«Сытярэн пэстири годи и парудён»

1, 2. Со трэбуй тэ терас и посли кода, сар болделям? Росԥэнэн.

САР часто тумэ прилэн па цэр? Например, кала тумэ пэрэжан андо нэво цэр, наверно, тумэ тердоп генерально. Но со, если потом тэ на слидос пала вужымос? Сар амэ ӷанас, о цэр можэт ӥто тэ мэлярдёл. Кай андэр лэстэ тэ авэл порядко, трэбуй постояно пала када тэ слидос.

² Кадяжэ трэбуй тэ пристас зор, кай тэ слидосарас пала амарэ гиндоря и о характеро. Канешно, инке англа кода, сар тэ болдювас, амэ ужэ бут со парудям, кай тэ ашас вужэ кодэлэстар, «со мэлярэл и тила и годи» (2 Кор. 7:1). Но нащи пэ када тэ тердювас. Сар ԥэндя о апостало Павло, амэ трэбуй и май дур тэ терас вся, кай тэ парудювас (Эф. 4:23). Васо? Важ кода кай о мэлалимос кадэла люмако можэт ӥто тэ стидэлпэ андэр мэндэ. Кай кацаво тэ на авэл и кай лэ Иеговасти тэ чалёл тэ диқэл пар мэндэ, амэ трэбуй всегда тэ проверяем, сар амэ гиндосарас, со камас и савэ амэ.

СЫТЯР ПЭСТИРИ ГОДИ

3. Со када тэ сытярас пэстири годи? (Римлянам 12:2).

³ Со трэбуй тэ терас, кай тэ сытярас пэстири годи или, аврэ алавэнца, тэ парувас и гиндоря? (Проадинон Римлянам 12:2.) На хутила просто тэ стерас ек дуй лащи дила, кай тэ ашас май лашэ. Амэ трэбуй всегда тэ слидосарас, саво амэндэ ди, и тэ парудювас андрал, кай тэ жувас кадя, сар камэл о Иегова.

4. Сар тэ на домэкас, кай пар мэндэ тэ влияет кадэва миро?

⁴ Кала амэ ашаса совершэни, вся, со амэ ласа тэ терас, чалёла лэ Иеговасти. Но акана амэнди трэбуй тэ пристас бут зор, кай о Иегова тэ авэл амэнца довольно. Андэ Римлянам 12:2 о апостало Павло ԥэнэн, кай амэндэ на вижала тэ сытярас пэстири годи, если амэ на полас, со ужал андэ лэ Дэвлэстири воля. Амэ на камас тэ домэкас, кай пар мэндэ тэ влияет кадэва миро. Вместо када, амэнди трэбуй тэ проверим пэстирэ цэли и ришэнии, кай тэ диқас, пэскати амэ пэрэлям лэ Дэвлэстирэ гиндоря.

5. Росԥэнэн, сар амэ можэм тэ проверяем пэстирэ гиндоря. (Диқэн и картинка.)

⁵ Например, о Иегова камэл, кай амэ тэ сэрас пала лэско дес и тэ аштярас лэс (2 Пет. 3:12). Пуш пэстар: «Дицол па мэрни жызня, кай мэ полав пэскати дэ пашэ и время кадэла люмати? Сыкавэн мэрнэ ришэнии пала учоба и бути, кай само ӷлавно важ мандэ — тэ служысарав лэ Иеговасти? Патяв мэ, кай о Иегова позаботияпэ пала мандэ и пала мэрно ери? Или мэ вся и время гиндосарав, сар тэ затерав?» Погиндон, сар радуийпэ о Иегова, кала диқэл, кай амэ андярас кацави жызня, сави чалёл лэсти (Матф. 6:25—27, 33; Флп. 4:12, 13).

6. Со амэнди трэбуй вся и время тэ терас?

⁶ Амэнди трэбуй вся и время тэ шас сама пэ пэстирэ гиндоря и тэ парудювас. О апостало Павло пистросардя лэ коринфянонэнди: «Диқэн пала пэстири вера, кацави вой тумэндэ, сар трэбуй, чи най» (2 Кор. 13:5). Тэ диқас «пала пэстири вера» сыкавэл май бут, чем тэ ԥирас пэ христиански собрании и время времятар тэ росԥэнас пала Дэл. Андэ када кадяжэ ужал тэ слидосарас пала кода, васо амэ служысарас, каринг со амэн цырдэл и пала пэстирэ гиндоря. Важ када амэнди трэбуй вся и время тэ сытярас пэстири годи. Сар када тэ терас? Трэбуй тэ адиносарас и Библия, тэ сытювас тэ гиндосарас кадя, сар гиндой о Иегова, ай тоди тэ терас вся, кай тэ радосарас лэс (1 Кор. 2:14—16).

