Мэк и служэния лэ Иеговасти авэла само ӷлавно андэ тумаро ери

1, 2. а) Васо кодэлэнди, ко кати жэнисайля, важно тэ надеинпэ по Иегова? (Псалом 37:3, 4). б) Пала со амэ подаса дума андэ кадэя статья?

ЕСЛИ тумэ найдэлмут жэнисайлэ или кати тидэнпэ тэ цэлэн о ябьяв, то, канешно, тумэ вся и жызня камэн тэ проандярэн вмести. Но всаек андо ери исин пэстирэ трудности, и о хулай и хулаи трэбуй тэ прилэн важни ришэнии. Кодэлэстар, сар тумэ лэна тэ розришын и проблемы, зависит, авэла тумаро ери бахтало чи най. Если тумэ патян лэ Иеговасти, када поможыя тумэнди тэ прилэн мудри ришэнии, тумаро ери авэла май састо, ай тумэ ашэна инке май бахталэ. Но если тумэ на лэна тэ приашундёнпэ каринг лэ Дэвлэстирэ советоря, тоди, можэт тэ вижал кадя, кай тумэ дурёна ек еқэстар и хасарэна и радость, сави тумэндэ сас. (Адиносар Псалом 37:3, 4.)

² Кадэя статья май бут шол сама пэ кодэла, ко кати жэнисайля, но кадяжэ андэр латэ росԥэнэнпэ пала трудности, савэ моӷут тэ авэн андо любо ери. Амэ подаса дума, сости можно тэ сытювас кай и предани лэ Дэвлэстирэ служытеля, пала савэ ԥэнэнпэ андэ Библия. Кода, со пистромэ андэ кадэя статья, поможыя сар андо ери, кадя и андэ вся амари жызня. Кадяжэ амэ подаса дума пала дэсавэ еря, савэ жувэн андэ амари время.

САВЭ ТРУДНОСТИ МОӶУТ ТЭ АВЭН ПОСЛИ ЯБЬЯВ?

3, 4. Савэ трудности моӷут тэ авэн кодэлэндэ, ко кати жэнисайля?

³ Дэсавэ мануша моӷут тэ ԥэнэн кодэлэнди, ко кати жэнисайля, кай вонэ тэ жувэн «сар нармальни мануша». Например, и родителя моӷут фартэ тэ мангэн лэн, кай май ӥто лэндэ тэ авэн внукоря. Или дэкала и друӷоря или родо дэн совето, кай вонэ трэбуй тэ тинэн пэсти цэр, и кай андо цэр лэндэ вся тэ авэл.

⁴ Если кодэла, ко кати жэнисайля, лэна тэ прилэн нэправильни ришэнии, тоди вонэ заӷулена андо вужылимос или полэна кредиторя. Ай кай лэн тэ випотинэн, лэнди прижалапэ май бут тэ терэн бути. Понабут и бути лэла тэ одлэл лэндар кодэя время, сави лэндэ сас пэ лично и семейно изучения и пэ служэния. Если вонэ лэна тэ даран тэ хасарэн и бути или закамэна тэ затерэн май бут ловэ, тоди пэ када лэндэ лэла тэ жал май бут время и вонэ дажэ моӷут тэ промэкэн и собрании. Каринг со вся када анэна? О хулай и хулаи хасарэна и радость, сави авелоп лэндэ, если вонэ тэ отдиноп май бут время андэ служэния лэ Иеговасти.

5. Сости амэ сытювас анда кода, со сас андэ жызня кай о Коля и кай и Марина?

⁵ Дицол, кала важ о мануш само ӷлавно тэ стидэл май бут мищимос, кадэлэстар лэстэ на авэла радость. Када драго полинэ о Коля и Маринаb. Кай посли ябьяв тэ жувэн май драго, вонэ лэдуй линэ тэ терэн пэ бути вся о дес. Но андо ди лэндэ на сас нисави радость. О Коля росԥэнэн: «Амэндэ сас фартэ бут мищимос, дажэ май бут чем трэбуй. Но кай тэ ашас май пашэ каринг о Дэл, амэ нисо на терасас. Чаче тэ ԥэнав, амэ екжэнэ стердям, кай амари жызня тэ авэл май ԥари, и кадэлэстар ашэлэ инке май бут пэрэжывании». Можэт, тумэ тожэ шутэ сама, кай, кала тинэн вся нэво, када на анэн лош. Но дажэ если тумари жызня шолпэ пэ кода, со ԥэндя о Коля, нэ пэрэжывайте. И советоря анда кадэя статья моӷут тэ поможын, кай тумэ тэ парувэн варисо андэ пэстири жызня. Спэрва роздиқаса, сости хула́я моӷут тэ сытён кай о царё Иосафато.

