Тэрнэ ԥрала, терэн вся, кай тумэндэ тэ авэл лащи дружба лэ Иеговаса

1. Со трэбуй тэ терэл кажно ԥрал андэ собрания?

О АПОСТАЛО Павло ԥэндя лэ коринфянонэнди: «Ԥрала, кала трэбуй тэ росполэн, на авэн, сар бэяцэ. ...Авэн взросли, кала варисо трэбуй тэ полэн» (1 Кор. 14:20). Кадэла алава поджан каринг всаворэ мурш андэ христианско собрания. О мануш, савэстэ лащи дружба лэ Иеговаса, жувэл па лэ Дэвлэско законо и андэ пэстири жызня вся и время прилэл лэ Дэвлэстирэ принцыпоря (Луки 2:52). Васо лэ тэрнэ ԥралэнди трэбуй тэ старыинпэ тэ авэн кацавэ?

2, 3. Васо лэ тэрнэ ԥралэсти трэбуй тэ пристол о зор, кай тэ авэл састи дружба лэ Иеговаса?

² Кай о мурш андо ери и андэ собрания исин бут обязаности. Тэрно ԥрал, наверно, ту гиндос пала кода, со авэла англэ, саво ту авэса? Возможно, тутэ исин цэль тэ авэс пианероса или помошнико андэ собрания, ай тоди тэ служыс сар барэдэр ԥрал. Можэт ту закамэса тэ жэниспэ и кай тутэ тэ авэн бэяцэ (Эф. 6:4; 1 Тим. 3:1). Если ту витидэса варисо анда када, тутэ появинапэ нэвэ обязаности. Кай лэн тэ стерэс, тутэ трэбуй тэ авэл састи дружба лэ Иеговасаb.

³ Со поможыя, кай тутэ тэ авэл састи дружба лэ Иеговаса? Трэбуй, кай тутэ тэ авэл характеро, саво чалёл лэ Дэвлэсти, и тэ ӷанэс тэ терэс кода, со приӷодияпэ андэ жызня. Подаса дума пала када май драго.

СО ТЭ ТЕРЭС, КАЙ И ДРУЖБА ЛЭ ИЕГОВАСА ТЭ АВЭЛ МАЙ САСТИ?

4. Кай ту можэш тэ арақэс лашэ примероря, кастар тэ сытёс? (Диқэн кадяжэ и картинка.)

⁴ Витидэ, кастар можэш тэ сытёс лашымасти. Андэ Библия росԥэнэнпэ пала бут мурша, савэ любинас лэ Иеговас и заботинаспэ пала лэско народо. Вонэ ашэн, кай лэндар тэ сытёс. Ай инке ту можэш тэ сытёс кай и христианоря андэ собрания или кай пэстирэ чаче, кастэ састи дружба лэ Дэвлэса (Евр. 13:7). Но со май лашо примеро важ амэндэ сыкавэл о Иисус Христос (1 Пёт. 2:21). Погиндосар, со тути чалёл андо характеро, саво исин кай кадэла мурша, и старысав тэ терэс кадя, сар вонэ (Евр. 12:1, 2).

5. Со поможыя тути тэ гиндос кадя, сар о Иегова, и васо када важно? (Псалом 119:9).

⁵ На параш тэ сытёс драго тэ гиндос (Прит. 3:21). О мануш, саво драго гиндой, на грабийпэ сразу варисо тэ терэл. Во вся обгиндой и шол сама, сар пэ када диқэл о Дэл. Када фартэ на шолпэ пэ кода, сар терэн и тэрнэ мануша андэ кадэя люма. Вонэ терэн кода, со лэнди камэлпэ и со андэ лэндирэ яқа правильно (Прит. 7:7; 29:11). Кадяжэ пэр тутэ можэт фартэ тэ влияет о интернето и соцсети. Важ када присто о зор, кай тэ на пэрэлэс и гиндоря кадэла люмати. Сытюв драго тэ гиндос. Кала прилэс ришэнии, спэрва уӷан, со пала када гиндой о Иегова. Тоди старысав тэ полэс, васо кода, со во ԥэнэн, — када со май лащи ришэния. Потом тер кадя, сар уӷанглян. Тоди, кода, со ту витидэса, лэла тэ радуий лэ Иеговас. (Проадинон Псалом 119:9.) Кала ту сытёса тэ гиндос кадя, сар о Иегова, тири дружба лэса авэла пэ бутэстэ май лащи (Прит. 2:11, 12; Евр. 5:14). Роздиқаса сар када повлияет пэ кода: 1) сар ту лэса тэ обжаспэ лэ ԥэянца и 2) сар ту утидэспэ и сави тутэ причоска.

