Андо Дэл патян бут мануша. Но кала пушэс лэндар, ко када о Дэл, всаворэ ԥэнэн па пэстирятэ. Дэко гиндой, кай о Дэл сындомари, саво кати и аштярэл, кай тэ спушэл лэ манушэндар пала лэндирэ бэзэха. Авэр ԥэнэн, кай о Дэл всаворэн любий и вся простий. Ай варико гиндой, кай лэ Дэвлэсти всаек, со амэнца. Дицол, кай кажно па пэстирятэ полэл, ко када о Дэл. Важ када бут мануша ԥэнэн, кай тэ уӷанэс о чачимос пала Дэл нисар на вижала.

Трэбуй пала када тэ уӷанэс? Да, трэбуй. Сар ту лэса тэ уӷанэс, ко када о Дэл, када можэт тэ дэл тути помощь тэ полэс, васо жувэс (Деяния 17:26—28). Сар ту май драго уӷанэса лэ Дэвлэс, тоди во май фартэ лэла тэ любий тут и тэ поможый тути (Иакова 4:8). Кадяжэ, кода, кай ту ӷанэс о чачимос пала Дэл, можэт тэ дэл тути вечно жызня (Иоанна 17:3).

Сар тэ уӷанэс пала Дэл? Погиндосар пала кодэва, кас ту драго ӷанэс, например пала пэско лашо друӷо. Сар тумэ ашэлэ друӷонэнца? Ту уӷанглян, сар лэс ақарэн, саво во мануш, со во любий, ай со най. Кадяжэ ту уӷанглян, соса во залэлпэ и со во камэл тэ терэл англэ. Во ашэля тирэ друӷоса, важ кода кай ту май драго лэс уӷанглян.

Лэ Дэвлэс кадяжэ можно май драго тэ уӷанэс. Важ када подаса дума акэ пала со.

• САР АҚАРЭН ЛЭ ДЭВЛЭС?

• САВО ВО?

• СО ВО ТЕРЭЛ?

• СО ВО СТЕРЭЛА АНГЛЭ?

• СО ТУТИ МОЖЭТ ТЭ ДЭЛ КОДА, КАЙ ТУ ӶАНЭС ЛЭ ДЭВЛЭС?

Андэ кадэва журнало росԥэнэнпэ, со пала када пистромэ андэ Библия. Май англэ ту уӷанэса най кати, ко када о Дэл, но и саво лашимос авэла кодэлэстар, кай тутэ исин дружба лэса.

Кала ту камэс варикас тэ уӷанэс, спэрва ту пушэс: «Сар тут ақарэн?» Тэ пушлоп ту када кай о Дэл, со во ԥэндоп?

«Мэ Иегова. Када мэрно алав» (Исаия 42:8).

Можэт, ту пэрво разо ашунэс кадэва алав, важ кода кай андэ бут библейски переводоря лэ Дэвлэско алав почти или вообще нинай. Часто и переводчикоря стон вместо лэ Дэвлэско алав титуло «Ӷосподо». Но пэ шыб, пэ сави спэрва пистронас и Библия, лэ Дэвлэско алав сас варикай 7000 раз. Андэ кадэва алав штар еврейски согласни буквы, савэ андэ романи шыб пистронпэ ЙХВХ (или ИГВГ). Романэс ԥэнэн «Иегова».

Лэ Дэвлэско алав най еқвар сас запистромэ пэ еврейско шыб и андэ бут переводоря пэ авэр шыба

ВАСО ВАЖНО ЛЭ ДЭВЛЭСКО АЛАВ?

Кадэва алав важно важ о Дэл. Нико на дя лэ Дэвлэсти кадэва алав, во екжэно приԥэндя лэс пэсти. О Иегова ԥэндя: «Када мэрно алав пэ вечность и всаворэ мануша анда всаворэ поколении авэна тэ сэрэн, кай када мэрно алав» (Исход 3:15). Андэ Библия лэ Дэвлэско алав пистромэ май бут разоря, чем лэстирэ титулоря, кацавэ сар Всемоӷущё, Дад, Ӷосподо или Дэл. И пистромэ май бут чем лэ манушэндирэ алава, кацавэ сар Авраамо, Моисеё, Давидо или Иисусо. О Дэл екжэно камэл, кай лэско алав всаворэ тэ уӷанэн. Андэ Библия пистромэ: «Кай и мануша тэ ӷанэн, кай ту, каско алав Иегова, ту ек Всевышнё па вся ԥув» (Псалом 83:18).

Кадэва алав важно важ о Иисус Христос. Андэ молитва, пэ сави ԥэнэн «Отче наш», о Иисусо сытярэлас пэстирэ учениконэн тэ мангэнпэ лэ Дэвлэсти кацавэ алавэнца: «Мэк тиро алав авэл свынто» (Матфея 6:9). И екжэно о Иисусо мангэласпэ лэ Дэвлэсти: «Дадэ, стер кай тиро алав тэ авэл ашунгло» (Иоанна 12:28). Важ о Иисусо сас само ӷлавно, кай лэ Дэвлэско алав тэ авэл ашунгло. Важ када во ԥэндя лэ Дэвлэсти: «Мэ дэм лэнди тэ ӷанэн, сар тут ақарэн и инке дава тэ ӷанэн» (Иоанна 17:26).