ПАТЯН ЛЭ ИЕГОВАСТИ, САР О ЦАРЁ ИОСАФАТО

6. Сар андярдя пэс о Иосафато андэ ԥари время? (Притчи 3:5, 6).

⁶ Хула́я, можэт, тумэнди дэкала ԥарэс тэ терэн вся, со трэбуй тэ терэл о хулай андо ери. Тоди тумэ сможэте тэ полэн, со сас по ди кай о царё Иосафато. Во трэбуй сас тэ заботийпэ пала вся о народо. Сар лэстэ вижалас тэ терэл кадэя бари дила? Во терэлас вся, со сас па лэско зор, кай тэ фэрий пэстирэ народос. Во стердя, кай и Иудея тэ авэл ӷотово, если варико жала пэр латэ войнаса, и стидя бари армия, андэ сави сас май бут чем 1 160 000 воиноря (2 Лет. 17:12—19). Потом по Иосафато, лэско ери и лэско народо дя бари бида. Против лэндэ вижыля бари армия анда аммонитяноря, моавитяноря и кодэла, ко жувэлас пэ плая Сеиро (2 Лет. 20:1, 2). Со стердя о Иосафато? Во мангля помощь кай о Иегова. Имено пала када и ԥэнэнпэ андо мудро совето анда Притчи 3:5, 6 (адиносар). Андэ 2 Летопись 20:5—12 пистромэ и молитва, сави смирено ԥэндя о Иосафато. Анда лэстирэ алава, савэ во ԥэндя анда вся ди, дицолас, кай во андэ вся надеияспэ пэ пэско любящё небесно Дад. Сар о Иегова дя лэсти атвето?

7. Сар о Иегова дя атвето лэ Иосафатости?

⁷ О Иегова ԥэндя лэ Иосафатости через о левито Яхазиило: «Тердён... и диқэн, сар о Иегова... [спасыя] тумэн» (2 Лет. 20:13—17). Када страно совето важ кацави ситуацыя. Но кадэла алава сас най лэ манушэстар, ай лэ Иеговастар. О Иосафато всаворэ́ одеса патяя пэстирэ Дэвлэсти и стердя кадя. Кала во и лэско народо вижылэ против и вороӷоря, о царё андэ пэстири армия стодя май англал най лэ зоралэ воинонэн, ай кодэлэн, ко дилабэлас лэ Иеговасти и хвалияс лэс. О Иегова зритярдя пэско алав и умардя лэ вороӷонэн (2 Лет. 20:18—23).

8. Сости моӷут тэ сытён и хула́я кай о царё Иосафато?

⁸ Хула́я, тумэ можэте бутэсти тэ сытён кай о царё Иосафато. Тумэнди трэбуй тэ заботинпэ пала пэско ери, и тумэ пристон бут зор, кай тэ фэрин и тэ подритярэн пэстирэ чачен. Кала тумэндэ исин варисаво ԥаримос, тумэ можэте тэ погиндон, кай справинапэ лэса екжэнэ. Но мангас тумэн, сытён тэ надеинпэ най кати пэр пэстэ. Обратинпэ каринг о Иегова андэ пэстирэ молитвы, ай кадяжэ анда ди мангэнпэ вмести ла хулаяса. Мангэн лэ Иеговас тэ сыкавэл тумэнди, со во камэл, и изучайте и Библия и литература, сави вимэкэл лэ Дэвлэстири арӷанизацыя. Ай тоди терэн кадя, сар уӷанглэ. Най всаворэнди моӷут тэ чалён тумарэ ришэнии. Дэсавэ моӷут дажэ тэ гиндон, кай када дилимос. Вонэ моӷут тэ ԥэнэн, кай о ери тэ авэл бахтало, о хулай трэбуй тэ затерэл бут ловэ. Но на бистрэн пала Иосафато. Во надеияспэ пэ пэско Дэл, када дицолас па лэстири дила, и о Иегова на ашадя пэстирэ служытелёс, саво сас лэсти предано. Во на ашавэла и тумэн! (Пс. 37:28; Евр. 13:5). Ай со инке моӷут тэ терэн о хулай и хулаи, кай лэндири жызня тэ авэл бахтали?

