10. Саво ԥаримос пэрэандярдя о Иово и со во тердя?

¹⁰ Май англал о Сатана одля кай о Иово всаворэ́с скотос. Дэсавэс скотос чордэ, ай авэр попастосайлэ. Потом во умардя лэ Иовостирэн слуӷонэн. О Иово почти вся хасардя. Но о Сатана пэ када на терделя. Во умардя лэстирэн дэшэн бэятонэн. Но о Иово всаек на парашэля тэ кандэл лэ Иеговас. Андэ Библия пистромэ: «Андэ вся када о Иово на тердя бэзэх и на дошалярдя лэ Дэвлэс андэ кода, кай во варисо стердя най кадя» (Иов 1:12—19, 22).

1. Ко амэнди дя и жызня?

О ИЕГОВА, жундо Дэл и во дя амэнди жызня (Иеремия 10:10). Пала Иегова андэ Библия пистромэ: «Ту вся стердян и вся, со ту закамлян, исин и стердо» (Откровение 4:11). Амэ жувас, важ кода кай кадя камэл о Дэл. И жызня, када лэско подарко. (Адиносар Псалом 36:9.)

2. Со трэбуй тэ терас, кай и жызня тэ авэл бахтали?

² О Иегова позаботисайля, кай амэндэ тэ авэл вся, со трэбуй важ и жызня, кадяжэ о хамос и о паи (Деяния 17:28). Ай инке, во камэл, кай и жызня тэ анэн амэнди радость (Деяния 14:15—17). Кай тэ авэл и жызня бахтали, трэбуй тэ жувас па лэ Дэвлэстирэ законоря (Исаия 48:17, 18).

ВАЖ О ДЭЛ И ЖЫЗНЯ КУЧ

3. Со стердя о Иегова, кала о Каино умардя лэ Авелёс?

³ Анда Библия амэ уӷанас, кай важ о Иегова амари жызня и жызня аврэ манушэнди фартэ куч. Акэ, со сас, кала лэ Адамоско и ла Евако шаво, о Каино, фартэ холяйля пэ пэско цыкнэдэр ԥрал, по Авелё. О Иегова ԥэндя лэ Каиности, кай во трэбуй тэ зритярэл пэсти холи. Но о Каино на кангля лэ Дэвлэс. Во «жыля пэ пэско ԥрал по Авелё и умардя лэс» (Бытие 4:3—8). О Иегова на ашадя кадя лэ Каиности, кай во умардя лэ Авелёс (Бытие 4:9—11). Сости амэ анда када сытювас? И холи и вэрыцимос, када фартэ найдраго, када анэн лэ манушэн каринг и биды. Андэ Библия пистромэ, кацавэ манушэндэ на авэла вечно жызня. (Адиносар 1 Иоанна 3:15.) Кай тэ уӷодисарас лэ Иеговасти, амэ трэбуй тэ сытювас тэ любисарас лэ манушэн (1 Иоанна 3:11, 12).

4. Васо о Иегова дя лэ израильтянонэнди законо «на умар»?

⁴ Кала прожылэ бут бэрша, о Иегова инке еқвар сыкадя, кай и жызня важ лэстэ куч. Во через о Моисеё дя лэ израильтянонэнди Дэш законоря. Ек законо андар лэндэ, када: «На умар» (Второзаконие 5:17). Если о мануш на зритярдя кадэва законо и умардя, важ кода кай камэлас када тэ терэл, лэс екжэнэс сас трэбуй тэ умарэн.

5. Сар о Иегова диқэл пэ кода, кала вишон лэ бэятос, саво инке на арақаделяпэ?

⁵ Андо законо, саво о Иегова дя лэ израильтянонэнди, инке сас пистромэ акэ со. Кала варико дэладап ла жувля, сави ԥирэл бэятоса и о бэято мэрэла, инке сар на арақаделяпэ, через када лэ дошалэс трэбуй сас тэ умарэн. (Адиносар Исход 21:22, 23; Псалом 127:3). Тоди, сар о Дэл диқэл по аборто? Дицол, кай важ о Иегова куч и жызня кодэлэ бэятонэнди, савэ дажэ инке на арақаделэпэ. (Дик и ссылка 28.)