Кадэва алав важно важ кодэла, ко ӷанэн лэ Дэвлэс. Дэлмут и мануша, савэ любинас лэ Дэвлэс, полэнас, кай через лэ Дэвлэско алав, саво кати лэстэ, вонэ моӷут тэ фэринпэ и тэ спасынпэ. Андэ Библия пистромэ: «Лэ Иеговаско алав, сар бари састи башня. Гарадёл андэр латэ кодэва, ко кандэл лэ Дэвлэс, и фэрийпэ» (Притчи 18:10). Кадяжэ котэ исин кацавэ алава: «Кажно, ко ақарэл лэ Иеговас па алавэстэ, спасыяпэ» (Иоиль 2:32). Анда Библия дицол, кай па лэ Дэвлэско алав лэна тэ ӷатярэн кодэлэн, ко тэлён лэсти: «О Симеоно драго росԥэндя, сар о Дэл пэрво разо шутя сама пэ авэр народоря, кай тэ стидэл андар лэндэ народо важ пэско алав» (Деяния 15:14; Михей 4:5).

СО СЫКАВЭЛ КАДЭВА АЛАВ?

Кадэва алав сыкавэл, саво о Дэл. Сар гиндон бут мануша, савэ розлэнпэ андэ Библия, о алав Иегова сыкавэл, кай «Во дэл тэ ашэл». О Дэл Иегова май бут росԥэндя пала пэско алав, кала ԥэндя лэ Моисеёсти: «Мэ ашава кодэлэса, каса закамава тэ ашав» (Исход 3:14). Дицол, кай лэ Дэвлэско алав сыкавэл, кай во кодэва, ко вся создал. Но кадэва алав кадяжэ сыкавэл, кай о Дэл можэт тэ ашэл кодэлэса, каса трэбуй, кай тэ стерэл кода, со загиндосардя. И важ када во можэт тэ стерэл, кай лэстирэ создании тэ ашэн кодэлэнца, каса трэбуй. Лэ Дэвлэстирэ титулоря росԥэнэн, саво во залэл ҭан, сави лэстэ власть и зор. Но кати о алав, Иегова, сыкавэл, ко во исин и каса можэт тэ ашэл.

Лэ Дэвлэско алав доԥэнэн, кай амэ куч лэ Дэвлэсти. Лэ Дэвлэско алав дэл тэ полас, кай во вся и время диқэл пала амэндэ и пала вся, со создал. Кадяжэ, кода, кай о Дэл дя амэнди тэ ӷанас, сар лэс ақарэн, сыкавэл, кай во камэл, кай амэ тэ ашас лэстирэ друӷонэнца. Кати погиндосар, во росԥэндя, сар лэс ақарэн, инке сар и мануша на манглэ лэс пала када. О Дэл на камэл, кай амэ тэ гиндосарас, кай во кодэва, кас амэ на поласа и ко фартэ дур. Но камэл, кай амэ тэ полас, кай лэса амэндэ можэт тэ авэл лащи дружба (Псалом 73:28).

Кала ақарас лэ Дэвлэс па алавэстэ, амэ стас пэр лэстэ патив. Например, ту ԥэндян кодэлэсти, каса камэс тэ дружыс, кай во тэ ақарэл тут па алавэстэ. Со авелоп тутэ андо ди, кала во отԥэнделоп када тэ терэл? Сар прожылоп и время, ту погиндосардоп, кай кадэва мануш на камэл туса тэ дружый. Кадя и лэ Дэвлэса. О Иегова мангэл, кай амэ тэ ақарас лэс па алавэстэ. Сар амэ терас кадя, амэ сыкавас, кай амэнди куч амари дружба лэса. Ай лэсти куч кодэла, ко «гиндой пала лэско алав» (Малахия 3:16).

Тэ ӷанэс лэ Дэвлэско алав, када пэрво, со поможыя, кай тутэ тэ авэл лащи дружба лэса. Но када инке най вся. Трэбуй тэ уӷанэс, ко во сыно, и май драго лэс тэ полэс.

Со май бут лашимос амэ уӷанас пала мануш, со май фартэ во амэнди чалёл и амари дружба лэса ашэл инке май састи. Кадя жэ и лэ Иеговаса. Кала амэ май бут ласа тэ уӷанас саво во, амэ май драго лэс поласа и во авэла инке май пашэ каринг амэндэ. Анда всаворэ лашэ лэ Дэвлэстирэ качестворя, исин штар, савэ май ӷлавни. Када зор, мудрость, справедливость и любовь.

О ДЭЛ ЗОРАЛО

«О Владыка Ӷосподо Иегова! Ту стердян о нэбо и ԥув пэстирэ барэ зорэса» (ИЕРЕМИЯ 32:17).

Лэ Дэвлэско зор дицол андэ кода, со во создал. Например, со ту чуствуеш, кала вижас миласа пэ вулица? Татимос лэ қамэстар. Но па чачимастэ када сыкавэл лэ Дэвлэско зор. Саво зор жал лэ қамэстар? О паи тирёл, кала и температура ваздэлпэ жы кай и 100 ӷрадусоря. Ай о қам варикай пэ 150 000 разоря инке май ԥабардо. Кажно секунда лэ қамэстар жал кацаво зор, сар кала взорвинпэ миллионоря ядерни бомбы.