АВ «АВРЭ МАНУШЭСА»

7. Сар ԥэнэнпэ андэ Эфесянам 4:31, 32, со инке амэнди трэбуй тэ терас и васо када можэт тэ авэл найвушэро?

⁷ Проадинон Эфесянам 4:31, 32. Кажно андар мэндэ трэбуй най кати тэ парувэл пэстирэ гиндоря, но и тэ авэл «аврэ манушэса» (Эф. 4:24). Пэ када трэбуй тэ пристас пэско зор. Кадяжэ амэнди трэбуй тэ старысавас тэ улас пэстар и ӷрубо дума и холи. Васо када можэт тэ авэл найвушэро тэ стерас? Важ кода кай дэкала фартэ ԥарэс тэ парувэс андэр пэстэ дэсавэ найлашэ качестворя. Например андэ Библия ԥэнэнпэ: «[Лэ манушэско] ди и гиндоря цырдэнпэ каринг о найлашымос» (Быт. 8:21). Дажэ посли кода, сар болделям, трэбуй вся и время тэ пристас зор, кай тэ контролируем кадэла найлашэ качестворя, савэ амэндэ ашэлэпэ. Роздиқам ек примеро.

8, 9. Сар лэ Стивеноско примеро сыкавэл, кай трэбуй вся и время тэ борисавас, кай тэ улас и найлашэ качестворя?

⁸ Лэ ԥралэсти, савэс ақарэн Стивено, сас фартэ ԥарэс тэ зритярэл пэстири холи. Во росԥэнэн: «Дажэ посли кода, сар мэ болделэм, манди трэбуй сас тэ пристав о зор, кай тэ парудював. Например, еқвар, кала мэ сымас андэ служэния, мэ прастаем пала мануш, саво чордя о радио анда мэрни машына. Кала мэ лэс почти доӷонисардэм, во вишутя о радио анда вас и унашлятар. Мэ росԥэндэм пала када аврэнди, и о барэдэр ԥрал пушля мандар: „Стивено, ай со бы ту стердоп, если тэ доӷонисардоп лэс?“ Через када мэ загиндосайлэм и закамлэм инке май бут тэ став зор, кай тэ авав мирно»b.

⁹ Кода, со сас лэ Стивеноса, драго сыкавэл, кай дэкала и найлашэ качестворя, савэ андэр мэндэ исин, моӷут нэожыдано тэ дицон, дажэ если амэ гиндосарасас, кай амэ вся стердям, кай вонэ тэ на авэн. Если тутэ кадяжэ, нэ пэрэжывай и на гиндосар, кай ту найлашо христианино. Дажэ о апостало Павло прижанэлас: «Кала мэ камав тэ терав лашымос, андэр мандэ ужэ исин о найлашымос» (Рим. 7:21—23). Всаворэ́ христианонэнди прижалпэ тэ боринпэ, кай тэ улэн андар пэстэ и найлашэ качестворя. Вонэ, сар и мэл, сави упалэ и упалэ стидэлпэ андэ амаро «цэр». Амэнди трэбуй вся и время тэ пристас о зор, кай тэ авас вужэ. Сар амэ можэм када тэ терас?

10. Если амэндэ исин и найлашэ качестворя, сар амэ можэм тэ борисавас лэнца? (1 Иоанна 5:14, 15).

¹⁰ Мангпэ лэ Иеговасти пала помощь, если тути трудно тэ парудёс, и патя, кай во тут ашунэл. (Проадинон 1 Иоанна 5:14, 15.) Хоть о Иегова и на стерэла важ тутэ чуда, кай тэ парувэл тиро характеро, но во дэла тути зор тэ бориспэ, кай тэ улэс и найлашэ качестворя (1 Пет. 5:10). Пэстиря ригатар тер кадя, сар мангэспэ, и дурюв кодэлэстар, со можэт тэ рий и найлашэ качестворя. Ав осторожно, кала витидэс, со тэ диқэс или тэ ашунэс. Если котэ и мануша путён кодэлэса, кай лэндэ исин и найлашэ качестворя, савэнца ту бориспэ, када можэт тэ повлияет пэр тутэ. Ай инке на домэк, кай ту бут тэ гиндос пала нэправильни жылании (Флп. 4:8; Кол. 3:2).

