И МАНУША мангэнпэ па вся и люма, андэ кажно культура и религия. Вонэ када терэн екжэнэ или стидэнпэ андэ ӷруппа. Вонэ мангэнпэ андэ қандиря, храморя, синагоги, мечети, ай кадяжэ паша святыни. Кай тэ мангэнпэ, вонэ используют найбарэ париндора, чотки, барабаноря, молитвенникоря, масхаря, ай кадяжэ молитвы пэ дощечки, савэ потом амблавэн по особо ҭан.

Анда всаворэ жундэ тварении мангэнпэ кати и мануша. Канешно, машкар жывотни и мануша исин бут со общё. Кадя жэ, сар и жывотни, и мануша трэбуй тэ хан, тэ пэн и тэ ԥурдэн. Вонэ тожэ арқадёнпэ, жувэн и мэрэн (Экклезиаст 3:19). Но тэ мангэнпэ моӷут кати и мануша. Васо?

Если тэ ԥэнас еқэ алавэса, када амэнди фартэ трэбуй. Но, сар дэсавэ гиндон, само ӷлавно, кай через и молитва кай и мануша можэт тэ авэл связь кодэлэса, со исин по нэбо, со важ лэндэ свынто и вечно. Андэ Библия ԥэнэнпэ, кай амэ создани кадя, кай амэн тэ цырдэл тэ уӷанас пала лэстэ (Экклезиаст 3:11). Еқвар о Иисус Христос ԥэндя: «Бахталэ, ко полэн, кай лэнди трэбуй о Дэл» (Матфея 5:3).

Кай лэ манушэнди трэбуй о Дэл, драго сыкавэл кода, кай исин барэ қандиря, мечети, синагоги и разни свынти предметоря. Ай скати время и мануша проандярэн андэ молитва? Канешно, дэсавэ мануша екжэнэ стон пэско зор, кай тэ полэн лэ Дэвлэс или мангэн аврэндар помощь. Но хэба на здэлпэ тумэнди, кай и мануша нэ моӷут тэ дэн кодэя помощь, сави трэбуй? Амэнди часто на хутилэл зор, амэ нэ можэм тэ диқас, со авэла англэ, ай инке амари жызня фартэ ӥто прожал. Кати кодэва, ко пэ бутэстэ май мудро, май зорало и ко жувэл май долӷо амэндар, можэт тэ дэл кода, со амэнди трэбуй. Тоди васо амэ камас тэ полас лэ Дэвлэс и тэ мангаспэ?

Давайте погиндосараса акэ пала со. Сас тумэндэ кацаво, кай тумэнди фартэ трэбуй сас помощь, совето и атветоря пэ вопросоря, савэ, сар здэлпэ, най па лэ манушэндири годи? Камэнас тумэ варикала, кай тумэн тэ подритярэн андэ фартэ ԥари время, кала на ашэля кодэлэс, ко тумэнди куч? Или кай тэ поможын тэ прилэн ришэния андэ ԥари ситуацыя? Или кай тумэн тэ простин важ тумари дош и кадэлэстар тэ авэл май вушэро по ди?

Анда Библия дицол, кай через вся када о мануш можэт тэ лэл тэ мангэлпэ. Анда кадэя книӷа пистромэ чачимос пала молитва и кадяжэ андэр латэ запистромэ, пала со мангэнаспэ бут лэ Дэвлэстирэ мануша. Кала вонэ мангэнаспэ, вонэ камэнас тэ виарақэн помощь, зор, совето, прощения и атветоря пэ со май ԥарэ вопросоря (Псалом 23:3; 71:21; Даниил 9:4, 5, 19; Аввакум 1:3).

Хоть кадэла молитвы сас разни, лэндэ всаек исин варисо общё. Всаворэ, ко мангэнаспэ, ӷанэнас пала кода, со сас фартэ важно, кай лэндирэ молитвы тэ авэн ашундэ, и пэр со адес и мануша на камэн тэ шон сама. Кодэла мануша ӷанэнас, кастэ трэбуй сас тэ взвинпэ андэ молитва.

АВЭНА ашундэ всаворэ молитвы, касти бы амэ тэ на мангаспэ? Бут мануша андэ амари время кадя и гиндон. Кацаво гиндо чалёл кодэлэнди, ко нэ против, кай и мануша анда разни веры тэ поможын ек еқэсти, и ко гиндой, кай всаворэ религии лашэ, хоть андэр лэндэ по разному сытярэн. Чаче када кадя чи най?