Если тэ сыстосарас андо Космосо и миллиардоря черӷая, о Қам, када цыкнёры черӷай машкар лэндэ. И учони полинэ, кай ек анда само барэ черӷая, када черӷай UY Щита. Вонэ ԥэнэн, кай кадэя черӷай пэ скати бари, кай если ла тэ стас вместо қам, то вой заушаравэла и ԥув и зажала пала орбита кай лэ Юпитеростири планета. Када хоть варисар поможый тэ полас и алава, савэ ԥэндя о Иеремия, кай о Дэл Иегова создал о нэбо и ԥув, амаро Космосо, пэстирэ барэ зорэса.

Со амэнди можэт тэ дэл лэ Дэвлэско зор? Амари жызня зависит кодэлэстар, со создал о Дэл. Например, када, со жал лэ қамэстар и со дэл и ԥув. Кадяжэ о Дэл пэстирэ барэ зорэса, можэт тэ поможый лэ манушэнди. Сар када? Андэ пэрво вико о Дэл дя пэско зор лэ Иисусости, кай во тэ терэл чудеса. Пала када андэ Библия пистромэ: «И корэ лэн тэ диқэн, кодэла, ко лангал, лэн тэ ԥирэн, и прокажённи ашэн зоралэ, и мулэ ринпэ каринг и жызня» (Матфея 11:5). Ай со андэ амари время? Андэ Библия пистромэ: «Во дэл зор кодэлэсти, ко цыеля». Кадяжэ андэ Библия исин кацавэ алава: «Кодэла, ко аштярэн лэ Иеговастар о лашимос, упалэ лэна зор» (Исаия 40:29, 31). О Иегова камэл тэ дэл пэско зор, кай амэ тэ пэрэандярас амаро ԥаримос (2 Коринфянам 4:7). Камэс ту тэ ашэс друӷоса кодэлэсти, ко кадя диқэл пала тутэ и можэт тэ дэл тути пэско баро зор?

О ДЭЛ МУДРО

«Сар дэ бут ту создал, о Иегова! Ту вся создал фартэ мудро» (ПСАЛОМ 104:24).

Со май бут амэ уӷанас пала кода, со создал о Дэл, со май фартэ амэнди лэл тэ чалёл лэстири мудрость. И учони драго роздиқэн кода, со создал о Иегова, кай потом тэ пэрэлэн када кай и природа и тэ терэн кадя жэ. Например, кала терэн варисо цыкноро, ԥэнаса, застёжка пэ липучка и жы кай варисо баро важ о самолёто. Пэ када ԥэнэн биомиметика или биомимикрия.

Инке май фартэ дицол лэ Дэвлэстири мудрость андэ кода, сар дэ драго о Дэл создал лэ манушэс. Подаса дума, сар барёл о бэято андо йло кай и жувли, кала вой заԥирдя. Спэрва о бэято фартэ цыкноро. Сар прожал и время, кай о бэято лэн тэ барён орӷаноря, кокаля, вязы и тила. Вся када жал андэ пэстири время. И через девять шона во арақадёлпэ. Кала и мануша диқэн лэ Дэвлэстири бари мудрость андэ кода, сар во создал лэ манушэс, вонэ полэн и алава, савэ запистромэ андэ Библия: «Авава тэ хвалисарав тут, важ кода кай ту шукарнэс создал ман и кадэлэстар мандэ бари патив каринг тутэ» (Псалом 139:14).

Со амэнди можэт тэ дэл лэ Дэвлэстири мудрость? Амаро Создателё ӷанэн, со трэбуй, кай амэ тэ авас бахталэ. О Дэл вся ӷанэн и полэл. Во анда оди дэл амэнди пэстири мудрость. Ла можно тэ виарақас андэ Библия. Например, андэ Библия пистромэ кацавэ алава: «Анда вся оди простин ек еқэс» (Колоссянам 3:13). Када годявэрнэс? Да. И учони полинэ, кай и мануша, савэ ӷанэн тэ простин, май драго совэн, лэндэ най кадя часто ваздэлпэ и давления, най кадя часто лэлпэ депрессия и авэр насвалимос. Сар лашо друӷо, саво полэл и диқэл пала амэндэ, о Дэл вся и время можэт драго и ковлэс тэ подԥэнэн амэнди (2 Тимофею 3:16, 17). Камлоп и ту, кай тутэ тэ авэл кацаво друӷо?

О ДЭЛ СПРАВЕДЛИВО

«О Иегова любий справедливость» (ПСАЛОМ 37:28).

