«Терэн вся, кай тумэндэ тэ авэл твэрэзо годи, авэн осторожни!»

1. Со о Иисусо ԥэндя лэ учениконэнди пала время, кала пашона «и послидни деса кадэла люмати» и каринг со во лэн побудисардя?

ЧЕРЕЗ дэсавэ деса о Иисусо трэбуй сас тэ мэрэл. Каринг лэстэ поджылэ штар лэстирэ ученикоря и пушлэ: «Со сыкавэла... кай пашэлэ и послидни деса кадэла люмати?» (Матф. 24:3). Кадэла ученикоря, наверно, пушэнас пала кода, сар вонэ моӷут тэ полэн, кала авэла розмардо о Иерусалимо и о храмо. Но о Иисусо росԥэндя лэнди най кати пала када. Во кадяжэ объяснисардя лэнди, со авэла, кала пашола и время кадэла люмати, андэ сави амэ жувас. Кала жэ трэбуй тэ авэл кадэя время? Акэ со ԥэндя о Иисусо: «Пала кода, кала авэла кодэва дес и часо, на ӷанэн нико: ни анӷелоря по нэбо, ни о Шаво — када ӷанэн кати о Дад». Ай тоди о Иисусо ԥэндя пэстирэ учениконэнди тэ на совэн и тэ авэн внимательни (Мар. 13:32—37).

2. Васо лэ христианонэнди андо пэрво вико трэбуй сас тэ авэн внимательни?

² И христианоря, савэ жувэнас андо пэрво вико андэ Иудея, трэбуй сас тэ авэн внимательни. Кадэлэстар зависила лэндири жызня. О Иисусо ԥэндя пэстирэ учениконэнди, пар со вонэ моӷут тэ полэн, кай пашол и время важ о Иерусалимо и лэско храмо. Во ԥэндя: «Кала тумэ додиқэна, кай о Иерусалимо окружысардэ и войскоря, тоди ӷанэн, кай ӥто во авэла шушо». Тоди лэнди трэбуй сас тэ приашундён каринг лэ Иисусостирэ алава и тэ нашэн андэ плая (Луки 21:20, 21). Кала и римляноря розмардэ о Иерусалимо, кодэла, ко канглэ лэ Иисусос, ашэлэпэ жундэ.

3. Пала со амэ подаса дума андэ кадэя статья?

³ Амэ тумэнца жувас андэ найлащи люма, савяти ужэ пашол и время. Важ када амэнди тожэ трэбуй тэ авас осторожни. Андэ кадэя статья амэ подаса дума, со тэ терас, кай амэндэ тэ авэл твэрэзо годи, кала диқас пэ кода, со терэлпэ андэ люма. Кадяжэ амэ уӷанаса, сар тэ диқас пала пэстэ и сар годяса тэ проандярас и время, сави ашэляпэ.

ТВЭРЭЗО ДИҚЭН ПЭ КОДА, СО ТЕРЭЛПЭ АНДЭ ЛЮМА

4. Васо амэнди трэбуй тэ шас сама пэ кода, со терэлпэ андэ люма, и сар исполнинпэ и библейски пророчества?

⁴ Канешно, амэ драго полас, васо трэбуй тэ шас сама пэ кода, со терэлпэ андэ люма. Вся када сыкавэл, кай исполнинпэ и библейски пророчества. Например, о Иисусо ԥэндя пала событии, савэ поможына тэ полас, кай пашол и время кадэла люмати, савяса правий о Сатана (Матф. 24:3—14). О апостало Пётро побудисардя амэн тэ авас внимательни каринг кода, сар исполнинпэ и пророчества, кай амари вера тэ ашэлпэ састи (2 Пет. 1:19—21). Послиднё книжка андэ Библия залэлпэ кацавэ алавэнца: «И откровения лэ Иисусостар Христостар, сави дя лэсти о Дэл, кай тэ сыкавэл пэстирэ рабонэнди кода, со ӥто трэбуй тэ авэл» (Отк. 1:1). Важ када амэнди фартэ интересно кода, со терэлпэ андэ люма, и сар кадэлэса исполнинпэ и библейски пророчества. И дэкала амэ камас май ӥто тэ подас дума пала када ек еқэса.