Сар ԥэнэнпэ андэ Библия, най всаворэ мануша мангэнпэ лэ чачунэ Дэвлэсти. Андэ библейско время и мануша мангэнаспэ лэ дэвлэнди, савэ вишындэ анда каш. Но о Дэл лэнди най еқвар ԥэнэнас, кай на трэбуй кадя тэ терэн. Акэ со ԥэнэнпэ пала хохавнэ дэвла андо Псалом 115:4—6: «Лэндэ исин кан, но вонэ на ашунэн». Вижал трэбуй ту тэ мангэспэ лэ дэвлэсти, саво тут никала на ашунэла?

Андэ Библия пала кадэя тема бут со росԥэнэнпэ. Например, лэ чачунэ Дэвлэско пророко о Илья ԥэндя лэ Ваалостирэ пророконэнди, кай вонэ тэ мангэнпэ пэстирэ дэвлэсти, ай потом во мангэлапэ пэстирэ Дэвлэсти. О Илья ԥэндя, кай о чачуно Дэл атветит, ай о хохавно най. Тоди лэ Ваалостирэ пророкоря линэ тэ мангэнпэ долӷо и настойчиво и дажэ линэ фартэ тэ цыпин, но вся сас евья! Андэ Библия ԥэнэнпэ: «На сас ни звуко, ни атвето и нико лэн на шолас сама» (1 Царей 18:29). Но ай со сас, кала о Илья мангляпэ?

О Дэл сразу атветил лэ Ильясти и бишалдя па нэбо яг, кай тэ сԥабарэл и жэртва, сави во андя важ лэстэ. Васо о Дэл ашундя лэ Ильястири молитва, ай лэ Ваалостирэ пророконэнди най? Андэ лэ Ильястири молитва, сави запистромэ андэ 1 Царей 18:36, 37, сас ԥэндо варисо фартэ важно. Хоть лэстири молитва и на сас лунго, када варикай 30 алава пэ древнееврейско шыб, андэ молитва о Илья тривар взвисайля каринг о Дэл па алавэстэ Иегова.

О алав Ваало значит «хулай» или «ӷосподино». Во сас дэл важ и хананеёря. Интересно, кай андэ разни ҭана сас пэско Ваало. Но алав Иегова, када особо алав, саво па вся и люма исин кати еқэстэ. О Дэл, каско алав Иегова, ԥэндя пэстирэ народости: «Мэ о Иегова. Када мэрно алав. Мэ на отдава пэстири слава никасти» (Исаия 42:8).

Кала тэлёнас лэ Ваалости, андэ лэстири поклонения кадяжэ ужалас и храмово проституцыя. Инке андэ кадэя поклонения ужалас, кай анэнас лэ манушэн андэ жэртва. Вся када терэлас, кай и мануша тэ римонпэ инке май фартэ. Ай о израильско народо, саво тэлёлас лэ Иеговасти, ашэлас май лашо. И кода, кай вонэ тэлёнас лэ Иеговасти, поможысардя лэнди тэ на терэн и абычаи, савэ гряца важ лэстэ. Акэ погиндосар, ту камэс тэ бишалэс письмо пэстирэ друӷости, пэ саво ту стос бари патив. Пистроса ту спецыально аврэ манушэско адресо и авэр алав, хоть и ӷанэс, кай лэстэ фартэ найлащи дила и тирэ друӷости када фартэ на чалёл? Канешно най.

Кала мангэнпэ лэ Иеговасти, тумэ дэн дума лэ Создателёса. Во Дад лэ манушэнгоa. О пророко Исаия ԥэндя, кай о Иегова амаро Дад (Исаия 63:16). Када кодэва жэ Дад, пала саво ԥэндя о Иисус Христос пэстирэ учениконэнди: «Мэ жав каринг мэрно Дад и тумаро Дад и каринг мэрно Дэл и тумаро Дэл» (Иоанна 20:17). Лэ Иисусоско дад, када о Иегова. О Иисусо мангэласпэ лэсти и во сытярэлас, кай кадяжэ тэ терэн и лэстирэ ученикоря (Матфея 6:9).

Ԥэнэнпэ андэ Библия, кай можно тэ мангаспэ лэ Иисусости, ла Марияти, лэ анӷелонэнди и пэ святыни? Най. Тэ мангаспэ трэбуй кати лэ Иеговасти. Подаса дума пала дуй причины. Пэрво, и молитва ужал андэ кода, кай тэ тэлёс Дэвлэсти, ай андэ Библия ԥэнэнпэ, кай трэбуй тэ тэлёс кати лэ Иеговасти (Исход 20:5). Дуйто, анда Библия амэ уӷанас, кай лэ Дэвлэстэ исин титуло «Кодэва, ко ашунэл и молитвы» (Псалом 65:2). Хоть о Иегова и дэл власть анӷелонэнди и манушэнди, но во никала и никасти на дэла, кай тэ ашунэн амарэ молитвы. Во дэл алав, кай екжэно лэла тэ ашунэл амарэ молитвы.