6. Сар амэ сыкавас лэ Иеговасти, кай важ амэндэ и жызня куч?

⁶ Сар амэ тэ сыкавас лэ Иеговасти, кай и жызня важ амэндэ куч? Кала амэ нисо на ласа тэ терас, со можэт тэ анэн найлашимос амаря жызняти и аврэндиря жызняти. Амэ на ласа тэ цырдас, тэ матювас, тэ прилас наркотикоря, тэ чамбас насвай. Када римой о зор и амэ можэм тэ мэрас кадэлэстар.

7. Васо амэ трэбуй тэ отԥэндювас лэ найлашэ привычкэндар?

⁷ Амаро орӷанизмо, подарко лэ Дэвлэстар. О Дэл камэл, кай амэ тэ фэрисарас амаро орӷанизмо. Через и найлашэ привычки о мануш ашэл найвужо англа лэ Дэвлэстирэ яқа (Римлянам 6:19; 12:1; 2 Коринфянам 7:1). Амэ нэ можэм тэ тэлювас лэ Иеговасти, кала амэ на цэнисарас и жызня, сави во подарисардя. Тэ отԥэндювас лэ найлашэ привычкэндар можэт тэ авэл найвушэро. Но о Иегова поможыя амэнди андэ када, если амэ стас зор.

8. Со трэбуй тэ терас, кай тэ на авэл вэрыто ни амэнди, ни аврэнди?

⁸ Амэ уӷанглям, кай и жызня, када кучутно подарко и амэнди трэбуй тэ цэнисарас ла и тэ на терас вэрыто ни пэсти, ни аврэнди. Например, када, кала ладас пэ машына чи по мотоцыкло, чи пэ авэр варисо. Кадяжэ тэ на ԥирас по опасно чи по жэстоко спорто (Псалом 11:5). Инке трэбуй тэ диқас, кай андэ амаро цэр вся тэ авэл безопасно. Андэ лэ Дэвлэско законо сас пистромэ: «Кала строиса нэво цэр, стер пэ крыша заӷорождения, кай нико тэ на пэрэл пар латэ и тэ на авэл дош пэр тутэ и пэ тиро цэр, кай питяла варикаско рат» (Второзаконие 22:8).

9. Сар амэнди трэбуй тэ обжаспэ лэ жывотнонэнца?

⁹ Лэ Иеговасти кадяжэ най всаек, сар амэ обжаспэ лэ жывотнонэнца. О Дэл домэкэл тэ умарэн лэ жывотнонэн тоди, кала лэ манушэнди трэбуй тэ хан чи тэ стерэн йда, чи, кала о жывотно опасно важ и жызня (Бытие 3:21; 9:3; Исход 21:28). Но тэ умарэн лэн просто кадя, кай амэнди интересно чи андо спорто, када нащи (Притчи 12:10).

ПОЛЭ И ЖЫЗНЯ, САР ВАРИСО СВЫНТО

10. Катар амэ ӷанас, кай о рат, када и жызня?

¹⁰ Важ о Иегова о рат свынто, важ кода кай о рат, када и жызня. Например, кала о Каино умардя лэ Авелёс, о Иегова ԥэндя лэсти: «О рат тирэ ԥралэско питяя, и важ када мэ тутар спушава и сындосарава» (Бытие 4:10). Сар дицол анда кадэва стихо, о рат лэ Авелёско сыкавэлас лэстири жызня. Кай питяя лэ Авелёско рат, о Дэл на ашадя када кадя лэ Каиности. Посли Потопо о Иегова упалэ сыкадя, кай важ лэстэ о рат сыкавэл и жызня. О Дэл ԥэндя лэ Ноёсти и лэстирэ ерести: «Вся со ԥирэл и со жувэл, авэла тумэнди хамос. Сар и зелень, кай барёл, мэ дав тумэнди вся када. Кати на хан о мас, андэ саво жызня, када о рат. Кати на хан о мас, андэ саво исин рат» (Бытие 1:29; 9:3, 4). О Иегова на мэкля тэ хан о мас лэ ратэса, важ кода кай о рат, када и жызня.

