Всаворэ ли христианоря чачунэ?

СКАТИ мануша ԥэнэн, кай вонэ христианоря? Сар дицол анда «Атласо па христиански веры», андо 2010 бэрш па вся и люма сас варикай 2,3 милиардоря христианонэн (Atlas of Global Christianity). Котэ жэ ԥэнэнпэ, кай всаворэ вонэ ужан андэ май бут чем 41 000 разни веры и кай кажно андар лэндэ исин пэстирэ учения и кода, сар трэбуй пэс тэ андярэн. Акана понятно, васо дэсавэ мануша, кала диқэн кадя бут разни «христиански» веры, на ӷанэн, со тэ витидэн, и дажэ умэкэн и вас. Вонэ моӷут тэ пушэн: «Чаче ли всаворэ, ко ԥэнэн, кай вонэ христианоря, чачунэ христианоря?»

Роздиқаса примеро. Кала о мануш пэрэладэл и ӷраница, во трэбуй тэ сыкавэл, саво лэстэ ӷражданство. Но када на хутила. Во трэбуй тэ доԥэнэн, кай во па чачимастэ кодэва, пала кастэ пэс видэл, и тэ сыкавэл, например, пэско лил. Кадяжэ о чачуно христианино трэбуй най кати тэ ԥэнэн пала пэстири вера, но во трэбуй тэ сыкавэл, кай во па чачимастэ христианино. Сар када?

О алав «христианино» линэ тэ ԥэнэн варикай андо 44 бэрш лэ И. Х. О Лука, саво пистрояс и Библия, ԥэндя: «Андэ Антиохия, кадя, сар камля о Дэл, пэ ученикоря пэрво разо линэ тэ ԥэнэн христианоря» (Деяния 11:26). Шон сама, кай пэ Иисусостирэ ученикоря ԥэнэнас христианоря. Но ко када лэ Иисусоско ученико? Андо «Нэво международно теологическо словарё важ о Нэво Завето» ԥэнэнпэ: «Тэ авэс лэ Иисусоско ученико, сыкавэл еқварэс и пэ вся и время тэ отдэс вся пэстири жызня» (The New International Dictionary of New Testament Theology). Вижал, чачуно христианино, када кодэва, ко андэ вся пэстири жызня ритярэл лэ Иисусостирэ учении и законоря, савэ во стодя, сар кодэва, кастар жыля о христианство.

Исин ли адес кацавэ машкар кодэла, ко ԥэнэн пэр пэстэ христианоря? Сар амэ можэм тэ ӷатярас чачунэ христианонэн, сар ԥэндя о Иисусо? Давайте роздиқаса анда Библия атветоря пэ кадэла вопросоря. Андэ авэр статьи пистромэ панч маменторя, сар па лэ Иисусостирэ алава, амэ можэм тэ ӷатярас лэстирэ учениконэн. Амэ роздиқаса, сар андярэнас пэс и христианоря андо пэрво вико, и пристаса зор, кай тэ розлас, ко адес андярэл пэс кадя, сар ԥэндя о Иисусо.

«Тумэ ритярдён кодэлэсти, сости мэ сытярав»

«Если тумэ ритярдён кодэлэсти, сости мэ сытярав, тоди тумэ па чачимастэ мэрнэ ученикоря. Тумэ уӷанэна о чачимос и о чачимос дэла тумэнди свобода» (ИОАННА 8:31, 32).

Со када сыкавэл. Кода, сости сытярэлас о Иисусо, сас дино лэсти лэ Дэвлэстар. Во ԥэндя: «О Дад бишалдя ман и ԥэндя, со мэ трэбуй тэ ԥэнав» (Иоанна 12:49). Кала о Иисусо мангэласпэ пэстирэ небеснонэ Дадэсти, лэ Иеговасти, во ԥэндя: «Тиро алав исин чачимос». Кала во сытярэлас, во часто шолас сама по лэ Дэвлэско Алав (Иоанна 17:17; Матфея 4:4, 7, 10). Важ када и чачунэ христианоря ритярдёнпэ кодэлэсти, со ԥэндя о Иисусо. Лэ Дэвлэско Алав важ лэндэ чачимос и ӷлавно, со сыкавэл, сар тэ патян андо Дэл и сар тэ андярэн пэс.

