Сас тутэ кацаво, кай спэрва тути камэласпэ тэ адинос и Библия, но кацавэ гиндоря на домэкэнас? Бут мануша гиндон, кай тэ адинон и Библия фартэ ԥарэс. Ай если б ту уӷанглоп, кай и Библия можэт тэ стерэл тири жызня май лащи и кай ту тэ авэс май бахтало? И кай тэ адинос и Библия можэт тэ авэл фартэ интересно? Камэс тэ уӷанэс, со можэт тэ дэл тути и Библия?

Акэ со ԥэнэн дэсавэ мануша, савэ полинэ, кай и Библия можэт тэ стерэл и жызня май лащи.

О Езекилё, савэсти май бут чем 20 бэрш, ԥэнэн: «Раньшэ мэ сымас, сар водителё, саво на ӷанэн каринг ладэл. Но и Библия поможысардя манди тэ полав, каринг со тэ цырдавпэ и сости мэ жував. Андэр латэ исин лашэ советоря пэ кажно дес».

Ек тэрни манушни, савя ақарэн Фрида, ԥэнэн: «Мэ фартэ ӥто вижавас андар пэстэ. Но через и Библия мэ сытелэм тэ ритярав пэс андэ вас. Манди ашэля май вушэро тэ ладисарав аврэнца, и акана мандэ исин май бут друӷоря».

Ай и Евника, савяти май бут чем 50 бэрш, ԥэнэн: «И Библия поможысардя манди тэ парував пэско характеро и тэ ашавав и найлашэ привычки».

И Библия дя помощь кадэлэнди и инке бутэ манушэнди, савэ ла адинон, тэ ашэн па чачимастэ бахталэ. Вой можэт тэ дэл помощь и тути (Исаия 48:17, 18). Вой поможыя тэ прилэс годявэрнэ ришэнии, тэ виарақэс лашэ друӷонэн, тэ улэс пэрэжывании, и со инке май важно, тэ уӷанэс о чачимос пала Дэл. И советоря, савэ андэр латэ пистромэ, жан лэ Дэвлэстар и ту никала нэ пожалееш, кай прилян лэн. О Дэл нэ можэт тэ дэл кацаво совето, саво стерэла амэнди вэрыто.

Трэбуй просто тэ лэс тэ адинос. Со тути андэ када поможыя? И сар тэ стерэс, кай тэ авэл интересно тэ адинос и Библия?

Со поможыя, кай тэ авэл интересно тэ адинос и Библия и кай када тэ анэн лашимос? Роздиқам панч лашэ советоря.

Арак ҭан, кай тути авэла драго тэ адинос. Виарак спокойно лашо ҭан, кай нисо тут тэ на отвлекает тэ адинос. Лашо вудуд и свижо воздухо поможына тути драго тэ гиндос пала кода, со адинос.

Мэк тутэ авэн правильни гиндоря, кала адинос. И Библия, када письмо Кодэлэстар, ко дя амэнди и жызня. Важ када тэ адинос ла трэбуй кадя, сар бэято ашунэл пэстирэ любящёнэ дадэс. Если ту гиндос найдраго пала Библия или тути варисо андэр латэ на чалёл, парув пэстирэ гиндоря, кай о Дэл моӷ тэ сытярэл тут (Псалом 25:4).

Мангпэ англа кода, сар тэ адинос. Андэ Библия запистромэ лэ Дэвлэстирэ гиндоря, важ када, амэнди трэбуй лэстири помощь, кай тэ полас лэн. О Дэл ԥэндя, кай «дэла о свынто духо кодэлэнди, ко мангэл лэс» (Луки 11:13). О свынто духо поможыя тути тэ полэс, сар гиндой о Дэл. Прожала время и о свынто духо дэла май драго тэ полэс «дажэ бари лэ Дэвлэстири мудрость» (1 Коринфянам 2:10).