6. Сар о тэрно ԥрал можэт тэ сыкавэл, кай во стол патив пэ ԥэя?

⁶ О ԥрал, саво сытеля тэ гиндой кадя, сар о Иегова, обжалпэ лэ жувлянца пативаса. Например, о тэрно ԥрал закамля тэ познакомица варисавя ԥьяса. Када нармально и катэ нинай нисо нэправильно. Но о ԥрал, саво сытеля тэ гиндой, сар о Иегова, на лэла пэс тэ андярэл кадя, кай ла ԥьятэ тэ авэн варисавэ чуства каринг лэстэ, если во на гиндой пэр латэ тэ жэнийпэ. Например, во на лэла тэ дэл дума, тэ пистрой или тэ терэл кода, через со и ԥэй можэт тэ погиндой, кай вой лэсти чалёл (1 Тим. 5:1, 2). Если во встречаеца ла ԥьяса, во лэла тэ фэрий лако лашо алав, кай пала латэ тэ на дэн дума найдраго. Кадяжэ во позаботияпэ, кай вонэ тэ на ашэнпэ дуйжэнэ, и кай паша лэндэ тэ авэл мануш, савэстэ састи дружба лэ Дэвлэса (1 Кор. 6:18).

7. Пала со трэбуй тэ сэрэл о тэрно ԥрал, кала витидэл причоска и сар тэ утидэлпэ?

⁷ Если о тэрно ԥрал сытеля тэ гиндой кадя, сар о Иегова, када лэла тэ дицол па кода, сар во утидэлпэ и сави лэстэ причоска. Часто и мода андэ кадэя люма заандярэн и мануша, савэ андярэн пэс билажавардэс, и на стон патив по Иегова. Кадэла мануша на гиндон кадя, сар во. Вонэ вимэкэн кацави ӥда, кай вой тэ авэл фартэ обцырди, или кай и мурша через латэ тэ шонпэ пэ жувля. Пала со лэла тэ гиндой о ԥрал, кала витидэл со тэ лэл пэр пэстэ? Если во андэ вся камэл тэ терэл кадя, сар о Христос, во шола сама пэ принцыпоря анда Библия, ай кадяжэ пэ ԥрала андэ собрания, савэндэ састи дружба лэ Иеговаса. Во можэт тэ пушэл пэстар: «И ӥда, сави мэ камав тэ лав пэр пэстэ, поджал важ о христианино? Дицол па мэрни ӥда и па мэрни причоска, кай мэ став патив пэ авэр? Кала и мануша диқэна пэр мандэ, полэна вонэ, кай мэ служысарав лэ Дэвлэсти?» (1 Кор. 10:31—33; Титу 2:6). Если важ о тэрно ԥрал важно, со гиндой о Иегова и со лэстэ андо ди, тоди во затерэла лашо алав най кати лэ ԥралэндар и лэ ԥэяндар анда собрания, но и пэстирэ небеснонэ Дадэстар.

8. Сар о тэрно ԥрал можэт тэ авэл надёжно мануш?

⁸ Ав надёжно. О ԥрал, пэ саво можно тэ надеиспэ, поджал ответствено каринг пэстири бути (Луки 16:10). Роздиқаса идиально лэ Иисусоско примеро. Во серьёзно поджалас каринг и дила, сави лэстэ сас. О Иисусо терэлас любо дила, сави дэлас лэсти о Иегова, дажэ тоди, кала када сас найвушэро. Во любияс лэ манушэн, особено пэстирэ учениконэн, и дажэ одя важ лэндэ пэстири жызня (Иоан. 13:1). Сытюв кай о Иисусо. Тер любо дила анда вся оди. Если ту на ӷанэс, сар ла тэ стерэс, на ав ӷордо, манг помощь кай и опытни ԥрала. Исин мануша, савэ терэн и дила кадя, кай лиш бы лэндар тэ отԥандён, вонэ на терэн май бут. Никала на ав кацаво! (Рим. 12:11). Тер любо дила кадя, кабута ту терэс ла важ о Иегова, ай най важ и мануша и доандяр ла до конца (Кол. 3:23). Канешно, ту найидиально мануш, важ када ав сэжо и прижан пэстирэ ошыбки (Прит. 11:2).