Сар андярэнас пэс и пэрви христианоря. О апостоло Павло, саво бут пистросардя и када ужыля андэ Библия, кадяжэ сар и о Иисусо, столас патив по лэ Дэвлэско Алав. Во ԥэндя: «Всаворэ алава анда Писания лэ Дэвлэстар и вонэ лашэ» (2 Тимофею 3:16). И мурша, савэн стонас, кай тэ сытярэн аврэ христианонэн, трэбуй сас «тэ приритярдён лэ чачунэ алавэсти» (Титу 1:7, 9). Пэрвонэ христианонэнди дэнас совето тэ ашавэн «и мудрость кадэлэ мирости и хохавни и йвутни дума... када ритярдёл пэ традицыи, пэ принцыпоря кадэлэ мирости, ай най пэ кода, сости сытярэл о Христос» (Колоссянам 2:8).

Ко адес кадя терэл? Андэ книӷа пала Католическо қандири сас запистромэ и алава анда книӷа пала лэ Дэвлэстири Откровения, сави прилинэ андо Ватикано андо 1965 бэрш. Котэ ԥэнэнпэ: «И католическо қандири, савяти динэ тэ росԥэнэн и тэ полэн и Откровения, „ашэл уверенно андэ кода, со сас ԥэрнадо най кати через и Свынто Писания. Важ када пэ Писания и пэ учении, савэ пэрэдэнас алавэнца, трэбуй тэ стон бари патив еқэндар“». Андо журнало «Маклинз» сас запистромэ алава еқа жувляти, сави служыяс андэ қандири андо Торонто (Канада). Вой ԥэндя: «Сости тэ терэс кадя, сар сас ԥэндо варикай дуй тысячи бэрш палпалэ?». Амэндэ екжэнэндэ исин райканэ идеи, сар варисо тэ терас, но вонэ ашэн нисо важ кода, кай амэ вся и время шас сама по Иисусо и пэ Писания».

Ай пала лэ Иеговастирэ свидетеля андэ «Нэви католическо инцыклапедия» пистромэ: «Важ лэндэ и Библия, када ӷлавно, пэр со вонэ шон сама, кала витидэн, андэр со тэ патян и сар пэс тэ андярэн». Найдэлмут ек мурш андэ Канада пэрэмардя и дума еқа жувляти, сави сас лэ Иеговаско свидетелё и задя дума лэса. Во сыкадя пэ латири Библия и ԥэндя: «Мэ полэм ко ту па тири визитно карточка».

«Вонэ на шонпэ пэ мануша анда кадэя люма»

«О миро ля тэ вэрыцый лэн, важ кода кай вонэ на шонпэ пэ мануша анда кадэя люма» (ИОАННА 17:14).

Со када сыкавэл. О Иисусо на шоласпэ пэ мануша анда кадэя люма, во на залэлас никастири риг, машкар и мануша и машкар власти. О Иисусо ԥэндя: «Тэ авелоп мэрно Царство анда кадэва миро, тоди мэрнэ ученикоря мардопэ, кай ман тэ на отдэн лэ иудеёнэнди. Но най, мэрно Царство най катар» (Иоанна 18:36). Кадяжэ о Иисусо ԥэнэнас пэстирэ учениконэнди, кай вонэ тэ дурён кодэлэстар, кай тэ гиндон, тэ дэн дума и тэ андярэн пэс кадя, сар на чалёл лэ Дэвлэсти (Матфея 20:25—27).