11. Саво законо о Дэл дя лэ израильтянонэнди?

¹¹ Варикай через восемьсот бэрш, сар прожыля о Потопо, о Иегова дя пэстирэ народости кацаво законо: «Если варико анда лэ Израилёстирэ шавэ или кодэва, ко жувэл машкар тумэндэ, саво авеля анда авэр ԥув, астарэла пэ охота зверёс или птица́, савэн можно тэ хан, тоди мэк вимэкэл анда кода, со астардя, о рат и зашол о рат ла ԥувьяса». Потом о Дэл ԥэндя: «На хан о рат» (Левит 17:13, 14). Анда када дицол, кай о Иегова идоси камэл, кай лэстирэ служытеля тэ полэн, кай о рат свынто. Во мэкля лэн тэ хан о мас, но на мэкля тэ хан о рат. Англа кода, сар тэ хан о мас лэ жывотнонэско, савэс умардэ, трэбуй сас тэ вимэкэн андар лэстэ о рат пэ ԥув.

12. Сар и христианоря трэбуй тэ полэн о рат?

¹² Сар прожылэ дэсавэ бэрша посли лэ Иисусости смэрть, андо Иерусалимо стидэпэ и апостолоря и старейшыноря анда христианско собрания. Лэнди сас трэбуй тэ витидэн, савэ законоря анда кодэла, савэ о Дэл дя лэ израильтянонэнди, лэнди инке сас трэбуй тэ ритярэн. (Адиносар Деяния 15:28, 29; 21:25.) О Иегова поможысардя лэ апостолонэнди и лэ старейшынонэнди тэ полэн, кай о рат, сар и варикала, ашэляпэ важ лэстэ куч, и важ лэндэ о рат кадяжэ тэ авэл свынто. Лэ пэрвонэ христианонэнди нащи сас тэ хан или тэ пэн о рат. Лэнди кадяжэ сас нащи тэ хан о мас лэ жывотнонэско, савэс умардэ и на вимэклэ о рат. Када сас кацаво жэ бэзэх, всаек, со тэ тэлён лэ хохавнэ дэвлэнди или тэ терэн билажавардимос. Ай сар о Иегова адес диқэл по рат? Во идоси камэл, кай амэ тэ полас, кай о рат свынто. Важ када и чачунэ христианоря на хан и на пэн о рат.

13. Васо и христианоря отԥэндён тэ пэрэшон о рат?

¹³ Ай можно лэ христианонэнди тэ пэрэшон о рат? Най, нащи. Например, если тумэнди нащи тэ пэн ягали, можно ла тэ шон андэ вена? Канешно най. Кадяжэ о рат нащи тэ пэрэшос, тэ хас, тэ пэс и тэ сдэс. (Дик и ссылка 29.)

14, 15. Хоть и христианоря цэнин и жызня, лэна вонэ тэ фэрин пэстири жызня кодэлэса, кала жан против лэ Дэвлэско законо? Росԥэнэн.

¹⁴ Со тэ терэс, кала тути и врачоря ԥэнэн, если ту на пэрэшоса о рат, ту хасарэса и жызня? Кажно андар мэндэ трэбуй екжэно тэ витидэл, лэла во тэ ритярэл лэ Дэвлэско законо важ о рат чи най. Амэ, сар христианоря, цэнисарас о подарко, када и жызня, и терас вся, кай тэ фэрисарас ла. Важ када, хоть амэ на жас пэ кода, кай тэ пэрэшон амэнди о рат, амэ старысавас тэ арақас, сар па аврятэ тэ личисавас.

