Ай тумэ ӷотови каринг и бари бида?

1. Васо годявэрнэс тэ авас ӷотови каринг и природни биды?

И ПОДӶОТОВКА можэт тэ спасый и жызня. Например, кодэла, ко подӷотовился каринг и природа бида, май ӥто всаворэстар спасынапэ екжэнэ и смоӷут тэ поможын аврэнди. Ек европейско ӷуманитарно арӷанизацыя пала када ԥэндя кадя: «И лащи подӷотовка фартэ важно важ и спасения».

2. Васо амэ трэбуй тэ ӷотовимся каринг и «бари бида»? (Матфеё 24:44).

² И «бари бида» залэлапэ нэожыдано (Матф. 24:21). Но кадэя бида на шолпэ пэ бут авэр биды, важ кода кай амэ ӷанас, кай вой авэла. Варикай 2 000 бэрш палпалэ о Иисусо ԥэндя пэстирэ учениконэнди, кай трэбуй тэ авэн ӷотови каринг кадэя бида. (Проадинон Матфеё 24:44.) Если амэ ӷотови, амэнди авэла май вушэро тэ пэрэандярас кодэя ԥари время и тэ подритярас аврэн (Луки 21:36).

3. Сар амэнди поможыя тэ подӷотовимся каринг и бари бида кода, кай амэ ӷанас тэ пэрэандярас и ԥари время, тэ жалуисарас анда вся оди и тэ любисарас?

³ Подам дума пала трин маменторя, савэ поможына амэнди тэ авас ӷотови каринг и бари бида. Сар амэ пэс андяраса, кала трэбуй авэла тэ росԥэнас и ӷрозно новость, ай и мануша лэна тэ тасавэн пар мэндэ? (Отк. 16:21). Амэнди трэбуй авэла тэ ӷанас тэ пэрэандярас и ԥари время, кай тэ кандас лэ Иеговас — тэ кандас и тэ патяс, кай во амэн фэрия. Со амэ тераса, если амарэ ԥрала хасарэна пэско хабэ? (Авв. 3:17, 18). Амэнди трэбуй авэла тэ жалуисарас лэн анда вся оди, кай тэ поможысарас. Сар амэ пэс андяраса, кала и объединёни правительстворя дэна пар мэндэ и амэнди прижалапэ дэсави время тэ гарадювас еқэҭанэ аврэ ԥралэнца и ԥэянца? (Иез. 38:10—12). Амэнди трэбуй авэла фартэ тэ любисарас лэн, кай вмести тэ виритярас кадэя ԥари время.

4. Сар и Библия сыкавэл, кай трэбуй тэ сытювас тэ пэрэандярас и ԥари время, тэ жалуисарас анда вся оди и тэ любисарас?

⁴ Андэ лэ Дэвлэско алав ԥэнэнпэ, кай трэбуй тэ сытювас тэ пэрэандярас и ԥари время, тэ жалуисарас анда вся оди и тэ любисарас. Андэ Луки 21:19 ԥэнэнпэ: «Тумэ фэрина пэстири жызня кодэлэса, кай виритярэна о ԥаримос». Андэ Колоссянам 3:12 пистромэ: «Утидэнпэ андэ... сострадания». Ай андэ 1 Фессалоникийцам 4:9, 10 амэ адиносарас: «Тумэн сытярдя о Дэл тэ любисарэн ек еқэс. [...] Но мангас тумэн, ԥрала, любисарэн инке май фартэ». Всаворэ кадэла алава сас пистромэ важ и христианоря, савэ ужэ ӷанэнас тэ пэрэандярэн и ԥари время, тэ жалуин анда вся оди и тэ любин. Но лэнди трэбуй сас и май дур тэ старыинпэ тэ терэн када инке май драго. Кадя жэ трэбуй тэ терас и амэ. Со андэ када поможыя? Давайте подаса дума, сар кажно анда кадэла качестворя сыкавэнас и христианоря андо пэрво вико. Ай потом амэ уӷанаса, сар тэ терас кадя жэ, сар кодэла ԥрала и ԥэя. Кадя амэ поласа, ӷотови амэ каринг и бида чи най.

СЫТЁН ТЭ ПЭРЭАНДЯРЭН И ԤАРИ ВРЕМЯ

5. Со поможыяс лэ пэрвонэ христианонэнди тэ пэрэандярэн и ԥари время?