Если ту камэс, кай о Дэл тэ ашунэл тирэ молитвы, на бистэр и алава анда Библия: «Кажно, ко ԥэнэн лэ Дэвлэско алав, во спасыяпэ» (Деяния 2:21). Но ашунэл о Дэл всаворэ молитвы? Или трэбуй инке пала варисо тэ уӷанас, если камас, кай амарэ молитвы о Иегова тэ ашунэл?

КАЛА дума жал пала молитва, бут мануша гиндон, сар вонэ када трэбуй тэ терэн, тэ бэшэн или тэ тердён. Ай кадяжэ гиндон, савэ алава трэбуй тэ ԥэнэн и кай када тэ сжалпэ лэндиря вераса. Но и Библия поможый амэнди май бут тэ шас сама най пэ кадэла маменторя, ай пэ кода, со май важно. Например: «Сар амэ трэбуй тэ мангаспэ?»

Андэ Библия ԥэнэнпэ пала преданни лэ Иеговастирэ служытеля, савэ мангэнаспэ андэ разни ҭана. Вонэ терэнас када по разному, ко бэшэлас, ко тердёлас, ай варико мангэласпэ инке варисар. Андэ разни ситуацыи, вонэ мангэнаспэ андо гиндо или вслух. Ай инке вонэ мангэнаспэ, кала диқэнас по нэбо или аравэнас о шэро. Вонэ мангэнаспэ анда вся оди и вонэ важ када на лэнас нисави картина, нисавэ чотки андэ вас и нисави книжка, андэ сави запистромэ и молитвы. Тоди сар лэндирэ молитвы о Дэл ашунэлас?

Сар сас ԥэндо андэ статья май англал, кадэла преданни лэ Иеговастирэ служытеля мангэнаспэ кати еқэ Дэвлэсти, лэ Иеговасти. Но исин инке ек маменто. Андэ 1 Иоанна 5:14 ԥэнэнпэ: «И акэ андэр со амэ патяс, со бы амэ тэ на мангас лэ Дэвлэстар, во ашунэл амэн, если мангас кода, со сжалпэ лэстиря времяса». Амарэ молитвы трэбуй тэ сжанпэ лэ Иеговастиря времяса. Со када значит?

Кай тэ мангаспэ кадя, кай тэ сжалпэ лэ Дэвлэстиря времяса, трэбуй тэ ӷанас, со када за время? Кай тэ полас када, трэбуй тэ изучаем и Библия. Сыкавэл када, кай о Дэл амэн на лэла тэ ашунэл, если амэ найдраго ӷанас и Библия? Канешно най. Но о Дэл аштярэл, кай амэ ласа тэ уӷанас лэстири время, тэ стас зор тэ полас ла и тэ терас кадя, сар уӷанглям (Матфея 7:21—23). Кадяжэ амари молитва трэбуй тэ сжалпэ кодэлэса, пала со амэ уӷанглям.

Кала амэ май бут уӷанас пала Иегова и пала лэстири время, амэ лас май фартэ тэ патяс лэсти. Ай када фартэ важно маменто. О Иисусо ԥэндя: «Вся, со бы тэ на мангэн андэ молитва, важ кода кай патян, тумэнди авэла дино» (Матфея 21:22). Кала лэ манушэстэ исин вера, када на сыкавэл, кай во патял кажнонэ алавэсти. Кай и чачуни вера андэ кода, со на дицол, трэбуй тэ авэн доказательства (Евреям 11:1). Например, андэ Библия исин бут со до ԥэнэн, кай о Иегова, савэс амэ нэ можэм тэ диқас, па чачимастэ исин. Во подритярэл амэн андэ любо время и виашунэл и молитвы кодэлэндирэ, ко патял лэсти. Амэ можэм вся время тэ мангас лэ Иеговастар, кай май фартэ тэ патяс лэсти, ай о Иегова радосавэл тэ дэл кода, со амэнди трэбуй (Луки 17:5; Иакова 1:17).

