СТАТЬЯ, КАЙ ТЭ СЫТЮВАС 24
Отшон люби гиндоря, савэ на сжанпэ кодэлэса, сости сытярэл о Дэл!
«Амэ отшас и найлашэ гиндоря и розмарас вся, со на домэкэл лэ манушэн тэ уӷанэн лэ Дэвлэс» (2 КОРИНФЯНАМ 10:5).
ДИЛИ 124 Преданы Богу всегда
ПАЛА СО УӶАНАСА АНДА СТАТЬЯ?a
1. Со о апостоло Павло ԥэндя лэ памазаниконэнди?
О АПОСТОЛО Павло пистросардя лэ христианонэнди андэ пэрво вико: «Парашэн тэ гиндон и тэ терэн, сар и мануша андэ кадэя люма» (Римлянам 12:2). Васо о апостоло Павло ԥэндя кадэла алава лэ ԥралэнди и лэ ԥэянди, савэ динэ алав лэ Иеговасти тэ жувэн важ лэстэ и савэ сас памазаникоря? (Римлянам 1:7).
2, 3. Со о Сатана терэл, кай тэ одындярэл амэн лэ Иеговастар, и сар тэ улас и найлашэ гиндоря, савэ идоси састэс ритярдён?
2 О Павло пэрэжывал, кай пэ дэсавэ христианоря влияли и гиндоря и кода, со ашундёл андо миро, савэса правий о Сатана (Эфесянам 4:17—19). Варисо кацаво можэт тэ авэл и амэнца. О Сатана камэл тэ одындярэл амэн лэ Иеговастар и во терэл када через разни ловушки. Например, во можэт тэ заманий кодэлэса, кай амэ фартэ любисарас корко пэс и камас, кай пар мэндэ тэ шон май бут сама. Кай тэ залас лэстири риг, во можэт тэ обхохавэл амэн дажэ через кода, сар амэн барярдэ, со за амэндэ образования и сави культура.
3 Ай можэм амэ тэ стерас кадя, кай амэндэ тэ на авэн и найлашэ гиндоря, савэ идоси састэс ритярдён? (2 Коринфянам 10:4). Шон сама пэ кода, со пистросардя о Павло: «Амэ отшас и найлашэ гиндоря и розмарас вся, со на домэкэл лэ манушэн тэ уӷанэн лэ Дэвлэс. Амэ лас кажно гиндо андо плено, кай о гиндо тэ авэл кандино лэ Христости» (2 Коринфянам 10:5). Да, лэ Иеговастирэ зорэса амэ можэм тэ отшас люби найлашэ гиндоря. Сар о драб можэт тэ улэл о ядо, кадя жэ и Библия поможый тэ улэл кода, сости сытярэн и мануша анда лэ Сатанаско миро.
«ПАРУДЁНПЭ И ГИНДОН ПА АВРЯТЭ»
4. Со тердэ бут андар мэндэ, кай тэ парудён, кала уӷанглэ о чачимос?
4 На бистрэн, со тумэ тердэ, кай тэ парудён, кала уӷанглэ о чачимос анда Библия и линэ тэ служын лэ Иеговасти. Бутэнди андар мэндэ трэбуй сас тэ парувас пэстири жызня (1 Коринфянам 6:9—11). Амэ фартэ лошалэ, кай о Иегова дя амэнди зор тэ парашас тэ терас и найлашэ дилы.
5. Пала савэ дуй маменторя пистромэ андэ Римлянам 12:2?
5 Амэнди на трэбуй тэ гиндосарас, кай ужэ на трэбуй ни андэр со тэ парудювас. Кала амэ ашэлям христианоря, амэ будэр на терас баро бэзэх. Но амэнди всаек трэбуй тэ фэрисавас всаворэстар, через со амэ упалэ моӷли бы тэ андярас пэс найдраго. Со амэнди андэ када поможыя? О Павло ԥэнэнас лэ христианонэнди: «Парашэн тэ гиндон и тэ терэн, сар и мануша андэ кадэя люма. Парудёнпэ и гиндон па аврятэ» (Римлянам 12:2). Трэбуй тэ стерас акэ со. Пэрво, тэ парашас тэ гиндосарас и тэ терас, сар и мануша андэ кадэя люма. Ай дуйто, тэ на парашас тэ парувас пэстирэ гиндоря.
6. Сости сытярэн амэн лэ Иисусостирэ алава, савэ запистромэ андэ Матфея 12:43—45?
