Фэрисар и жызня — кучутно лэ Дэвлэско подарко

1. Пэ скати важ о Иегова куч амари жызня?

ПРЕЦТАВЬ, кай тиро друӷо подарисардя тути фартэ шукарни картина, сави стердя ашунгло художнико. Вой пурани и обрангли, дэкай ашэля май тускло и ԥарэля. Но всаек вой ашэл барэ ловэ, милионы долларов. Канешно, ту лэса тэ цэнис и тэ фэрис кадэва подарко. Амаро небесно Друӷо, о Иегова, тожэ подарисардя амэнди кучутно подарко — амари жызня. Ай инке о Иегова сыкадя, пэ скати дэ куч вой важ лэстэ, кала отдя пэстирэ Шавэс пала амэндэ (Иоан. 3:16).

2. Со аштярэл амэндар о Иегова, сар ԥэнэнпэ андэ 2 Коринфянам 7:1?

² О Иегова — кодэва, кастар жал и жызня (Пс. 36:9). О апостало Павло ԥэндя пала када: «Через лэстэ амэ жувас, ԥирас и ԥурдас» (Деян. 17:25, 28). Важ када амэ можэм тэ ԥэнас, кай и жызня — када подарко лэ Дэвлэстар. Во любий амэн и дэл вся, со трэбуй (Деян. 14:15—17). Но о Иегова на терэл чудеса, кай тэ подритярэл амари жызня. Во аштярэл, кай амэ пэстиря ригатар екжэнэ ласа тэ заботисавас, кай амэндэ тэ авэл лашо зор и лащи дружба лэса. (Проадинон 2 Коринфянам 7:1.) Васо трэбуй тэ фэрисарас пэско зор и жызня? И сар амэ можэм када тэ терас?

ЦЭНИСАР И ЖЫЗНЯ, ЛЭ ДЭВЛЭСКО ПОДАРКО

3. Васо важно тэ заботисавас пала пэско зор?

³ Васо амэнди трэбуй тэ заботисавас, кай амэндэ тэ авэл лашо зор? Амэ полас, кай кати тоди сможэм тэ служысарас лэ Иеговасти всаворэ́ зорэса (Мар. 12:30). Амэ камас тэ приашундювас каринг о библейско совето: «Отдэн лэ Дэвлэсти пэстири тила сар жэртва, сави жунди, свынто и уӷодно лэсти» (Рим. 12:1). Важ када амэ на ласа тэ терас кода, со римосардоп амаро зор. Канешно, амэ полас, кай дажэ если фартэ ласа тэ старысавас, амэндэ на вижала тэ фэрисарас пэс всаворэ насвалимастар. Но амэ пэстиря ригатар терас вся, кай тэ заботисавас пала пэско зор. Важ кода кай камас тэ сыкавас амарэ небеснонэ Дадэсти блаӷодарность пала лэско кучутно подарко — и жызня.

4. Со камэлас тэ терэл о царё Давидо?

⁴ О царё Давидо росԥэндя, васо во цэнияс лэ Дэвлэско подарко, и жызня: «Саво лашымос мэрня смэртятар, кодэлэстар, кай мэ жава андэ моӷила? Лэла о прахо тэ хвалий тут? Росԥэнэна во пала тири верность?» (Пс. 30:9). Возможно, о Давидо запистросардя кадэла алава тоди, кала ужэ поджалас лэстири время. Но во анда вся оди камэлас тэ жувэл май долӷо и тэ заботийпэ пала пэско зор, кай тэ служый лэ Иеговасти. И канешно, амэ всаворэ камас тэ терас кадяжэ.

5. Со амэ можэм тэ терас, дажэ если амэнди бут бэрша или амэндэ найлашо зор?

⁵ Через о насвалимос или ԥурэ бэрша амэндэ, возможно, на вижала тэ терас кадя бут, сар варикала. Кадэлэстар можэт тэ авэл фартэ ԥарэс. Но на умэкэн и вас! Авелоп нэправильно тэ гиндосарас, кай будэр на трэбуй тэ заботисавас пала пэско зор. Васо? Нэважно, скати амэнди бэрш и саво амэндэ зор, амэ всаек можэм тэ служысарас лэ Иеговасти, сар о царё Давидо. Амэн лэл лэ одестар, кай о Дэл фартэ цэний амэн, хоть амэ и нэсовершэни! (Матф. 10:29—31). И дажэ если амэнди прижалапэ тэ хасарас и жызня, во лэла фартэ тэ аштярэл и время, кала воскресия амэн (Иов 14:14, 15). Важ када пока марэлпэ амаро ди, давайте тэ терас вся, кай тэ фэрисарас пэско зор.