¹⁵ Важ о Дэл и жызня фартэ куч, важ када амэ старысавас тэ фэрисарас амаро зор. Но амэ никала на жаса пэ кода, кай тэ пэрэшас о рат. Амэ на жас против лэ Дэвлэско законо, кай тэ фэрисарас пэстири жызня. Важ амэндэ май куч тэ кандас лэ Иеговас. О Иисусо ԥэндя: «Ко камэл тэ фэрий пэстири жызня, кодэва хасарэла ла, ай ко хасарэла пэстири жызня важ мандэ, кодэлэстэ вой авэла» (Матфея 16:25). И христианоря ритярэн лэ Дэвлэско законо важ о рат, важ кода кай любин лэс. Амэ патяс, кай о Иегова ӷанэн, со важ амэндэ май фэдэр. Амэ, сар и во, цэнисарас и жызня и полас, кай вой свынто (Евреям 11:6).

16. Васо лэ Дэвлэстирэ служытеля кандэн лэс?

¹⁶ Амэ полям, и служытеля, савэ на парашэн тэ кандэн лэ Дэвлэс, витидэ важ пэстэ тэ ритярэн о законо важ о рат. Вонэ на хан и на пэн о рат. И вонэ на прилэн о рат, кай тэ личинпэ, дажэ кала лэнди ԥэнэн, кай моӷут тэ хасарэн и жызня. Но вонэ виарақэн тэ личинпэ па аврятэ, кай тэ спасын пэстири жызняa. Вонэ патян, кай о Иегова, саво создал и жызня и о рат, май драго ӷанэн, со важ лэндэ фэдэр. Ай ту патяс, кай о Иегова камэл важ тутэ вся со май лашо?

ЕК, СО О ИЕГОВА МЭКЛЯ ТЭ ТЕРЭН ЛЭ РАТЭСА

17. Со мэкля о Иегова тэ терэн и израильтяноря лэ ратэса?

¹⁷ Андэ лэ Дэвлэско законо, саво во дя лэ Моисеёсти, пистромэ: «И жызня кай кажно жундо, када лэско рат, и мэ витидэм лэс важ о жэртвеннико, кай лэ ратэса тэ витинэн пэстири жызня [тэ мангэн прощения], важ кода кай кати о рат витинэл» (Левит 17:11). Кала и израильтяноря терэнас бэзэх, вонэ анэнас андэ жэртва жывотнонэс и мангэнас лэ рашас тэ вишол набут рат кодэлэ жывотнонэско по жэртвеннико андо храмо. Кадя вонэ мангэнас, кай о Иегова тэ простий лэнго бэзэх. О Иегова мэкля кати кадя тэ терэн варисо лэ ратэса.

18. Со амэндэ исин через кода, кай о Иисусо отдя пэстири жызня андэ жэртва?

¹⁸ О Иисусо отдя пэстири жызня. Аврэ алавэнца можно тэ ԥэнас, питяя лэско рат, кай тэ простинпэ амарэ ӷрехоря. Кадя парудэ о законо тэ анэн андэ жэртва лэ жывотнонэс (Матфея 20:28; Евреям 10:1). Лэ Иисусостири жызня сас кадя куч, кай через кадэя жэртва о Иегова можэт тэ дэл кажнонэ манушэсти тэ жувэл вечно (Иоанна 3:16; Евреям 9:11, 12; 1 Петра 1:18, 19).

19. Со амэ трэбуй тэ терас, кай тэ авас «вужэ всаворэндирэ ратэстар»?

¹⁹ Амэ блаӷодарисарас лэ Иеговас, важ кода кай во подарисардя амэнди жызня. И амэ камас тэ росԥэнас аврэнди, кай вонэ смоӷут тэ жувэн вечно, кала лэна тэ патян андо Иисусо. Амэ любисарас лэ манушэн и стераса вся, кай тэ поможысарас лэнди тэ уӷанэн, со тэ терэн, кай тэ авэл лэндэ вечно жызня (Иезекииль 3:17—21). О апостоло Павло ԥэндя: «Мэ вужо всаворэндирэ ратэстар, важ кода кай мэ на парашавас тэ росԥэнав вся лэ Дэвлэстири воля» (Деяния 20:26, 27). Амэ кадяжэ камас тэ авас «вужэ всаворэндирэ ратэстар». Важ када амэ трэбуй тэ росԥэнас лэ манушэнди важ о Иегова и пала кода, пэ скати важ лэстэ куч и жызня.