Исин инке ек важно маменто. О Иисусо ԥэндя: «Нико на авэл каринг мэрно Дад па аврятэ, сар кати через мандэ» (Иоанна 14:6). Амэ можэм тэ авас май пашэ каринг амаро Дад, каринг о Иегова, через о Иисусо. Важ када о Иисусо сытярэлас пэстирэ учениконэн, кай вонэ тэ мангэнпэ через лэско алав (Иоанна 14:13; 15:16). Но када на сыкавэл, кай амэ мангаспэ лэ Иисусости. Амэ мангаспэ через лэ Иисусоско алав. Кадя амэ сыкавас, кай блаӷодаря лэсти амэ можэм тэ пашувас каринг амаро совершэно и свынто Дад.

Лэ Иисусостирэ пашутнэ ученикоря еқвар манглэ лэс: «Ӷосподо, сытяр амэн тэ мангаспэ» (Луки 11:1). Канешно, вонэ на пушэнас, сар тэ мангэспэ. Па чачимастэ, вонэ камэнас тэ уӷанэн, пала со трэбуй тэ мангэспэ.

ИСИН кацаво гиндо, кай лэ Иисусостири ашунгли молитва, пэ сави дэкала ԥэнэн лэ Ӷосподостири молитва или Отче наш, и христианоря ԥэнэн со май часто. Но сар бы тэ на авэл, бут мануша полэн ла нэправильно. Милионоря мануша ӷанэн ла наизусть и ԥэнэн ла кажно дес, ай можэт и най еқварэс андо дес. Но о Иисусо на камэлас, кай кадэя молитва тэ ԥэнэн упалэ и упалэ. Катар амэ када ӷанас?

Англа кода, сар о Иисусо тэ ԥэнэн кадэя молитва, во ԥэндя: «Кала мангэнпэ, на ԥэнэн упалэ кодэла жэ алава» (Матфея 6:7). Жылоп о Иисусо против корко пэстэ тэ ԥэндоп, кай и мануша трэбуй тэ висытён наизусть кадэла алава и тэ ԥэнэн упалэ и упалэ? Канешно най! Наоборот, о Иисусо сыкадя, пала со трэбуй тэ мангаспэ. Давайте май драго подаса дума пала кадэя молитва, сави запистромэ андэ Матфея 6:9—13.

«Амаро Дад по нэбо, мэк тиро алав авэл свынто».

О Иисусо ԥэндя пэстирэ учениконэнди, кай трэбуй тэ мангэнпэ лэстирэ Дадэсти, лэ Иеговасти. Ай ӷанэн тумэ, васо лэ Дэвлэско алав кацаво дэ важно и васо во трэбуй тэ авэл свынто?

Инке тоди, кала о Дэл кати создал лэ пэрвонэ манушэн, пэ Дэвлэско свынто алав андярдэ хохаимос. О Сатана, саво жыля против о Дэл, ԥэндя по Иегова, кай во хохавно и ни пала кастэ на гиндой. Ай инке ԥэндя важ о Иегова, кай во правителё, савэстэ нинай право тэ хулаий пэ пэстирэ тварении (Бытие 3:1—6). Бут ко терделя пэ Сатанастири риг. Вонэ линэ тэ гиндон, кай о Дэл жэстоко и можэт тэ рий, если о мануш шылисайля. Ай инке и мануша гиндон, кай лэ Дэвлэс вообще нинай. Авэр мануша жылэ против лэ Дэвлэско алав Иегова, кала улинэ кадэва алав анда Библии и заԥэндэ, кай и мануша тэ на ԥэнэн лэс.

Андэ Библия ԥэнэнпэ, кай о Дэл улэла вся кадэя нэсправедливость (Иезекииль 39:7). Кала о Дэл када стерэла, во дэла лэ манушэнди вся, со лэнди трэбуй. Ай инке во улэла всаворэ проблемы. Сар во када стерэла? О атвето исин андэ кадэя жэ лэ Иисусостири молитва.

«Мэк авэл тиро царство».

Адес и барэ мануша анда веры, савэ сытярэн пала Дэл, по разному полэн, со када лэ Дэвлэско Царство. Но и мануша, савэ ашунэнас лэ Иисусос, ӷанэнас пала кода, со дэлмут росԥэнэнас лэ Дэвлэстирэ пророкоря. Вонэ ԥэнэнас, кай о Христос, савэс витидя о Дэл, правия андо Царство, саво парувэла вся, со исин андэ люма (Исаия 9:6, 7; Даниил 2:44). Кадэва Царство, стерэла, кай лэ Дэвлэско алав тэ авэл свынто, кала доԥэнэна, кай о Сатана хохадя по о Иегова. Кадяжэ кадэва Царство улэла всавори лэ Сатанастири дила и умарэла лэс. Кала лэла тэ правий лэ Дэвлэско Царство, тоди будэр на авэна войны, насвалимос, боқалимос и дажэ смэрть (Псалом 46:9; 72:12—16; Исаия 25:8; 33:24). Кала тумэ мангэнпэ пала кода, кай тэ авэл лэ Дэвлэско Царство, тумэ мангэн, кай всаворэ кадэла обещянии тэ исполняца.

