СТАТЬЯ, КАЙ ТЭ СЫТЮВАС 4
О свынто духо ԥэнэн, кай вонэ лэ Дэвлэстирэ бэятцэ
«И кадэва духо ԥэнэн амэнди, кай амэ лэ Дэвлэстирэ бэятцэ» (РИМЛЯНАМ 8:16).
ДИЛИ 25 Особо народо
ПАЛА СО УӶАНАСА АНДА СТАТЬЯ?a
Андэ Пятидесятница о Иегова стердя чуда. Во дя о свынто духо варикай 120 лэ Иисусостирэ учениконэнди (Диқэн и абзацоря 1, 2.)
1, 2. Сави чуда тердяпэ андэ Пятидесятница андо 33 бэрш лэ И. Х.?
АНДО Иерусалимо андэ Пятидесятница 33 бэрш лэ И. Х. в курте тэсара андэ ек цэр андэ упруни комната стидэпэ варикай 120 лэ Иисусостирэ ученикоря (Деяния 1:13—15; 2:1). Май дэ англал каринг када о Иисусо приԥэндя лэнди тэ ашэнпэ андо Иерусалимо, кай лэнди тэ дэн особенно подарко (Деяния 1:4, 5). Со терэлпэ посли када?
2 Андэ Библия пистромэ: «И акэ па нэбо ашунделя шумо, сар ла баря балвалятар и о шумо ашэля ԥэрдо цэр». Посли када пэ шэрэ учениконэндирэ сжылэ, «сар ԥэнэса, найбарэ ягора», и тоди «пэр лэндэ пэ всаворэндэ сжыля о свынто духо» (Деяния 2:2—4). О Иегова дя лэнди о свынто духо, и када сас чуда (Деяния 1:8). Лэн пэрвонэн о Дэл помазал свынтонэ духосаb и дя лэнди пэрвонэнди тэ аштярэн англэ о лашимос, кай тэ правин лэ Иисусоса по нэбо.
САР АШЭН ПАМАЗАНИКОРЯ?
3. Васо андэ Пятидесятница андо 33 бэрш лэ И. Х. лэ Иисусостирэ ученикоря патянас, кай о Дэл помазал лэн свынтонэ духоса?
3 Погиндон, ԥэнэса, тумэ машкар лэ Иисусостирэ ученикоря, савэ стидэпэ андэ Пятидесятница андэ упруни комната. Тоди тумэ никала на бистэрдоп кода, со котэ сас. Кати погиндон, сар тумэнди по шэро змэкэлпэ варисо, сар ягора и тумэ залэн тэ дэн дума пэ разни шыба! (Деяния 2:5—12). Тумэ фартэ патяёп, кай када о Дэл помазал тумэн свынтонэ духоса. Всаворэ чи най памазаникоря кадя удивительно получисардэ и помазания? Най. Катар амэ када ӷанас?
4. Кала пэ памазаникоря андэ пэрво вико сжыля о свынто духо? Росԥэнэн.
4 Подам дума пала кода, кала о мануш можэт тэ ашэл памазанико? Най всаворэ христианоря ашэнас памазаникоря, кала болдёнас. Кодэла ученикоря, пала савэ амэ дям дума, сас най екжэнэ, пэр кастэ сжыля о свынто духо, андэ Пятидесятница андо 33 бэрш лэ И. Х. Посли када андэ кадэва жэ дес свынтонэ духоса сас помазани инке варикай 3 000 мануша. О свынто духо сжыля пэр лэндэ, кала вонэ болделэ (Деяния 2:37, 38, 41). Пэ самаритяноря сжыля о свынто духо, кала прожыля варисави время, посли кода, сар вонэ болделэ (Деяния 8:14—17). Ай по Корнилиё и лэско родо сжыля о свынто духо жы каринг кода, сар вонэ болделэ. Кацаво сас пэрво разо (Деяния 10:44—48).
5. Сар парудён лэ манушэстирэ гиндоря, кала во ашэл памазанико, и со пала када пистромэ андэ 2 Коринфянам 1:21, 22?