МЭК О ИЕГОВА АВЭЛА ӶЛАВНО АНДЭ ТУМАРИ ЖЫЗНЯ, САР КАЙ О ПРОРОКО ИСАЙЯ И ЛЭСТИРИ ХУЛАИ

9. Со амэ ӷанас пала пророко Исайя и лэстири хулаи?

⁹ Само ӷлавно важ о Исайя и лэстири хулаи сас и служэния лэ Иеговасти. Катар амэ када ӷанас? О Исайя сас пророко. И андэ Библия ԥэнэнпэ, кай лэстири хулаи сас пророчица, и, наверно, о Иегова дэлас лати дила, кай вой тэ пэрэдэл лэстирэ алава (Ис. 8:1—4). Вижал, важ о Исайя и лэстири хулаи само ӷлавно андэ жызня сас и служэния лэ Иеговасти. Вонэ розлашо примеро важ и еря андэ амари время!

10. Сар можэт тэ поможый, кай о хулай и хулаи тэ терэн май бут андэ служэния лэ Иеговасти, если вонэ изучают и библейски пророчества?

¹⁰ И еря андэ амари время моӷут кадя жэ, сар о Исайя и лэстири хулаи, тэ пристон бут зор андэ служэния лэ Иеговасти. Если о хулай и хулаи вмести лэна май драго тэ изучают и пророчества анда Библия и тэ диқэн, кай вонэ всегда исполняюца, тоди вонэ лэна май фартэ тэ патян лэ Иеговасти (Титу 1:2)c. Кадяжэ авэла драго, кай о хулай и хулаи тэ погиндон, со лично вонэ моӷут тэ стерэн, кай тэ исполняца кадэла пророчества. Например, ек андар лэндэ, када лэ Иисусостирэ алава: «И лащи новость пала Царство росԥэнэна па вся и ԥув, кай ла тэ ашунэн всаворэ народоря, и тоди авэла конец» (Матф. 24:14). Со май драго вонэ полэна, кай и библейски пророчества точно исполняюца, со май фартэ вонэ закамэна тэ терэн май бут андэ служэния лэ Иеговасти.

СТОН ЛЭ ДЭВЛЭСТИРИ ДИЛА ПО ПЭРВО ҬАН АНДЭ ЖЫЗНЯ, САР О АКИЛА И ПРИСКИЛЛА

11. Сави служэния сас кай о Акила и Прискилла и васо?

¹¹ Лашо примеро важ о тэрно ери, када о Акила и Прискилла, савэ жувэнас андо Римо. Вонэ сас евреёря и, кала ашунглэ и лащи новость пала Иисусо, вонэ ашэлэ христианоря. Лэнди чалёлас лэндири жызня, но потом фартэ ӥто вся паруделя, кала о императоро Клавдиё приԥэндя, кай всаворэ евреёря тэ ужан анда Римо. Погиндон, со када андя важ о Акила и Прискилла. Лэнди прижыляпэ тэ ашавэн пэско цэр, пэстири бути, пэ сави вонэ терэнас и катуны, тэ пэрэладэн андэ авэр форо и бут со инке тэ парувэн андэ пэстири жызня. Сар вся када повлияло по Акила и Прискилла? На вижыля кадя, кай лэ Дэвлэстири дила отжыля по дуйто ҭан андэ лэндири жызня? Наверно, тумэ ӷанэн атветоря пэ кадэла вопросоря. Кала о Акила и Прискилла линэ тэ жувэн андо Коринфо, вонэ всегда служынас ла собранияса и подритярэнас лэ ԥралэн и лэ ԥэян вмести лэ Павлоса. Потом вонэ най еқвар пэрэладэнас андэ разни фороря, кай на хутилэлас кодэлэн, ко росԥэнэнас пала Дэл (Деян. 18:18—21; Рим. 16:3—5). Да, лэндэ па чачимастэ сас интересно и бахтали жызня!

12. Васо важно, кай о хулай и хулаи тэ стон цэли андэ служэния лэ Иеговасти?