О Дэл андэ вся андярэл пэс справедливо. Чаче, «нэ можэт о чачуно Дэл тэ терэл о найлашимос и о Всемоӷущё тэ андярэл пэс нэсправедливо!» (Иов 34:10). Во справедливо виандярэл о сындо. Акэ со пала Иегова ԥэндя о псалмопевцо: «Ту сындоса и народоря па чачимастэ» (Псалом 67:4). Кадя сар «о Иегова диқэл оди», во шол сама, кала и мануша притерэнпэ, сразу полэл кай о чачимос, ай кай най и сындой лэ манушэн па лэндири дила (1 Самуила 16:7). Кадяжэ, о Дэл диқэл, кала лэ манушэнца обжанпэ нэсправедливо, и кала подтинэн аврэн. И во дэл алав, кай «кодэла, ко терэн о найлашимос, будэр на авэна пэ ԥув» (Притчи 2:22).

Но о Дэл най кодэва сындомари, саво кати и аштярэл, кай тэ спушэл лэ манушэндар пала лэндирэ бэзэха. Во вся и время камэл тэ виарақэл, васо тэ жалуий и тэ простий лэ манушэс. Андэ Библия ԥэнэнпэ, кай «о Иегова простий и жалуий анда вся оди» дажэ найлашэ манушэн, если вонэ анда вся оди каинпэ андэ пэстирэ бэзэха. Хэба най кацави трэбуй тэ авэл и чачуни справедливость? (Псалом 103:8; 2 Петра 3:9).

Со амэнди можэт тэ дэл лэ Дэвлэстири справедливость? О апостоло Пётро ԥэндя: «О Дэл на диқэл, сави кай о мануш нацыя. Но андэ кажно народо исин кодэва, ко дарал лэстар и ритярэл лэско законо, ко кадя терэл чалёл лэсти» (Деяния 10:34, 35). О Дэл на диқэл, ко о мануш, сави лэстэ нацыя, анда сави во страна или скати лэстэ ловэ. И кадэлэстар амэндэ кажнонэстэ можэт тэ авэл бут лашимос.

О Дэл камэл, кай амэ тэ полас васо во справедливо и тэ терас кадя жэ. Важ када во дя амэнди и совесть. Андэ Библия ԥэнэнпэ, кай и совесть, када законо, саво андэ амарэ одя и саво поможый амэнди тэ полас, драго амэ пэс андярас чи най (Римлянам 2:15). Со амэнди кадэлэстар? Сар амэ драго сытярдям амари совесть, вой поможыя амэнди тэ на терас найгодявэрнэс и нэсправедливо. Ай если амэ шылисайлям, и совесть поможыя амэнди тэ каисавас и андэ варисо тэ парудювас. Сар жэ амэ лошалэ, кай о Дэл екжэно справедливо и сытярэл амэн кадэлэсти! И важ када амэ камас тэ авас инке май лашэ друӷоря лэса.

О ДЭЛ ИСИН ЛЮБОВЬ

«О Дэл исин любовь» (1 ИОАННА 4:8).

Лэ Дэвлэстэ исин зор и во справедливо и мудро. Но андэ Библия никай на ԥэнэнпэ пала Дэл, кай во исин зор, мудрость и справедливость. Андэр латэ пистромэ, кай о Дэл исин любовь. Васо? Андэ вся, со терэл о Иегова, дицол лэско зор, мудрость и справедливость, но терэл во када через и любовь. Вся, со терэл о Иегова, во терэл важ кода кай любий.

О Иегова ля тэ создаёт най важ кода, кай лэсти варисо на хутилэлас. Через и любовь во создал по нэбо и пэ ԥув кодэлэн, ко сможэт тэ цэний и тэ полэл, кай во анда вся оди диқэл пала лэндэ. Во создал и ԥув кадя, кай вой тэ ашэл сар райкано цэр важ и мануша. И о Дэл на парашэл тэ диқэл пала мануша, во «приԥэнэн лэ қамэсти тэ ваздэлпэ важ кодэла, ко терэл о лашимос и ко терэл о найлашимос, и бишалэл о брышын важ и лашэ и важ и найлашэ мануша» (Матфея 5:45).

Кадяжэ, «о Иегова цэний и жалуий анда вся оди» (Иакова 5:11). Лэсти куч кодэла, ко всаворэ одеса камэл тэ уӷанэн лэс и тэ ашэл лэстирэ друӷоса. Во цэний кажнонэ кацавэ манушэс. О Дэл подритярэл амэн через и Библия, кай во «найдур кажнонэстар амэндар» (Деяния 17:27).

Со амэнди можэт тэ дэл лэ Дэвлэстири любовь? Амэнди чалёл тэ диқас, кала шукарнэс зажал о қам. Амэнди чалёл тэ ашунас сар асал о бэято. Амэнди куч лэ манушэстири любовь, саво амэнди пашэ. На ԥэнэса, кай би кадэлэско амэ нэ сможэм тэ жувас, но кадэлэстар амари жызня ашэл май барвали.

Инке сар о Дэл сыкавэл пэстири любовь, када и молитва. Андэ Библия ԥэнэнпэ: «Ни пала со фартэ на загиндонпэ, но андэ вся, кала мангэнпэ и кала ясвэнца мангэнпэ, блаӷодарин и анда оди росԥэнэн лэ Дэвлэсти, со камэн». Сар любящё дад во камэл, кай амэ тэ росԥэнас лэсти вся, пала со загиндосавас. Важ када о Иегова дэл алав, кай дэла амэнди «о лашимос андо ди, саво май баро кодэлэстар, со полэл о мануш» (Филиппийцам 4:6, 7).