5 Акана подам дума пала кода, сар парудён лэ манушэстирэ гиндоря, кала во ашэл памазанико? Дэкасти спэрва ԥарэс тэ присытён каринг кода, кай лэн витидя о Иегова. Важ када вонэ нащи полэн: «Васо мэ?» Авэр памазаникоря диқэн пэ када па аврятэ. Сар бы тэ на авэл, но о апостоло Павло росԥэндя, со терэлпэ всаворэнца, ко ашэн памазаникоря: «Через лэстэ и пэр тумэндэ посли кода, сар патяе, стодэ печатьc, када о свынто духо, пала саво сас дино алав, и саво дэл ӷарантия, кай тумэндэ авэла кода, со тумэнди прижал» (Эфесянам 1:13, 14). Када сыкавэл, кай о Иегова через пэско свынто духо дэл лэнди драго тэ полэн, кай во лэн витидя. Через о свынто духо лэндэ исин ӷарантия чи залоӷо (завдатко) кодэлэсти, кай май англэ вонэ лэна тэ жувэн вечно по нэбо, ай най пэ ԥув. (Адиносар 2 Коринфянам 1:21, 22d.)
6. Со трэбуй тэ терэл о помазано христианино, кай лэстэ тэ авэл небесно наӷрада?
6 Если по христианино сжыля о свынто духо, сыкавэл када чи най, кай лэстэ ужэ исин и наӷрада по нэбо? Най. Кацаво христианино патял, кай о Иегова витидя лэс, кай тэ жувэл по нэбо. Но лэсти всаек трэбуй тэ на бистрэл кадэла алава: «Важ када, ԥрала, стон инке май бут зор, кай май драго тэ ритярдён кодэлэсти, каринг со тумэн ақардэ и витидэ. Кала терэна кадя, тумэ никала на змардёна па правильно дром» (2 Петра 1:10). Хоть лэ памазаникос и витидэ тэ жувэл по нэбо, лэстэ када авэла кати тоди, если во на парашэла тэ кандэл лэ Дэвлэс (Филиппийцам 3:12—14; Евреям 3:1; Откровение 2:10).
САР О ХРИСТИАНИНО ПОЛЭЛ, КАЙ ВО ПАМАЗАНИКО?
7. Сар о христианино полэл, кай во жувэла по нэбо?
7 Но сар о христианино полэл, кай во лэла тэ жувэл по нэбо? Атвето можно тэ виарақас андэ лэ Павлостирэ алава, савэ во ԥэндя кодэлэнди, кас о Дэл «витидя тэ авэн свынти». Во пистросардя лэнди: «Тумэнди на динэ духо, сар рабонэнди, савэстар тумэ упалэ тэ даран. Но тумэнди динэ духо, саво приля тумэн, сар пэстирэ шавэн. Через кадэва духо тумэ ԥэнэн: „А́вва, Дадэ!“ И кадэва духо ԥэнэн амэнди, кай амэ лэ Дэвлэстирэ бэятцэ» (Римлянам 1:7; 8:15, 16). Вижал, о Иегова через пэско свынто духо дэл лэ памазаниконэнди, кай вонэ драго тэ полэн, кай жувэна по нэбо (1 Фессалоникийцам 2:12).
8. Сар и алава, савэ запистромэ андэ 1 Иоанна 2:20, 27, сыкавэн, кай лэ памазаниконэнди на трэбуй, кай варико авэр тэ доԥэнэн, кай вонэ жувэна по нэбо?
8 И памазаникоря фартэ патян, кай жувэна по нэбо, важ кода кай о Иегова када дэл лэнди драго тэ полэн. (Адиносар 1 Иоанна 2:20e, 27f.) Канешно, лэ памазаниконэнди, сар и всаворэнди, трэбуй тэ сытён кай о Иегова и тэ цэнин кода, кай во лэн сытярэл через и собрания. Но лэнди на трэбуй, кай варико авэр тэ доԥэнэн, кай вонэ памазаникоря. Кай о Иегова исин о свынто духо, када само баро зор андэ люма. Через лэстэ во дэл лэ христианонэнди драго тэ полэн, кай вонэ жувэна по нэбо!
ВОНЭ АРАҚАДЕЛЭПЭ УПАЛЭ ЧЕРЕЗ О СВЫНТО ДУХО
9. Сар парудён лэ манушэстирэ гиндоря, кала во ашэл памазанико, и сар пала када пистромэ андэ Эфесянам 1:18?
9 Бут лэ Дэвлэстирэ служытеля нащи полэн, сар када помазани свынтонэ духоса. И када можно тэ полэс, важ кода кай кацаво випэрэл найбутэ манушэнди. О Иегова создал лэ манушэн тэ жувэн вечно най по нэбо, ай пэ ԥув (Бытие 1:28; Псалом 37:29). Но о Иегова витидя дэсавэн манушэн тэ жувэн по нэбо. Важ када, кала во помазал лэ манушэс свынтонэ духоса, кадэлэса во фартэ парувэл лэстирэ гиндоря и дэл лэсти тэ аштярэл авэр лашимос, саво авэла по нэбо. (Адиносар Эфесянам 1:18g.)