«Мэк тири воля авэла и пэ ԥув, сар по нэбо».

Па лэ Иисусостирэ алава дицол, кай лэ Дэвлэстири воля трэбуй тэ авэл пэ ԥув кадя жэ, сар вой исин по нэбо, кай жувэл о Дэл. Нисо нэ можэт тэ мишыий, кай по нэбо тэ на авэл лэ Дэвлэстири воля. Котэ лэ Дэвлэско Шаво воевал против о Сатана и лэстирэ бэнга и во сшутя лэн пэ ԥув (Откровение 12:9—12). Кадэя трито просьба, сар и дуй авэр, анда лэ Иисусостири ашунгли молитва, поможый амэнди тэ шас сама по само важно. Када пэ Дэвлэстири воля, ай най пэ кода, со амэ камас. Кала терас кадя, сар камэл о Дэл, када анэн лашимос всаворэнди. Дажэ о Иисусо, о совершэно мануш, ԥэндя пэстирэ Дадэсти: «Мэк вся авэл най кадя, сар мэ камав, ай сар камэс ту» (Луки 22:42).

«Дэ амэнди адес марно».

Потом о Иисусо ԥэндя, кай андэ молитва, амэ трэбуй тэ на бистрас и пала пэстэ. Када нармально тэ мангас лэ Дэвлэс пала кода, со амэнди трэбуй по кажно дес. Кацавэ молитвы дэн амэнди тэ на бистрас, кай о Иегова «дэл всаворэнди и жызня, и кай тэ ԥурдэн, и вся со трэбуй» (Деяния 17:25). Андэ Библия росԥэнэнпэ, кай о Дэл, сар любящё дад, савэсти чалёл тэ дэл кода, со фартэ трэбуй лэстирэ бэятонэнди. Но во, сар лашо дад, на лэла тэ дэл пэстирэ бэятонэнди кода, со вонэ мангэн, если диқэл, кай лэнди када на анэна лашимос.

«Простисар амэнди амарэ ӷрехоря».

Па чачимастэ амэ дошалэ англа Дэл? Трэбуй амэнди, кай о Дэл амэн тэ простий? Бут мануша адес на полэн, со када ӷрехо и пэ скати во дэ серьёзно. Но андэ Библия ԥэнэнпэ, кай через о ӷрехо амэндэ всаворэ проблемы, и кай во андярэл каринг и смэрть. Через кода, кай амэнди пэрэжыля о ӷрехо, амэ часто терас нэправильно. Ай кай амэндэ тэ авэл и вечно жызня, пала сави о Дэл дя алав, трэбуй кай о Дэл амэн тэ простий (Римлянам 3:23; 5:12; 6:23). Сар жэ амэн лэн лэ одестар и алава, савэ запистромэ андэ Библия. Котэ ԥэнэнпэ, кай о Иегова добро и ӷотово тэ простий (Псалом 86:5).

«Фэрисар лэ Найлашэстар».

Полэн тумэ, пэ скати трэбуй, кай о Дэл тумэн тэ фэрий? Бут мануша на камэн тэ патян, кай исин о «Найлашо», о Сатана. Но о Иисусо ԥэндя, кай о Сатана па чачимастэ исин и кай во «хулаий всаворя люмаса» (Иоанна 12:31; 16:11). О Сатана фартэ найдраго влияет пэ мануша, савэнца правий. Во фартэ камэл тэ на домэкэл и тут, тэ пашос каринг тиро Дад, Иегова (1 Петра 5:8). Но о Иегова пэ бутэстэ май зорало, чем о Сатана. О Иегова радуийпэ, кала фэрий кодэлэс, ко лэс любий.

Амэ роздиқлям дэсавэ маменторя анда ашунгли лэ Иисусостири молитва. И канешно, када най вся, пала со амэ можэм тэ мангаспэ. Вспомним кода, со ԥэнэнпэ пала Дэл андэ 1 Иоанна 5:14: «Со бы амэ тэ на мангас лэ Дэвлэстар, во ашунэл амэн». Важ када, на трэбуй тэ гиндон, кай тумаро ԥаримос най пэ скати дэ важно, кай тэ мангэн лэ Дэвлэс пала када (1 Петра 5:7).

Ай кала и кай трэбуй тэ мангаспэ?