Амэ уӷанглям пала штар ӷлавни лэ Дэвлэстирэ качестворя, када зор, мудрость, справедливость и любовь. Поможысардя када тути май драго тэ полэс, ко када о Дэл? Кай о Дэл тэ авэл тути инке май пашутно друӷо, давай уӷанаса, со во ужэ стердя важ амэндэ и со стерэла англэ.

Если ту камэс тэ уӷанэс лэ манушэс май фэдэр, авелоп драго тэ уӷанэс, со кадэва мануш ужэ стердя андэ пэстири жызня и саво ԥаримос пэрэандярдя. Кадя жэ и лэ Дэвлэса, если амэ камас тэ полас лэс, амэнди трэбуй май бут тэ уӷанас, со во стердя. Можэт важ тутэ авэла нэво, сар дэ бут о Дэл подарисардя лэ манушэнди, сар када терэл амари жызня май бахтали и скати лашимос када анэна англэ.

О ДЭЛ ПОДАРИСАРДЯ АМЭНДИ РАЙКАНО ЦЭР

О Дэл Иегова амаро создателё. И «лэстирэ качестворя... драго дицон кодэла времятар, сар во создал и люма, важ кода кай лэн [лэ Дэвлэстирэ качестворя] ӷатярэн через кода, со во создал» (Римлянам 1:20). Андэ Библия пала Дэл ԥэнэнпэ: «Во пэстирэ зорэса создал и ԥув. И лащи ԥув во создал пэстиря мудростяса и пэстиря годяса росшутя о нэбо» (Иеремия 10:12). Кода, со создал о Дэл, сыкавэл, кай лэсти най всаек, со амэнца.

О Иегова стердя и жызня май бахтали кодэлэса, кай «создал лэ манушэс, кай во пэр лэстэ тэ шолпэ» (Бытие 1:27). Када сыкавэл, кай амэндэ андэ варисостэ моӷут тэ авэн кацавэ жэ качестворя, сар лэстэ. Во создал амэн кадя, кай амэ тэ камас тэ ӷанас пала лэстэ, тэ полас и тэ прилас кода, со лэсти куч. Если амэ диқас пэ вся кадя, сар о Дэл, тоди амари жызня ашэл май бахтали и амэ полас васо жувас. Инке о Дэл стердя кадя, кай амэ можэм тэ ашас лэстирэ друӷонэнца.

Кода, сар о Иегова создал амари ԥув, сыкавэл, кай во любий амэн. О апостоло Павло ԥэндя, кай о Дэл «на парашэлас тэ росԥэнэн пала пэстэ, кала терэлас лашимос, бишалэлас... [амэнди] па нэбо о брышын, дэлас урожаё андэ пэстири время, дэлас хамос и ԥэрэлас... [амарэ] одя лошаса» (Деяния 14:17). О Дэл дя амэнди май бут, чем кода, со трэбуй кай тэ вижувас. Кода, со во дя, сыкавэл, кай о Дэл камэл, кай амэ тэ лошавас ла жызняти. Но када кати набут анда вся кода, со о Дэл камэлас амэнди тэ дэл.

О Иегова создал и ԥув кадя, кай и мануша тэ жувэн пэр латэ вечно. Андэ Библия ԥэнэнпэ кай «и ԥув, во дя лэ манушэндирэ шавэнди», ай кадяжэ кай во «стердя и ԥув най евья, ай создал ла важ кода, кай пэр латэ тэ жувэн» (Псалом 115:16; Исаия 45:18). Ко трэбуй сас пэр латэ тэ жувэл и скати время? Акэ со ԥэнэнпэ андэ Библия: «Кодэлэнди, ко кандэн лэ Дэвлэс, ашэлапэ и ԥув и вонэ жувэна пэр латэ вечно» (Псалом 37:29).

О Иегова создал пэрвонэ муршэс и пэрвона жувля, лэ Адамос и ла Ева. Во дя лэнди тэ жувэн андо райкано садо. Во камэлас, кай вонэ тэ залэнпэ лэ садоса и тэ диқэн пала лэстэ (Бытие 2:8, 15). О Дэл ԥэндя, кай лэндэ тэ авэн бут бэятцэ и кай тэ залэнпэ ла ԥувьяса (Бытие 1:28). О Адамо и Ева моӷли тэ жувэн пэ ԥув вечно. Но вонэ на канглэ лэ Дэвлэс и ужэ нэ моӷли тэ жувэн машкар кодэла, ко кандэл лэ Дэвлэс и савэнди ашэлапэ и ԥув. Сар амэ уӷанаса, о Дэл через кадэва бэзэх на отԥэнделя тэ стерэл кода, со загиндосардя важ и мануша и важ и ԥув. Но пала када подаса дума май англэ. Ай акана, давай уӷанаса, со инке о Дэл стердя важ и мануша.