10. Со када тэ арақадёлпэ упалэ через о свынто духо? (Диқэн кадяжэ и сноска.)
10 Кала о христианино ашэл памазанико, во арақадёлпэ упалэh через о свынто духо. О Иисусо ԥэндя, кай на росԥэнэса точно кодэлэсти, ко най помазано, со када тэ арақадёлпэ упалэ через о свынто духо (Иоанна 3:3—8).
11. Сар парудёл о гиндо кай и христианоря, кала вонэ ашэн памазаникоря?
11 Сар парудёл о гиндо кай и христианоря, кала вонэ ашэн памазаникоря? Жы каринг кода, сар вонэ ашэлэ памазаникоря, важ лэндэ сас фартэ куч о лашимос, саво авэла вся и вечность пэ ԥув. Вонэ фартэ долӷо аштярэнас кодэя время, кала о Иегова улэла вся о найлашимос и рия о раё пэ ԥув. Вонэ, файма, аштярэнас тэ диқэн, кала ринапэ каринг и жызня лэндирэ чаче. Но кала вонэ ашэлэ памазаникоря, вся паруделя. Васо? На ԥэнэса, кай лэнди на ля тэ чалёл лашимос, саво авэла англэ пэ ԥув. Вонэ линэ кадя тэ гиндон най кодэлэстар, кай пэрэандярдэ варисаво баро ԥаримос. Вонэ на гиндон, кай и вечно жызня пэ ԥув авэла скучно. Вонэ кадя фартэ паруделэ через кода, кай о Иегова пэстирэ свынтонэ духоса парудя лэндирэ гиндоря и кода, со вонэ аштярэнас англэ.
12. Сар и памазаникоря полэн о лашимос, саво лэн аштярэл англэ, сар пистромэ андэ 1 Петра 1:3, 4?
12 Файма, дэсавэ памазаникоря гиндон, кай вонэ на ашэн кода, кай пэр лэндэ стодэ кацави патив. Но вонэ фартэ патян, кай о Иегова лэн витидя. Вонэ фартэ бахталэ и блаӷодарин лэ Дэвлэс, кала гиндон пала лашимос, саво лэн аштярэл англэ. (Адиносар 1 Петра 1:3, 4i.)
13. Сар и памазаникоря диқэн пэ жызня пэ ԥув?
13 Сыкавэл када, кай и памазаникоря камэн тэ мэрэн? Пэ кадэва вопросо дя атвето о апостоло Павло. Во сыстосардя лэ памазаниконэндири тила ла катунаса и пистросардя: «Амэ сам андэ кадэя катуна, и андэр латэ амэ ровас лэ ԥаримастар, най важ кода, кай камас тэ ашавас ла, сар бы тэ злас и йда пар пэстэ, ай важ кода, кай камас, кай тэ авэл амэндэ небесно катуна, кай и тила, сави мэрэл, тэ парудёл пэ тила, сави на мэрэл» (2 Коринфянам 5:4). Кадэлэ христианонэнди чалёл, кай вонэ жувэн пэ ԥув, и на аштярэн, кай май йто тэ мэрэн. Лэнди чалёл тэ жувэн и важ лэндэ куч кажно дес, саво вонэ проандярэн лэ ереса и лэ друӷонэнца андэ служэния лэ Иеговасти. Но вонэ вся и время сэрэн пала лашимос, саво лэн аштярэл англэ (1 Коринфянам 15:53; 2 Петра 1:4; 1 Иоанна 3:2, 3; Откровение 20:6).
ПОМАЗАЛ ИЕГОВА ТУТ ЧИ НАЙ ЛЭ СВЫНТОНЭ ДУХОСА?
14. Со на доԥэнэн, кай о мануш памазанико?
