Иоанно Крестителё. Сытювас, сар тэ на хасарас и радость

КАМЛОП тумэ, кай тумэнди тэ дэн варисави дила андэ служэния, сави тумэ акана нэ можэте тэ терэн? Ай можэт кадэя дила акана терэл варико авэр. Можэт тумэ акана нэ можэте тэ служын анда вся зор, важ кода кай ужэ андэ бэршэндэ, найлашо зор, нинай ловэ чи трэбуй тэ диқэн пала ери. Или тумэнди прижыляпэ тэ ашавэн и служэния, сави тумэнди фартэ чалёлас, через кода кай варисо паруделя андэ арӷанизацыя, хоть кадэлэсти тумэ отдинэ бут бэрша. Сави бы тэ на авэл причина, тумэнди можэт тэ здэлпэ, кай на вижал тэ стерэн вся, со тумэ камлоп андэ служэния лэ Дэвлэсти. Тоди тумэндэ можэт тэ авэл фартэ бари пэрэжывания. Сар тэ на домэкас, кай и пэрэжывании и обида, важ кода кай на вижыля кадя, сар камасас, тэ ашэнпэ андо ди пэ долӷонэстэ? Со поможыя тэ на хасарас и радость?

Кода, со сас андэ жызня кай о Иоанно Крестителё, драго сыкавэл, сар тэ на хасарас и радость. Хоть во и терэлас фартэ интересно дила, файма, во гиндояс, кай лэстири служэния лэ Иеговасти авэла па аврятэ. Во дажэ нэ моӷ тэ гиндой, кай проандярэла андо баруно май бут время, чем андэ служэния. Но через када, о Иоанно на хасардя и радость, и лэстэ вижыля ла тэ фэрий до конца. Со лэсти поможыяс? Сар тэ на хасарас и радость, дажэ кала амэндэ на вижал кадя, сар амэ камас?

СЛУЖЭНИЯ АНЭНАС ЛЭ ИОАННОСТИ РАДОСТЬ

О Иоанно заля пэстири служэния весной андо 29 бэрш лэ И. Х. Во ля тэ подӷотавливает о дром важ о Христос кодэлэса, кай ԥэнэнас лэ манушэнди: «Каинпэ, важ кода кай пашэля о небесно царство» (Матфея 3:2; Луки 1:12—17). Бут приашунделэ каринг лэстирэ алава. И мануша авэнас анда само дурутнэ ҭана анда Иудея. Вонэ камэнас тэ ашунэн, со во росԥэнэн, и бут ко андар лэндэ каисайлэ пала пэстирэ ӷрехоря и болделэ. Кадяжэ о Иоанно смило дэлас дума лэ барэ манушэнца анда веры, савэ фартэ заваздэнас о шэро. Во ԥэнэнас, со лэн аштярэл, если вонэ на парудёна (Матфея 3:5—12). Само важно, со сас андэ лэстири служэния, када сас осенью андо 29 бэрш лэ И. Х., кала во болдя лэ Иисусос. Кодэла времятар во ԥэнэнас аврэнди тэ жан пала Иисусо, саво сас Христос (Иоанна 1:32—37).

Лэ Иоанностэ сас фартэ важно дила, важ када о Иисусо ԥэндя важ лэстэ: «Машкар кодэла, кас арақадэ и жувля, на сас май баро чем о Иоанно Крестителё» (Матфея 11:11). О Иоанно канешно сас фартэ лошало, кай лэсти випэля кацави бах. Адес бут ԥрала и ԥэя кадяжэ терэн бут интересно дила андэ служэния лэ Иеговасти. Акэ примеро еқэ ԥралэско, савэс ақарэн Терри. Во и лэстири хулаи Сандра служынас полновременно май бут чем 50 бэрш. О Терри росԥэнэн: «Скати дила манди о Иегова дясас! Мэ служысаравас пианероса, андо вефилё, спецыально пианеро, раёно и областно надзирателё, и акана упалэ служысарав сар спецыально пианеро». Канешно, фартэ бари радость, кала терэс лэ Иеговастири дила. Но сар амэ диқас кода, со сас лэ Иоанноса, сытярэл амэн, кай тэ на хасарас и радость, трэбуй тэ стас зор.