СЫТЮВ ТЭ ТЕРЭС КОДА, СО ПРИӶОДИЯПЭ АНДЭ ЖЫЗНЯ

9. Васо о тэрно ԥрал трэбуй тэ сытёл тэ терэл кода, со приӷодияпэ андэ жызня?

⁹ Кай тэ авэл лащи дружба лэ Дэвлэса, тути трэбуй тэ сытёс тэ терэс кода, со приӷодияпэ андэ жызня. Када поможыя тути тэ терэс и дила андэ собрания, тэ виарақэс бути, кай тэ проправарэс пэс или пэстирэ ерес, ай кадяжэ тэ ладис аврэнца. Акэ дэсавэ маменторя.

10, 11. Васо лэ тэрнэ ԥралэсти трэбуй тэ сытёл драго тэ адиной и тэ пистрой? (Псалом 1:1—3). (Диқэн кадяжэ и картинка.)

¹⁰ Сытюв драго тэ адинос и тэ пистрос. Андэ Библия ԥэнэнпэ, кай лэ манушэстэ драго вижала тэ терэл и дила и во авэла бахтало, если во кажно дес адиной лэ Дэвлэско Алав и гиндой пала кода, со адиной. (Проадинон Псалом 1:1—3.) Если ту адинос и Библия кажно дес, када поможыя тути тэ гиндос кадя, сар о Иегова. Тоди, кала лэса тэ прилэс и ришэнии, ту лэса тэ шос сама най пэ кода, сар ту гиндос, ай пэ принцыпоря анда Библия (Прит. 1:3, 4). Кацавэ мурша фартэ трэбуй андэ собрания. Васо?

¹¹ Лэ ԥралэнди и лэ ԥэянди фартэ трэбуй, кай лэн тэ сытярэн кодэлэсти, со пистромэ андэ лэ Дэвлэско Алав (Титу 1:9). Если ту ӷанэс драго тэ адинос и тэ пистрос, тоди ту можэш тэ подӷотовиш пэстирэ каминтарии и речи кадя, кай када тэ придэл зор аврэнди. Кадяжэ ту можэш тэ випистрос важ пэстэ и гиндоря, кала проандярэс и лично изучения, ашунэс и речи пэ собрании или пэ канӷрэсоря. Кадэла випистромэ гиндоря поможына тути тэ састярэс пэстири вера и тэ подритярэс аврэн.

12. Сар можно тэ сытёс май драго тэ дэс дума аврэнца?

¹² Сытюв драго тэ дэс дума аврэнца. И христианоря трэбуй тэ ӷанэн драго тэ дэн дума аврэнца. Вонэ трэбуй тэ авэн внимательни каринг авэр и драго лэн тэ виашунэн (Прит. 20:5). Важ када о ԥрал трэбуй тэ сытёл тэ шол сама пэ кода, сар о мануш андярэл пэс, кала дэл дума, саво лэстэ муй и тоно андэ кодэва маменто. Кай када тэ полэс, трэбуй тэ проандярэс и время лэ манушэнца. Но если ту кати общаешься через и сообщения, тути авэла трудно тэ дэс дума лэ манушэса, кала диқэсапэ лэса. Отстов о телефоно и родэ возможность тэ подэс дума лэ манушэса лично (2 Иоан. 12).

13. Сости инке трэбуй тэ сытёл о тэрно мануш? (1 Тимофею 5:8).(Диқэн кадяжэ и картинка.)