О ДЭЛ ДЯ АМЭНДИ И БИБЛИЯ

И Библия, када лэ Дэвлэско алав. Сости о Иегова дя амэнди и Библия? Ӷлавно, када, кай амэ тэ уӷанас пала лэстэ (Притчи 2:1—5). Канешно, андэ Библия на росԥэнэнпэ вся пала Дэл, андэ книӷа вся када дажэ на поместияпэ (Экклезиаст 3:11). Но вся, со пистромэ андэ Библия, поможый амэнди тэ уӷанас, саво о Дэл. Амэ май бут уӷанас пала лэстэ, кала адиносарас, сар о Дэл андярэлас пэс разнонэ манушэнца. Амэ диқас савэ мануша лэсти чалён, ай савэ най (Псалом 15:1—5). Амэ полас, сави религия лэсти чалёл, савэ нормы во стодя и сар трэбуй тэ диқас пэ ловэ. Но май бут амэ уӷанас пала Иегова, кала адиносарас андэ Библия пала кода, со ԥэнэнас и терэлас лэско шаво, о Иисус Христос (Иоанна 14:9).

Сас инке васо о Иегова закамля тэ дэл амэнди и Библия. Во камэлас тэ сытярэл амэн тэ жувас кадя, кай тэ авас бахталэ и тэ полас васо жувас. Андэ Библия о Иегова росԥэнэн со трэбуй тэ терас, кай о ери тэ авэл бахтало, сар тэ жувас, кай тэ авас лошалэ и сар тэ на загиндосавас бут. Май дур андэ кадэва журнало ту уӷанэса, кай андэ Библия исин ответоря пэ ӷлавни вопросоря. Например «Васо кадя бут ԥаримос?», «Со авэла англэ?». Кадяжэ андэр латэ пистромэ, со ужэ стердя о Дэл, кай тэ авэл кода, со во загиндосардя спэрва.

Исин инке, со доԥэнэн, кай и Библия па чачимастэ ек кацави книӷа, сави амэнди дя о Дэл. Ла пистросардэ варикай сорок мурша и пистрояспэ вой 1 600 бэрш, но андэр латэ ек ӷлавно тема (2 Тимофею 3:16). И Библия, сави амэ адиносарас адес, кацави жэ, сар и тоди, кала вой сас запистромэ. И када доԥэнэн бут пуранэ библейски тексторя. Но када на ԥэнэса пала авэр книшки. Кадяжэ, и мануша терэнас вся, кай и Библия тэ на пэрэандярэн пэ авэр шыба и кай вой тэ на авэл лэ манушэндэ. Но адес и Библия, када книӷа, сави можэт тэ адиной почти кажно мануш и сави пэрэандярэн пэ со май бут шыба. И Библия исин почти андо кажно цэр, и када драго доԥэнэн, кай «о алав амарэ Дэвлэско авэла вечно» (Исаия 40:8).

О ДЭЛ ОТДЯ ПАЛА АМЭНДЭ ПЭСТИРЭ ШАВЭС

О Дэл диласа сыкадя, кай вся, со во загиндосардя важ и мануша, во стерэла. Када инке ек лэстири бари дила. Сар ужэ сас ԥэндо, о Дэл камэлас, кай и мануша тэ жувэн пэ ԥув вечно. Кала о Адамо жыля против о Дэл, во стердя бэзэх и кадя най кати во хасардя и вечно жызня, но и всаворэ, ко жыля лэстар. Андэ Библия пистромэ: «Важ кода, кай через о ек мануш о бэзэх авеля андо миро, ай через о бэзэх авеля и смэрть, и кадя смэрть пэрэжыля пэ всаворэ мануша, важ кода кай всаворэ стердэ бэзэх» (Римлянам 5:12). Кода, со стердя о Адамо, здэласпэ, кай сԥангля лэ Дэвлэсти и вас, кай во тэ на стерэл кода, со загиндосардя. Но када кадя?

Андэ кода, со стердя о Иегова, дицэлэ лэстирэ ӷлавни качестворя. Важ кода кай во справедливо, во спушля лэ Адамостар и ла Еватар, но сыкадя пэстири любовь каринг всаворэ авэр мануша. Через пэстири мудрость во поля, со трэбуй тэ терэл и росԥэндя пала када (Бытие 3:15). Кай тэ улэл лэ манушэндар о бэзэх и смэрть, о Иегова ԥэндя пэстирэ шавэсти, лэ Иисусости, кай во када тэ стерэл. Сар када сас трэбуй тэ авэл?

Кай тэ улэл лэ манушэндар о бэзэх, саво жыля лэ Адамостар, о Иегова бишалдя пэ ԥув пэстирэ шавэс. О Иисусо трэбуй сас тэ отдэл «пэстири жызня, кай тэ витинэл бутэн» и тэ сытярэл лэ манушэн тэ жувэн правильно (Матфея 20:28; Иоанна 14:6)a. О Иисусо моӷ тэ витинэл лэ манушэн, важ кода кай во, сар и о Адамо, сас би бэзэхэско. Но кати о Иисусо кандэлас лэ Иеговас жы каринг пэстири смэрть. Во на затердя тэ мэрэл, важ када о Иегова рисардя лэс каринг и жызня по нэбо. Акана о Иисусо моӷ тэ стерэл кода, со на вижыля кай о Адамо, када, тэ дэл лэ лашэ манушэнди тэ жувэн вечно. Андэ Библия ԥэнэнпэ: «Через кода, кай о ек мануш на кангля лэ Дэвлэс, бут мануша ашэлэ ӷрешни, и кадя через кода, кай о ек мануш кангля лэ Дэвлэс, бут ашэна лашэ манушэнца андэ лэ Дэвлэстирэ яқа» (Римлянам 5:19). О Иегова дя алав, кай дэла лэ манушэнди вечно жызня и кода, кай о Иисусо отдя пэстири жызня, доԥэнэн када.