АВЭН БЛАӶОДАРНИ

Лэ Иоанности Крестителёсти тэ на хасарэл и радость поможыяс и блаӷодарность. Важ лэстэ сас куч вся и время и дила, сави дэлас лэсти о Дэл. Диқам, со сас еқварэс. Посли кода, сар о Иисусо болделя, лэстэ ашэля май бут ученикоря, ай кай о Иоанно ученикоря ашэлэ май набут. Лэ Иоанностирэ ученикоря, савэ пэрэжывали пала када, ԥэндэ лэсти: «[О Иисусо] болэл и всаворэ жан каринг лэстэ» (Иоанна 3:26). О Иоанно ԥэндя лэнди: «И тэрни лэ тэрнэсти. Ай о пашутно лэ тэрнэско друӷо фартэ лошавэл, кала тердёл и ашунэл лэ тэрнэско ӷолосо. Кадя и мэ фартэ лошало» (Иоанна 3:29). О Иоанно на гиндояс, кай о Иисусо пэрэмарэл лэсти андэ варисостэ и на гиндояс, если кай о Иисусо май важно дила, тоди лэстири дила сас евья. Най, о Иоанно на хасарэлас и радость, важ кода кай во цэнияс и дила, сави лэсти динэ, када, кай тэ авэл «пашутно лэ тэрнэско друӷо».

И гиндоря, савэ сас кай о Иоанно, поможынас лэсти тэ ашэлпэ лошало, дажэ кала лэсти бут со сас нащи, кала во служыяс лэ Дэвлэсти. Например, во сар арақаделяпэ ашэля назареё, важ када лэсти нащи сас тэ пэл вино (Луки 1:15). Акэ со росԥэндя о Иисусо пала лэстири просто жызня: «Авеля о Иоанно, на хал и на пэл». Ай о Иисусо и лэстирэ ученикоря на андярэнас кацави жызня (Матфея 11:18, 19). Кадяжэ, о Иоанно на стердя ни ек чуда, но ӷанэнас, кай кацаво зор исин кай лэ Иисусостирэ ученикоря, машкар савэ сас и лэстирэ ученикоря (Матфея 10:1; Иоанна 10:41). Но о Иоанно важ када нэ пэрэжывал. Во вся пэско зор отдэлас пэ служэния, сави лэсти дя о Иегова.

Амэ на хасараса и радость, если важ амэндэ куч и дила, сави дэн тэ терас андэ лэ Иеговастири арӷанизацыя. Акэ со росԥэнэн о Терри, пала саво сас пистромэ май англал: «Кала манди дэнас варисави дила, мэ теравас ла анда вся оди». Кала во гиндой пала пэстири полновременно служэния, во росԥэнэн: «Мэ дажэ набут на жалуисарав, кати ек о лашимос сэрав».

Кай тэ авэл май бут радость андэ служэния лэ Иеговасти, трэбуй тэ гиндосарас, васо па чачимастэ куч любо дила, сави дэн андэ служэния. Ӷлавно, када, кай амэ «терас лэ Дэвлэса ек дила» (1 Коринфянам 3:9). Кучутни вещь ашэлапэ всегда лащи, если амэ вся и время ласа тэ следисарас пала латэ. Амэ кадяжэ ашасапэ лошалэ, если на парашаса тэ гиндосарас, сави бах, кай служысарас лэ Иеговасти. Амэ на ласа тэ сыстосарас кода, пэр со амэ жас ради служэния лэ Иеговасти, кодэлэса, пэр со жан авэр. Инке амэ на ласа тэ гиндосарас, кай и дила, сави дя амэнди о Иегова, най кадя дэ куч, чем и дила, сави во дэл аврэнди (Галатам 6:4).

ДИҚЭН ПЭ КОДА, СО КУЧ ВАЖ О ИЕГОВА

Можэт о Иоанно и ӷанэнас, кай лэстири служэния на авэла долӷо. Но во дажэ нэ моӷ тэ гиндой, кай вой кадя йто парашэла (Иоанна 3:30). Через епаш бэрш, посли кода, сар болделя о Иисусо, андо 30 бэрш лэ И. Х., о царё Иродо стодя лэ Иоаннос андо баруно. Но када на тердярдя лэ Иоаннос. Во терэлас вся, со сас андэ лэско зор, кай тэ росԥэнэн пала чачимос (Марка 6:17—20). Со поможыяс лэсти тэ на хасарэл и радость? Во диқэлас пэ кода, со куч важ о Иегова.