ДУРЮВ КОДЭЛЭСТАР, СО РИМОЙ О ЗОР

6. Сар о Иегова камэл, кай амэ тэ диқас по хамос и пимос?

⁶ Хоть и Библия — када най книжка пала зор и най пала полезно хамос, но андэр латэ росԥэнэнпэ, сар о Иегова диқэл пэ када. Например, котэ исин совето: «Оджа кодэлэстар, со анэна бида [или вредо] тиря тилати» (Эккл. 11:10). Андэ Библия ԥэнэнпэ, кай кала о мануш черезчур бут хал или пэл, када римой о зор и можэт тэ анэн каринг и смэрть (Прит. 23:20). О Иегова камэл, кай амэ тэ ритярас пэс андэ вас, кала витидас со и скати тэ хас или тэ пас (1 Кор. 6:12; 9:25).

7. Сар и алава анда Притчи 2:11 поможын амэнди тэ прилас годявэрнэ ришэнии пала амаро зор?

⁷ Кай тэ сыкавас лэ Дэвлэсти пэстири блаӷодарность пала жызня, амэ трэбуй тэ прилас и ришэния годяса (Пс. 119:99, 100; проадинон Притчи 2:11). Например, када поможыя амэнди, кала витидас, со тэ хас. Если амэнди чалёл варисаво хамос, но амэ ӷанас, кай во можэт тэ анэн амэнди вредо, амэ на ласа лэс тэ хас. Кадяжэ амэ сыкаваса, кай годяса прилас и ришэнии, если ласа тэ висоваспэ, тэ заласпэ спортоса, тэ слидосарас пала гигиена и пала вужимос андо цэр.

ТЕР ВСЯ, КАЙ ТЭ АВЭЛ БЕЗОПАСНО

8. Со о Дэл гиндой пала безопасность? Росԥэнэн.

⁸ О Иегова дя лэ израильтянонэнди законо. Андэр лэстэ сас указании, савэ поможынас тэ фэринпэ, кай тэ на терэлпэ нэожыдано бида цэрэ или пэ бути (Исх. 21:28, 29; Втор. 22:8). Если тердяпэ кацави бида и через када на ашэля лэ манушэс, тоди кодэва, ко дошало, трэбуй сас тэ атветит пала када (Втор. 19:4, 5). Андо законо дажэ сас пистромэ, сар трэбуй тэ просытярэн лэ манушэс, кала во дэзначай андя вредо лэ бэятости, саво инке на арақаделя (Исх. 21:22, 23). Сар дицол анда Свынто Писания, о Иегова камэл, кай амэ серьёзно тэ диқас пэ безопасность.

9. Со поможыя, кай тэ на терэлпэ нэожыдано бида? (Кадяжэ диқэн и картинка.)

⁹ Амэ сыкавас и блаӷодарность лэ Дэвлэсти пала лэско подарко, и жызня, кодэлэса, кай диқас пала безопасность цэрэ и пэ бути. Например, кала вишас востри предметоря, химия и драба, амэ заботисавас, кай када тэ на анэн вредо аврэнди, ай кадяжэ тэ на попэрэл андэ вас лэ бэятонэнди. Кадяжэ, кала амэ ԥабарас и яг, терявас о паи и используем инструменторя, амэ трэбуй тэ авас осторожни, кай тэ на ашавас када кадя и тэ на ужастар. Инке о христианино на бэшэла пала рулё, если во полэл, кай лэстэ найдраго терэл о шэро через и драба, савэ во пиля важ о зор, кала во мателя или на висутяпэ. Ай кала во андо дром, во на лэла андэ вас о телефоно.