5. Со амэ трэбуй тэ терас, ай состар трэбуй тэ фэрисавас? (Кадяжэ диқэн и картинка.)

⁵ Кала амэ дас дума пала библейски пророчества, амэнди трэбуй тэ авас осторожни, кай нисо тэ на достас. Васо? Важ кода кай амэ на камас, кай через амарэ алава андэ собрания тэ на авэл единство. Например, амэ можэм тэ ашунас, сар и барэдэр мануша андэ страны доԥэндёнпэ тэ улэн варисаво розладо и тэ стерэн, кай тэ авэл мирно и безопасно. Варико сразу лэла тэ гиндой, кай кадэлэса исполнийпэ о пророчество анда 1 Фессалоникийцам 5:3. Но амэнди трэбуй тэ слидосарас пала послидни новости, савэ ԥэндя лэ Иеговастири арӷанизацыя. Если амэ андэ дума шас сама пэ када, тоди поможысарас лэ ԥралэнди и лэ ԥэянди андэ собрания тэ гиндон и тэ диқэн еқэндар (1 Кор. 1:10; 4:6).

6. Сости амэ сытювас анда 2 Петра 3:11—13?

⁶ Проадинон 2 Петра 3:11—13. О апостало Пётро поможый амэнди тэ полас, васо трэбуй тэ изучаем и библейски пророчества. Во побудий амэн тэ аштярас «лэ Иеговаско дес». Васо? Най важ кода, кай тэ полас о дес и о часо, кала авэла Армагеддоно (Матф. 24:36; Луки 12:40). Амэ камас андэ кадэя время, сави ашэляпэ, тэ андярас пэс вужэс англа Дэл и тэ стас бари патив пэр лэстэ. Аврэ алавэнца, тэ андярас пэс правильно и анда вся оди тэ служысарас лэ Иеговасти кадя, кай во тэ диқэл амари бари любовь каринг лэстэ. Ай важ када амэнди трэбуй тэ диқас пала пэстэ.

САР КАДА — ТЭ ДИҚАС ПАЛА ПЭСТЭ?

7. Сар када — тэ диқас пала пэстэ? (Луки 21:34).

⁷ О Иисусо сытярэлас пэстирэ учениконэн, кай вонэ тэ диқэн най кати пала кода, со терэлпэ андэ люма. (Проадинон Луки 21:34.) Во ԥэндя: «Драго диқэн пала пэстэ». Со када сыкавэл? Трэбуй тэ авас внимательни каринг вся, со можэт тэ римой амари дружба лэ Иеговаса, и тэ пристас вся пэско зор, кай тэ на домэкас када. Тоди о Иегова никала на парашэла амэн тэ любий (Прит. 22:3; Иуды 20, 21).

8. Со о апостало Павло ԥэндя лэ христианонэнди?

⁸ О апостало Павло тожэ ԥэнэнас лэ христианонэнди тэ слидон пала пэстэ. Например, во пистросардя лэ ԥралэнди андо Эфесо: «Драго диқэн, кай тумэ тэ андярэн пэс, сар годявэрнэ мануша, ай най сар найгодявэрнэ» (Эф. 5:15, 16). О Сатана вся и время старыийпэ тэ дурярэл амэн лэ Иеговастар. Важ када андэ Библия ԥэнэнпэ: «Терэн вся, кай тэ полэн, со камэл о Иегова». Када поможыя амэнди тэ фэрисавас лэ Сатанастар (Эф. 5:17).

9. Сар тэ полас, со камэл о Иегова?