Сар терэнас и пэрви христианоря. О Джонатано Даймандо, саво пистрояс пала веры, ԥэндя, кай и пэрви христианоря «отԥэндёнас тэ жан пэ война, со бы лэнди пала када тэ на авэл, дажэ если ԥэнэнас найлашэ алава, бэшарэнас андо баруно или умарэнас». Вонэ сас ӷотови тэ пэрэандярэн о ԥаримос, кай тэ на залэн никастири риг андэ политика. Кадяжэ вонэ на шонаспэ пэ авэр андэ кода, кай андярэнас пэс вужэс. О апостоло Павло ԥэнэнас христианонэнди пала кодэла, ко на патянас кадя, сар вонэ: «И акана вонэ удивинпэ, кай тумэ будэр на жан вмести лэнца билажавардэ дромэса и дэн дума пала тумэндэ найдраго» (1 Петра 4:4). О историко Вило Дюренто пистросардя, кай и христианоря «ритярэнас лэ Дэвлэско законо и андярэнас пэс вужэс и кадэлэса холярэнас лэ манушэн, савэ любинас развличении и тэлёнас лэ хохавнэ дэвлэнди».

Ко терэл кадя адес? Андэ «Нэви католическо инцыклапедия» ԥэнэнаспэ пала кода, кай и христианоря на залэнас никастири риг андэ политика: «Кала и мануша отԥэндён тэ жан пэ война, важ кода кай патян андо Дэл, када най оправдания». Андэ ек ӷазета андэ Швейцария пистромэ пала кода, со ԥэндя ек арӷанизацыя «Права африканцев», сави зашоласпэ пала кода, со трэбуй лэ манушэнди. Кала андо 1994 бэрш андэ Руанда умарэнас цыло нацыя, андэ када «участвовали всаворэ қандиря, кроме лэ Иеговастирэ свидетеля» (Reformierte Presse).

Ек учителё ԥэндя, кай, кала и фашысторя умарэнас разни нацыи, «ни ек ӷруппа или арӷанизацыя анда прости мануша на жыля против хохаимос, бари жэстокость и кай умарэнас лэ манушэн». Во ля тэ розуӷанэн пала када май бут андо Американско музеё, андэ саво росԥэнэнпэ, со сас андэ кодэя время. Тоди во пистросардя: «Акана мэ ӷанав о чачимос». Котэ во уӷангля, кай лэ Иеговастирэ свидетеля састэс приритярдёнас кодэлэсти, андэр со патянас, хоть лэнца и обжанаспэ фартэ жэстоко.

Ай со можно тэ ԥэнас пала кода, сар вонэ пэс андярэн? Андо журнало «Ю.С. католик» сас пистромэ: «Адес, бут мануша анда тэрнэ католикоря нэ соӷласни кодэлэса, сости сытярэл и қандири пала кода, кай о мурш и жувли нащи тэ жувэн вмести жы каринг о ябьяв». Котэ кадяжэ пистромэ и алава лэ манушэстирэ, саво служый андэ қандири: «Мэ шутэм сама, кай фартэ бут жувля и мурша жувэн вмести жы каринг о ябьяв». Ай андэ «Нэви британско инцыклапедия» пистромэ, кай лэ Иеговастирэ свидетеля «ԥэнэн, кай трэбуй тэ ритярэн лэ Дэвлэско законо пала билажавардимос».

«Любин ек еқэс»

«Мэ дав тумэнди нэво законо, любин ек еқэс. Сар мэ любисарав тумэн, кадя и тумэ любин ек еқэс. И кала машкар тумэндэ авэла любовь, всаворэ ӷатярэна, кай тумэ мэрнэ ученикоря» (ИОАННА 13:34, 35).

Со када сыкавэл. О Христос ԥэндя пэстирэ учениконэнди, кай вонэ тэ любин ек еқэс кадяжэ, сар во любияс лэн. Ай сар о Иисусо любияс пэстирэ учениконэн? Лэстири любовь сас май бари чем о гиндо андэ кодэя время, кай и жувли най мануш, ай и чужи народоря нисо на ашэн. (Иоанна 4:7—10). О Иисусо фартэ любияс аврэн и важ када во на жалуияс пэстири время и о зор, кай тэ дэл помощь лэнди (Марка 6:30—34). Кадяжэ о Иисусо сыкадя со май бари любовь, во ԥэндя: «Мэ, лашо пастухо. Лашо пастухо отдэл пэсти жызня важ пэстирэ бакрорэ» (Иоанна 10:11).