КАЛА ФАРТЭ ԤАРИ СИТУАЦЫЯ АНДЭ ЛЮМА

10. Сар тэ подӷотовимся каринг и ԥари ситуацыя андэ люма и со амэ можэм тэ терас, кала вой ужэ тердяпэ?

¹⁰ Дэкала терэлпэ кода, со можэт тэ навредий амаря жызняти, и амэ най всегда можэм када тэ тердярас. Особено, кала терэлпэ природно бида, война или появийпэ эпидемия. Но андэ кадэла маменторя, амэ всаек можэм тэ фэрисавас. Сар? Если ласа тэ кандас лэ властен, кала вонэ ԥэнэн тэ на вижас цэрал андэ определёно время, тэ уладастар котар, кай амэ жувас или инке варисо (Рим. 13:1, 5—7). Дэсавэ опасни ситуацыи можно тэ додиқас май данглал. Важ када, кала и катутнэ власти дэн и указании, амаря ригатар авелоп годявэрнэс тэ приашундювас каринг када. Например, амэ можэм тэ позаботисавас, кай цэрэ тэ авэл май бут паи, хамос, саво долӷо проритярдёла, ай кадяжэ, кай тэ авэн драба важ и пэрво помощь.

11. Со трэбуй тэ терас, кала ӥто розжалпэ и инфекцыя?

¹¹ Со трэбуй тэ терас, если котэ, кай амэ жувас, ӥто розжалпэ и инфекцыя? Амэ ласа тэ терас кадя, сар ԥэнэн и власти, кай трэбуй тэ халавас и вас, тэ ритярас и дистанцыя, тэ ԥиравас и маски и тэ бэшас по карантино. Если амэ кадя терас, тоди сыкавас, кай цэнисарас и жызня — кучутно лэ Дэвлэско подарко.

12. Сар о принцыпо анда Притчи 14:15 поможый тэ полас, каринг со трэбуй тэ приашундювас, кала андэ люма фартэ ԥари ситауцыя?

¹² Кала андэ люма фартэ ԥари ситауцыя, амэ можэм тэ ашунас най чачуни инфармацыя. Пала латэ амэ можэм тэ уӷанас лэ друӷонэндар, лэ сосидонэндар или анда новости. Чем тэ патяс любонэ алавэсти, авелоп май драго тэ приашундювас каринг и точно инфармацыя, сави ԥэнэн и мануша анда правительство или врачоря. (Проадинон Притчи 14:15.) Англа кода, сар о Руководящё совето и филиалоря тэ дэн и указании пала собрании и проповедь, вонэ фартэ драго проверяют и инфармацыя (Евр. 13:17). Если амэ прилас лэнго руковоцтво, амэ фэрисарас пэс и аврэн. Кадяжэ, блаӷодаря кодэлэсти, кай амэ кандас, и собрания затерэл лашо алав англа мануша (1 Пет. 2:12).

РИТЯРДЁН МАЙ ДУР ЛЭ РАТЭСТАР

13. Сар амэ сыкавас, кай цэнисарас и жызня, кала ритярас лэ Иеговаско законо пала рат?

¹³ Бут мануша ӷанэн, кай важ лэ Иеговастирэ свидетеля о рат свынто. Амэ сыкавас, кай ритярас лэ Иеговаско законо пала рат, кала отԥэндювас лэс тэ пэрэшас, дажэ тоди, кала трэбуй срочно помощь лэ врачонэндар (Деян. 15:28, 29). Но када на сыкавэл, кай амэ на камас тэ жувас. Наоборот, амэ фартэ цэнисарас и жызня, сави подарисардя амэнди о Иегова. Амэ обратисавас каринг и врачоря, савэ професионально терэн пэстири бути и ӷотови тэ личин би ратэско.

14. Со амэ можэм тэ терас, кай амэнди тэ на прижалпэ серьёзно помощь лэ врачонэндар?

¹⁴ Если амэ заботисавас пала пэско зор и терас кода, пала со дям дума андэ кадэя статья, тоди, возможно, амэнди на прижалапэ тэ терас операцыя или авэр серьёзно личения. И если амэндэ лашо зор, амэ май ӥто востановимся посли операцыя. Ай инке, цэрэ и пэ бути амэнди трэбуй тэ улас вся, со можэт тэ анэн вредо амаря жызняти. Кадя жэ амэ ласа тэ саблюдаем и правила, савэ стодэ важ и движэния по дром. Если амэ кадя тераса, амэ сможэм тэ фэрисавас кодэлэстар, кай тэ на авэн и ситуацыи, андэ савэ авэла трэбуй помощь лэ врачонэндар.