⁹ Андэ Библия на ԥэнэнпэ пала вся, со можэт тэ римой амари дружба лэ Иеговаса. Часто амэнди прижалпэ тэ прилас и ришэнии андэ ситуацыи, пала савэ ворта нисо на ԥэнэнпэ андэ Библия. Кай тэ стерас мудро выборо, амэнди трэбуй тэ полас, «со камэл о Иегова». Важ када амэ трэбуй часто тэ изучаем лэ Дэвлэско Алав и тэ розмышляем пала кода, со проадиносардям. Када поможыя амэнди тэ полас и тэ пэрэлас лэ Иеговаско и «лэ Христоско гиндо». Со май драго амэ када тераса, со май вушэро амэнди авэла тэ андярас пэс годявэрнэс, дажэ кала нинай точно руковоцтво пала кажно ситуацыя андэ амари жызня (1 Кор. 2:14—16). Дэсавэ лэ Сатанастирэ ловушки амэнди драго дицон, ай дэсавэ най.

10. Росԥэнэн пала кода, состар амэ трэбуй тэ фэрисавас.

¹⁰ Акэ кати дэсо, через со амэ можэм тэ попэрас андэ бида: када кала и яқа цэлэн андо чикат, черезчур бут хас или пас, ԥэнас найлашэ алава пэ авэр, витидас и развличении, андэ савэ исин жэстокость, диқас о билажавардимос и инке авэр кацави жэ дила (Пс. 101:3). Кадэлэстар трэбуй тэ фэрисавас. Амаро вороӷо, о Сатана, вся и время старыийпэ тэ дурярэл амэн лэ Иеговастар (1 Пет. 5:8). Если амэ на аваса осторожни, во сможэт тэ повлияет пэ амари годи и тэ стерэл, кай амаро ди тэ цырдэлпэ, кай тэ завидуисарас, тэ прихохавас, тэ авас жадни, тэ холявас, тэ заваздас о шэро и ӥто тэ обижаемся (Гал. 5:19—21). Кала кадэла жылании кати появинпэ, можэт тэ здэлпэ, кай андэ када нинай нисо. Но если амэ сразу на уласа лэн, тоди вонэ лэна тэ хулаин амэнца, и амэ попэраса андэ бида (Иак. 1:14, 15).

11. Сави исин нэзаметно опасность и васо амэнди трэбуй латар тэ фэрисавас?

¹¹ Инке ек опасность, сави сразу на дицол и савятар трэбуй тэ фэрисавас, — када и дружба кодэлэнца, ко на служый лэ Иеговасти. Прецтавь кацави ситуацыя. Ту терэс бути варикаса, ко на служый лэ Иеговасти. Ту камэс, кай кодэва мануш драго тэ гиндой пала лэ Иеговастирэ свидетеля. Важ када андярэс пэс по доброму и всегда ӷотово тэ поможыс. Возможно, дэкала ту соӷласиспэ лэса тэ жас тэ хас, и акэ ту ужэ постояно вмести лэса жас по перерыво. Дэкала и дума жал пала варисо абисо, но спэрва ту старыиспэ тэ на подритярэс ла. Полокорэс ту присытёс каринг кацави дума и вой ашэл важ тутэ нормально. И акэ еқвар кодэва мануш ақарэл тут тэ побэшэс лэса варикай посли бути и ту соӷласиспэ. Прожал набут время и ту ужэ лэс тэ гиндос кадя жэ, сар во. Ай сар ту лэса май бут общаться кадэлэ манушэса, на андярэса ту пэс кадяжэ? Канешно, амэ камас тэ авас добри и тэ стас патив пэ всаворэ. Но нащи тэ бистрас, кай кодэла, каса амэ проандярас и время, фартэ влияют пар мэндэ (1 Кор. 15:33). Сар дэ важно тэ сэрас лэ Иисусостирэ алава и тэ диқас пала пэстэ! Тоди амэ на ласа тэ дас дума май бут, чем трэбуй, кодэлэнца, ко на жувэл кадя, сар чалёл лэ Иеговасти (2 Кор. 6:15). Амэ додиқаса и опасность и ласа латар тэ фэрисавас.