Сар терэнас и пэрви христианоря. И христианоря андо пэрво вико ԥэнэнас ек пэ ек ԥрала и ԥэя (Филимону 1, 2). Важ кода кай вонэ гиндонас кай нинай различия машкар иудеё и ӷреко, важ кода кай ек Дэл англа всаворэ. Вонэ анда вся оди прилэнас андэ пэстирэ собрании лэ манушэн анда всаворэ народоря (Римлянам 10:11, 12). Посли Пятидесятница андо 33 бэрш лэ И. Х. и ученикоря андо Иерусалимо «битинэнас пэско хабэ и ԥув и розделинас кадэла ловэ машкар всаворэ, ко андэр со нуждался». Пэрсо? Кай кодэла, ко найдэлмут болделэ моӷли тэ ашэнпэ андо Иерусалимо и май драго тэ сытён кодэлэсти, сости сытярэн и апостолоря (Деяния 2:41—45). Васо кадэла христианоря кадя терэнас? Варикай через 200 бэрш сар мулинэ и апостолоря о Тертуллиано запистросардя, со ԥэнэнас пала кадэла христианоря: «Сар вонэ любин ек еқэс... кай ӷотови дажэ тэ мэрэн ек пала аврэстэ».

Ко терэл адес кадя? Андэ книӷа «История упадка и разрушения Римской империи», сави вимэклэ андо 1837 бэрш, сас пистромэ, кай важ бут бэрша кодэла, ко ԥэнэнас пэр пэстэ христианоря, «стердэ ек аврэсти май бут найлашимос, чем виритярдэ кодэлэндар, ко сас нэверующи». Ай найдэлмут андэ США проандярдэ исследования и полинэ, кай и религиозни чуства, бутэ манушэндирэ, савэ ԥэнэн, кай вонэ христианоря, фартэ сԥанглэ кодэлэса, кай вэрыцын лэ манушэн анда авэр нацыи. Обычно и мануша анда ек вера, савэ жувэн андэ разни страны, на гиндон ек пала ек и важ када нэ моӷут или на камэн тэ дэн помощь, кала авэр нуждаюца.

Кала андо 2004 бэрш пэ Флорида важ дуй шон сжылэ штар ураӷаноря, о председателё Камитета па чрезвычайни ситуацыи андо штато Флорида закамля тэ продиқэл, правильно ли используеца и помощь, сави дэл о Камитето. Во ԥэндя, кай ни ек авэр арӷанизацыя на терэл кадя дэ драго, сар лэ Иеговастирэ свидетеля. Во дажэ ԥэндя, кай и Свидетеля тэ лэн вся, со лэнди трэбуй. Май англал андо 1997 бэрш, кала андэ Демократическо Республика Конго сас бида, и добровольцоря анда лэ Иеговастирэ свидетеля андэ хамос, драба и ӥда пэстирэ ԥралэнди па вера и аврэ манушэнди. Андэ кодэя время лэ Иеговастирэ свидетеля анда европейски страны стидэ вся, со трэбуй лэ манушэнди, и пэ ловэ када вижыля варикай милионо долларов США.

«Мэ дэм лэнди тэ ӷанэн, сар тут ақарэн»

«Мэ росԥэндэм важ тиро алав лэ манушэнди, савэн ту дян манди анда миро. [...] Мэ дэм лэнди тэ ӷанэн, сар тут ақарэн и инке дава тэ ӷанэн» (ИОАННА 17:6, 26).

