Пушэн кодэла, ко адинон

Со лэ Иеговастирэ свидетеля гиндон пала сайторя, пэ савэ можно тэ виарақэс пэсти тэрня или тэрнэс?

О Иегова фартэ камэл, кай лэдуй мануша, савэ камэн ери пэсти, тэ авэн бахталэ и никала тэ на розжанпэ (Матф. 19:4—6). Если ту камэс тэ жэниспэ или тэ жас миростэ, сар тэ виарақэс пэсти лащя хулая или хулас? О Иегова амаро Создателё и во ӷанэн, со важ амэндэ авэла май фэдэр. Если ту лэс тэ уӷанэс лэ манушэс, саво тути чалёл, или тумэ ужэ жэнисайлэ и камэн, кай тумаро ери тэ авэл бахтало, тоди тумэнди трэбуй тэ терэн, кадя сар пистромэ андэ лэ Дэвлэско алав андэ Библия. Подам дума пала дэсавэ советоря анда Библия.

Спэрва, амэ трэбуй тэ полас ек важно гиндо анда Библия. Котэ пистромэ: «Кадя, сар хохавэл оди, нико и нисо на хохавэл и оди жала пэ вся» (Иер. 17:9). Кала о шаворо и щеёры лэн тэ общяюца и вонэ лэн фартэ тэ чалён ек еқэсти, тоди ужэ лэнди можэт тэ авэл ԥарэс тэ полэн, саво о мануш па чачимастэ. Важ кода кай лэнго ди можэт тэ хохавэл лэн. И если вонэ на шона сама пэ када, тоди сар вонэ жэнинапэ, лэнди авэла май ԥарэс ек еқэса (Прит. 28:26). Важ када англа кода сар тэ жэниспэ или тэ жас миростэ, трэбуй тэ диқэс най пэ кода, саво во пар пэстэ, ай трэбуй май драго тэ уӷанэс, саво о мануш па чачимастэ.

Андэ Притчи 22:3 ԥэнэнпэ: «Годявэрнэ мануша диқэн и бида и гарадён, ай и найгодявэрнэ жан англэ и попэрэн андэ бида». Дэсавэ мануша полинэ, кай если о мануш родэл пэсти тэрнэс или тэрня андо интэрнэто, тоди када можэт тэ анэн каринг и бида. Кала вонэ лэн тэ диқэнпэ ек еқэса вонэ моӷут тэ полэн, кай кадэва мануш хохавно. Кадяжэ андо интэрнэто дэсавэ мануша терэн спецыально хохавнэ страницы, кай лэн тэ на ӷатярэн, кай тэ вицырдэн лэ манушэндар и ловэ. И дэкала дажэ кацавэ мануша хохавэн, кай вонэ лэ Иеговастирэ свидетеля.

Но акэ инке состар трэбуй тэ фэриспэ. Андо интэрнэто исин кацавэ сайторя, кай варисар виадинон па цыфры, ко касти поджал. Но када хохаимос. Хэба авэла годявэрнэс тэ витидэс пэсти хулая или хулас па варисавэ цыфры? И хэба када авэла фэдэр, чем и советоря анда Библия? (Прит. 1:7; 3:5—7).

Инке андэ Библия исин ек лашо совето, саво запистромэ андэ Притчи 14:15: «Найгодявэрно патял любонэ алавэсти, ай годявэрно обгиндой, со лэла тэ терэл». Кажно мануш англа кода, сар тэ жэнийпэ или тэ жал миростэ, камэл май драго тэ уӷанэн лэ манушэс. Но андо интэрнэто, када тэ стерэс фартэ ԥарэс. Дажэ если тумэ мэклэ, кай во тэ зажал пэ тумари страница и тумэ бут пэрэпистронпэ, хэба можно тэ ԥэнэс, кай тумэ па чачимастэ ӷанэн драго ек еқэс? Часто лэ манушэнди здэлпэ, кай андо интэрнэто вонэ виарақлэ манушэс, саво важ лэндэ май лашо всаворэндар. Но кала вонэ диқэнпэ кадэлэ манушэса па чачимастэ, вонэ полэн, кай када най лэнго мануш.

О псалмопевцо ԥэндя: «Мэ на бэшавас кодэлэнца, ко хохавэл, кодэлэнца, ко гаравэл, саво во исин, на ԥиравас» (Пс. 26:4). Бут мануша на диқэн нисо вэрыто, кай тэ прихохавэн пала пэстэ варисо андо интэрнэто. Дэсавэ бут со на доԥэнэн пала пэстэ. Ай дэко пистрой, кай во лэ Иеговаско служытелё. Но чаче када кадя? Болделя кадэва мануш? Ритярэл во лэ Дэвлэско законо? Лащи лэстэ дружба лэ Иеговаса? Стон пэр лэстэ патив андэ собрания? Или во андярэл пэс кадя, кай лэстар трэбуй тэ дурёс? (1 Кор. 15:33; 2 Тим. 2:20, 21). Ай если кадэва мануш розжыляпэ пэстиря хулаяса или лэ хуласа, тоди исин лэстэ право па Библия упалэ тэ жэнийпэ чи тэ жал миростэ? Тэ уӷанэс пала вся када фартэ важно. Но кай тэ уӷанэс о чачимос пала мануш, савэса общяешся, трэбуй тэ подэс дума лэ ԥралэнца и лэ ԥэянца анда собрания, савэ драго лэс ӷанэн (Прит. 15:22). О мануш, саво кандэл лэ Дэвлэс, никала на жэнияпэ или на жала пала кодэва, ко на служый лэ Иеговасти (2 Кор. 6:14; 1 Кор. 7:39).

Анда вся дицол, кай кала о мануш родэл пэсти тэрня чи тэрнэс андо интэрнэто, када на анэна нисо лашо. Но сар тоди тэ виарақэс кодэлэ манушэс, каса ту прожувэса вся тири жызня? Кай лэ Иеговастирэ свидетеля исин лащи возможность тэ уӷанэн ек еқэс май драго и тэ общяюца пэ собрании, пэ канӷрэсоря, ай кадяжэ вонэ стидэнпэ, кай тэ побэшэн вмести тэ хан и тэ пэн.

Пока амэ нащи тэ стидаспэ вмести через о вирусо, саво жал па вся и люма. Но амэ можэм тэ диқаспэ пэ собрания через о зумо. Кадя амарэ ԥрала и ԥэя моӷут май драго тэ уӷанэн ек еқэс. Вонэ моӷут тэ диқэн, сар о ԥрал или и ԥэй терэл и задании и савэ каминтарии во или вой дэл (1 Тим. 6:11, 12). Посли собрания и ԥрала и ԥэя моӷут тэ общяюца андэ отдельни залоря. Ай инке амарэ ԥрала и ԥэя стидэнпэ па зумо, кай тэ побэшэн, тэ пэн чаё, тэ хан и тэ дэн дума. Тоди кадя тумэ сможэте май бут тэ уӷанэн пала мануш, саво чалеля (1 Пет. 3:4). Тумэ кадяжэ полэна, камэл кодэва мануш тэ терэл важ о Дэл кода жэ со и тумэ, и поджан тумэ ек еқэсти чи най.

Если о шаво камэл тэ жэнийпэ или и щей камэл тэ жал миростэ, тоди вонэ трэбуй тэ полэл, со пала када ԥэнэн о Дэл и тэ терэн кадя, сар во ԥэнэн. Тоди вонэ па чачимастэ авэна бахталэ (Прит. 18:22).