«ПРОАНДЯРЭН И ВРЕМЯ ГОДЯСА»

12. Со трэбуй сас тэ терэн лэ Иисусостирэ ученикоря, кала пашолас и время важ о Иерусалимо и лэско храмо?

¹² О Иисусо на камэлас, кай лэстирэ ученикоря тэ бэшэн би дилако и просто тэ аштярэн, кала о Иерусалимо и о храмо авэна розмардэ. Во дя лэнди задания. О Иисусо приԥэндя тэ росԥэнэн и лащи новость «андо Иерусалимо, па вся Иудея и Самария и жы кай само дурутнэ ҭана пэ ԥув» (Деян. 1:6—8). Сави дэ бари дила! Кала вонэ терэнас када анда вся оди, вонэ сыкавэнас, кай проандярэн и время годяса.

13. Васо амэнди трэбуй тэ проандярас и время годяса? (Колоссянам 4:5).

¹³ Проадинон Колоссянам 4:5. Если амэ диқас пала пэстэ, тоди ласа серьёзно тэ поджас каринг кода, сар используем и время. Амэ сэрас кай «важ всаворэ время и случаё» (Эккл. 9:11). Кажно мануш можэт нэожыдано тэ хасарэл и жызня.

14, 15. Сар амэ можэм тэ проандярас и время годяса? (Евреям 6:11, 12). (Кадяжэ диқэн и картинка.)

¹⁴ Амэ сможэм тэ проандярас и время годяса, кала терас кода, со камэл о Иегова и састярас пэстири дружба лэса (Иоан. 14:21). Амэнди трэбуй тэ терас кадя, сар ԥэндя о апостало Павло: «Авэн састэ, на́ парашэн тэ патян, вся и время терэн бут лэ Ӷосподостири дила» (1 Кор. 15:58). Если амэ кадя тераса, тоди, кала пашола и время амари или кадэла люмати, амэндэ на авэла тэ дуқал оди через кода, пэр со амэ тратисарасас и время (Матф. 24:13; Рим. 14:8).

¹⁵ Андэ амарэ деса о Иисусо кадяжэ поможый пэстирэ учениконэнди тэ росԥэнэн и новость пала лэ Дэвлэско Царство па вся и ԥув. Кадэлэса во зритярэл пэско алав. Через лэ Иеговастири арӷанизацыя о Иисусо сытярэл амэн, сар тэ росԥэнас и лащи новость. Во кадяжэ дэл вся, со трэбуй, кай амэ моӷли тэ терас кадэя дила (Матф. 28:18—20). Ай амэ, пэстиря ригатар, анда вся оди проповедуем и сытярас лэ манушэн, кай вонэ тэ ашэн лэ Иисусостирэ ученикоря. Кадяжэ амэ на парашас тэ авас внимательни, кала аштярас, сар о Иегова улэла кадэя найлащи люма. Кала амэ прилас о совето анда Евреям 6:11, 12, амэ сможэм састэс тэ патяс и тэ аштярэс о лашымос до конца (проадинон).

16. Со амэ камас тэ терас?

¹⁶ О Иегова стодя о дес и о часо, кала во улэла лэ Сатанастири люма. Андэ кодэя время о Иегова обязательно исполнит всаворэ обещянии пала раё пэ ԥув, савэ во запистросардя андэ Библия. Дэкала амэнди можэт тэ здэлпэ, кай инке най ӥто пашола и время кадэла люмати. Но лэ Иеговаско дес «авэла андэ время, сави [во] стодя»! (Авв. 2:3). Важ када давайте тэ на парашас тэ аштярас «лэ Дэвлэс, саво фэрий» (Мих. 7:7).