Сар о Руководящё совето терэл дила андэ амарэ деса?

Андо пэрво вико андо руководящё совето слинэ «и апостолоря и старейшыноря анда Иерусалимо». Кадэла набут мануша прилэнас важни ришэнии важ вся христианско собрания (Деяния 15:2). Англа кода, сар варисо тэ витидэн, вонэ розлэнас, со пала када ԥэнэнпэ андэ Писании и терэнас кадя, сар андярэлас лэн лэ Дэвлэско духо (Деяния 15:25). Андэ амарэ деса лэ Иеговастирэ свидетеля терэн кадяжэ.

Во терэл кода, со камэл о Дэл. Важ и памазаникоря, савэ служын андо Руководящё совето, фартэ куч лэ Дэвлэско Алав. Вонэ прожудэ бут бэрша и драго ӷанэн и Библия. Кажно курко вонэ стидэнпэ, кай тэ дэн дума пала кода, со трэбуй важ о баро ери, саво па вся и ԥув. Сар и андо пэрво вико, о Руководящё совето па Библия ԥэнэн лэ ԥралэнди и лэ ԥэянди па вся и ԥув, со и сар тэ терэн. Например, вонэ моӷут тэ бишалэн письмо андэ собрания или о раёно надзирателё можэт пала када тэ росԥэнэн. Важ када андэ лэ Дэвлэско народо всаворэ гиндон и терэн дила, сар ек ери (Деяния 16:4, 5). О Руководящё совето диқэл, кай тэ вимэкэн и библейско литература. Кадяжэ во диқэл пала дила, кай тэ росԥэнэн важ лэ Дэвлэско Царство, и пала кода, кай тэ стон лэ ԥралэн тэ диқэн пала собрания.

Терэл кадя, сар подԥэнэн лэ Дэвлэско духо. И ԥрала, савэ диқэн пала лэ Дэвлэско народо, андэ вся кандэн лэ Иеговас и лэ Иисусос (1 Коринфянам 11:3; Эфесянам 5:23). Кадэла ԥрала на гиндон пала пэстэ, кай вонэ ӷлавни андэ лэ Дэвлэско народо. Вмести аврэ памазаниконэнца вонэ «жан пала Бакроро [Иисусо], каринг бы во тэ на жал» (Откровение 14:4). И ԥрала анда Руководящё совето фартэ цэнин, кала амэ мангаспэ пала лэндэ.

• Ко сас о руководящё совето андо пэрво вико?

• Сар андэ амари время о Руководящё совето терэл кода, со камэл о Дэл?