6 Кала о Павло ԥэндя тэ парудювас, во на гиндояс, кай трэбуй тэ парудювас кати упрал, тэ парувас и йда и причоска, ай кай вся тэ авэл драго. Трэбуй тэ парудювас андэ вся. (Диқэн и рамка «Парудён, ай най кати терэн о видо».) Трэбуй тэ на парашас тэ парувас пэстирэ гиндоря. Када тэ гиндосарас па аврятэ, тэ парувас, со амэндэ андо ди и каринг со амэн цырдэл. Важ када кажно трэбуй тэ пушэл корко пэстар: «Мэ андэ вся парудював, кай тэ авав христианино чи кати терав о видо?» О атвето пэ кадэва вопросо фартэ важно. Андэ Матфея 12:43—45b о Иисусо росԥэндя, со амэнди трэбуй тэ терас. (Адиносар.) Лэстирэ алава драго сытярэн, кай на хутилэл кати тэ улас найлашэ гиндоря. Но пэ лэнго ҭан амэндэ трэбуй тэ авэн лашэ гиндоря, савэнца радосараса лэ Иеговас.
ТРЭБУЙ «ТЭ НА ПАРАШЭН ТЭ ГИНДОН ПА АВРЯТЭ»
7. Сар тэ парудювас всаворэ ригэндар?
7 Вижал амэндэ тэ парудювас всаворэ ригэндар? Андэ Библия пистромэ: «тэ терэн вся, кай тэ гиндон па аврятэ и тэ жувэн нэвя жызняса, кацавяса, сар камэл о Дэл, кай тумэ тэ терэн вся, кай тэ авэн андэ чачуни праведность и преданность» (Эфесянам 4:23, 24). Да, тэ парудёс можно, кати када найвушэро. Амэнди трэбуй най просто тэ улас и найлашэ жылании и тэ на терас нисо вэрыто. Ай трэбуй тэ гиндосарас па аврятэ. Важ када трэбуй тэ парувас кода, сар амэ пэс андярас, со амэ камас и васо амэ када камас. И када трэбуй тэ на парашас тэ терас вся и время.
8, 9. Сар кода, со стердя ек ԥрал, сыкавэл, пэ скати важно тэ парувэс пэстирэ гиндоря?
8 Акэ, со тердяпэ еқэ ԥралэса, саво варикала часто марэласпэ. Во мэкля тэ пэл и парашэля тэ марэлпэ. Када драго сыкадя, кай во паруделя и када диқлэ всаворэ, ко жувэлас андэ лэско гав. Но посли кода, сар во болделя, тердяпэ акэ со. Еқвар вэчэром, каринг лэско цэр поджыля варисаво мато мануш и ля тэ долэлпэ лэстэ, кай во тэ вижал тэ марэлпэ лэса. Спэрва о ԥрал зритярделяпэ. Но кала о мато мануш ля тэ ԥэнэн найлашэ алава по Иегова, амаро ԥрал на виритярдя. Во вижыля анда цэр и мардя кодэлэ манушэс. Васо во на зритярдя корко пэс? Хоть кода, кай во сытеля па Библия и поможысардя лэсти тэ зритярэл и холи, но во всаек гиндояс кадя, сар гиндояс варикала.
9 Но о ԥрал на умэкля и вас (Притчи 24:16). И старейшыноря поможысардэ лэсти, кай во па чачимастэ тэ парудёл. Прожыля время и во екжэно ашэля старейшына. Посли кодэва случаё прожылэ варисавэ бэрша и упалэ кацаво тердяпэ. Еқвар вэчэром, ворта паша зало, кай тидэнпэ лэ Иеговастирэ свидетеля, мато мануш камля тэ марэл еқэ старейшынас. Со стердя о ԥрал? Во ковлэс и анда оди подя дума лэ матэ манушэса, уля лэс и поможысардя лэсти тэ дожал цэрэ. Васо пэ кадэва разо о ԥрал тердя па аврятэ? Во ля тэ гиндой па аврятэ. Акана во, блаӷодаря лэ Иеговасти, ашэля авэр мануш, савэстэ ковло ди и ашэля спокойно.
10. Со трэбуй тэ терэс, кай андэ вся тэ парудёс?
10 Кай о мануш кадя тэ парудёл, пэ када трэбуй время. Можэт тэ парудювас амэнди прижалапэ бут бэрша, и важ када пэстиря ригатар трэбуй тэ стас вся пэско зор (2 Петра 1:5). Важ када трэбуй най кати просто тэ авэс лэ Иеговаско свидетелё. Трэбуй тэ старыиспэ и тэ стос зор, кай тэ парувэс пэстирэ гиндоря. Подам дума, со поможыя амэнди андэ када.