¹² И еря андэ амари время моӷут тэ сытён кай о Акила и Прискилла и тэ стон лэ Дэвлэско Царство по пэрво ҭан андэ пэстири жызня. Авелоп драго, кай о шаво и щей, инке кала общяюца, ужэ тэ подэн дума, со авэла ӷлавно андэ лэндири жызня. Если вонэ вмести стон цэли андэ служэния лэ Дэвлэсти и старыинпэ тэ домардён лэн, тоди вонэ домэкэн, кай лэ Дэвлэско свынто духо май фартэ тэ влияет пэ лэндири жызня (Эккл. 4:9, 12). И када драго дицэля андэ жызня кай о Расселло и Элизабет. О Расселло ԥэнэн: «Пала амарэ цэли андэ служэния лэ Иеговасти амэ подям дума инке жы каринг о ябьяв». Ай акэ со ԥэнэн и Элизабет: «Када поможысардя амэнди, кала амэ пожэнисайлям. Кала амэ прилас ришэния, амэ всегда сэрас пала амарэ цэли и на домэкас, кай варисо тэ мишыий амэнди». Блаӷодаря кадэлэсти о Расселло и Элизабет смоӷли тэ пэрэладэн андэ Микронезия, кай на хутилэлас вазвещятелёнэн.

13. Саво лашимос авэла кай о хулай и хулаи, савэ надеинпэ по Иегова? (Псалом 28:7)

¹³ Сар и о Рассело и Элизабет, бут еря ришыли тэ андярэн просто жызня, кай май бут время тэ отдэн андэ служэния лэ Иеговасти и тэ поможын лэ манушэнди тэ ашэн ученикоря. Кала о хулай и хулаи стон цэли андэ служэния лэ Иеговасти и вмести домардён лэн, кадэлэстар лэндэ авэла инке май бут лашимос. Вонэ диқэна, сар о Иегова заботийпэ пала лэндэ, лэна инке май фартэ лэсти тэ патян и авэна кадэлэстар па чачимастэ бахталэ. (Адиносар Псалом 28:7.)

ПАТЯН АНДЭ ЛЭ ИЕГОВАСТИРЭ ОБЕЩЯНИИ, САР О АПОСТОЛО ПЁТРО И ЛЭСТИРИ ХУЛАИ

14. Сар о апостоло Пётро и лэстири хулаи сыкадэ, кай патян лэ алавэнди анда Матфея 6:25, 31—34?

¹⁴ И еря кадяжэ бут сости моӷут тэ сытён кай о Пётро и лэстири хулаи. Посли кода, сар о Пётро пэрво разо диқляпэ лэ Иисусоса, прожыля варикай полӷода или бэрш, и о Иисусо лэсти ԥэндя, кай во тэ ашэл лэско ученико. Кала о Пётро гиндояс, сави ришэния тэ прилэл, во трэбуй сас тэ сэрэл, кай обязано тэ заботийпэ пала ери. Важ када о Пётро сас рыбако (Луки 5:1—11). Но всаек во ришыл тэ ашэл лэ Иисусоско ученико, и када сас годявэрнэс. И, наверно, лэстири хулаи подритярдя лэстири ришэния. Анда Библия дицол, кай посли кода, сар воскрес о Иисусо, вой дэкала жалас лэ Петроса андо баро дром андэ служэния (1 Кор. 9:5). Важ кода, кай вой сас лащи христианка и предано хулаи, кай о Пётро сас муй тэ дэл совето лэ хуланди и лэ хулаянди (1 Пет. 3:1—7). Дицол, кай и о Пётро, и лэстири хулаи, патянас лэ Иеговасти, кай во заботияпэ пала кодэла, ко стол лэско Царство по пэрво ҭан андэ пэстири жызня. (Адиносар Матфея 6:25, 31—34.)

15. Сости амэ можэм тэ сытювас кай о Тьягу и Эстер?

