Ай тумэ гиндон кадя, сар о Дэл?

1, 2. а) Со ԥэндя о Иисусо лэ Петрости, кала кодэва ԥэндя, кай о Иисусо тэ жалуий пэс? (Диқэн и картинка англа статья.) б) Васо о Иисусо кадя ԥэндя?

ЛЭ ИИСУСОСТИРЭ учениконэнди на патяласпэ. Вонэ гиндонас, кай о Иисусо стерэла кадя, кай о израильско царство лэла упалэ тэ правий. Но о Иисусо ԥэндя лэнди, кай йто лэсти прижалапэ тэ пэрэжувэл баро ԥаримос и тэ мэрэл. Пэ када о апостоло Пётро ԥэндя: «Ӷосподо, жалуисар пэс. Тэ на авэл туса кацаво никала. О Иисусо катэ жэ ԥэндя лэсти: «„Вижа мандар, Сатана! Ту змарэс ман па правильно дром, важ кода кай ту гиндос най важ лэ Дэвлэско, ай важ лэ манушэско“» (Матфея 16:21 жы кай 23; Деяния 1:6).

² Кадэлэ алавэнца о Иисусо сыкадя, кай кода, сар гиндой о Дэл, на шолпэ кодэлэса, сар гиндон и мануша андэ кадэя люма, савяса хулаий о Бэнг (1 Иоанна 5:19). Анда лэ Петростирэ алава, савэ во ԥэндя лэ Иисусости дицэля, кай во гиндой кати пала пэстэ, сар и май бут мануша андэ кадэя люма. Но о Иисусо ӷанэнас, кай о Иегова гиндояс па аврятэ. О Дэл камэлас, кай о Иисусо тэ ӷанэн, кай англэ лэстэ авэла о ԥаримос и кай во кадэлэстар тэ на дарал. О Иисусо драго сыкадя, кай гиндой кадя, сар о Иегова и на камэл тэ гиндой кадя, сар и мануша андэ люма.

3. Васо ԥарэс тэ на гиндосарас кадя, сар и мануша андэ кадэя люма?

³ Ай со можно тэ ԥэнас пала амэндэ? Амэ гиндосарас сар о Иегова чи, сар и мануша андэ кадэя люма? Сар христианоря амэ терас вся, со камэл о Дэл. Но со можно тэ ԥэнас пала кода, сар амэ гиндосарас? Гиндосарас амэ и диқас пэ вся кадя, сар о Иегова? Пэ када трэбуй бут зор. Но тэ лас тэ гиндосарас кадя, сар и мануша андэ кадэя люма фартэ вушэро. Васо? Важ кода кай, сар гиндон и терэн и мануша андэ кадэя люма амэ диқас везде (Эфесянам 2:2). Кадяжэ и мануша андэ кадэя люма, гиндон кати пала пэстэ и важ када амэнди можэт тэ закамэлпэ тэ гиносарас кадя жэ, сар и вонэ.

4. а) Со авэла, сар амэ домэкаса пэсти кацавэ гиндоря, сар кай и мануша андэ кадэя люма? б) Пала со амэ уӷанаса, кала адиносараса кадэя статья?

⁴ Сар амэ домэкаса пэсти кацавэ гиндоря, сар кай и мануша андэ кадэя люма, тоди амэ ласа тэ гиндосарас кати пала пэстэ и закамаса екжэнэ тэ витидас со лашимос, ай со найлашимос (Марка 7:21, 22). Акэ васо трэбуй тэ сытювас тэ гиндосарас кадя, сар гиндой о Дэл, ай най и мануша. Анда кадэя статья амэ уӷанаса, сар тэ диқас пэ вся кадя, сар диқэл о Иегова. Амэ уӷанаса, васо ԥэнэса, кай када на сԥандэл амарэ вас, ай анэн кати о лашимос. Кадяжэ амэ уӷанаса, со трэбуй тэ терас, кай тэ на гиндосарас кадя, сар гиндон и мануша андэ кадэя люма. Ай анда авэр статья амэ уӷанаса, сар тэ полас, сар о Иегова диқэл пэ варисо и сар амэнди тэ диқас пэ кода кадя жэ.

ВАСО ТЭ ГИНДОСАРАС КАДЯ, САР О ИЕГОВА, АНЭН ЛАШИМОС?