⁵ И пэрви христианоря трэбуй сас тэ ӷанэн тэ пэрэандярэн и ԥари время (Евр. 10:36). Лэндэ сас най кати обычни проблемы, савэ исин кай всаворэ мануша, но лэндэ сас инке и авэр ԥаримос. Бутэн андар лэндэ приследовали най кати и иудейски барэдэра андэ веры или и римски власти, но и о родо (Матф. 10:21). Ай инке лэнди дэкала прижаласпэ тэ боринпэ лэ отступниконэнца и кодэлэса, сости вонэ сытярэнас, кай када тэ на розделий и собрания (Дила 20:29, 30). Но всаек кодэла христианоря на парашэнас тэ пэрэандярэн и ԥари время (Отк. 2:3). Со лэнди поможыяс? Вонэ гиндонас пала библейски примероря, сар авэр пэрэандярэнас о ԥаримос, например, о Иово (Иак. 5:10, 11). Кадяжэ вонэ мангэнаспэ пала зор (Дила 4:29—31). Ай инке кодэла христианоря сэрэнас пала кода, кай о Иегова блаӷословия лэн, если вонэ вся виритярэна (Дила 5:41).

6. Сар ла Меритако примеро поможыя тумэнди, кала пэр тумэндэ тасавэн?

⁶ Амэндэ тожэ вижала вся тэ виритярас, если амэ вся и время ласа тэ гиндосарас, сар авэр пэрэандярэнас и ԥари время. Кацавэ примероря исин андэ Библия и андэ амари литература. Када и поможысардя ла Мерита́ти анда Албания тэ виритярэл, кала пэр латэ жэстоко тасавэлас о ери. Вой росԥэнэн: «Ман фартэ ля лэ одестар лэ Иовоско примеро. Лэстэ сас кадя бут ԥаримос, ай во дажэ на ӷанэнас, ко андэ када сас дошало. Но во всаек ԥэндя: „Пока мэ на мэрава, ашавапэ вужо англа Дэл!“ Мэ погиндосардэм, кай мэрно ԥаримос нисар на сыстояпэ кодэлэса, со сас кай о Иово. И мэ ӷанавас, ко дошало андэ мэрно ԥаримос» (Иов 27:5).

7. Со трэбуй тэ сытювас тэ терас ужэ акана, дажэ если амэндэ инке нинай баро ԥаримос?

⁷ Амэндэ тожэ вижала инке май драго тэ пэрэандярас и ԥари время, если амэ ласа часто и анда вся оди тэ росԥэнас лэ Иеговасти пала пэстирэ пэрэжывании (Флп. 4:6; 1 Фес. 5:17). Можэт, ворта акана тумэндэ нинай баро ԥаримос. Но пушэн пэстар: «Родав мэ помощь кай о Иегова, кала ростроено или кала на ӷанав, со тэ терав?» Если тумэ присытелэ тэ взвинпэ каринг о Дэл андэ любо сложно ситуацыя, тоди тумэ сразу мангэна лэстар помощь, кала авэла баро ԥаримос. Тумэ на лэна самневаца, кай во точно ӷанэн, кала и сар тумэнди тэ поможый (Пс. 27:1, 3).

8. Сар ла Мирако примеро сыкавэл, кай если амэ пэрэандярас и ԥари время ужэ акана, тоди виритяраса и авэр ԥаримос? (Иаково 1:2—4). (Диқэн кадяжэ и картинка.)

