Гиндос ту кадя, сар о Иегова?
«Парудёнпэ и гиндон па аврятэ» (РИМЛЯНАМ 12:2).
1, 2. Сости амэ сытювас, кала лас май драго тэ полас лэ Дэвлэс? Росԥэнэн.
ԤЭНАСА, варико подарисардя варисо лэ бэятости. Лэско дад и дэй ԥэнэн лэсти: «Ԥэн наис». О бэято терэл када, важ кода кай лэсти кадя ԥэндэ. Кала о бэято барёл, во лэл май драго тэ полэл, васо лэско дад и дэй гиндон, кай во трэбуй тэ авэл блаӷодарно, кала варико терэл лашимос. И тоди во екжэно камэл тэ авэл блаӷодарно и ԥэнэн «наис» аврэнди. Васо? Важ кода кай акана, када лэстэ андо ди.
2 Кадя жэ и амэ. Кала амэ уӷанглям о чачимос пала Дэл, амэ полям, сар важно тэ кандас андэ кода, со спэрва о Иегова амэндар аштярэл. Но кала амэ лям май драго тэ полас лэ Дэвлэс, амэ май бут уӷанас, со лэсти чалёл, ай со най и сар во диқэл пэ варисо. Амэ сыкавас, кай пэрэлям лэстирэ гиндоря, кала сытювас тэ гиндосарас и тэ терас, сар во.
3. Васо дэкала найвушэро тэ гиндосарас кадя жэ, сар о Иегова?
3 Тэ сытювас тэ гиндосарас кадя, сар о Дэл, када фартэ драго. Но всаек када найвушэро, важ кода кай амэ найсовершенни. Амэ ӷанас, со о Иегова гиндой пала проповедь, пала рат, пала барвалимос, пала билажавардимос и инке пала варисо. Со во гиндой пала рат, кала лэса терэн варисо най кадя. Но амэнди можэт тэ авэл найвушэро тэ полас, сар во пэ када диқэл. Со амэнди поможыя тэ пэрэлас лэстирэ гиндоря? И со тоди амэ ласа тэ терас акана и май англэ?
САР ТЭ ПЭРЭЛАС ЛЭ ДЭВЛЭСТИРЭ ГИНДОРЯ?
4. Сар кода, со ԥэндя о Павло, поможый амэнди тэ парувас пэско гиндо?
4 Адиносар Римлянам 12:2a. Андэ кадэва стихо о апостоло Павло росԥэндя, со амэнди поможыя тэ гиндосарас кадя, сар о Иегова. Сар амэ на камас, кай и мануша, савэ на полэн лэ Иеговас, тэ парувэн па пэстирятэ амарэ гиндоря, тоди амэнди трэбуй тэ фэрисавас. Состар? Кодэлэстар, сар диқэн и гиндон и мануша андэ кадэя люма, сар сас пистромэ андэ статья, сави сас май англал. О Павло кадяжэ ԥэндя, пэ скати трэбуй тэ парувас пэско гиндо. Со важ када трэбуй? Тэ сытювас па Библия и тэ стас зор, кай тэ полас лэ Дэвлэстирэ гиндоря и тэ гиндосарас пала лэндэ. Ай кадяжэ тэ сытювас тэ гиндосарас кадя, сар во.
5. Васо када най ек, кала сытёс и кала кати проадинос?
5 Тэ сытёс, када най кати тэ проадинос чи тэ виарақэс ответоря пэ вопросоря. Ай кала амэ сытювас, амэ гиндосарас пала кода, со уӷанас пала Иегова, пала лэско дром и пала кода, сар во гиндой. Амэ камас тэ полас, васо о Дэл мангэл амэн дэсо тэ терас, ай дэсо най. Кадяжэ амэ гиндосарас, савэ гиндоря и сави дила амэнди трэбуй тэ парувас. Амэндэ можэт тэ на вижал тэ стерас када вся сразу. Но авелоп драго, кай кала амэ сытювас па Библия, тэ витидас хоть епаш анда кадэя время, кай тэ погиндосарас пала кода, со уӷанглям (Псалом 119:97; 1 Тимофею 4:15).
6. Со авэла, кала амэ гиндосарас пала алава анда Библия?