Амэ бут уӷанас пала Иегова анда кода, со во стердя, кала о Адамо жыля против лэстэ. Сар амэ полям, нисо нэ можэт тэ на дэл лэ Иеговасти тэ стерэл кода, со во ля тэ терэл. Вся со во ԥэнэн, кадя и исин (Исаия 55:11). Акана амэ полас, сар дэ фартэ любий амэн о Иегова. Андэ 1 Иоанна 4:9, 10 пистромэ: «О Дэл сыкадя пэстири любовь каринг амэндэ, кай бишалдя андо миро пэстирэ шавэс, саво лэстэ ек кацаво, кай через лэстэ амэ тэ жувас. Любовь най андэ кода, кай амэ лям тэ любисарас лэ Дэвлэс, ай андэ кода, кай во ля тэ любий амэн и бишалдя пэстирэ шавэс тэ отдэл пэстири жызня, кай тэ витинэл амэн лэ бэзэхэстар».

Если о Дэл «на жалуисардя пэстирэ шавэс, ай отдя лэс важ амэндэ», можно тэ патяс, кай во стерэла и вся авэр, пала со дя алав (Римлянам 8:32). Пала со жал и дума? Адиносар май дур и уӷанэса.

Кала лэ манушэстэ ԥаримос, во аштярэл, кай о друӷо поможыя лэсти. Важ када дэсавэ мануша ԥэнэн, кай о Дэл лэнди най друӷо, важ кода кай лэстар нинай нисави помощь. Но па чачимастэ о Дэл бут со стердя важ амэндэ. И инке, йто о Дэл улэла вся амаро ԥаримос и биды. Со во стерэла англэ?

УЛЭЛА О НАЙЛАШИМОС

О Дэл улэла най кати о найлашимос, ай и кодэлэс, кастар во жал. Андэ Библия ԥэнэнпэ: «Всаворя люмаса правий о Найлашо» (1 Иоанна 5:19). «О Найлашо», када кодэва, пэр кастэ о Иисусо ԥэндя, кай во ла люмако правителё, када о Сатана (Иоанна 12:31). Вижал, кодэлэстар, кай пэ мануша тасавэл о Сатана, лэндэ кацави ԥари жызня. Но сар о Дэл вся парувэла?

Йто о Дэл Иегова через пэско шаво, о Иисусо, «умарэла лэ Сатанас» (Евреям 2:14; 1 Иоанна 3:8). Сар пистромэ андэ Библия, о Сатана ӷанэн, кай «лэстэ ашэлпэ набут время» (Откровение 12:12). Кадяжэ, о Дэл улэла па ԥув кодэлэн, ко терэл о найлашимос аврэнди (Псалом 37:9; Притчи 2:22).

ПА ВСЯ И ԤУВ СТЕРЭЛА РАЁ

Посли кода, сар амаро Создателё улэла па ԥув вся о найлашимос, во стерэла вся, со загиндосардя спэрва важ и ԥув и важ и мануша. Со амэн аштярэл?

Всаворэ ладина ек еқэса и нисо на авэла тэ даравэл. «Кодэлэнди, кастэ ковло ди, ашэлапэ и ԥув и вонэ авэна лошалэ кодэлэстар, кай всаворэ ладина ек еқэса» (Псалом 37:11).

Фартэ бут лашо хамос. «Пэ ԥув авэла бут марно. Упрэ пэ плая, лэс авэла ԥэрдо» (Псалом 72:16).

Лашэ цэра и бути, сави чалёл. «И мануша лэна тэ строин и цэра и тэ жувэн андэр лэндэ, авэна тэ барярэн и виноӷрадникоря и тэ хан о виноӷрадо. [...] ...И кодэла, кас мэ витидэм, авэна тэ лэн вся кода, со стердэ пэстирэ вастэнца» (Исаия 65:21, 22).

Камлоп ту тэ диқэс када пэстирэ яқэнца? Йто всаворэ мануша кадя и жувэна.

УЛЭЛА О НАСВАЛИМОС И СМЭРТЬ

Адес кажно мануш пэрэандярэл ԥаримос лэ насвалимастар и ла смэртятар. Но кадя авэла най вся и время. Йто о Дэл стерэла кадя, кай через лэ Иисусостири смэрть «кажно, ко сыкавэл, кай патял андэр лэстэ, тэ на мэрэл, ай тэ жувэл вечно» (Иоанна 3:16). Со амэнди кадэлэстар авэла?

О насвалимос будэр на авэла. «Нико анда мануша, на ԥэнэна: „Мэ насвало“. Лэ народости, саво жувэл пэ кодэя ԥув, простияпэ лэско бэзэх» (Исаия 33:24).