⁸ Амэнди авэла май вушэро тэ виритярас и бари бида, если ужэ акана амэ ӷанас тэ пэрэандярас и ԥари время (Рим. 5:3). Васо можно кадя тэ ԥэнас? Бут ԥрала шутэ сама, кай кала вонэ виритярэнас ек ԥаримос, тэ виритярэн авэр лэнди сас ужэ май вушэро. Кадэлэстар ашэлас май састи лэндири вера андэ кода, кай о Иегова паша лэндэ и кай во ӷотово лэнди тэ поможый. Ай ужэ и вера поможыяс лэнди тэ виритярэн и авэр ԥаримос. (Проадинон Иаково 1:2—4.) И Ми́ра, и пианерка анда Албания, ԥэнэн, кай кода, со вой ужэ пэрэжудя, поможый лати тэ пэрэандярэл и ԥари время и адес. Дэкала лати здэлпэ, кай кати латэ кадя дэ бут ԥаримос. Но тоди вой вспоминает, сар о Иегова подритярэлас ла важ и послидни 20 бэрш, и ԥэнэн пэсти: «На здэпэ! На бистэр вся, со о Иегова стердя важ тутэ. Сэр, скати ту ужэ виритярдян лэ Иеговаса». Тумэ тожэ можэте тэ вспоминаете, сар о Иегова поможыяс тумэнди. Тоди, кала залэлапэ и бари бида, тумэ ужэ ӷанэна, сар тэ виритярэн о ԥаримос, и закамэна и дальшэ када тэ терэн. Патян, о Иегова шол сама пэ кажно ԥаримос, саво тумэ виритярэн, и обязательно дэла тумэнди важ када лашымос (Матф. 5:10—12).

ЖАЛУИН АНДА ВСЯ ОДИ

9. Сар и христианоря андэ сирийско Антёхия сыкадэ, кай жалуин анда вся оди?

⁹ Уӷанам, со сас, кала андэ Иудея заляпэ баро боқалимос. Кала и христианоря андэ сирийско Антёхия ашундэ пала када, вонэ, канешно, закамлэ тэ жалуин пэстирэ ԥралэн андэ Иудея. Но када сас най кати жылания. Кадэла христианоря пэ дила сыкадэ, кай камэн тэ жалуин. Вонэ «закамлэ тэ поможын лэ ԥралэнди андэ Иудея, ко соса моӷ» (Дила 11:27—30). Хоть и Иудея сас дур, и христианоря андэ Антёхия фартэ камэнас тэ поможын пэстирэ ԥралэнди (1 Иоан. 3:17, 18).

10. Сар амэ можэм тэ сыкавас, кай анда вся оди жалуисарас лэ ԥралэн и лэ ԥэян, савэ попэлинэ андэ бида? (Диқэн кадяжэ и картинка.)

¹⁰ Адес амэ тожэ можэм тэ сыкавас, кай анда вся оди жалуисарас амарэ ԥралэн и ԥэян, савэ попэлинэ андэ бида. Амэ сразу камас варисо тэ терас. Например, амэ ԥэнас лэ барэдэрэ ԥралэнди, кай ӷотови тэ поможысарасb, терас пожэртвовании или мангаспэ пала кодэла, ко пострадал (Прит. 17:17). Андо 2020 бэрш па вся и люма стердэ май бут, чем 950 камитеторя, савэ поможын андэ чрезвычайни ситуацыи, кай тэ дэн помощь кодэлэнди, ко пострадал через и пандэмия КОВИДО-19. Кодэла, ко терэн дила вмести лэ ԥралэнца анда кадэла камитеторя ашэн, кай амэ лэн тэ хвалисарас. Важ кода кай анда вся оди жалуин, вонэ анэн лэ ԥралэнди и лэ ԥэянди и ӷуманитарно помощь, поможын, кай лэндэ тэ авэл састи дружба лэ Дэвлэса, ай дэкала ремонтируют или ваздэн и цэра и Залоря Царства, савэ сас розмардэ. (Диқэн 2 Коринфянам 8:1—4.)

11. Сар амари лащи дила хвалий амарэ небеснонэ Дадэс?

¹¹ Кала амэ дас помощь посли природно бида, авэр шон сама пэ жэртвы, пэ савэ амэ жас. Например, андо 2019 бэрш, о ураӷано «Дориано» розмардя о Зало Царства пэ Багамы. Кала амарэ ԥрала упалэ ваздэнас кадэва Зало, вонэ манглэ лэ манушэс, саво залэлпэ стройкаса и саво най Свидетелё, тэ ԥэнэн, скати во лэла важ пэстири бути. Пэ када во ԥэндя: «Мэ на лава нисавэ ловэ и дава тумэнди инструменто, материало и рабочонэн. Мэ просто камав хоть варисар тэ поможысарав тумаря арӷанизацыяти. Ман фартэ ля лэ одестар кода, сар тумэ заботинпэ ек пала еқэстэ». Май бут мануша андэ люма на ӷанэн лэ Иеговас. Но бут андар лэндэ диқэн, со терэн лэ Иеговастирэ свидетеля, кай тэ поможын аврэнди. Важ амэндэ бари бах, кай амари лащи дила поможый, кай и мануша тэ уӷанэн лэ Дэвлэс, саво «фартэ жалуий»! (Эф. 2:4).