5. Васо дэсавэ мануша на камэн тэ гиндон кадя жэ, сар авэр?

⁵ Дэсавэ мануша на камэн, кай авэр лэнди тэ росԥэнэн, сар вонэ тэ гиндон. Вонэ ԥэнэн: «Мандэ исин пэско шэро». Файма, кадэлэса вонэ камэн тэ ԥэнэн, кай вонэ екжэнэ витидэн, со лэнди тэ терэн и кай лэндэ исин пэ када право. Вонэ на камэн тэ жувэн кадя, сар лэнди росԥэнэн авэр и даран тэ авэн кацавэ, сар всаворэa.

6. а) Со о Иегова дя, кай амэ екжэнэ тэ витидас? б) Сыкавэл када, кай амэ можэм тэ терас вся, со камас?

⁶ На трэбуй фартэ тэ загиндосавас пала кода, кай сар амэ гиндосараса кадя сар о Дэл, тоди амэндэ на авэна пэстирэ гиндоря. Андэ 2 Коринфянам 3:17 пистромэ: «Кай лэ Иеговаско духо, котэ нинай рабство». Амэ екжэнэ витидас, савэ манушэса амэ камас тэ ашас. Кажно андар мэндэ екжэно витидэл, со лэсти тэ чалёл и сар во тэ отцыёл. О Иегова кадя амэн создал. Но када на сыкавэл, кай амэ можэм тэ терас вся, со камас. (Адиносар 1 Петра 2:16b). О Иегова камэл, кай амэ тэ сэрас, со запистромэ андэ Библия пала кода, сар во гиндой, кала амэнди трэбуй тэ полас, со лашимос, ай со найлашимос. Сԥандэл када амэнди и вас чи анэн кати о лашимос?

7, 8. Васо, кала амэ гиндосарас кадя, сар о Иегова, када на сԥандэл амэнди и вас? Росԥэнэн.

⁷ Подам дума акэ пала со. О дад и дэй стон зор, кай тэ сытярэн пэстирэ бэятонэн лашимасти. Вонэ сытярэн лэн тэ на хохавэн, тэ терэн бути и тэ терэн лашимос аврэнди. Кода, сости вонэ сытярэн, на сԥандэл лэ бэятонэнди и вас. Када поможыя лэ бэятонэнди, кала вонэ вибарёна, тэ авэн бахталэ. Кала о бэято вибарёла и закамэла тэ жал на отдиль, када поможыя лэсти екжэнэсти тэ витидэл, со и сар тэ терэл. Сар вонэ витидэна тэ терэн о лашимос, савэсти сытярдэ о дад и дэй, тоди кода, со вонэ витидэна, поможыя лэнди тэ обжан о ԥаримос.

⁸ О Иегова, сар дад, саво любий пэстирэ бэятонэн камэл, кай лэндэ тэ авэл бахтали жызня (Исаия 48:17, 18). Важ када во дя амэнди и алава анда Библия, савэ сытярэн, сар амэ пэс тэ андярас и сар тэ обжаспэ аврэнца. Во камэл, кай амэ тэ диқас кадя, сар во пэ вся када. Када на сԥандэл амэнди и вас, ай кати поможый май драго тэ гиндосарас (Псалом 92:5; Притчи 2:1 жы кай 5; Исаия 55:9). Через када амэ ласа екжэнэ тэ витидас, со амэнди чалёл и кода, со амэ витидаса, поможыя амэнди тэ авас бахталэ (Псалом 1:2, 3). Чаче, кала амэ гиндосарас кадя, сар о Иегова, када анэн амэнди бут лашимос.

КАДЯ, САР ГИНДОЙ О ИЕГОВА, БУДЭР НИКО НА ГИНДОЙ

9, 10. Васо ԥэнэса, кай кода, сар гиндой о Иегова, фэдэр кодэлэстар, сар гиндон и мануша андэ кадэя люма?