15. а) Васо трэбуй вся и время тэ ԥиравас пэса о лил «Волеизъявление»? (Кадяжэ диқэн и картинка.) б) Сар годяса тэ прилас и ришэнии тоди, кала андэ личения используеца о рат? (Диқэн и сноска.)

¹⁵ Амэ цэнисарас и жызня и важ када вся и время ԥиравас пэса заполнено лил «Волеизъявление и доверенность относительно медицинского вмешательства». Андэр лэстэ ԥэнэнпэ, кай амэнди тэ на пэрэшон о рат, и сар амэ диқас пэ авэр разни медицынски процэдуры. Ай андэ тиро «Волеизъявление» на трэбуй варисо тэ парувэс? Если трэбуй, заполни или обнови лэс. На отсто кадэя дила. Если андэ кадэва лил амэ понятно пистросардям, сар амэ камас, кай амэн тэ личин, тоди, кала амэнди авэла трэбуй помощь лэ врачонэндар, вонэ смоӷут май ӥто када тэ стерэн. Кадэлэса амэ кадяжэ поможысараса лэ врачонэнди, кай вонэ тэ на используют кодэя личения, сави анэна амэнди вредоb.

16. Со амэ можэм тэ стерас, если на ӷанас, сар тэ заполним о лил «Волеизъявление»?

¹⁶ Любо мануш, дажэ если во тэрно и зорало, можэт тэ попэрэл андэ бида или тэ занасвавэл (Эккл. 9:11). Важ када авелоп годявэрнэс тэ заполним о лил «Волеизъявление». Если ту на ӷанэс, сар када тэ стерэс, манг помощь кай и барэдэр ԥрала андэ собрания. Вонэ на лэна тэ прилэн и ришэния важ тутэ, сави личения тути поджала. Када ту трэбуй тэ стерэс екжэно (Гал. 6:4, 5). Но вонэ моӷут тэ поможын тэ розлэспэ андэ кода, сави исин личения и сар можно тэ пистрос пала пэстирэ ришэнии.

АВ ГОДЯВЭР

17. Андар со дицола, кай амэ годявэрнэс поджас каринг и вопросоря пала зор?

¹⁷ Амари совесть, сави сытярди па Библия, поможый амэнди тэ полас, сар тэ заботисавас пала пэско зор и сави личения тэ витидас (Деян. 24:16; 1 Тим. 3:9). Кала амэ прилас ришэния и дас дума пала када аврэнца, амэнди трэбуй тэ терас кадя, сар пистромэ андэ Филиппийцам 4:5: «Мэк всаворэ ӷанэн, кай тумэ блаӷоразумни». Если амэ андярас пэс кадя, тоди на ласа черезчур тэ пэрэжываем пала пэско зор. Кадяжэ амэ на ласа тэ тасавас пэ авэр, кай вонэ тэ гиндон кадяжэ, сар амэ. Амэ любисарас лэ ԥралэн и лэ ԥэян и стас патив пэр лэндэ, дажэ если вонэ прилинэ авэр ришэния, най кацави, сар амэ (Рим. 14:10—12).

18. Сар амэ можэм тэ сыкавас и блаӷодарность лэ Иеговасти пала жызня?

¹⁸ Сар амэ можэм тэ сыкавас лэ Иеговасти и блаӷодарность пала жызня? Амэ фэрисарас ла и отдас лэ Дэвлэсти со май лашо, со амэндэ исин (Отк. 4:11). Чаче, акана амэнди прижалпэ тэ пэрэандярас разно насвалимос и биды. Но амаро Создателё загиндосардясас важ амэндэ най кацави жызня. Ӥто во подария амэнди вечно жызня, кай нинай дук и смэрть (Отк. 21:4). Ай пока кадэя время инке на авеля, давайте тэ цэнисарас, кай амэ жувас и можэм тэ служысарас амарэ небеснонэ Дадэсти, лэ Иеговасти!