САР ТЭ ПАРУВАС ПЭСТИРЭ ГИНДОРЯ?
11. Сар и молитва поможыя амэнди тэ парувас пэстирэ гиндоря?
11 Пэрво, када трэбуй тэ мангаспэ. Драго када сыкадя амэнди о псалмопевцо, саво пистросардя: «Дэ манди тэ авэл вужо ди, дэ манди нэвэ и састэстэ гиндоря» (Псалом 51:10). Трэбуй тэ прижанас, кай амэнди фартэ трэбуй тэ парувас пэстирэ гиндоря и амэ катэ на обжасапэ би лэ Иеговастирэ зорэско. Васо можно тэ патяс, кай о Иегова поможыя амэнди тэ парудювас? На бистрам, со во ԥэндя лэ израильтянонэнди, савэ терэнас па пэстирятэ андэ кодэя время, кала жувэлас о Иезекиилё. Во ԥэндя: «Мэ стидава лэндирэ одя, кай тэ авэн, сар ек оди и дава лэнди нэвэ гиндоря. Мэ... дава лэнди манушыкано ди [када оди, саво прилэл лэ Дэвлэстирэ алава]» (Иезекииль 11:19). О Иегова камля тэ поможый лэ израильтянонэнди тэ парудён. Во камэл и акана амэнди тэ поможый.
12, 13. а) Пала со амэнди трэбуй тэ гиндосарас, сар пистромэ андэ Псалом 119:59? б) Со можно пэстар тэ пушэс?
12 Дуйто, када тэ гиндосарас. Кала кажно дес адиносарас и Библия, трэбуй тэ витидас и время, кай драго тэ погиндосарас, савэ гиндоря и качестворя амэнди трэбуй тэ отшас пэстар. (Адиносар Псалом 119:59c; Евреям 4:12; Иакова 1:25.) Важ кода кай пар мэндэ тасавэл кадэва миро, амэ трэбуй тэ полас, каринг со амэн цырдэл и со амэ камас. Инке трэбуй тэ полас, андэр со амэнди трэбуй тэ парудювас и анда вся зор када тэ терас.
13 Например, можно тэ пушас пэстар: «На ашэляпэ андэ мэрно ди хоть набут, кай мэ тэ завидуисарав чи заваздав о шэро? (1 Петра 2:1). Абуросарав мэ андэ кода, ко мэ сым, сави мандэ образования чи саво мандэ барвалимос? (Притчи 16:5). На гиндосарав мэ, кай мэ май лашо лэ манушэндар, савэндэ нинай кода, со исин мандэ чи савэндэ авэр нацыя? (Иакова 2:2—4). Чалёл манди чи най варисо андо миро, савэса хулаий о Сатана? (1 Иоанна 2:15—17). Чалён манди и развличении, андэ савэ исин найлашимос и билажавардимос? (Псалом 97:10; 101:3; Амос 5:15)». Атветоря пэ кадэла вопросоря поможына тэ полас, андэр со трэбуй тэ парудювас. Кала амэ паруваса кода, каринг со амэн цырдэл, амэ ласа тэ радосарас амарэ небеснонэ Дадэс (Псалом 19:14).
14. Васо кадя важно тэ ӷанас, каса тэ дружысарас?
14 Трито, трэбуй тэ ӷанас, каса тэ дружысарас. Камас амэ када чи най, но пар мэндэ фартэ влияет кода, каса амэ проандярас время (Притчи 13:20). Пэ бутятэ амэ чи андэ школа, паша амэндэ кацавэ мануша, савэ на поможына, кай амэндэ май бут тэ авэн гиндоря, савэ радосардоп лэ Дэвлэс. Ай пэ собрания ԥэнэн, тэ любисарас и тэ терас лашимос (Евреям 10:24, 25). Кати котэ амэ можэм тэ арақас лашэ друӷонэн.
МЭК ТУМЭН НИКО ТЭ «НА ЗМАРЭЛ» КОДЭЛЭСТАР, АНДЭР СО ТУМЭ ПАТЯН
15, 16. Со терэл о Сатана, кай амэ тэ гиндосарас сар во?
15 На бистрэн, кай о Сатана старыийпэ, кай амэ тэ гиндосарас сар во. Во замарэл амэнди гиндоря, кай амэндэ май набут тэ ашэлпэ о лашимос, савэстэ амэ сытелям анда Библия.