6 Кала амэ гиндосарас пала алава анда Библия, авэла акэ со. Амэ лас май фартэ тэ полас, кай кода, сар о Иегова гиндой, совершенно. Амэ лас тэ диқас пэ вся лэстирэ яқэнца и лас тэ гиндосарас кадя жэ, сар во. Амарэ гиндоря парудён и амэ лас тэ гиндосарас па аврятэ. Тоди кода, сар амэ диқас пэ вся, лэл тэ шолпэ пэ кода, сар диқэл о Дэл.
АМЭ ТЕРАС КАДЯ, САР ГИНДОСАРАС
7, 8. а) Сар о Иегова диқэл по барвалимос? (Диқэн и картинка англа статья.) б) Со важ амэндэ авэла пэ пэрво ҭан, кала амэ гиндосарас кадя, сар о Дэл?
7 Амэ терас кадя, сар гиндосарас (Марка 7:21 жы кай 23; Иакова 2:17). Кай май драго када тэ полас, подам дума акэ пала со. Анда Евангелии амэ уӷанас, сар о Иегова диқэл по барвалимос. О Дэл закамля, кай лэско шаво тэ барёл андо ери, кай сас фартэ набут ловэ (Левит 12:8; Луки 2:24). Кала кай и Мария арақаделяпэ о Иисусо, вой стодя лэс «андэ кормушка важ о ското, важ кода кай андэ ӷостиница на сас ҭана» (Луки 2:7). Тэ камлоп о Иегова, во стердоп кадя, кай лэско шаво тэ арақаделоп андэ авэр, май лашо ҭан. Но во камэлас, кай о Иисусо тэ барёл андо ери, кастэ о Дэл сас пэ пэрво ҭан. Важ о Иегова када сас со май ӷлавно.
8 Кала амэ гиндосарас, андэ саво ҭан арақаделяпэ о Иисусо, амэ полас, сар о Иегова диқэл по барвалимос. Дэсавэ дада и дэя камэн, кай лэндирэ бэятонэндэ тэ авэл вся со май лашо, дажэ сар кадэлэстар лэ бэятонэндири дружба лэ Иеговаса римояпэ. Но о Иегова диқэл пэ када кадя, кай важ амэндэ и дружба лэса трэбуй тэ авэл пэ пэрво ҭан. Гиндон тумэ кадя, сар во? Ай со дицол па тумари дила? (Адиносар Евреям 13:5b).
9, 10. Сар амэ сыкавас, кай диқас кадя жэ, сар о Иегова пэ дила, сави можэт тэ змарэл аврэс?
9 Инке исин пала со тэ погиндосарас. Погиндосарам, сар о Дэл диқэл пэ кода, кала ек христианино змарэл аврэс па христианско дром. О Иисусо ԥэндя пала кацаво мануш: «Авелоп фэдэр тэ приԥандэн лэсти пэ кор о бар, савэса мэлин о зэрно и тэ шон лэс андэ моря» (Марка 9:42). Анда кадэла алава дицол, кай о Иисусо строӷо сындой. Ай кадя, сар о Иисусо шолпэ пэ пэско дад, амэ полас, кай о Иегова кадяжэ строӷо сындой кодэлэс, ко на гиндой пала авэр христианоря и терэл, со камэл (Иоанна 14:9).
10 Диқас амэ пэ када кадя жэ, сар о Иегова и о Иисусо? Ай со дицол па амари дила? Со сар пэстиря йдаса амэ холярас дэсавэн ԥралэн и ԥэян, чи кадэлэстар варикастэ авэна найлашэ гиндоря? Закамаса амэ через кода, кай любисарас аврэн тэ отԥэндюваспэ кодэлэстар, со амэнди чалёл? (1 Тимофею 2:9, 10).
11, 12. Сар кода, кай амэ лас тэ диқас по найлашимос кадя, сар о Дэл, и ритярас пэс андэ вас, фэрия амэн тэ на терас бэзэх?
11 Подам дума инке акэ пала со. О Иегова вэрыцый о найлашимос (Исаия 61:8). О Дэл ӷанэн, важ кода кай амэ найсовершенни, амэнди ԥарэс вся и время тэ терас кати кода, со лашо. Важ када во камэл, кай амэ кадя жэ, сар и во, тэ вэрыцысарас о найлашимос. (Адиносар Псалом 97:10c). Кала амэ гиндосарас, васо о Дэл вэрыцый о найлашимос, када поможыя амэнди тэ гиндосарас кадя, сар во. Инке дэла амэнди зор тэ на терас бэзэх.