⁹ Инке исин, васо лэ Иеговастирэ служытеля диқэн пэ вся лэстирэ яқэнца. Васо? Важ кода кай кадя, сар о Иегова, будэр нико на гиндой. Адес и мануша бут со подԥэнэн пала кода, сар о мурш и жувли трэбуй тэ андярэн пэс ек аврэса. Кадяжэ вонэ подԥэнэн пала реӷистрацыя, саво трэбуй тэ авэл о ери, сави бути и инке пала бут со. Но кода, сар вонэ гиндон, на сжалпэ кодэлэса, сар гиндой о Дэл. Ԥэнаса, и мануша андэ кадэя люма росԥэнэн, кай трэбуй тэ гиндосарас кати пала пэстэ и кай андо билажавардимос нинай нисо вэрыто. Кала андо ери на полэн ек аврэс, лэнди подԥэнэн, кай фэдэр вонэ тэ росжанпэ чи тэ розвэдинпэ, дажэ кала най васо. Но када на сжалпэ кодэлэса, со пала када пистромэ андэ Библия. Но со фэдэр поджал кода, со подԥэнэн и мануша андэ кадэя люма, чи кода, со пистромэ андэ Библия?

¹⁰ О Иисусо ԥэндя: «Но годявэрно о мануш чи най, дицол па лэстири дила» (Матфея 11:19). Хоть адес и мануша бут сости домарделэ андэ наука и андэ техника, лэндэ всаек на вижыля тэ улэн о ԥаримос, саво на дэл амэнди тэ авас бахталэ. На вижыля тэ улэн и война, кай и мануша через и нацыя тэ на вэрыцын ек аврэс, ай кадяжэ и преступность. Инке и мануша андэ люма гиндон, кай андо билажавардимос нинай нисо. Но бут мануша прижанэн, кай через о билажавардимос росжанпэ бут еря, через лэстэ римойпэ о зор и терэлпэ инке бут авэр ԥаримос. Кай и христианоря, савэ диқэн пэ вся лэ Иеговастирэ яқэнца, бахталэ еря. Лэндэ нинай насвалимос, саво пэрэдэлпэ через о билажавардимос. Кадяжэ вонэ па вся и люма, ладин лэ ԥралэнца и лэ ԥэянца, савэнца патян андо ек Дэл (Исаия 2:4; Деяния 10:34, 35; 1 Коринфянам 6:9 жы кай 11). Када драго сыкавэл, сар гиндой о Иегова, фэдэр кодэлэстар, сар гиндон и мануша андэ кадэя люма.

11. Сар ко, гиндояс о Моисеё, и саво лашимос када андя?

¹¹ Лэ Иеговастирэ служытеля, савэ жувэнас дэлмут ӷанэнас, кай кода, сар гиндой о Иегова, фэдэр всаворэстар. Ԥэнаса, хоть о Моисеё и «сас сытярдо всаворя мудростяти, сави сас кай и египтяноря», во ӷанэнас, кай и чачуни мудрость жал лэ Иеговастар (Деяния 7:22; Псалом 90:12). Важ када во мангэлас лэ Иеговастар: «Дэ манди тэ ӷанав тирэ дрома» (Исход 33:13). О Моисеё домэкля, кай о Иегова тэ парувэл лэстирэ гиндоря. Важ када о Иегова через Моисеё стердя кода, со загиндосардя. Кадяжэ пала лэстэ во ԥэнэнас, кай лэстэ састи вера (Евреям 11:24 жы кай 27).

12. Пала со гиндояс о Павло, кала лэсти сас трэбуй варисо тэ витидэл?

¹² О апостоло Павло сас годявэрно мануш, саво бут сытеля и саво ӷанэнас и еврейско и ӷреческо шыб (Деяния 5:34; 21:37, 39; 22:2, 3). Но кала лэсти трэбуй сас варисо тэ витидэл, во на шолас сама пэ кода, сар гиндон и мануша андэ кадэя люма, ай гиндояс кадя, сар пистромэ андэ Писания. (Адиносар Деяния 17:2c; 1 Коринфянам 2:6, 7d, 13e). Важ када о Павло бут со стердя андэ служэния лэ Иеговасти и во ля тэ аштярэл о лашимос, саво авэла англэ, кай во лэла тэ жувэл вечно (2 Тимофею 4:8).

13. Ко трэбуй тэ витидэл, тэ пэрэлэл лэ Дэвлэстирэ гиндоря чи най?

¹³ Драго дицол, кай кода, сар гиндой о Иегова, фэдэр чем кода, сар гиндон и мануша андэ кадэя люма. Сар амэ жуваса кадя, сар камэл о Иегова, амэ аваса па чачимастэ бахталэ и лошалэ мануша. Но о Иегова на заставий амэн тэ гиндосарас кадя, сар во. Нико, ни о «верно и блаӷоразумно рабо», ни и барэдэра ԥрала андэ собрания на уԥэнэна амэнди, пала со амэ тэ гиндосарас (Матфея 24:45; 2 Коринфянам 1:24). Кажно андар мэндэ екжэно витидэл тэ пэрэлэл лэ Дэвлэстирэ гиндоря чи най. Но со важ када трэбуй?