МОЖЭТ, ту шутян сама, кай важ бут офицыальни религии исин шукарнэ здании, андэ савэ и мануша мангэнпэ андэ кодэя время, сави сас стоди. Ай со ԥэнэнпэ андэ лэ Дэвлэско Алав пала кода, кала и кай трэбуй тэ мангаспэ?

Андэ Библия пистромэ пала ситуацыи, андэ савэ авелоп драго тэ мангаспэ. Например, о Иисусо англа кода, сар вэчэром тэ бэшэл тэ хал пэстирэ учениконэнца, поблаӷодарисардя лэ Дэвлэс андэ молитва (Луки 22:17). Кадяжэ лэстирэ ученикоря мангэнаспэ тоди, кала стидэнаспэ, кай тэ уӷанэн пала Дэл. Кадя, вонэ терэнас, сар сас принято андэ иудейски синагоги и андо Иерусалимско храмо. О Дэл камэлас, кай пэ кадэва храмо «тэ ԥэнэн цэр важ и молитва, саво важ и всаворэ народоря» (Марка 11:17).

Кала лэ Дэвлэстирэ служытеля стидэнпэ и вмести мангэнпэ, лэндирэ молитвы о Дэл можэт тэ ашунэл. Если кай дэсавэ мануша, савэ стидэпэ вмести, ек цэль важ о Дэл и лэндирэ молитвы сжанпэ кодэлэса, со пистромэ андэ Свынто Писания, тоди када уӷодно лэ Дэвлэсти. Через и молитва о мануш можэт тэ закамэл тэ стерэл кода, со май англал на камэлас тэ терэл (Евреям 13:18, 19). Лэ Иеговастирэ свидетеля мангэнпэ пэ кажно христианско собрания. Амэ анда оди ақарас тут, тэ авэс андо Зало Царства, саво май пашэ каринг тутэ. Котэ ту ашунэса кацавэ молитвы.

Но андэ Библия нисо най пистромэ пала кода, кай амэ трэбуй тэ мангаспэ андэ варисаво ек ҭан или андэ варисави ек время. Наоборот, андэ кадэя книӷа пистромэ пала бут случаёря, кала лэ Дэвлэстирэ служытеля мангэнаспэ андэ разно время и андэ разни ҭана. О Иисусо ԥэндя: «Кала мангэспэ, зажа андэ пэстири комната, ԥандав и двэри, мангпэ пэстирэ небеснонэ Дадэсти. И тоди тиро Дад, саво диқэл вся, со терэлпэ чоралэс, дэла лашимос тути» (Матфея 6:6).

Хэба када най райканэс? Ту можэш тэ взвиспэ каринг о Владыка всаворя люмако, андэ любо время. Ту можэш када тэ стерэс котэ, кай никас нинай и точно тэ ӷанэс, кай во тут виашунэла. Най удивительно, кай о Иисусо камэлас тэ ашэлпэ екжэно, кай тэ мангэлпэ! Еқварэс, во вся и рят дя дума андэ молитва лэ Дэвлэса, кай о Дэл тэ поможый лэсти тэ прилэл фартэ важно ришэния (Луки 6:12, 13).

Разни мурша и жувля, пала савэ пистромэ андэ Библия, мангэнаспэ, кала трэбуй сас тэ прилэн важно ришэния или кала лэндэ сас варисаво ԥаримос. Дэкала вонэ мангэнаспэ вслух, ай дэкала андо гиндо. Вонэ мангэнаспэ екжэнэ или вмести варикаса. Само ӷлавно, кай вонэ мангэнаспэ. И о Дэл дажэ ԥэнэн пэстирэ служытелёнэнди: «На парашэн тэ мангэнпэ» (1 Фессалоникийцам 5:17). Во вся и время ӷотово тэ ашунэл кодэлэн, ко андярэл лэстири время. Када сыкавэл, кай во любий амэн и заботийпэ пала амэндэ!

И канешно, адес андэ кадэя люма, кай и мануша родэн пэсти выӷода, бутэнди интересно, сар поможый и молитва. Можэт, ту пушэс: «Поможыя манди и молитва чи най?»

АНЭН и молитва варисави польза? Андэ Библия ԥэнэнпэ, кай да. Кода, кай мангэнпэ лэ Дэвлэстирэ служытеля, савэ на парашэн лэс тэ кандэн, анэн лэнди лашимос (Луки 22:40; Иакова 5:13). И молитва можэт драго тэ влияет пэ амари дружба лэ Дэвлэса и дажэ пэ амарэ гиндоря и пэ кода, со андо ди. Ай кадяжэ драго влияет по амаро зор. Сар када можэт тэ авэл?