12. Сар андэ бари бида амэнди поможыя кода, кай ужэ адес амэ сытювас тэ жалуисарас анда вся оди? (Откровение 13:16, 17).

¹² Васо амэнди трэбуй авэла тэ жалуисарас анда вся оди, кала авэла и бари бида? Анда Библия драго дицол, кай кодэлэндэ, ко на залэл никастири риг андэ политика, авэла ԥаримос сар и андэ амари время, кадя и тоди, кала авэла и бари бида. (Проадинон Откровение 13:16, 17.) Лэ ԥралэнди и лэ ԥэянди, можэт, дажэ авэла трэбуй само нэобходимо. Ӥто амаро Царё, о Христос Иисус, авэла, кай тэ исполнит лэ Дэвлэско приӷоворо важ кадэя люма. Сар дэ важно, кай андэ кодэя время во тэ диқэл, кай амэ анда вся оди жалуисарас амарэ ԥралэн и ԥэян! Тоди во ԥэнэна амэнди: «Получин о Царство» (Матф. 25:34—40).

СЫТЁН ТЭ ЛЮБИН

13. Сар лэ Павлоско совето анда Римлянам 15:7 поможысардя лэ пэрвонэ христианонэнди тэ любин инке май фартэ?

¹³ Лэ пэрвонэ христианонэн ӷатярэнас па любовь. Но вушэро лэнди сас тэ сыкавэн кадэва качество? Подам дума пала христианско собрания андо Римо. Андэ кодэя собрания сас бут разни мануша. Котэ сас най кати и евреёря, савэ барёнас па лэ Моисеёско законо, но и язычникоря, савэ вибарелэ совсем па аврятэ. Машкар христианоря сас раборя, свободни и дажэ кодэла, ко ритярэлас рабонэн. Сар вонэ моӷли тэ сыкавэн, кай любин ек еқэс, хоть машкар лэндэ и сас бари разница? О апостало Павло ԥэндя лэнди: «Прилэн ек аврэс анда вся оди». (Проадинон Римлянам 15:7.) Со во камля тэ ԥэнэн? О алав, саво пэрэандярдэ сар «прилэн ек аврэс анда вся оди», сыкавэл «лэ одеса тэ прилэс варикас пэстэ цэрэ» или «варикаса тэ подружыспэ». Например, о Павло побудисардя лэ Филимонос анда оди тэ прилэл пэстэ лэ Анисимос, лэ рабос, саво унашля (Флм. 17). Ай и Прискила и о Акила, ақардэ каринг пэстэ лэ Апалосос, саво ӷанэнас пала христианство май набут, чем вонэ (Дила 18:26). Кодэла христианоря на домэкэнас, кай машкар лэндэ тэ авэл разделения, и анда вся оди прилэнас пэстэ ек еқэс, хоть вонэ и сас фартэ разни.

14. Сар ек мисианерско ери сыкадя и любовь пэ дила?

¹⁴ Амэ тожэ можэм тэ сыкавас пэстири любовь каринг и ԥрала и ԥэя и тэ подружысавас лэнца. Тоди вонэ, можэт, тожэ ԥэрнавэна амэнди пэско ди (2 Кор. 6:11—13). Акэ ла Аннако примеро. Ӥто посли кода, сар вонэ лэ хуласа получисардэ мисианерско назначения андэ Западно Африка, заляпэ и пандэмия КОВИДО-19. Важ када вонэ нэ моӷли лично тэ диқэнпэ лэ ԥралэнца и лэ ԥэянца анда пэстири нэви собрания. Сар тоди вонэ моӷли тэ сыкавэн, кай любин лэн? Вонэ звонинас лэнди па видеосвязь и ԥэнэнас, кай фартэ камлоп май пашэ лэн тэ уӷанэн. Бутэ ерен ля лэ одестар лэндири любовь и часто вонэ тожэ звонинас лэнди и бишалэнас сообщении. Васо кадэва мисианерско ери терэлас вся, кай тэ подружыйпэ ла нэвя собранияса? И Анна ԥэнэн: «Мэрно ери най еқвар диқэлас, сар и ԥрала и ԥэя сыкавэн каринг амэндэ и любовь и андэ ԥари время, и андэ лащи. Када ля ман лэ одестар и мэ закамлэм тэ терав кадя жэ».