НА ПОДЭНПЭ КОДЭЛЭСТИ, САР ТЕРЭН И МАНУША АНДЭ КАДЭЯ ЛЮМА

14, 15. а) Пала со амэнди трэбуй тэ гиндосарас, кай амэндэ тэ авэн кацавэ жэ гиндоря, сар кай о Иегова? б) Васо кода, сар гиндон и мануша андэ кадэя люма, трэбуй тэ на авэл андэ амари годи? Росԥэнэн.

¹⁴ Андэ Римлянам 12:2 пистромэ: «Парашэн тэ гиндон и тэ терэн, сар и мануша андэ кадэя люма. Парудёнпэ и гиндон па аврятэ, кай тумэ драго тэ полэн лэ Дэвлэстири воля, сави чалёл, лащи, и совершенно». Анда кадэла лэ Дэвлэстирэ алава дицол, кай сар амэ тэ на гиндосардоп жы кодэлэстэ, сар уӷанглям о чачимос, амэндэ вижала тэ парувас пэстирэ гиндоря, кай вонэ тэ шонпэ пэ Иеговастирэ. Кода, сар амэ гиндосарас, можэт тэ пэрэдэлпэ лэ родостар чи па кода, со амэ пэрэжудям андэ жызня. Но всаек амарэ гиндоря моӷут тэ парудён. Вонэ парудён кодэлэстар, пала со амэ гиндосарас. Сар амэ гиндосарас пала кода, сар гиндой о Иегова, амэ полас, кай кода, сар во гиндой вся и время правильно. Тоди амэ закамаса тэ гиндосарас кадя, сар во.

¹⁵ Но кай тэ гиндосарас кадя, сар о Иегова, амэнди трэбуй тэ парашас тэ гиндосарас кадя, сар и мануша андэ кадэя люма. Трэбуй тэ парашас тэ диқас, тэ адиносарас и тэ ашунас кода, со на сжалпэ кодэлэса, сар гиндой о Иегова. Кай тэ полас када, подам дума акэ пала со. Ԥэнаса, варико закамля тэ лашарэл пэско зор и важ када витидя тэ хал кати о май лашо хамос. Но вся када авэла евья, сар во лэла тэ хал и о хамос, савэстар римояпэ о зор. Кадяжэ, кала и амэ закамлям тэ гиндосарас кадя, сар о Иегова и андэ кадэя жэ время гиндосарас кадя, сар гиндон и мануша андэ кадэя люма, када на анэна нисаво лашимос.

16. Состар амэнди трэбуй пэс тэ фэрисарас?

¹⁶ Но хэба вижала амэндэ тэ на гиндосарас ни пала со, со исин андэ кадэя люма? Най, амэндэ на вижала варикай тэ тераспэ кадэлэ миростар. Всаек, варисо анда кода, сар гиндон и мануша андэ кадэя люма, авэла андэ амаро шэро (1 Коринфянам 5:9, 10). Дажэ тоди, кала амэ росԥэнас пала Дэл, амэ дас дума лэ манушэнца, савэ най кадя гиндон и патян андо хохаимос. И всаек, кала када исин, и амэ виашунас кацавэ гиндоря, амэнди на трэбуй тэ роспушас пала када май бут чи тэ лас тэ гиндосарас кадя жэ. Сар и о Иисусо, амэнди трэбуй йто тэ отԥэндювас тэ гиндосарас кадя, сар камэл о Сатана. Инке тэ фэрисавас, пэ скати када возможно, кай тэ на гиндосарас, сар и мануша андэ кадэя люма. (Адиносар Притчи 4:23f).

17. Сар амэндэ вижала тэ на домэкас тэ гиндосарас, сар и мануша андэ кадэя люма?