¹³ Сытюв тэ затерэс важ пэстэ. О христианино, савэстэ лащи дружба лэ Иеговаса, трэбуй тэ ӷанэн тэ затерэл и ловэ, кай тэ проправарэл пэс или пэстирэ ерес. (Проадинон 1 Тимофею 5:8.) Андэ дэсавэ страны и тэрнэ ԥрала моӷут тэ сытён кай пэско дад или кай пэстирэ чаче, сар тэ терэн бути. Ай андэ авэр страны, кала получин и среднё образования, и мануша моӷут сразу тэ получин и професия. Тэ висытёс пэ варисави спецыальность андэ тэрнэ бэрша — када фартэ драго. Када поможыя потом тэ арақэс бути (Дила 18:2, 3; 20:34; Эф. 4:28). Анда вся оди тер и бути и присытюв вся и время тэ дотерэс кода, пала со лянпэ. Тоди пэр тутэ ԥэнэна, кай ту надёжно мануш. Ай кацавэ мануша фартэ трэбуй пэ бути. Кацаво характеро и кода, со ту сытелян тэ терэс, поможыя тэ подӷотовишся каринг и обязаности, савэ тутэ моӷут тэ авэн андэ жызня.

АВ ӶОТОВО КАРИНГ И ОБЯЗАНОСТИ, САВЭ ТУТЭ МОӶУТ ТЭ АВЭН

14. Сар о тэрно ԥрал можэт тэ подӷотовица, кай тэ служый полновремено?

¹⁴ Полновремено служытелё. Бут христианоря, кастэ лащи дружба лэ Иеговаса, линэ тэ служын полновремно андэ тэрнэ бэрша. И пианерско служэния сытярэл лэ тэрнэ ԥралэс тэ дэл дума разнонэ манушэнца. Кадяжэ кадэя служэния сытярэл лэ манушэс правильно тэ тратий пэстирэ ловэ (Флп. 4:11—13). Кай тэ служыс сар общё пианеро, тути поможыя, кай спэрва тэ послужыс сар подсобно пианеро. Бут подсобни пианероря ӷэт май интя ашэлэ общи. Потом англа лэндэ ԥэрнаделэ май бут возможности, например тэ участвуют пэ стройка или тэ служын андо Вефилё.

15, 16. Со поможыя лэ тэрнэ ԥралэсти, кай во тэ авэл помошнико или барэдэр ԥрал андэ собрания?

¹⁵ Помошнико или барэдэр ԥрал андэ собрания. Всаворэ ԥрала трэбуй тэ старыинпэ, кай тэ авэн барэдэр ԥрала андэ собрания. Важ када вонэ трэбуй тэ авэн кацавэ, сар пала барэдэр ԥрала пистромэ андэ Библия. Андэ лэ Дэвлэско Алав драго дэлпэ дума пала мануша, савэ стодэ англа пэстэ кацави цэль (1 Тим. 3:1). Спэрва о ԥрал дэсави время трэбуй тэ послужый, сар помошнико андэ собрания, ай тоди лэс моӷут назначить барэдэрэ ԥралэса. И помошникоря андэ собрания дэн бари помощь андэ разни вопросоря. И барэдэр ԥрала и помошникоря андэ собрания — када найӷорди мануша, савэ заботинпэ пала лэ Иеговастирэ бакрорэ и анда вся оди росԥэнэн пала Дэл аврэнди. О тэрно ԥрал можэт тэ ашэл помошнико андэ собрания ужэ в 18 лет. Ай если помошнико андэ собрания драго терэл пэстири дила, тоди кала лэсти 21 лет, во ужэ можэт тэ авэл барэдэр ԥрал андэ собрания.

¹⁶ Со тэ терэс, кай тэ авэс помошнико андэ собрания или барэдэр ԥрал? Нисаво секрето нинай. Вся пистромэ андэ Библия. Само ӷлавно — трэбуй тэ любис лэ Иеговас, лэ ерес и собрания (1 Тим. 3:1—13; Титу 1:6—9; 1 Пёт. 5:2, 3). Проадиносар всаворэ стихоря анда кадэва абзацо, кай тэ полэс со тутар аштярэл о Дэл. Манг, кай о Иегова тэ поможый тути, кай тутэ тэ авэл кацаво характеро, саво трэбуй важ кадэя назначенияc.