15. Сар кода, со сас кай и Ванесса, сытярэл тут тэ сыкавэс и любовь каринг всаворэ ԥрала и ԥэя? (Диқэн кадяжэ и картинка.)

¹⁵ Андэ собрания моӷут тэ авэн ԥрала и ԥэя, савэндэ разно характеро и культура. Фартэ важно тэ шас май бут сама пэ лэндирэ лашэ качестворя. Тоди амэ ласа тэ любисарас лэн инке май фартэ. Важ и Ване́сса, сави служый андэ Нэви Зеландия, сас ԥарэс тэ ладий дэсавэ ԥралэнца и ԥэянца андэ собрания. Но потом вой закамля тэ на дурёл кодэлэндар, ко лати на чалёл, ай наоборот, тэ проандярэл лэнца май бут время. Када поможысардя лати тэ диқэл, васо о Иегова лэн любий. Вой ԥэнэн: «Кала мэрно хулай ашэля раёнонэ барэдэрэ ԥралэса, амэ лям общяца май бутэ мироса, и лэ манушэн, савэндэ разно характеро, ашэля инке май бут. Но важ мандэ када ужэ на сас проблема. Манди ля тэ чалёл, кай всаворэ мануша разни. И па вся дицол, кай лэ Иеговасти тожэ када чалёл, важ кода кай во пашардя каринг пэстэ всаворэн амэн, кацавэ разнонэн». Кала амэ пристас зор, кай лэ Иеговастирэ яқэнца тэ диқас пэ авэр, амэ сыкавас, кай любисарас лэн (2 Кор. 8:24).

16. Васо авэла трэбуй и любовь, особено кала авэла и бари бида? (Диқэн кадяжэ и картинка.)

¹⁶ Амэнди трэбуй авэла тэ сыкавас и любовь, особено кала авэла и бари бида. Сар о Иегова фэрия амэн, кала вой залэлапэ? Акэ со трэбуй сас тэ терэн лэ Дэвлэстирэ служытеля, кала и мидо-персицко армия дя по Вавилоно: «Зажа, мэрно народо, андэ комнаты, савэ андрэ и ԥандав пала пэстэ и вудара. Гарадю пэ най бари время, пока на прожала и холи» (Ис. 26:20). Здэлпэ, кай кадэла алава пистромэ и важ амэндэ, важ кода кай пашол и бари бида. И алава «комнаты, савэ андрэ» моӷут тэ сыкавэн пэ амарэ собрании. О Иегова фэрия амэн андэ бари бида, если амэ аваса паша амаро духовно ери. Важ када амэнди ужэ акана трэбуй тэ пристас зор, кай най просто тэ тэрписарас амарэ ԥралэн и ԥэян, ай тэ любисарас лэн. Кадэлэстар зависит амари жызня!

ӶОТОВЬТЕСЬ УЖЭ АКАНА

17. Со амэ сможэм тэ стерас андэ бари бида, если ласа тэ ӷотовимся ужэ акана?

¹⁷ «Лэ Иеговаско дес» анэна баро ԥаримос всаворэ манушэнди (Соф. 1:14, 15). Лэ Иеговастирэ служытелёнэнди тожэ авэла найвушэро. Но если амэ подӷотовимся ужэ акана, амэндэ авэла спокойно по ди и амэ дажэ ласа тэ поможысарас аврэнди. Амэ сможэм тэ пэрэандярас любо ԥаримос, саво амэндэ авэла. Ай если амарэ ԥрала и ԥэя попэрэна андэ бида, амэ стераса вся, кай тэ жалуисарас лэн анда вся оди и тэ позаботисавас пала кода, со лэнди трэбуй. Амэ на домэкаса, кай варисо тэ дурярэл амэн лэ ԥралэндар и лэ ԥэяндар, савэн амэ ужэ полюбисардям. Тоди о Иегова дэла амэнди вечно жызня андэ люма, кай забистрэлапэ вся о ԥаримос (Ис. 65:17).