14 Можэт ту пушэс пэстар: «Ай можэт и ман о Иегова помазал лэ свынтонэ духоса?» Если тути кадя здэлпэ, тоди погиндосар пала кадэла вопросоря. Фартэ ту камэс чи най тэ терэс кода, со камэл о Иегова? Стос ту фартэ бут зор андэ служэния чи най? Чалёл тути чи най тэ сытёс па Библия и тэ полэс май драго лэ Дэвлэско чачимос? (1 Коринфянам 2:10). Блаӷословий чи най тут о Иегова андэ служэния? Полэс ту андо ди, кай тути фартэ трэбуй тэ поможыс аврэнди, кай лэндэ тэ авэл лащи дружба лэ Дэвлэса? Патяс ту чи най, кай о Иегова най еқварэс поможыяс тути, и када драго дицэля андэ тири жызня? Если ту дян атвето пэ кадэла вопросоря «да», доԥэнэн када чи най, кай ту памазанико? Най. Васо? Важ кода, кай кацаво можэт тэ авэл кай всаворэ лэ Дэвлэстирэ служытеля, ай най кати кай и памазаникоря. Лэ Иеговаско духо поможый всаворэ христианонэнди, и всаек, саво лашимос вонэ аштярэн англэ. Если ту гиндос, памазанико ту чи най, када ужэ сыкавэл, кай ту най памазанико. Кодэла, кас о Иегова витидя тэ жувэн по нэбо, вонэ кадя на гиндон. Вонэ драго полэн, кай помазани лэ свынтонэ духоса!
О Иегова дэлас о свынто духо лэ Авраамости, ла Саррати, лэ Давидости и лэ Иоанности Крестителёсти важ кода, кай вонэ тэ терэн удивительни дилы, ай най важ кода, кай вонэ тэ жувэн по нэбо (Диқэн и абзацоря 15, 16.)j
15. Катар амэ ӷанас, кай най всаворэ, пэр кастэ сжыля о свынто духо, лэна тэ жувэн по нэбо?
15 Андэ Библия бут пистромэ пала лэ Дэвлэстирэ служытеля, савэ на парашэнас лэс тэ кандэн, и савэнди о Дэл дя о свынто духо. Но вонэ на сас памазаникоря. Например, лэ Дэвлэско духо поможыяс лэ царёсти лэ Давидости (1 Самуила 16:13). Во поможыяс лэсти тэ полэл май драго чачимос важ о Иегова и подԥэнэнас лэсти тэ пистрой дэсо андэ Писания (Марка 12:36). И всаек андэ Пятидесятница о Пётро росԥэндя, кай о Давидо «на вазгляпэ по нэбо» (Деяния 2:34). Кадяжэ и по Иоанно Крестителё сас о свынто духо (Луки 1:13—16). О Иисусо ԥэндя, кай «машкар кодэла, кас арақадэ и жувля, на сас май баро чем о Иоанно Крестителё». Но инке во ԥэндя, кай о Иоанно на зажала андо небесно Царство (Матфея 11:10, 11). О Иегова дэлас кодэлэ служытелёнэнди о свынто духо важ кода, кай вонэ тэ терэн удивительни дилы, ай най важ кода, кай вонэ тэ жувэн по нэбо. Сыкавэл када чи най, кай вонэ май набут кандэнас, чем и памазаникоря? Най. Када просто сыкавэл, кай о Иегова рия лэн каринг и жызня тэ жувэн андо раё пэ ԥув (Иоанна 5:28, 29; Деяния 24:15).
16. Саво лашимос аштярэн бут лэ Дэвлэстирэ служытеля?
16 Адес бут лэ Дэвлэстирэ служытеля на аштярэн, кай жувэна по нэбо, сар и на аштярэнас када о Авраамо, и Сарра, о Давидо, о Иоанно Крестителё и бут авэр лэ Дэвлэстирэ служытеля, савэ жувэнас андэ библейско время. Вонэ нащи доаштярдён кодэя время, кала жувэна пэ ԥув, кала правия лэ Дэвлэско Царство (Евреям 11:10).
17. Пала савэ вопросоря подаса дума андэ авэр статья?
17 Адес машкар амэндэ инке жувэн пэ ԥув и памазаникоря, важ када амэндэ моӷут тэ авэн вопросоря (Откровение 12:17). Сар и памазаникоря трэбуй тэ полэн корко пэс? Сар трэбуй тэ полас кодэлэн, ко андэ амари собрания лэл тэ хал о марно и тэ пэл о вино по Вэчэро, кай сэрэн лэ Иисусостири смэрть? Трэбуй чи най тэ пэрэжываем, кай кацавэ манушэн ашэл май бут? Пала кадэла вопросоря подаса дума андэ авэр статья.