Ԥэнаса, тирэ бэятости динэ подарко. Ԥэнэса ту лэсти, кай хутила и кода, кай во тэ авэл андо ди блаӷодарно? Или жэ ту сытярэса лэ бэятос, тэ сыкавэл пэстири блаӷодарность пэ алава и пэ дила? Кала амэ росԥэнас кода, со амэндэ по ди, через када амэ май бут шас сама пэ када. Ай инке амэ ашас май блаӷодарни. Кала амэ дас дума лэ Дэвлэса, амэндэ по ди кацаво жэ. Роздиқам дэсавэ примероря.

Молитвы, андэ савэ блаӷодарисарас. Кала амэ блаӷодарисарас амарэ небеснонэ Дадэс пала вся о лашимос, саво амэндэ исин, амэ май бут шас сама пэ амарэ блаӷословении. Через када, амэндэ можэт тэ авэл инке май бут блаӷодарность и радость, ай о настроё инке май лашо (Филиппийцам 4:6).

Примеро. О Иисусо блаӷодарияс пэстирэ Дадэс важ кода, кай во ашунэл лэстирэ молитвы и атвечает пэр лэндэ (Иоанна 11:41).

Молитвы, андэ савэ мангас прощения. Кала амэ мангас лэ Дэвлэс, кай во амэн тэ простий, кадя амэ инке май драго сытярас пэстири совесть. Амэ инке май фартэ каисавас и инке май драго полас, пэ скати дэ серьёзно о ӷрехо. Кадяжэ, амэ на лас ужэ пэс фартэ андэ варисостэ тэ дошалярас.

Примеро. Андэ молитва о Давидо росԥэнэнас, кай поля пэстири дош, и кай каийпэ анда вся оди (Псалом 51).

Молитвы, андэ савэ мангас руководство и мудрость. Если амэ мангас лэ Иеговас, кай во тэ дэл амэнди мудрость или тэ подԥэнэн, сар тэ прилас правильно ришэния, када поможыя амэнди тэ на заваздас о шэро. Кацавэ молитвы дэн амэнди тэ сэрас, кай най вся па амаро зор и поможын инке май фартэ тэ патяс амарэ Дадэсти, саво по нэбо (Притчи 3:5, 6).

Примеро. О Соломоно на заваздэлас о шэро. Во мангэлас, кай о Дэл тэ дэл лэсти мудрость и руководство, кай тэ правий лэ Израилёса (1 Царей 3:5—12).

Молитвы, андэ кодэя время, кала ԥаримос. Если андэ время, кала амэндэ ԥаримос, амэ росԥэнас лэ Дэвлэсти, пала со пэрэжываем, тоди амэндэ авэла спокойство по ди и амэ ласа тэ надеисавас пэ Дэвлэско зор, ай най пэ пэско (Псалом 62:8).

Примеро. О царё Аса мангэласпэ англа кода, сар трэбуй сас тэ жал пэ война против враӷо, саво пэ бутэстэ май зорало лэстар (2 Летопись 14:11).

Молитвы пала кодэла, касти трэбуй помощь. Кацавэ молитвы поможын амэнди тэ на гиндосарас кати пала пэстэ. Кадяжэ вонэ поможын тэ полас, со аврэндэ по ди и тэ жалуисарас лэн.

Примеро. О Иисусо мангэласпэ пала пэстирэ ученикоря (Иоанна 17:9—17).

Молитвы, андэ савэ хвалисарас. Кала амэ хвалисарас лэ Иеговас важ кода, саво во дэ райкано и важ лэстири дила, амари патив и блаӷодарность ашэл май бари. Кадяжэ, кацавэ молитвы поможын амэнди тэ ашас май пашэ каринг амаро Дэл и Дад.

Примеро. О Давидо анда вся оди хвалияс лэ Дэвлэс важ лэстирэ тварении (Псалом 8).

Кадяжэ через и молитва амэндэ можэт тэ авэл «спокойство андо ди, саво май баро чем всаворэ гиндоря» (Филиппийцам 4:7). Тэ авэл спокойство андэ кадэя нэ спокойно люма, када па чачимастэ блаӷословения, сави исин най всаворэндэ. И молитвы кадяжэ драго влияют по амаро зор (Притчи 14:30). Но можно тэ ԥэнас, кай вся када блаӷодаря кати амарэ зорэсти? Или када блаӷодаря варисости, со май важно?

КАДЭВА вопросо фартэ интересно. Андэ Библия ԥэнэнпэ, кай о Иегова ашунэл и молитвы и андэ амарэ деса. Но ашунэла о Дэл амарэ молитвы чи най, зависит амэндар.