Кала о Иоанно бэшэлас андо баруно, во ашундя пала кода, сар драго жал и служэния кай о Иисусо (Матфея 11:2; Луки 7:18). О Иоанно патялас, кай о Иисусо, када Христос. Но во всаек камэлас тэ ӷанэн, сар о Иисусо стерэла всаворэ пророчества, савэ сас пала Христос. Сар сас пистромэ андэ Писания, о Христос трэбуй сас тэ ашэл царёса. Но сыкавэлас када, кай о Иисусо лэла тэ правий ужэ фартэ йто? И вижала лэстэ через када тэ вилэл лэ Иоаннос анда баруно? Кай май драго тэ полэл, со камэл тэ терэл о Иисусо, о Иоанно бишалдя дуе пэстирэ учениконэн тэ пушэн лэстар: «Ту кодэва, ко трэбуй тэ авэл, или амэ тэ аштярас аврэс?» (Луки 7:19). Кала и ученикоря рисайлэ, вонэ росԥэндэ лэ Иоанности, сар о Иисусо через и чуда виличисардя лэ насвалэн и одбишалдя лэ учениконэн каринг лэстэ тэ ԥэнэн лэсти: «И корэ диқэн, и ланганэ ԥирэн, и кодэлэндэ, кастэ сас чирки, савэндар тернёл и тила, виличисайлэ, и кашукэ ашунэн, кодэла, ко мулинэ, ринпэ каринг и жызня и лэ чорорэнди росԥэнэн и лащи весть» (Луки 7:20—22).

Кода, со росԥэндэ и ученикоря лэ Иоанности, дя лэсти зор. Во май драго поля, кай по Иисусо исполнинпэ и пророчества пала Христос. Хоть када и на сыкавэлас, кай о Иисусо поможыя лэсти тэ вижал анда баруно, но о Иоанно патялас, кай во най евья терэлас и дила. Дажэ кала лэсти сас фартэ ԥарэс, во всаек виарақэлас, васо тэ лошавэл.

Если амэ, сар о Иоанно диқас пэ кода, со куч важ о Иегова, амэндэ кадяжэ вижала вся тэ виритярас и тэ на хасарас и радость (Колоссянам 1:9—11). Важ када амэнди трэбуй тэ адиносарас и Библия и тэ гиндосарас пала кода, со адиносардям. Кадяжэ тэ на бистрас, кай амари служэния лэ Дэвлэсти нэ можэт тэ авэл евья (1 Коринфянам 15:58). Акэ, со росԥэнэн и Сандра: «Мэ кажно дес адиносарав по ек ӷлава анда Библия и полав, кай ашав май пашэ каринг о Иегова. Када поможый манди спэрва тэ гиндосарав пала Иегова, ай потом пала мандэ». Если амэ диқас андэ новости пала лэ Иеговаско народо, амэ тоди фартэ на загиндосавас пала пэско ԥаримос, ай гиндосарас спэрва пала лэ Иеговастири дила. И Сандра росԥэнэн: «Через кода, кай амэндэ исин Бродкастинго, амэ полас, кай ашас май пашэ каринг лэ Дэвлэстири арӷанизацыя. Ай инке када поможый амэнди тэ на хасарас и радость андэ служэния, сави амэнди динэ».

О Иоанно Крестителё служыяс найдолӷо, и во росԥэнэнас важ о чачимос, ԥэнэса, «лэ духоса и лэ зорэса, саво сас кай о Илья». Кай о Иоанно и кай о Илья по ди сас «кацаво жэ, сар и амэндэ» (Луки 1:17; Иакова 5:17). Если амэндэ андо ди исин блаӷодарность и диқас пэ кода, со куч лэ Иеговасти, амэ кадяжэ на хасараса и радость андэ служэния лэ Дэвлэсти, со бы тэ на авэл амэндэ андэ жызня.