a Андэ Пятидесятница, сави сас андо 33 бэрш лэ И. Х., о Иегова ля тэ дэл дэсавэ христианонэнди лашимос, саво авэла англэ, када, кай тэ правин лэстирэ Шавэса по нэбо. Но катар кадэла христианоря ӷанэн, кай о Иегова лэн витидя? Сар парудён лэндирэ гиндоря, кала вонэ уӷанэн, кай о Иегова ақарэл лэн по нэбо? И атветоря амэ виарақаса андэ кадэя статья. Ла стердэ па статья анда «Сторожэво башня» пала январё 2016 бэрш.
b РОСԤЭНЭНПЭ, САР ТЭ ПОЛАС О АЛАВ. Помазани свынтонэ духоса чи памазаникоря, када мануша, савэн о Иегова витидя, кай вонэ тэ правин лэ Иисусоса по нэбо. Через пэско свынто духо о Дэл дэл лэнди ӷарантия кодэлэсти, со лэн аштярэл англэ (Эфесянам 1:13, 14). Кадэла христианоря моӷут тэ ԥэнэн, кай о свынто духо ԥэнэн лэнди чи дэл алав, кай лэнго лашимос по нэбо (Римлянам 8:16).
c РОСԤЭНЭНПЭ, САР ТЭ ПОЛАС О АЛАВ. Кадэя печать най пэ вся и время. Вой на сыкавэл, кай и памазаникоря, савэ на парашэн тэ кандэн лэ Дэвлэс, нэ моӷут тэ хасарэн о лашимос, саво авэла англэ. Ай и печать, сави стона пэ вся и время пэ памазаникоря, стона англа лэндири смэрть чи англа кода, сар тэ залэлпэ и само бари бида (Эфесянам 4:30; Откровение 7:2—4; диқэн андэ Источникоря важ и тетрадка, кай тэ сытювас «Дром и служэния» пала апрелё 2019 бэрш).
d 2 Коринфянам 1:21, 22: «Екжэно о Дэл помазал амэн, и во дэл алав, кай тумэ и амэ лэ Христостирэ. И во стодя пар мэндэ пэстири печать и дя амэнди о духо андэ амарэ одя, сар залоӷо [завдатко] кодэлэсти, со трэбуй тэ авэл».
e 1 Иоанна 2:20: «Тумэ помазани лэ Свынтонэстар, и всаворэ тумэ бут ӷанэн».
f 1 Иоанна 2:27: «Ай со жы каринг тумэндэ, и помазания, сави тумэндэ исин, лэстар, ашэлпэ пэр тумэндэ, и тумэнди на трэбуй, кай тумэн варико тэ сытярэл. Но кода, кай тумэ помазани лэстар, сытярэл тумэн всаворэсти. И помазания чачуни, андэр латэ нинай хохаимос. Сар и сытярэл тумэн и помазания, ашэнпэ еқэҭанэ кодэлэса, ко тумэн помазал».
g Эфесянам 1:18: «О Дэл ԥэрнавэл тумаро ди, кай тумэ тэ полэн, со тумэн аштярэл, кала во тумэн ақардя, и о барвалимос, саво нисоса на сыстойпэ, о Иегова дэла лэ свынтонэнди, сар кода, со лэнди прижал».
h Май бут пистромэ пала када, со сыкавэл тэ арақадёлпэ упалэ через о свынто духо, адинон андэ «Сторожэво башня» пала 1 апрелё пала 2009 бэрш андэ статьи «Новое рождение. Ведет ли оно к спасению?», «Новое рождение. Насколько оно важно?», «Новое рождение. Вопрос личного выбора?», «Новое рождение. Какова его цель?», «Новое рождение. Как оно происходит?», «Новое рождение. С какой переменой оно связано?», «Правители небесного Царства и его подданные».
i 1 Петра 1:3, 4: «Тэ блаӷословин амарэ Ӷосподостирэ лэ Иисусости Христостирэ Дэвлэс и Дадэс, саво жалуисардя анда вся оди, и дя амэнди нэви жызня через кода, кай о Иисусо рисайля каринг жызня, и отдя кода, со прижал амэнди, со никала на тернёл, вужо и никала на римойпэ. Вся када во фэрий важ тумэндэ по нэбо».
ДИЛИ 12 Иегова Велико Царё
j ПЭ КАРТИНКА. Бэшас амэ андо баруно пала кода, кай патяс андо Иегова, чи вольно росԥэнас важ о Дэл и сытярас лэ манушэн чачимасти, амэ аштярас о лашимос, саво авэла пэ ԥув андэ лэ Дэвлэско Царство.