Кала о Иисусо сас пэ ԥув, во сындояс лэ барэ манушэн андэ веры важ лэндирэ молитвы. Васо? Важ кода кай лэндирэ молитвы сас най анда оди. Вонэ мангэнаспэ, кай лэ манушэнди тэ дицол, кай вонэ патян андо Дэл. О Иисусо ԥэндя, кай кадэлэ манушэнди «ужэ динэ лэнго лашимос». Через кадэла алава о Иисусо дя тэ полэн, кай кадэлэ манушэндэ авэла кати кода, со вонэ камэн, када кай и мануша пэр лэндэ тэ шон сама. Но лэндэ на авэла кода, со лэнди трэбуй па чачимастэ, када кай о Дэл пэр лэндэ тэ шол сама (Матфея 6:5). Кадяжэ и адес бут мануша мангэнпэ кадя, сар екжэнэ камэн, ай най кадя, сар о Дэл камэл. О Дэл на ашунэл лэндирэ молитвы, важ кода кай вонэ на шон сама пэ принцыпоря, пала савэ сас пистромэ май англал.

Ай со можно тэ ԥэнас пала тутэ? Ашунэл о Дэл тирэ молитвы и атвечает пэр лэндэ чи най? Када нэ зависит кодэлэстар, сави тутэ нацыя или культура. Андэ Библия пистромэ: «О Дэл на диқэл, сави кай о мануш нацыя. Но андэ кажно народо исин кодэва, ко дарал лэстар и ритярэл лэско законо, ко кадя терэл чалёл лэсти» (Деяния 10:34, 35). Поджан кадэла алава каринг тутэ? Если ту стос патив по Дэл, андярэс лэстири время и на терэс кода, через со лэсти можэт тэ авэл ԥарэс по ди, тоди ту дарас лэ Дэвлэстар. Ту андярэс пэс праведно, если старыиспэ тэ терэс кода, со правильно андэ лэ Дэвлэстирэ яқа, ай най андэ тирэ яқа или инке варикастирэ. Камэс ту, кай о Дэл тэ ашунэл тирэ молитвы? И Библия можэт тути андэ када тэ поможый.

Канешно, бут мануша камэн, кай о Дэл тэ атвечает пэ лэндирэ молитвы через и чуда. Но о Дэл ридко терэлас чудеса дажэ андэ библейско время. Дэкала машкар ек чуда и авэр прожанас фартэ бут бэрша. Кадяжэ андэ Библия пистромэ, кай посли кода, сар мулинэ и апостолоря, чудеса будэр на сас (1 Коринфянам 13:8—10). Тоди сыкавэл када, кай адес о Дэл нэ атвечает пэ амарэ молитвы? Канешно, най! Подам дума пала молитвы, пэ савэ во атвечает.

О Дэл дэл мудрость. О Иегова када кодэва, кастар жал всавори чачуни мудрость. Во анда оди дэл ла кодэлэнди, ко родэл лэстири руководства и камэл тэ жувэл кадя, сар во ԥэнэн (Иакова 1:5).

О Дэл дэл о свынто духо и блаӷословении, савэ исин через лэстэ. О свынто духо, када лэ Дэвлэско зор, через саво во терэл вся. Блаӷодаря кадэлэ зорэсти амэ можэм тэ виритярас любо ԥаримос. О свынто духо можэт тэ дэл спокойство по ди, кала амэ пала варисо пэрэжываем. Ай кадяжэ во можэт тэ поможый амэнди тэ парудювас андэ лащи риг (Галатам 5:22, 23). О Иисусо дя алав пэстирэ учениконэнди, кай о Дэл дэла кадэва духо кодэлэнди, ко мангэл лэс (Луки 11:13).

О Дэл дэл тэ уӷанэн пала лэстэ кодэлэнди, ко родэл лэс. Па вся и люма исин мануша, савэ камэн тэ уӷанэн о чачимос пала Дэл (Деяния 17:26, 27). Вонэ камэн тэ ӷанэн, сар ақарэн лэ Дэвлэс, со во загиндосардя важ и мануша и важ и ԥув, и сар вонэ моӷут тэ авэн май пашэ каринг Лэстэ (Иакова 4:8). Лэ Иеговастирэ свидетеля часто диқэн кацавэ манушэн и анда оди росԥэнэн лэнди пала библейски атветоря пэ кадэла вопросоря.

Можэт, важ када ту и ритярэс кадэя публикацыя андэ вас? Ту родэс лэ Дэвлэс? Возможно, када и исин атвето пэ тири молитва.