И мануша на лэна тэ мэрэн. «Во улэла и смэрть пэ вечность, и о Владыка Ӷосподо Иегова виқосэла всаворэ ясва» (Исаия 25:8).

И мануша жувэна вечно. «О подарко лэ Дэвлэстар, када и вечно жызня, сави через о Иисус Христос амаро Ӷосподо» (Римлянам 6:23).

Кодэла, ко муля, упалэ лэна тэ жувэн пэ ԥув. «Ринапэ каринг и жызня кодэла, ко муля, праведни и нэправедни» (Деяния 24:15). Када авэла через и цэмин, сави о Дэл потиндя важ и мануша.

Сар о Дэл вся када стерэла?

О ДЭЛ СТОЛА СО МАЙ ЛАШО ПРАВИТЕЛЬСТВО

О Дэл стерэла вся, со загиндосардясас важ и ԥув и важ и мануша, через о правительство, саво по нэбо. О Дэл стодя лэ Иисусос, кай во тэ авэл правителё (Псалом 110:1, 2). Пала кадэва правительство, или царство, о Иисусо сытярэлас пэстирэ учениконэн тэ мангэнпэ: «Амаро Дад по нэбо... Мэк авэл тиро царство» (Матфея 6:9, 10).

Лэ Дэвлэско царство лэла тэ правий па вся и ԥув и улэла о ԥаримос всаворэ манушэндар. Ни ек правительство, саво стодэ и мануша, на сыстояпэ кадэлэ царствоса! Важ када о Иисусо, кала служыяс пэ ԥув, на жалуияс о зор, кай тэ росԥэнэн «и лащи весть пала царство». Во ԥэндя пэстирэ учениконэнди, кай вонэ тэ терэн кадэя жэ дила (Матфея 4:23; 24:14).

Вся када о Иегова камэл тэ стерэл пэ ԥув, важ кода кай во фартэ любий лэ манушэн. Камлоп ту май бут тэ уӷанэс пала кацаво любящё Дэл и тэ ашэс май пашэ каринг лэстэ? Со тути дэла кода, кай ту ӷанэс лэ Дэвлэс? Давай подаса дума пала када андэ авэр статья.

Ни акэ, амэ уӷанглям, ко када о Дэл. Амэ полям кай лэс ақарэн Иегова и кай лэско ӷлавно качество, када любовь. Кадяжэ амэ уӷанглям со во ужэ стердя важ и мануша и со во инке стерэла. И Библия инке бут со росԥэнэн важ о Дэл. Но вижал кацаво вопросо: «Саво манди лашимос кодэлэстар, кай мэ када ӷанав?»

О Иегова дэл алав, кай «сар ту лэса тэ родэс лэс, во домэкэла, кай ту тэ виарақэс лэс» (1 Летопись 28:9). Кати погиндосар, кала ту и май дур лэса тэ уӷанэс пала лэстэ, тоди тутэ авэла «лащи дружба лэ Иеговаса» (Псалом 25:14). Саво лашимос авэла кадэлэстар?

Чачуни бах. О Иегова, када бахтало Дэл (1 Тимофею 1:11). Кала амэ терас вся, кай тэ дружысарас лэ Иеговаса, тоди амэ ашас май бахталэ. Када поможый амэнди тэ парувас амаро гиндо, ай кадяжэ кода, со амэндэ по ди, и тэ авэл май лашо зор (Псалом 33:12). Тутэ вижала тэ ашавэс и найлашэ привычки и ту присытёса тэ терэс драго. Кадяжэ тутэ вижала тэ ладис аврэнца. Кала тутэ када вся авэла, ту ԥэнэса, сар о псалмопевцо, саво пистросардя: «Важ мандэ тэ пашував каринг о Дэл, када лашимос» (Псалом 73:28).

Диқэл пала кажно. О Иегова ԥэндя пэстирэ служытелёнэнди: «Подԥэнава тути и лава тэ диқав пала тутэ» (Псалом 32:8). Када сыкавэл, кай о Иегова шол сама кажнонэсти, ко служый лэсти, и полэл, со трэбуй важ кажно мануш (Псалом 139:1, 2). Кала ту уӷанэса лэ Иеговас май драго, ту полэса, кай во чачуно друӷо, саво можэт вся и время тэ поможый тути.

Англэ авэла бут лашимос. О Иегова дэл амэнди най кати кода, со анэн каринг и бахтали жызня ужэ адес, но кадяжэ и англэ дэла бут лашимос (Исаия 48:17, 18). Андэ Библия ԥэнэнпэ: «Кай тэ авэл вечно жызня, трэбуй тэ уӷанэн пала тутэ, еқэ чачунэ Дэвлэстэ, и пала Иисус Христос, савэс ту бишалдян» (Иоанна 17:3). Андэ кадэя ԥари время о лашимос, саво авэла англэ и саво амэнди дя о Дэл, поможый амэнди тэ ритярдювас састэс андэ вера (Евреям 6:19).

Исин и авэр, васо трэбуй тэ на парашэс тэ уӷанэс пала Дэл и тэ ашэс май лашо друӷо лэса. Кай тэ уӷанэс май бут пала када, подэ дума варикаса анда лэ Иеговастирэ свидетеля или зажа пэ амаро сайто, jw.org.