1, 2. Васо можно тэ ԥэнэс, кай о Иегова камэл, кай и еря тэ авэн бахталэ?

ПЭРВО ери создал о Иегова. Андэ Библия пистромэ, кай о Иегова создал ла жувля и андя ла каринг о мурш, каринг о Адамо. Кала о Адамо ла додиқля, во зарадосайля и ԥэндя: «Када кокали мэрнэ кокалендар и тила мэрня тилатар» (Бытие 2:22, 23). Во сас фартэ лошало. Када сыкавэл, кай о Иегова камэл, кай и еря тэ авэн бахталэ.

² Но най всаворэ вибарелэ андэ бахталэ еря. Кода, со пистромэ андэ Библия, поможыя, кай кажно андо ери тэ авэл бахтало и лошало (Луки 11:28).

САР ТЭ АВЭС ЛАШО ХУЛАЙ АНДО ЕРИ?

3, 4. а) Сар о хулай трэбуй тэ полэл пэстиря хулая? б) Васо лэ хуласти и ла хулаяти трэбуй тэ простин ек аврэс?

³ Андэ Библия пистромэ, кай о хулай трэбуй тэ любий и тэ стол патив пэ пэстири хулаи. Мангав тут, адиносар Эфесянам 5:25—29. Лашо хулай вся и время стол патив пэ пэсти хулаи. Во фэрий ла и заботийпэ пала латэ. Во на лэла тэ ԥэнэн пэр латэ алава, савэндар авэла найдраго по ди, и кадяжэ на марэла ла.

⁴ Дэкала и хулаи можэт тэ стерэл варисо, со на чалёл лэ хуласти. Со тоди трэбуй тэ терэл о хулай? Акэ, со ԥэнэн и Библия: «Хула́я, на парашэн тэ любин пэстирэ хулая́н и на авэн лэнца ӷруби» (Колоссянам 3:19). Хулай, на бистэр, кай ту кадяжэ можэш тэ шылиспэ. И если ту камэс, кай о Дэл тут тэ простий, ту трэбуй тэ простис пэстиря хулая (Матфея 6:12, 14, 15). Кала о хулай и хулаи простин ек аврэс, тоди лэнго ери авэла май бахтало.

5. Васо о хулай трэбуй тэ стол патив пэ пэстири хулаи?

⁵ О Иегова камэл, кай о хулай тэ стол патив пэ пэстири хулаи. О хулай трэбуй тэ гиндой, кай латэ тэ авэл, со тэ хал и со тэ лэл пэр пэстэ. Кадяжэ во трэбуй тэ витидэл время, кай тэ подэл дума ласа и тэ полэл, со латэ по ди. Када фартэ важно. Кала о хулай найдраго обжалпэ пэстиря хулаяса, о Иегова можэт тэ на ашунэл лэстирэ молитвы (1 Петра 3:7). Важ о Иегова и мурша най май куч, чем и жувля. Во любий всаворэн, ко лэс любий.

6. Со када тэ авэн «ек тила»?

⁶ О Иисусо росԥэндя, кай посли кода, сар о мурш и жувли жэнинпэ, «вонэ ужэ най дуй, ай ек тила», вонэ ашэн фартэ пашэ ек еқэсти (Матфея 19:6). О хулай и хулаи трэбуй тэ на мэкэн ек еқэс и никала тэ на изменяют ек еқэсти (Притчи 5:15—21; Евреям 13:4). О хулай и хулаи трэбуй драго тэ полэн, со трэбуй ек аврэсти. Ай инке май фартэ, кала и дума жал пала кода, со трэбуй тэ авэл кати машкар хулай и хулаи, и тэ на гиндон андэ када кати ек важ пэстэ (1 Коринфянам 7:3—5). Андэ Библия пистромэ, о хулай трэбуй тэ сэрэл: «Нико на вэрыцый пэстири тила, но праварэл ла и жалуий ла». Када сыкавэл, кай о хулай трэбуй най кати тэ любий пэстиря хулая, ай инке анда оди тэ заботийпэ пала латэ. Ай и хулаи фартэ камэл, кай о хулай тэ любий ла и тэ жалуий (Эфесянам 5:29). Кала и христианоря жэнинпэ, вонэ трэбуй тэ стон патив по законо андэ страна, андэ сави вонэ жувэн и тэ роспистронпэ, кай о ери тэ авэл бахтало и драго тэ сытярэн лэ бэятонэн (Луки 2:1, 4, 5).