Со када сыкавэл. О Иисусо дэлас тэ ӷанэн лэ Дэвлэско алав, кала росԥэнэнас пала лэстэ андэ служэния. Кала о Иисусо адинояс и Свынто Писания, ай во када терэлас часто, во ԥэнэнас лэ Дэвлэско алав (Луки 4:16—21). Во сытярэлас пэстирэ учениконэн тэ мангэнпэ: «Дад, мэк тиро алав авэл свынто» (Луки 11:2).

Сар терэнас и пэрви христианоря. О апостоло Пётро ԥэндя лэ старейшынонэнди андо Иерусалимо, кай о Дэл стидя лэ манушэн анда разни нацыи «важ пэско алав» (Деяния 15:14). И апостолоря и авэр христианоря росԥэнэнас, кай «кажно, ко ақарэл лэ Иеговас па алавэстэ, спасыяпэ» (Деяния 2:21; Римлянам 10:13). Кадяжэ вонэ использовали лэ Дэвлэско алав андэ пэстирэ письморя. Андэ иудейско сборнико законав, саво сас стидо андо 3 вико лэ И. Х., сас пистромэ, со тэ терэн если и христиански писания лэна тэ ԥабон: «И Евангелия и книӷи, савэ пренадлежын ми́нам [возможно, лэ христианонэнди анда евреёря], на спасын ла ягатар, но ашавэн тэ ԥабон вмести лэ Дэвлэстирэ алавэса, саво исин андэр лэндэ».

Ко терэл адес кадя? Каринг ек библейско переводо, саво сас одобрено кай о Национальныо совето андэ лэ Христостирэ қандиря андэ США, пистромэ: «Парашэлэ тэ ԥэнэн о алав, саво исин кати кай о единственно Дэл, важ кода кай ԥэнэса исин авэр дэвла, савэндар лэс трэбуй отличать. Кадэва алав парашэлэ тэ ԥэнэн андо иудаизмо, сар инке на сас о христианство и кадэва алав совсем на приашэл важ вселенско вера кай и Христианско Қандири» (Revised Standard Version). Важ када лэ Дэвлэско алав парудэ по титуло «Господь». Ай най дэлмут сас указания важ и рашая андо Ватикано, котэ ԥэнэнаспэ: «Андэ диля и молитвы лэ Дэвлэско алав сар тетраграмматоно ЙХВХa нащи тэ используют или тэ ԥэнэн».

Ко андэ амарэ деса использует и ԥэнэн лэ Дэвлэско алав? Кала о Серёжа сас подростко и жувэлас андэ Киргизия, во диқля фильмо, андо саво ԥэнэнас лэ Дэвлэско алав, Иегова. Посли када варикай 10 бэрш во на ашунэнас лэ Дэвлэско алав. Потом о Серёжа пэрэлагля андэ США, котэ лэсти авелэ лэ Иеговастирэ свидетеля и сыкадэ лэсти лэ Дэвлэско алав андэ Библия. Во сас фартэ радо, кай арақля манушэн, савэ ԥэнэн лэ Дэвлэско алав, Иегова. Интересно, кай андо «Трито издания нэво международно словарё Уэбстера» андэ статья «Иегова Дэл» акэ со пистромэ пала кадэва алав: «Верховно божэство, саво прижанэн, и единственно божэство, савэсти тэлён лэ Иеговастирэ свидетеля».

[Сноска]

«Кадэя лащи весть пала Царство росԥэнэна»

«Кадэя лащи весть пала Царство росԥэнэна па вся и ԥув, кай тэ уӷанэн всаворэ народоря, и тоди авэла конец» (МАТФЕЯ 24:14).

Со када сыкавэл. О Лука пистросардя, кай о Иисусо «жыля па гава и фороря, тэ росԥэнэн пала радосно новость важ лэ Дэвлэско Царство» (Луки 8:1). Ай екжэно о Иисусо ԥэндя: «Мэ трэбуй тэ росԥэнав и лащи новость пала лэ Дэвлэско Царство и андэ авэр фороря, важ кода кай ман пала када и бишалдэ» (Луки 4:43). Во бишалдя пэстирэ учениконэн тэ росԥэнэн и лащи весть па фороря па гава, ай май позжэ приԥэндя лэнди: «Тумэ авэна мэрнэ свидетеля... жы кай само дурутнэ ҭана пэ ԥув» (Деяния 1:8; Луки 10:1).