¹⁷ Ԥэнаса, амэнди трэбуй драго тэ витидас пэсти друӷонэн. Андэ Библия пистромэ, кай кала амэ дружысарас лэ манушэнца, савэ на служын лэ Иеговасти, тоди амэ ласа тэ гиндосарас и тэ терас кадя, сар вонэ (Притчи 13:20; 1 Коринфянам 15:12, 32, 33). Кадяжэ трэбуй драго тэ витидас развлечении. Сар андэ развлечении исин кода, со ԥэнэн, кай амэн создал най о Дэл, чи котэ марэнпэ и умарэн, чи исин билажавардимос, амэнди трэбуй тэ на витидас лэн. Тоди амэ на римосараса пэстири годи кодэлэса, со жал против кода, со амэ ӷанас пала Дэл (2 Коринфянам 10:5).

18, 19. а) Васо трэбуй драго тэ росполэс кода, со най кадя гиндон и мануша? б) Со трэбуй пэстар тэ пушэс и васо?

¹⁸ Но дэкала и мануша андэ кадэя люма росԥэнэн пала кода, со вонэ гиндон кадя, кай сразу на полэса, со катэ най кадя. Важ када трэбуй тэ ӷанас тэ росполас када. Ԥэнаса, андэ дэсавэ новости пала политика росԥэнэн кадя, кай и мануша тэ залэн варикастири риг. Ай анда кода, со пистрон пала ашунглэ мануша, дицон кадэлэ мирости гиндоря пала кода, состар о мануш ашэл бахтало. Андэ дэсавэ киноря и книжки исин кацавэ гиндоря «пэ пэрво ҭан мэ и мэрно ери» и здэлпэ, кай када годявэрнэс, правильно и лэл лэ одестар. Но када на сжалпэ кодэлэса, со пистромэ андэ Библия. Андэ Библия пистромэ, кай амэ и амаро ери авэла па чачимастэ бахтало кати тоди, кала со май фартэ амэ ласа тэ любисарас лэ Иеговас (Матфея 22:36 жы кай 39). Кадяжэ андэ дэсавэ мультикоря важ и бэятцэ, хоть и здэлпэ, кай нинай нисо найлашо, через лэндэ кай и бэятцэ авэна кацавэ гиндоря, кай андо билажавардимос нинай ни́со.

¹⁹ Када на сыкавэл, кай трэбуй тэ на витидэс нисавэ развлечении. Трэбуй тэ пушэс пэстар: «Дажэ, кала мэ най сразу полав, со мануша андэ кадэя люма гиндон най кадя, вижал мандэ кадэла гиндоря тэ ӷатярав? Диқав мэ пала кода, со диқэн чи адинон мэрнэ бэятцэ и мэ екжэно? Сытярав мэ мэрнэ бэятонэн, кай вонэ тэ диқэн пэ вся кадя, сар о Иегова. Васо? Кай лэнди тэ авэл вушэро тэ отԥэндён кодэлэстар, со важ и мануша андэ кадэя люма куч». Амэ на ласа тэ гиндосарас кадя, сар и мануша андэ кадэя люма. Но сар? Кала амэ драго диқаса, соса на шолпэ кода, сар гиндой о Дэл и сар и мануша андэ кадэя люма.

КАСТАР ТУМЭ СЫТЁН АКАНА?

20. Андар со дицол, кастар амэ сытювас, лэ Дэвлэстар чи лэ манушэндар анда кадэя люма?

²⁰ Амэнди трэбуй тэ сэрас, кай исин дуй гиндоря, лэ Иеговаско и лэ мироско, савэса хулаий о Сатана. Каско гиндо амэ витидаса дицола анда кода, каринг кастэ амэ приашундювас. Сар амэнди чалёл лэ манушэнго гиндо анда кадэя люма и кода, со лэнди куч, тоди амэ ласа тэ гиндосарас и тэ терас кадя, сар май бут мануша, савэ гиндон кати пала пэстэ. Акэ васо фартэ трэбуй тэ диқас пала кода, со амэ гиндосарас, со адиносарас и со ашунас.

21. Пала со амэ уӷанаса анда авэр статья?

²¹ Анда кадэя статья амэ уӷанглям, кай сар амэ ласа тэ гиндосарас кадя, сар о Иегова, амэнди трэбуй тэ фэрисавас кодэлэстар, сар гиндон и мануша андэ кадэя люма. Амэнди кадяжэ трэбуй тэ гиндосарас пала кода, сар гиндой о Дэл, кай тэ диқас пэ вся кадя, сар во. Анда авэр статья амэ уӷанаса, сар када тэ терас.