САР ТЭ АВЭС ЛАЩИ ХУЛАИ АНДО ЕРИ?

7. Васо андо ери трэбуй тэ авэл хулай?

⁷ Кай тэ авэл лашо ери, трэбуй тэ авэл лашо хулай, саво драго сытярэл лэ ерес. Андэ Библия пистромэ: «Кажнонэ муршэсти хулай о Христос, ла жувляти хулай о мурш, ай лэ Христости хулай о Дэл» (1 Коринфянам 11:3).

8. Сар и хулаи можэт тэ сыкавэл, кай стол патив по хулай?

⁸ О хулай кадяжэ можэт тэ шылийпэ. Но кала и хулаи терэла кадя, сар камэл о хулай и подритярэла лэс, кодэлэстар всаворэ́ ерести авэла драго (1 Петра 3:1—6). Андэ Библия пистромэ, кай «ла хулаяти трэбуй тэ стол бари патив по хулай» (Эфесянам 5:33). Ай сар и хулаи трэбуй тэ обжалпэ лэ хуласа, кала во на патял андо Дэл чи лэстэ авэр вера? Тэ стол бари патив пэр лэстэ. Андэ Библия пистромэ: «Кадяжэ тумэ, жувля, кандэн пэстирэ хулан, кай кодэла, ко на терэн па лэ Дэвлэско алав, би алавэнго тэ патян андэр лэстэ, через кода, кай тумэ драго андярэн пэс и стон бари патив пэр лэндэ» (1 Петра 3:1, 2). Кала и жувли андярэл пэс пативалэс, через када о хулай можэт тэ закамэл тэ уӷанэн май бут пала латири вера и тэ стол патив пэ кода, андэр со вой патял.

9. а) Со трэбуй тэ терэл и хулаи, кала лати на чалёл, со терэл лако хулай? б) Саво совето запистромэ важ и хулая́ андэ Титу 2:4, 5?

⁹ Если ла хулаяти на чалёл кода, со терэл о хулай, вой можэт тэ подԥэнэн лэсти. Но тэ дэл дума трэбуй пативалэс. Еқвар и Сарра ԥэндя лэ Авраамости пэско гиндо. Лэсти када на чалеля. Но о Иегова ԥэндя: «Кандэ, со вой ԥэндя» (Бытие 21:9—12). Кала о хулай христианино варисо ришает, со на жал против и Библия, лэстири хулаи трэбуй тэ подритярэл лэс (Деяния 5:29; Эфесянам 5:24). Лащи хулаи и лащи дэй заботийпэ пала пэско ери. (Адиносар Титу 2:4, 5.) Кала о хулай и бэятцэ диқэн, кай вой бут со терэл важ лэндэ, вонэ инке май фартэ лэна ла тэ любин и тэ полэн (Притчи 31:10, 28).

10. Можно лэ хуласти чи ла хулаяти тэ жувэн отдельно чи тэ розвэдинпэ?