12 Кадяжэ кала амэ, сар о Иегова, вэрыцысарас о найлашимос, тоди амэ поласа, кай дэсо и христианоря нащи тэ терэн, дажэ кала андэ Библия нисо пала када на ԥэнэнпэ. Адес ашэл май ашунгло билажавардо танцо, андэ саво май часто цэлэн чуть най нангэ. Када ек анда кода, кала андярэн пэс билажавардэс. Дэко гиндой, кай кадэва танцо най бэзэх, важ кода кай кодэла, ко лэс цэлэн, на пэрэсовэн ек еқэсаd. Но со гиндой пала када о Иегова? Лэ любонэ найлашимастар лэсти ашэл гряца. Тоди, ритярэн пэс андэ вас, ритярдён май дур кацавя дилатар и вэрыцын кода, состар лэ Дэвлэсти гряца (Римлянам 12:9).
МАЙ АНГЛАЛ ГИНДОСАР, СО ТЭ ВИТИДЭС
13. Васо трэбуй май англал тэ гиндос пала кода, сар о Дэл гиндой пала варисо?
13 Кала ту сытёс па Библия, ту трэбуй тэ гиндос пала кода, сар о Иегова диқэл пэ варисо. Када поможыя тути тэ витидэс годявэрнэс. И тоди, кала тути трэбуй авэла йто варисо тэ витидэс, ту ӷанэса, со тэ терэс (Притчи 22:3). Уӷанам, сар када сас кай и мануша, пала савэ пистромэ андэ Библия.
14. Сости амэ сытювас анда кода, со о Иосифо ԥэндя лэ Потифаростиря хулаяти?
14 О Иосифо йто отԥэнделя тэ пэрэл лэ Потифаростиря хулаяса. Кадэлэса во сыкадя, кай май англал гиндояс пала кода, сар о Иегова диқэл по ери. (Адиносар Бытие 39:8, 9e). О Иосифо ԥэндя лэ Потифаростиря хулаяти: «Сар жэ мэ стерава кадэва найлашимос и стерава бэзэх англа Дэл?». Када сыкавэл, кай во гиндояс кадя, сар о Дэл. Ай со можно тэ ԥэнас пала амэндэ? Ԥэнаса, пэ бути чи, кала ездис пэ бутятэ, варико лэл вэсэло тэ диқэл пэр тутэ чи варикастэ лэн тэ цэлэн и яқа андо чикат. Чи тути бишалэн по телефоно билажавардэ карточки чи эсэмэскиf. Кала ту май англал погиндоса, со пала када гиндой о Иегова, лэса тэ диқэс пэ кода кадя жэ, сар во и май англал витидэса, со тэ терэс, тути авэла май вушэро тэ терэс правильно.
15. Со поможыя амэнди, сар варикала лэ тринэ евреёнэнди, тэ на парашас тэ кандас лэ Иеговас?
15 Акана подам дума пала трин евреёря, пала Седрахо, Мисахо и Авденаго. Вонэ отԥэнделэ тэ тэлён лэ сомнаконэ истуканости, савэс стодя о царё Навуходоносоро. Анда кода, со вонэ ԥэндэ лэ царёсти, дицол, кай вонэ май англал гиндонас, сар тэ на парашэн тэ кандэн лэ Дэвлэс (Исход 20:4, 5; Даниил 3:4 жы кай 6, 12, 16 жы кай 18). Ԥэнаса, тутэ пэ бути стон празднико важ и хохавнэ дэвла и о начальнико мангэл тут тэ дэс ловэ. Чи кала ту пэ бутятэ и о миро стол празднико важ пэстирэ дэвла, и ақарэл тут пэ мисяйля. Со ту тердоп? Кала тутэ инке на сас кацаво, погиндосар май англал, со пала када гиндой о Иегова. И тоди тути, сар лэ тринэ евреёнэнди, авэла май вушэро тэ росԥэнэс, андэр со ту патяс и тэ терэс кадя, сар трэбуй.
Ӷанэс ту, со тэ терэс, кала терэлапэ кода, со на аштярэс? Трэбуй тэ уӷанэс май бут пала када, тэ пистрос, сар ту камэс, кай тут тэ лечин и тэ подэс дума пала када пэстирэ врачоса. (Диқэн о абзацо 16.)
16. Сар кода, кай амэ драго полас, сар гиндой о Иегова, поможыя амэнди, кала трэбуй авэла йто тэ лечисавас?