11. Со трэбуй тэ терэс, кай тэ утидэспэ андэ нэви личность?

¹¹ Кала терэн вся, кай тэ улэн пэстар и пурани личность, фартэ важно тэ утидэнпэ андэ нэви личность. Сар када тэ терас? Кала уӷанэн пала лэ Дэвлэстирэ качестворя, старыинпэ тэ андярэн пэс кадя жэ, сар во (Эф. 5:1, 2). Например, кала ту адинос пала кода, сар о Иегова простий, пуш пэстар: «Ай мэ простисарав аврэн?» Кала ту адинос андэ Библия, сар о Иегова полэл и жалуий кодэлэн, ко попэля андэ бида, задэ пэсти вопросо: «Пэрэжываю мэ пала ԥрала и ԥэя, савэ андэ варисостэ нуждаюца, и дицол када па мэрни дила?» На параш тэ сытярэс пэстири годи, кала утидэспэ андэ нэви личность, и ав терпеливо каринг пэстэ.

12. Сар о Стивено поля па пэстири жызня, кай ла Библиятэ исин зор?

¹² Кай о Стивено, пала саво амэ дям дума, вижыля полокорэс тэ парудёлпэ. Во ԥэнэн: «Посли крещения мандэ сас най ек ситуацыя, андэ сави сас ԥарэс тэ зритярав пэстири холи. Мэ сытелэм правильно тэ диқав пэ кода, кала ман камэн тэ виандярэн андар пэстэ, и андэ кацаво маменто тэ терав вся, кай тэ авэл мирно. Бут мануша, ай кадяжэ мэрни хулаи, хвалин ман, сар мэ андярав пэс андэ кацавэ ситуацыи. Мэ и екжэно пэстар удивляюсь! Но мэ уверено, кай када най мэ кацаво хамари. Мандэ вижыля када тэ стерав, блаӷодаря кодэлэсти, кай ла Библиятэ исин зор тэ парувэл лэ манушэстири жызня».

БОРИСАВ, КАЙ ТЭ УЛЭС И НАЙЛАШЭ ЖЫЛАНИИ

13. Со поможыя, кай амэндэ тэ авэн и правильни жылании? (Галатам 5:16).

¹³ Проадинон Галатам 5:16. О Иегова анда вся оди дэл пэско свынто духо, кай тэ поможый амэнди тэ андярас пэстири жызня правильно англа лэстэ. Кала амэ изучаем и Библия, амэ домэкас, кай кадэва духо тэ влияет пар мэндэ. Кадяжэ амэ получисарас лэс, кала авас пэ собрании. Котэ амэ проандярас и время лэ ԥралэнца и лэ ԥэянца. Вонэ, кадя жэ сар и амэ, старыинпэ тэ терэн андэ пэстири жызня вся правильно. И када амэн фартэ подритярэл (Евр. 10:24, 25; 13:7). Кадяжэ о Иегова дэл пэско свынто духо, кала амэ анда ди мангас лэс тэ поможый амэнди тэ улас пэстар варисави слабость. Хоть, возможно, вся када полностью на улэла амэндар и нэправильни жылании, но када придэла амэнди зор тэ на подаспэ лэнди. Андэ Галатам 5:16 ԥэнэнпэ, кай кодэла, ко жувэн кадя, сар сытярэл о духо, на лэна «тэ терэн кадя, сар камэл и ӷрешно тила».

14. Васо важно вся и время тэ пристас зор, кай тэ авэн и правильни жылании?

¹⁴ На параш тэ изучаеш и Библия, тэ ԥирэс пэ собрании и тэ мангэспэ. Вся и время тер кадя, кай тэ авэн тутэ и правильни жылании. Васо када важно? Важ кода кай исин вороӷо, саво никала на совэл. Кадэва вороӷо — жылания тэ терэс кода, со нэправильно. Дажэ посли крещения амэндэ андо ди можэт тэ авэл кацаво, кай амэнди чалёл кода, состар амэ трэбуй тэ дурювас. Например, бут тэ пас, тэ цэлас андэ азартни иӷры или тэ диқас билажавардимос (Эф. 5:3, 4). Ек тэрно ԥрал прижанделя: «Манди сас фартэ ԥарэс тэ борисавав кодэлэса, кай манди чалёнас и мурша. Мэ гиндосаравас, кай када прожала, но мандэ идоси када исин». Со поможыя тути, если фартэ камэлпэ тэ стерэс кода, со нэправильно?

15. Сар амэн можэт тэ подритярэл кода, кай и нэправильни жылании исин най кати амэндэ? (Диқэн и картинка.)