¹⁰ Дэкала о хулай и хулаи грабин май йто тэ розвэдинпэ чи тэ жувэн отдельно ек аврэстар. Но андэ Библия пистромэ, кай «и хулаи на трэбуй тэ ужал лэ хуластар» и «о хулай на трэбуй тэ ашавэл ла хулая» (1 Коринфянам 7:10, 11). Андэ дэсавэ крайни случаёря о хулай и хулаи моӷут тэ витидэн, кай тэ жувэн отдельно ек аврэстар, но када фартэ серьёзно дила. Ай со андэ Библия пистромэ важ кода, кала можно тэ розвэдинпэ? Ек васо можно тэ розвэдинпэ, када кала варико андар лэндэ пэрэсовэл аврэ муршэса чи авря жувляса, ай кадяжэ терэн авэр билажавардимос (Матфея 19:9).

САР ТЭ АВЭС ЛАШО ДАД ЧИ ЛАЩИ ДЭЙ?

11. Со лэ бэятонэнди май фартэ трэбуй?

¹¹ Дада и дэя, трэбуй май часто тэ дэн дума пэстирэ бэятонэнца. Тумэ лэ бэятонэнди трэбуй. Со май бут тумэ можэте тэ стерэн важ лэндэ, када тэ росԥэнэн лэнди важ о Иегова (Второзаконие 6:4—9).

12. Со трэбуй тэ терэн и дада и дэя, кай тэ фэрин пэстирэ бэятонэн?

¹² Андэ люма, савяса правий о Сатана, дес десэстар ашэл май бут найлашимос. И дэсавэ мануша моӷут тэ терэн варисо вэрыто тумарэ бэятонэнди. Кардэ кадяжэ ужал, кала терэн нахально билажавардимос лэ бэятонэнца. Дэсавэ дадэнди и дэянди найвушэро тэ дэн дума пала када лэ бэятонэнца. Но вонэ всаек трэбуй тэ фэрин лэ бэятонэн кацавэндар и тэ сытярэн, сар вонэ пэс тэ андярэн кацавэ манушэнца. Дада и дэя, тумэ трэбуй тэ фэрин пэстирэ бэятонэнa (1 Петра 5:8).

13. Пала со трэбуй тэ сэрэн и дада и дэя, кала сытярэн пэстирэ бэятонэн?

¹³ Дада и дэя, тумэ трэбуй тэ сытярэн пэстирэ бэятонэн, сар вонэ пэс тэ андярэн. Сар и дада и дэя када моӷут тэ терэн? Лэ бэятонэн трэбуй вся и время тэ сытярэн, но тэ на авэн лэнца ӷруби и жэстоки (Иеремия 30:11). Никала на сытярэн лэ бэятос, кала тумэ холинатирэ, кай во андярдя пэс най кадя. Тумарэ алавэндар лэ бэятости авэла фартэ дуқанэс, сар ԥэнэса, лэс шынэн шуряса (Притчи 12:18). Фэдэр поможын лэ бэятонэнди тэ полэн, васо вонэ трэбуй тумэн тэ кандэн (Эфесянам 6:4; Евреям 12:9—11; дик и ссылка 30.)

САР ТРЭБУЙ ТЭ АНДЯРЭН ПЭС И БЭЯТЦЭ?

14, 15. Васо и бэятцэ трэбуй тэ кандэн лэ дадэс и ла да?

¹⁴ О Иисусо вся и время кандэлас пэстирэ небеснонэ Дадэс, дажэ кала када сас найвушэро (Луки 22:42; Иоанна 8:28, 29). О Иегова камэл, кай и бэятцэ кадяжэ тэ кандэн лэ дадэс и ла да (Эфесянам 6:1—3).

¹⁵ Бэятцэ, кала тумэнди найвушэро тэ кандэн лэ дадэс и ла да и тумэ всаек кандэн, ӷанэн, кодэлэстар лошавэн най кати вонэ, но и о Иеговаb (Притчи 1:8; 6:20; 23:22—25).

16. а) Сар о Сатана можэт тэ змарэл лэ тэрнэн манушэн тэ терэн варисо най кадя? б) Васо фартэ трэбуй тэ дружыс кодэлэнца, ко любий лэ Иеговас?

