол андэ кода, кай ту тэлёс лэ чачунэ Дэвлэсти и росԥэнэс аврэнди, андэр со патяс. Ту ужэ ӷанэс, сар тэ росԥэнэс пала чачимос анда Библия. И акана ту закамлян тэ служыс лэ Иеговасти, сар некрещённо вазвещятелё.

Уӷанглян ту пала Иегова жы бэятостар чи кала вибарелян, акана ту камэс тэ дэс алав лэ Иеговасти тэ жувэс важ лэстэ и тэ болдёс. Када дуй фартэ важни шагоря, кай тэ авэс инке май пашэ каринг о Иегова. Ту дэс алав лэ Иеговасти тэ жувэс важ лэстэ, кала ԥэнэс лэсти андэ молитва, кай камэс вся тири жызня тэ кандэс кати лэс и тэ тэлёс кати лэсти (Матф. 16:24). Тоди, кай тэ сыкавэс, кай ту дян алав лэ Иеговасти тэ жувэс важ лэстэ, ту болдёса андо паи (Матф. 28:19, 20). Кала ту дэс алав лэ Иеговасти и болдёс, ту ашэс лэско служытелё. Када бари бах!

Кала ту сытёсас па Библия, ту уӷанглян, кай тутэ андэ жызня можэт тэ авэл ԥаримос. Сгиндосар, кай посли кода, сар о Иисусо болделя «о духо андя лэ Иисусос андэ пустыня, и котэ о Найвужо ля тэ подмарэл лэс, кай во тэ стерэл бэзэх» (Матф. 4:1). Посли кода, сар ту болделян и ашэлян лэ Христоско ученико, тутэ можэт тэ авэл ԥаримос (Иоан. 15:20). Тиро ери можэт тэ авэл против тутэ (Матф. 10:36). Ай можэт тутар лэна тэ асанпэ кодэла, каса ту сытёс андо ек класо чи кодэла, каса ту пэ бутятэ чи кодэла, ко варикала сас тиро друӷо. Никала на бистэр лэ Иисусостирэ алава, савэ запистромэ андэ Марка 10:29, 30: «О Иисусо ԥэндя: „Чаче ԥэнав тумэнди, нинай ни ек мануш, ко тэ ашадоп важ мандэ и важ и лащи весть пэско цэр, чи ԥралэн, чи ԥэян, чи дэян, чи дадэн, чи бэятонэн, чи маля, и тэ на авелоп лэстэ акана, андэ кадэя время, в сто раз май бут цэра, и ԥрала, и ԥэя, и дэя, и бэяцэ, и маля, и инке, кай лэс тэ ӷонин важ и вера, ай андэ время, сави авэла, тэ авелоп вечно жызня“». Важ када стов вся о зор, кай тэ фэрис тири дружба лэ Иеговаса и тэ жувэс па лэско законо.

Кала ту закамэса тэ болдёс, пала када трэбуй тэ уӷанэн о координаторо совета старейшын. Кай тэ полэн, жувэс ту кадя, сар пистромэ важ кодэла, ко камэл тэ болдёл и старейшыноря диқэнапэ туса, кай тэ подэн дума пала вопросоря, савэ пистромэ май тэлэ. Ту можэш ужэ тэ адинос кадэла вопросоря и тэ гиндос пала лэндэ, кала ту екжэно сытёс па Библия.

Кала ту камэс тэ диқэспэ лэ старейшынонэнца, витидэ время, кай тэ проадинос всаворэ библейски стихоря, савэ катэ пистромэ и тэ погиндос пала лэндэ. Можэт ту закамэса варисо тэ пистрос андэ кадэя книжка чи инке варикай. Кала и старейшыноря лэна тэ дэн дума туса, тутэ можэт тэ авэл ԥэрнади кадэя книжка, кай тэ диқэс кода, со запистросардян. Кала ту лэса тэ ӷотовишся, и варисо на полян, на лажа тэ пушэс пала када кай о мануш, саво сытярэл тут па Библия чи варикастэ анда старейшыноря.

На гиндосар, кай тирэ атветоря трэбуй тэ авэн лунги и ԥарэ. Фэдэр тэ дэс атвето по вопросо просто, ворта и пэстирэ алавэнца. Авелоп драго, кала ту дэс атвето по вопросо, тэ ԥэрнавэс ек чи дуй стихоря, кай тэ доԥэнэс тирэ алава па Библия.

Если ту най фартэ драго полэс, со ӷлавно анда кода, сости сытярэл и Библия, и старейшыноря позаботинапэ, кай тути тэ поможын правильно тэ полэс када и кай ту тэ росԥэнэс пэстирэ алавэнца кода, сости сытярэл и Библия. Ай посли када май интя ту сможэш тэ болдёс.

[Лэ старейшынонэнди андэ собрания. Сар трэбуй тэ проандярэн и встреча кодэлэнца, ко камэн тэ болдён, пистромэ пэ страницы 54—59.]