16 Андэ люма, савяса хулаий о Сатана, амэндар часто пушэн кода, со варикала о Сатана пушлясас ла Еватар андо Эдэмско садо: «Ай чаче, о Дэл ԥэндя?..» (Бытие 3:1). И када можэт амэн тэ змарэл лэ чачимастар. Часто ԥэнэн: «Ай чаче, о Дэл на камэл, кай тумэ тэ терэн о Кричуно и день рождения? Ай чаче, тумаро Дэл на камэл, кай тумэ тэ пэрэшон о рат? Ай чаче, о Дэл, саво любий лэ манушэн, на камэл, кай тумэ тэ дэн дума лэ родоса чи лэ друӷонэнца, савэн исключисардэ анда собрания? Ай чаче, о Дэл против кода, кай тэ авэн бут хулая?»
17. а) Со тэ терас, кала варико задэл амэнди кацавэ вопросоря, через савэ амэ ласа тэ на допатяс лэ Иеговасти? б) Со трэбуй тэ домардювас, сар пистромэ андэ Колоссянам 2:6, 7?
17 Амэндэ трэбуй тэ авэл састи вера. Васо? Исин важни вопросоря, савэ поможын амэнди тэ полас, андэр со амэ патяс. Если амэ на виарақаса атветоря пэ кадэла вопросоря, вонэ анэна амэнди авэр гиндоря, через савэ амэ ласа тэ на допатяс лэ Иеговасти. Сар када тэ на домэкас? Андэ Библия пистромэ, кай амэ тэ парувас пэстирэ гиндоря, кай драго тэ полас лэ Дэвлэстири воля, сави чалёл, лащи и совершэно (Римлянам 12:2). Кала амэ на промэкас тэ сытювас па Библия и па амари литература, амэ можэм инке май драго тэ полас, кай кода, андэр со амэ патяс, чачимос. Амэ диқас, кай лэ Иеговастирэ законоря справедливи. Тоди амари вера авэла кацави састи, сар, ԥэнаса, барэ и састэ ла виткатирэ корнёря. (Адиносар Колоссянам 2:6, 7d.)
18. Со поможыя тэ на пэрэлас и гиндоря лэ манушэндар, савэ на патян андо Иегова?
18 Кати тумэ екжэнэ можэте тэ стерэн кадя, кай май фартэ тэ патян лэ Иеговасти. Важ када на парашэн тэ парувэн пэстирэ гиндоря. На парашэн тэ мангэнпэ и тэ мангэн кай о Иегова свынто духо. Сытён тэ гиндон, розлэнпэ андэ кода, каринг со тумэн цырдэл и со тумэ камэн. Правильно витидэн лэ друӷонэн и проандярэн и время кодэлэнца, ко поможыя тумэнди тэ гиндон па аврятэ. И тоди тумэндэ вижала тэ улэн найлашэ гиндоря, савэ сар о ядо, кодэлэ манушэндар, савэ на патян андо Иегова. Кадяжэ тумэндэ вижала тэ улэн «вся, со на домэкэл, кай и мануша тэ уӷанэн лэ Дэвлэс» (2 Коринфянам 10:5).
ДИЛИ 50 Молитва посвящения
a Можэт амэ када и на камас, но пар мэндэ влияет кода, со амэнца сас варикала, амари культура и сави амэндэ образования. Амэ можэт полас, кай амэндэ састэс ритярдён и найлашэ гиндоря. Андэ кадэя статья амэ подаса дума, со тэ терас, кай вонэ амэндэ тэ на авэн.
b Матфея 12:43—45: «Кала о бэнг вижал анда мануш, тоди во жал па ԥув, кай нинай паи и родэл, кай тэ ашэлпэ, но нисо на арақэл. Тоди во ԥэнэн: „Рисавава андо цэр, анда саво мэ вижылэм“. И кала авеля, диқэл, кай андо цэр вишуладо, вся притидо, нико интя на зажыля. Тоди во жал и лэл пэса семь аврэн бэнгэн инке май холинатирэн, чем во екжэно. И кала зажан андэ кодэва цэр, ашэнпэ котэ тэ жувэн. Тоди лэ манушэсти ашэл инке май вэрыто, чем сас спэрва. Кадя авэла и кадэла найлащя поколенияса».
c Псалом 119:59: «Мэ гиндосаравас пала пэстирэ дрома, кай тэ рисавав каринг кода, со ту манди ԥэнэсас».
d Колоссянам 2:6, 7: «Важ кода кай патяе андо Ӷосподо, андо Иисус Христос, и май дур гиндон и терэн кадя, сар во. Май драго полэн лэс, май фартэ патян андэр лэстэ и нико тумэн мэк на змарэл, кай тумэ тэ патян андэр лэстэ. Тэ авэл тумэндэ фартэ састи вера, сар тумэн и сытярдэ и тэ авэн фартэ блаӷодарни».