¹⁵ Если тумэ жэнати ужэ най ек бэрш, со тумэнди поможыя и дальшэ тэ терэн бут андэ служэния лэ Иеговасти? Тумэ можэте май бут тэ уӷанэн пала авэр еря. Например, пала кацавэ ԥрала и ԥэя росԥэнэнпэ андэ статьи анда рубрика «Вонэ сас ӷотови тэ отдэн пэс андэ служэния»d. Через кадэла статьи о Тьягу и Эстер, ек ери анда Бразилия, закамлэ тэ пэрэладэн кордэ, кай на хутилэл лэ вазвещятелёнэн. О Тьягу ԥэнэн: «Амэ адиносарасас, сар о Иегова поможый пэстирэ служытелёнэнди андэ амари время. И амэ тожэ закамлям пар пэстэ тэ диқас, сар о Иегова сыкавэла амэнди, со тэ терас, и по особому заботияпэ пала амаро ери». Прожыля время, и вонэ пэрэлаглэ андэ Парагвай и лэ 2014 бэршэстар росԥэнэн пала Дэл лэ манушэнди, савэ дэн дума пэ португальско шыб. И Эстер ԥэнэн: «Амэнди лэдуенди фартэ чалён и алава анда Эфесянам 3:20. Кала служысарас лэ Иеговасти, амэ кажно разо диқас, сар исполняюца кадэла алава андэ амари жызня». Андэ кадэва стихо о Павло ԥэнэн, кай о Иегова «можэт тэ стерэл май бут всаворэстар, пала со амэ мангас». И када бут со доԥэнэн.

16. Ко можэт тэ поможый лэ тэрнэ ерести тэ стол цэли андэ жызня?

¹⁶ И тэрнэ еря моӷут тэ пушэн совето кай кодэла, кастэ исин састи вера. Например, дэсавэ христиански еря ужэ най ек бэрш служын лэ Иеговасти полновремено. Если тумэ гиндон, со тэ стерэн важ о Иегова, васо бы тэ на пушэн лэндар совето? Кадя тумэ сыкавэна, кай надеинпэ по Иегова (Прит. 22:17, 19). И старейшыноря кадяжэ моӷут тэ поможын лэ тэрнэ еренди тэ стон цэли андэ служэния лэ Иеговасти и тэ домардён лэн.

17. Со сас андэ жызня кай о Коля и Марина и сости тумэ анда када сытён?

¹⁷ И всаек дэкала, кай амэ камас май бут тэ терас андэ служэния лэ Иеговасти, вижал най кадя, сар амэ спэрва гиндосарас. Кацаво сас кай о Коля и Марина, пала савэ амэ ужэ дям дума. Через трин бэрш посли ябьяв вонэ пэрэлаглэ андэ Финляндия, кай тэ дэн помощь тэ строин о филиало. Но потом лэнди ԥэндэ, кай вонэ служына котэ кати епаш бэрш. Спэрва через када вонэ умэклэ и вас. Но ӥто лэнди ԥэндэ, кай вонэ моӷут тэ прожан и курсы, кай тэ сытён арабско шыб. И акана вонэ инке май баря радостяса служын андэ авэр страна и росԥэнэн пала Дэл лэ манушэнди, савэ дэн дума пэ арабско шыб. Кала и Марина гиндой, со сас лэндэ андэ жызня, вой росԥэнэн: «Тэ ашавас и лащи жызня и тэ отдас пэс лэ Иеговасти сас фартэ страшно. Но мэ диқавас, кай о Иегова всегда поможый, и дэкала кадя, сар амэ на аштярас. Посли вся када мэ лэм инке май фартэ лэсти тэ патяв». Кода, со сас андэ жызня кай о Коля и кай и Марина, сыкавэл, кай о Иегова обязательно блаӷословия кодэлэн, ко всаворэ одеса лэсти патял.

18. Со поможыя лэ хуласти и ла хулаяти всегда тэ надеинпэ по Иегова?

¹⁸ О брако, када райкано подарко лэ Иеговастар (Матф. 19:5, 6). И во камэл, кай о хулай и хулаи тэ авэн бахталэ (Прит. 5:18). Тэрнэ еря, погиндон, пэр со тумэ тратин пэстири жызня? Терэн тумэ вся, со па тумаро зор, кай тэ сыкавэн лэ Иеговасти пэстири блаӷодарность важ лэско лашимос? Дэн дума лэ Иеговаса андэ молитва, изучайте и Библия, кай тэ виарақэн принцыпоря, савэ поджан андэ тумари ситуацыя, ай тоди терэн кадя, сар уӷанглэ. Патян, если андэ тумари жызня авэла ӷлавно и служэния лэ Иеговасти, тоди вой авэла бахтали и лошали!