Кала адинос, гиндосар пала када. На лэпэ тэ адинос фартэ бут, кати важ кода, кай тэ проадинос. Гиндосар пала кода, со адинос. Пуш пэстар. Саво о мануш, пала саво мэ проадиносардэм? Сости мэ моӷу лэстар тэ сытював?

Стов цэли. Кай тэ на гиндос, кай адинос и Библия евья, родэ андэр латэ кода, со стерэла тири жызня май лащи. Акэ савэ цэли ту можэш тэ стос. Май бут тэ уӷанэс пала Дэл. Тэ парудёс андэ лащи риг или тэ ашэс лашэ хуласа или хулаяса. Тоди арак дэсавэ стихоря, савэ поможына тути тэ домардёс кадэла цэлиa.

Кадэла панч советоря поможына тути тэ лэспэ тэ адинос. Но сар тэ стерэс, кай тэ авэл май интересно тэ адинос и Библия? Пала када подаса дума андэ авэр статья.

Тэ адинос и Библия авэла скучно или интересно? Када зависит кодэлэстар, сар ту када лэса тэ терэс. Роздиқам дэсавэ советоря, савэ поможына, кай тэ авэл интересно тэ адинос и Библия.

Витидэ точно и современно переводо. Если андэ книӷа бут алава, савэ ԥарэс тэ полэс или савэ ужэ пуранэ, можэт, тути на авэла интересно ла тэ адинос. Важ када арак кацаво библейско переводо, саво авэла вушэро тэ адинос и кай во тэ лэл лэ одестар. Кадяжэ важно, кай кадэва переводо точно тэ пэрэдэл и гиндоря па ориӷиналоa.

Пользуйся кодэлэса, со исин адес. Адес и Библия исин най кати, сар печатно книӷа, но и андо интэрнэто. И Библия можно тэ адинос онлайн андо интэрнэто или тэ скачаеш пэсти по компьютеро, планшэто или телефоно. Андэ дэсавэ устройства можно ӥто тэ продиқэс авэр библейски стихоря пэ тема, сави тути трэбуй, или тэ сыстос дэсавэ библейски переводоря. Если тути чалёл тэ ашунэс май бут, чем тэ адинос, тоди ту можэш тэ скачаеш и Библия, сави ашунэн. Бут мануша ашунэн и Библия, кала ладэн андо автобусо, ӷуляют или терэн варисави дила. Васо бы тэ на витидэс кода, со тути чалёла?

Используй инструменторя, кала изучаеш и Библия. Кацавэ инструменторя дэна помощь, кай тэ авэл интересно тэ адинос и Библия. Библейски карты поможына тэ виарақэс ҭан, пала саво ту адинос и май фэдэр тэ прецтавиш кода, со адинос. И статьи, например, анда кадэва журнало или анда раздело «Сытярэл и Библия» по сайто jw.org, поможына май фэдэр тэ полэс, со сыкавэл варисаво библейско стихо.

Сытюв по разному. Если тути здэлпэ, кай фартэ ԥарэс тэ проадинос вся и Библия, лэ тэ адинос кодэя библейско книӷа, сави тути май фартэ чалёл. Если ту камэс тэ уӷанэс май бут пала варисаво мануш анда Библия, адиносар кати кодэла библейски стихоря, кай пала лэстэ пистромэ. Андэ када тути дэла помощь и рамка «Уӷан май фэдэр и Библия и лэ манушэн, пала савэ андэр латэ пистромэ». Можэт ту закамэса тэ адинос и Библия па темы или тэ адинос па порядко, андэ сави время, со пала со жалас. Попробуй кадя тэ адинос.

И Библия када нэобычно книӷа. Амаро Создателё запистросардя андэр латэ важ амэндэ советоря (2 Тимофею 3:16). Вой можэт фартэ тэ парувэл тири жызня. Андэ Библия ԥэнэнпэ: «О Алав лэ Дэвлэстар жундо и лэстэ исин зор» (Евреям 4:12). Вой можэт тэ дэл помощь пэ кажно дес. Ай кадяжэ вой поможый май драго тэ уӷанэс лэ Дэвлэс и лэстирэ обещянии (1 Тимофею 4:8; Иакова 4:8).