16 Амэ камас тэ на парашас тэ кандас лэ Иеговас. Важ када трэбуй май англал тэ погиндосарас пала кода, кала йто трэбуй авэла тэ лечисавас. Амэ отԥэндювас тэ пэрэшас о рат и штар ӷлавни части андар лэстэ. Но исин авэр, со терэн и врачоря лэ ратэса, кай тэ лечин. Кажно трэбуй тэ витидэл екжэно тэ лечийпэ кадя чи най. Важ када трэбуй тэ полас, сар пэ када диқэл о Иегова (Деяния 15:28, 29). Фэдэр пала када тэ погиндос май англал, ай най андэ больница, кала тутэ фартэ варисо дуқал, ай и врачоря грабин тут тэ витидэс. Трэбуй ужэ акана тэ уӷанэс пала када, тэ пистрос, сар ту камэс, кай тут тэ лечин и тэ подэс дума пала када пэстирэ врачосаg.
17—19. Васо трэбуй ужэ акана тэ полас, сар гиндой о Иегова? Росԥэнэн.
17 Акана погиндосарам, сар андярдя пэс о Иисусо, кала о Пётро шылисайля. Во ԥэндя лэсти: «Ӷосподо, жалуисар пэс». Дицол, кай о Иисусо бут гиндояс пала кода, со лэстар аштярэлас о Дэл. Ай кадяжэ пала кода, со сас пистромэ андэ Писании пала лэстири жызня и смэрть пэ ԥув. Када дэлас лэсти зор тэ на парашэл тэ кандэл лэ Дэвлэс, и тэ камэл тэ отдэл пэстири жызня важ и мануша. (Адиносар Матфея 16:21 жы кай 23h).
18 Адес о Дэл камэл, кай лэстирэ служытелёнэндэ тэ авэл лэса лащи дружба. Ай кадяжэ, кай вонэ тэ отдэн май бут время и зор, кай тэ росԥэнэн важ и лащи весть (Матфея 6:33; 28:19, 20; Иакова 4:8). Сар лэ Иисусости, кадя жэ и амэнди, дэко можэт анда оди тэ ԥэнэн, кай амэ тэ витидас авэр дром. Погиндосар, кай о хулай па бути ԥэнэн тути, кай стола тут барэ манушэса и лэла тэ потинэл тути май бут ловэ. Чи сар ту сытёс андэ школа, ай тути ԥэнэн, кай ту тэ сытёс инке май бут андэ авэр форо. Но ту полэс, кай тоди тутэ на вижала тэ на промэкэс и собрании чи часто тэ ԥирэс тэ росԥэнэс важ о Дэл. Тэ авелоп тутэ кацаво, ту закамлоп тэ мангэспэ лэ Дэвлэсти и тэ адинос май бут литература пала када. Кадяжэ тэ подэс дума лэ ереса чи дажэ лэ барэдэрэ ԥралэнца андэ собрания, кай тэ витидэс кода, со трэбуй. Ай васо ужэ акана тэ на уӷанэс, со пала када гиндой о Иегова, кай и ту тэ гиндос кадя жэ, сар во? Тоди, кала тутэ авэла кацаво, тути и на закамэлапэ када тэ витидэс. Ту лэса драго тэ ӷанэс, со камэс тэ терэс важ о Дэл, и лэса тэ жас каринг када. И тоди, тути ашэлапэ кати тэ терэс кадя, сар витидян.
19 Авелоп драго тэ погиндос, со тутэ можэт тэ авэл андэ жызня, через со дицола, кай ту на ашавэс лэ Иеговас. Вся на уӷанэса. Но кала ту екжэно сытёс па Библия и гиндос пала кода, сар гиндой о Иегова, тоди тути авэла по гиндо, сости сытелян и ту витидэса кода, со трэбуй. И акэ, кала сытювас па Библия, сытювам тэ гиндосарас кадя, сар во и тэ пэрэлас лэстирэ гиндоря. И диқам, сар када поможыя амэнди тэ витидас годявэрнэс акана и англэ.
ЛЭ ДЭВЛЭСТИРЭ ГИНДОРЯ И ТИРИ ЖЫЗНЯ АНГЛЭ
20, 21. а) Сар амэ ласа тэ витидас, кала авэла лащи жызня? б) Состар амэ ужэ акана жуваса бахталэс?
20 Амэ фартэ аштярас и лащи жызня, сави авэла англэ. И бут андар мэндэ аштярэн тэ жувэн вечно андо раё пэ ԥув. Кала лэла тэ правий лэ Дэвлэско царство, лэ манушэндэ на авэла ԥаримос и вонэ на мучинапэ. Ай инке амэндэ ашэлапэ и свобода тэ витидас кода, со амэнди чалёл.