Сар терэнас и пэрви христианоря. Лэ Иисусостирэ ученикоря сразу жэ линэ тэ терэн кода, со во приԥэндя. Вонэ «кажно дес андо храмо и па цэра... на парашэнас тэ сытярэн и тэ росԥэнэн лащи новость, кай о Иисусо, када Христос» (Деяния 5:42). Росԥэнэнас всаворэ христианоря, ай най кати и избранни. О историко Августо Неандеро ԥэндя, кай «о Цельсо, пэрво, ко пистросардя, кай против христианства... [приасаласпэ] кодэлэстар, кай и шерстобитчикоря, сапожникоря, валяльщикоря, и сами ӷруби мурша анда вся оди росԥэнэнас и евангелия». О Жано Бернарди пистросардя андэ книӷа «Ранние века церкви»: «[Христианоря] трэбуй сас тэ жан и тэ дэн дума всаворэнца. Пэ барэ дрома и андэ фороря, пэ площади, кай бут мануша и андэ цэра. Кай лэн камэн и кай на камэн [...] ...Жы кай и краёря ԥув» (Les Premiers Siècles de L’Église).

Ко терэл кадя адес? Английско рашай Дейвидо Уотсоно пистросардя: «Ек анда причина васо и мануша хасардэ интересо кай и вера, када, кай и қандиря най серьёзно относяца каринг пэстири обязанность тэ росԥэнэн и тэ сытярэн». Андэ пэстири книӷа «Почему католики уходят из церкви?» О Хосе Луис Перес Гвадалупе, пистрой пала кода, со терэн и евангелисторя, адвентисторя и авэр веры, во ԥэндя, кай «вонэ на ԥирэн па цэра». Ай пала лэ Иеговастирэ свидетеля во пистросардя: «Вонэ на промэкэн тэ ԥирэн тэ росԥэнэн па цэра» (¿Por qué se van los Católicos?).

Андо журнало, андо саво пистрон само важни решения, савэ виандярдя о Верховно сындо США, сас пистромэ интересно и чачуно выводо, саво стердя о Джонатано Терли. Котэ пистромэ: «Стоит кати тэ ԥэнас пала лэ Иеговастирэ свидетеля и бутэнди сразу вспоминаюца и мануша, савэ росԥэнэн важ о Дэл и авэн нэ вовремя амэндэ цэрэ. Важ лэ Иеговастирэ свидетеля тэ росԥэнэн важ о Дэл па цэра, када лэндири вера, ай най просто способо кай и мануша тэ авэн андэ лэндири вера» (Cato Supreme Court Review, 2001-2002).

[Рамка]

Пэр кастэ вся када сыкавэл?

Андэ кадэла панч статьи амэ роздиқлям, со ԥэнэнпэ андэ Библия пала чачунэ христианоря, сар па тирятэ, ко пэр лэндэ шолпэ? Хоть исин фартэ бут веры, савэ ԥэнэн, кай вонэ христианоря, сэрэн, со ԥэндя о Иисусо пэстирэ учениконэнди: «Най кажно, ко ԥэнэн манди: „Ӷосподо, Ӷосподо“, зажала андо Царство, саво по нэбо, ай кати кодэва, ко терэл, со камэл мэрно Дад, саво по нэбо» (Матфея 7:21). Если тумэ арақэна кодэлэн, ко терэн кода, со камэл о Дад, кодэлэн, ко шонпэ пэ чачунэ христианоря, и присоедининапэ лэндэ, то тумэндэ авэна вечни блаӷословения тала лэ Дэвлэско Царство. Арак лэ Иеговастирэ свидетелёс, саво дя тути када тэ проадинос, кай тэ уӷанэс май бут пала лэ Дэвлэско Царство и пала блаӷословения, савэ во анэна (Луки 4:43).