17. Сар о тэрно ԥрал можэт тэ подӷотовица, кай тэ авэл хулай андо ери? (Диқэн кадяжэ и картинка.)

¹⁷ Хулай андо ери. О Иисусо шутя сама, кай най всаворэ христианоря, савэндэ састи дружба лэ Иеговаса, жэнинпэ (Матф. 19:12). Но если ту витидэса тэ жэниспэ, тутэ авэна нэвэ обязаности. Ту авэса хулай андо ери (1 Кор. 11:3). О Иегова аштярэл, кай о мурш тэ любий пэстиря хулая и тэ затерэл и ловэ важ о ери. Кадяжэ во трэбуй тэ авэл важ и хулаи пашутно друӷо и тэ поможый, кай латэ тэ авэл лащи дружба лэ Иеговаса (Эф. 5:28, 29). Андэ кадэя статья амэ подям дума, сар дэ важно тэ сытёс тэ гиндос кадя, сар о Иегова, тэ стос патив пэ жувля и тэ авэс надёжно мануш. Вся када поможыя тути тэ авэс лашо хулай андо ери.

18. Сар о тэрно ԥрал можэт тэ подӷотовица, кай тэ авэл дадэса?

¹⁸ Дад. Посли кода сар ту жэнисапэ, тумэндэ ла хулаяса моӷут тэ авэн бэяцэ. Кай тэ авэс лашо дад, ту можэш тэ сытёс кай о Иегова. Андэ када бут со ужал (Эф. 6:4). О Иегова на лажалас тэ ԥэнэн пэстирэ шавэсти, лэ Иисусости, кай любий лэс и дэла лэсти пэстири блаӷословения (Матф. 3:17). Если тутэ авэна бэяцэ на бистэр май часто тэ ԥэнэс лэнди, кай любис лэн. Хвалисар лэн пала лашымос, саво вонэ терэн, дажэ если када варисо найбаро. Дада, савэ терэн кадя жэ, сар о Иегова, поможын пэстирэ бэятонэнди, кай лэндэ тэ авэл лащи дружба лэ Дэвлэса. Но тэ подӷотовишся, кай тэ авэс лашо хулай, ту можэш ужэ акана. Заботисав пала пэстирэ дадэско ери и пала ԥрала и ԥэя андэ собрания. Сытюв тэ ԥэнэс лэнди, кай любис и цэнуис лэн (Иоан. 15:9). Кадя ту подӷотовишся, кай тэ авэс лашо хулай и дад. Кадэлэса ту радуиса лэ Иеговас и поможыса лэ манушэнди, савэ паша тутэ, кай вонэ тэ авэн лошалэ.

СО ТУ ТЕРЭСА?

19, 20. Со поможыя лэ тэрнэ ԥралэнди, кай лэндэ тэ авэл састи дружба лэ Иеговаса? (Диқэн и картинка пэ обложка.)

¹⁹ И састи дружба лэ Иеговаса на лэлпэ корко пэстар. Тумэнди, тэрнэ ԥрала, трэбуй тэ витидэн, кастар тэ сытён лашымасти. Сытён тэ гиндон кадя, сар о Иегова, и авэн надёжни. Ай кадяжэ сытён тэ терэн кода, со приӷодияпэ андэ жызня, и ӷотовьтесь каринг и обязаности, савэ тумэндэ моӷут тэ авэн.

²⁰ Ту можэш тэ пэрэжываеш, кай трэбуй авэла бут со тэ стерэс. Но тутэ вся вижала драго! О Иегова дэл алав, кай поможыя тути (Ис. 41:10, 13). Тирэ ԥрала и ԥэя андэ собрания кадяжэ авэна паша тутэ, и ту можэш тэ патяс, кай вонэ подритярэна тут. О Иегова камэл, кай тутэ тэ авэл састи дружба лэса. Во ӷанэн, кай тоди тири жызня авэла пэ бутэстэ май интересно и лошали. Амарэ тэрнэ ԥрала, тумэ фартэ, фартэ куч важ амэндэ! Терэн вся, кай тумэндэ тэ авэл лащи дружба лэ Иеговаса, и тоди во блаӷословия тумэн (Прит. 22:4).