¹⁵ Кала ту бориспэ, кай тэ зритярэс пэстирэ нэправильни жылании, сэр, кай кацаво исин най кати тутэ. Андэ Библия ԥэнэнпэ: «Ԥаримос, саво тумэндэ исин, обычно важ и мануша» (1 Кор. 10:13а). Кадэла алава сас пистромэ важ и ԥрала и ԥэя, савэ жувэнас андо Коринфо. Дэсавэ андар лэндэ жы каринг кода, сар тэ уӷанэн лэ Иеговас, изменяли пэстирэ хуланди или хулаянди. Дэсавэ муршэнди чалёнас мурша, ай ла жувлянди — жувля. Ай инке варико сас матимари (1 Кор. 6:9—11). Сар гиндон, сас лэндэ посли крещения кодэла жылании, савэнца трэбуй тэ боринпэ? Канешно. Хоть вонэ и сас памазани христианоря, вонэ всаек сас нэсовершэни мануша. Дэкала лэнди прижаласпэ тэ боринпэ, кай тэ улэн пэстар и нэправильни жылании. Если амэндэ исин варисави найлащи жылания и амэ борисавас ласа, амэн фартэ подритярэл о гиндо, кай исин кодэла, кастэ тожэ вой сас и лэндэ вижыля тэ улэн ла. Тутэ вижала тэ ашэспэ «андэ састи вера», кала ту ӷанэс, «кай кадя жэ ԥарэс всаворэнди ԥралэнди па вся люма» (1 Пет. 5:9).

16. Состар амэнди трэбуй тэ фэрисавас и васо?

¹⁶ Опасно тэ гиндосарас, кай нико нэ можэт тэ полэл, соса амэнди прижалпэ тэ борисавас. Если амэ ласа андэ када тэ патяс, тоди погиндосараса, кай амари ситуацыя на парудёла, и амэндэ на авэла зор тэ улас пэстар и нэправильни жылании. Но андэ Библия ԥэнэнпэ па аврятэ: «О Дэл на ашавэл, и во на домэкэла ԥаримос, саво май бут тумарэ зорэстар, но, кала авэла ԥарэс, дэла помощь, кай тумэ тэ виритярэн» (1 Кор. 10:13б). Вижал, дажэ если амэн фартэ цырдэл тэ стерас кода, со нэправильно, амэ можэм тэ на подаспэ кадэлэсти. Лэ Иеговастирэ зорэса амэндэ вижала вся тэ виритярас.

17. Хоть и нэправильни жылании лэна тэ появинпэ, но со амэ можэм тэ терас?

¹⁷ Никала на бистэр: амэ нэсовершэни мануша, и важ када амэндэ моӷут тэ появинпэ и нэправильни жылании. Ӥто тер вся, кай лэн тэ улэс, кадя жэ, сар када стердя о Иосифо, кала унашлятар ла Патифаростиря хулаятар (Быт. 39:12). На домэк, кай и нэправильни жылании тэ авэн хула́я пэр тутэ!

НА СДЭПЭ!

18, 19. Пала савэ вопросоря трэбуй тэ погиндос, кай и май дур тэ сытярэс пэстири годи?

¹⁸ Кай тэ сытярас пэстири годи, амэнди вся и время трэбуй тэ пристас зор. Трэбуй тэ парувас пэстирэ гиндоря и дила, кай вонэ тэ сжанпэ лэ Иеговастиря времяса. Важ када амэнди трэбуй най еқвар тэ проверяем пэс. Можно тэ пушас пэстар: «Сыкавэл мэрни дила, кай мэ полав андэ сави время жував? Вижал мандэ тэ авав аврэ манушэса и тэ утидавпэ андэ нэви личность? Домэкав мэ, кай лэ Иеговаско свынто духо тэ влияет пэр мандэ, кай мэ тэ отшав и найлашэ жылании?»

¹⁹ Кала ту атвечаешь пэ кадэла вопросоря, на аштяр, кай андэ вся авэса идеально. Шув сама пэ кода, со тутэ ужэ вижыля тэ стерэс. Если ту полян, кай трэбуй варисо тэ парувэс, на умэк и вас. Тер кадя, сар пистромэ андэ Филиппийцам 3:16: «И дажэ если амэ ужэ бут со домарделям, давайте и май дур тэ жас па кодэва жэ дром». Патя: о Иегова блаӷословия тут, важ кода кай ту пристос зор, кай тэ сытярэс пэстири годи.