Амэ можэм тэ сыкавас пэстири любовь каринг и ԥрала и ԥэя и тэ подружысавас лэнца. Андэ собрания моӷут тэ авэн ԥрала и ԥэя, савэндэ разно характеро и культура. Фартэ важно тэ шас май бут сама пэ лэндирэ лашэ качестворя. Тоди амэ ласа тэ любисарас лэн инке май фартэ. Кала амэ пристас зор, кай лэ Иеговастирэ яқэнца тэ диқас пэ авэр, амэ сыкавас, кай любисарас лэн. Амэнди трэбуй авэла тэ сыкавас и любовь, особено кала авэла и бари бида. Сар о Иегова фэрия амэн, кала вой залэлапэ? Акэ со трэбуй сас тэ терэн лэ Дэвлэстирэ служытеля, кала и мидо-персицко армия дя по Вавилоно: «Зажа, мэрно народо, андэ комнаты, савэ андрэ и ԥандав пала пэстэ и вудара. Гарадю пэ най бари время, пока на прожала и холи» (Ис. 26:20). Здэлпэ, кай кадэла алава пистромэ и важ амэндэ, важ кода кай пашол и бари бида. w23.07 6—7, абз. 14—16

О миро трэбуй тэ ӷанэн, кай амэ блаӷоразумни мануша. Пуш пэстар: «Диқэн авэр, кай мэ блаӷоразумно, на тердював пэ пэско и терпеливо? Или авэр гиндон, кай мэ упрямо, строӷо и никала на жав пэ уступки? Приашундював мэ каринг авэр и, кала када возможно, шав сама пэ кода, со камэн авэр?» Со май бут амэ андярас пэс блаӷоразумно, со май фартэ амэ шаспэ по Иегова и по Исусо. Тэ авэс блаӷоразумно — значит тэ ӷанэс, сар пэс тэ андярэс, кала варисо парудёл. Через када моӷут тэ авэн трудности, пала савэ амэ на гиндосарасас. Например, амэндэ моӷут тэ авэн барэ проблемы лэ зорэса. Ай через кода, со терэлпэ андэ политика и андэ экономика, амари жызня можэт тэ ашэл фартэ ԥари (Эккл. 9:11). Дажэ кала парудёл амари назначения андэ арӷанизацыя, када можэт тэ ашэл важ амэндэ ԥаримос. Тэ присытювас каринг када амэнди поможына штар маменторя: 1) прилэн, кай тумари жызня паруделя, 2) диқэн англэ, 3) гиндон кати пала лашымос и 4) поможын аврэнди. w23.07 21, 22, абз. 7, 8

Кала о Даниило сас тэрноро, лэс залинэ анда лэско форо и ундярдэ андо плено андо Вавилоно. Котэ пэр лэстэ сразу шутэ сама. Всаворэ диқэнас, кай лэ Даниилостэ на сас нисаво недостатко, во сас драго пар пэстэ и сас анда лашо ери. Важ када и вавилоняноря линэ тэ сытярэн лэс, кай во тэ ашэл баро мануш андо дварецо кай о царё (Дан. 1:3, 4, 6; 1 Сам. 16:7). О Иегова любияс лэ Даниилос важ кода, кай кадэва тэрно мануш старыияспэ анда вся оди тэ радуий лэс. Кати погиндон: лэ Даниилости сас кати 20 варисоса бэрш, ай о Иегова ужэ сыстояс лэс кацавэ ашунглэ служытелёнэнца, сар о Ноё и о Иово, савэ бут бэрша предано служынас лэ Дэвлэсти (Быт. 5:32; 6:9, 10; Иов 42:16, 17; Иез. 14:14). О Иегова на парашэлас тэ любий лэ Даниилос вся лэстири долӷо и интересно жызня (Дан. 10:11, 19). w23.08 2, абз. 1, 2