Дэл помощь андэ жызня. И Библия можэт тэ поможый амэнди андэ разни ситуацыи. И советоря андар латэ дэн помощь акэ андэр со.

• Сар тэ обжаспэ аврэнца (Эфесянам 4:31, 32; 5:22, 25, 28, 33).

• О зор и кода, со по ди (Псалом 37:8; Притчи 17:22).

• Сар пэс тэ андярас (1 Коринфянам 6:9, 10).

• Сар тэ диқас пэ ловэ (Притчи 10:4; 28:19; Эфесянам 4:28)a.

Еқэ ерести анда Азия и Библия поможысардя, кай лэнго ери тэ авэл май састо. Сар и бутэ манушэнди, савэ кати пожэнисайлэ, лэнди сас найвушэро тэ присытён ек еқэстэ и тэ росԥэнэн ек еқэсти, со лэндэ по ди. Но вонэ закамлэ тэ прилэн кода, со проадиносардэ андэ Библия. Сости вонэ сытелэ? О Висенто ԥэнэн: «И библейски советоря поможысардэ манди андэ любовь тэ розлав амарэ проблемы андо ери. Кала амэ лям тэ прилас и советоря анда Библия, амаро ери ашэля май лашо». Лэстири хулаи Аналу ԥэнэн: «Андэ Библия пистромэ пала мурша и жувля, савэ фартэ кандэнас лэ Дэвлэс. Кадэла примероря амэнди фартэ поможысардэ. Акана мэ фартэ лошали андо ери и амэндэ лэдуендэ и цэли еқэндар».

Уӷанас пала Дэл. И Библия поможысардя лэ Висентости и андэ авэр. Во ԥэнэн: «Через и Библия мэ кадя ашэлэм май пашэ каринг о Дэл, сар никала». Анда кода, со ԥэндя о Висенто, дицол, кай и Библия можэт тэ поможый тэ уӷанэс лэ Дэвлэс лэ Иеговас. Если ту лэса тэ адинос и Библия и тэ прилэс и советоря андар латэ, када най кати поможыя, кай тири жызня тэ авэл май лащи, но и тэ ашэс лэ Дэвлэско друӷо. Ту уӷанэса, со о Дэл росԥэнэн пала бахтали время, сави авэла англэ, кай ту авэса тэ радосавэс ла жызняти. И кадэя жызня авэла вечно (1 Тимофею 6:19). Ни ек авэр книӷа на дэла тути кацаво!

Если ту лэса тэ адинос и Библия кажно дес, и лэса тэ приритярдёс кадэлэсти, ту сможэш тэ виарақэс советоря пэ кажно дес и тэ уӷанэс лэ Дэвлэс. Но наверно, кала ту лэса тэ адинос и Библия, тутэ авэна бут вопросоря. Со тоди тэ терэс? Лашо примеро андэ када сыкадя ек баро мануш анда Эфиопия, саво жувэлас варикай 2000 лет палпалэ. Во адинояс и Свынто Писания и бут со на полэлас. Кала лэстар пушлэ, полэл ли во кода, со адиной, во ԥэндя: «Сар мэ полава, если манди нико на росԥэнэна?»b Во лэ одеса приля и помощь лэ Филиппостар, саво сас христианино и саво ӷанэнас драго и Свынто Писания (Деяния 8:30, 31, 34, Смыслово переводо). Если ту тожэ камэс май драго тэ уӷанэс и Библия, ашав и заявка по сайто www.pr2711.com или пистросар пэ ек анда кадэла адресоря, пала савэ пистромэ андо журнало. Лэ ужэ адес тэ адинос и Библия и мэк вой парувэл тири жызня андэ май лащи риг.