21 Но кадэя свобода авэла най андэ вся. Кала и мануша, савэндэ ковло ди, лэна варисо тэ витидэн, вонэ терэна када кадя, сар гиндой и сытярэл о Иегова (Псалом 37:11). Ай сар кадэя время инке на авеля, амэ ужэ акана можэм тэ пэрэлас лэ Дэвлэстирэ гиндоря и тэ жувас бахталэс.
a Римлянам 12:2: «Парашэн тэ гиндон и тэ терэн, сар и мануша андэ кадэя люма. Парудёнпэ и гиндон па аврятэ, кай тумэ драго тэ полэн лэ Дэвлэстири воля, сави чалёл, лащи, и совершенно».
b Евреям 13:5: «Мэк андэ тумари жызня на авэла любовь каринг и ловэ. Авэн лошалэ кодэлэсти, со исин, важ кода кай во ԥэндя: „Никала на ашавава тут и никала на мэкава тут“».
c Псалом 97:10: «Кодэла, ко любин лэ Иеговас, вэрыцын о найлашимос. Во фэрий кодэлэн, ко на ашавэл лэс. Фэрий лэн кодэлэндирэ вастэндар, ко терэн о найлашимос».
d Андэ дэсавэ танцоря кодэва, ко лэс цэлэл, чуть най нанго, бэшэл аврэсти пэ чанга и цэлэл всаворя тиласа фартэ найдраго. Када всаек, со и мануша тэ пэрэсовэн ек еқэса. Через када можэт тэ авэл правово комитето. Кала кай о христианино сас кацаво, лэсти трэбуй тэ мангэл, кай и барэдэра ԥрала андэ собрания тэ поможын лэсти (Иакова 5:14, 15).
e Бытие 39:8, 9: «Но во отԥэндёласпэ и ԥэнэнас пэстирэ ӷосподиностиря хулаяти: „Мэрно ӷосподино ни пала со на диқэл андо цэр и отдя андэ мэрнэ вас вся, со лэстэ исин. Андэ кадэва цэр нинай никас, ко авелоп май барэдэр мандар и во на отԥэндя манди ни андэр со, кроме тутэ, важ кода кай ту лэстири хулаи. Сар жэ мэ стерава кадэва найлашимос и стерава бэзэх англа Дэл?“».
f Кала бишалэн па телефоно билажавардэ карточки, билажавардэ видео чи билажавардэ эсэмэски, пэ када ԥэнэн секстинӷо. Кала кацаво терэлпэ андэ собрания, тоди и барэдэра ԥрала моӷут тэ стидэн правово комитето. Сас кацаво, кала тэрнэ мануша терэнас кадэя дила, лэн сындонас важ када андэ ваздии. Кай май бут тэ уӷанэс пала када, зажа по сайто jw.org/ru и проадиносар и статья андо интэрнэто «Что мне нужно знать о секстинге?» андэ рубрика «Вопросы молодежи». (Диқэн и вкладка БИБЛЕЙСКИЕ УЧЕНИЯ > ПОДРОСТКИ.) Кадяжэ диқэн и статья «Как поговорить со своим ребенком-подростком о секстинге?» андэ «Пробудитесь!» важ о ноябрё 2013 бэрш, страница 4 жы кай 5.
g Кай май бут тэ уӷанэс, сар по рат диқэл о Дэл, адиносар и книжка «Сохраняйте себя в Божьей любви», страница 215 жы кай 218.
h Матфея 16:21 жы кай 23: «Кодэла времятар, о Иисус Христос ля тэ росԥэнэн лэ учениконэнди, кай во трэбуй тэ жал андо Иерусалимо и тэ пэрэжувэл бут ԥаримос лэ старейшынонэндар, лэ барэдэрэ рашандар и лэ книжниконэндар и кай лэс умарэна и по трито дес во рияпэ каринг и жызня. Тоди о Пётро одындярдя лэс андэ риг и ля тэ ԥэнэн лэсти: „Ӷосподо, жалуисар пэс. Тэ на авэл туса кацаво никала“. Но во отбанделя лэ Петростар и ԥэндя лэсти: „Вижа мандар, Сатана! Ту змарэс ман па правильно дром, важ кода кай ту гиндос най важ лэ Дэвлэско, ай важ лэ манушэско“».