¹⁶ Сар о Сатана можэт тэ змарэл тумэн тэ стерэн варисо най кадя? Када во можэт тэ стерэл через тумарэ друӷоря или кас тумэ драго ӷанэн. О Сатана ӷанэн, сар фартэ ԥарэс тумэнди тэ на терэн кадя, сар вонэ камэн. Сэрэн, со стердя и Дина, лэ Иаковости щей? Вой дружыяс лэ манушэнца, савэ на любинас лэ Иеговас, и када андя бида лати и латирэ ерести (Бытие 34:1, 2). Кала тумэндэ исин друӷоря, савэ на любин лэ Иеговас, вонэ могут тэ змарэн тумэн, кай тумэ тэ стерэн варисо кацаво, со вэрыцый о Иегова. Када анэна ԥаримос тумэнди, тумарэ ерести и лэ Дэвлэсти (Притчи 17:21, 25). Важ када фартэ трэбуй тэ дружыс кодэлэнца, ко любий лэ Иеговас (1 Коринфянам 15:33).

ТИРО ЕРИ МОЖЭТ ТЭ АВЭЛ ИНКЕ МАЙ БАХТАЛО

17. Со о Дэл аштярэл кажнонэстар андо ери?

¹⁷ Если кажно андо ери лэла тэ терэл кадя, сар камэл о Дэл, када фэрия лэ ерес бутэ ԥаримастар. Хулай, любисар пэстиря хулая и обжапэ ласа драго. Хулаи, сто патив пэ пэско хулай и кандэ лэс. Старысав тэ шоспэ пэ кодэя хулаи, пала сави пистромэ андэ Притчи 31:10—31. Дада и дэя, сытярэн пэстирэ бэятонэн тэ любин лэ Дэвлэс (Притчи 22:6). Дада, старыинпэ драго тэ диқэн «пала пэско ери» (1 Тимофею 3:4, 5; 5:8). Бэятцэ, кандэн лэ дадэс и ла да (Колоссянам 3:20). Трэбуй тэ сэрэн, кай кажно андо ери можэт тэ стерэл варисо най кадя. Важ када уступин ек аврэсти и мангэн прощения ек еқэстар. Амэ диқлям, кай андэ Библия исин мудри советоря важ кажно анда ери.

1. Ко можэт тэ ԥэнэн, сар трэбуй тэ тэлювас лэ Дэвлэсти?

АНДЭ бут веры ԥэнэн, кай вонэ росԥэнэн о чачимос важ о Дэл. Но на вижал, кай тэ авэл о чачимос андэ всаворэ веры. Васо? Важ кода кай вонэ сытярэн по разному. Тоди, кай можно тэ уӷанас о чачимос важ о Дэл и сар трэбуй лэсти тэ тэлювас? Пала када можно тэ уӷанас кати кай о Дэл Иегова.

2. Катар амэ можэм тэ уӷанас, сар трэбуй тэ тэлювас лэ Дэвлэсти?

² Кай амэ тэ уӷанас, сар трэбуй тэ тэлювас лэ Иеговасти, во дя амэнди Библия. Важ када на парашам тэ сытювас пар латэ. Тоди о Дэл поможыя амэнди тэ полас, сости сытярэл и Библия. Васо? Важ кода кай во любий амэн и камэл, кай амари жызня тэ ашэл май лащи (Исаия 48:17).

3. Со амэндар аштярэл о Дэл?

³ Дэсавэ мануша ԥэнэн, кай всаворэ веры лэ Дэвлэстар. Но о Иисус Христос кадя на гиндояс. Акэ со во ԥэндя: «Най кажно, ко ԥэнэн манди: „Ӷосподо, Ӷосподо“, зажала андо царство, саво по нэбо, ай кати кодэва, ко терэл, со камэл мэрно Дад, саво по нэбо». Важ када трэбуй тэ уӷанас, со камэл о Дэл и тэ терас кадя. Када фартэ важно вопросо. Кодэла, ко на терэн кадя, сар камэл о Дэл, пэр лэндэ о Иисусо ԥэндя, кай вонэ мануша, савэ терэн «о найлашимос», вонэ преступникоря (Матфея 7:21—23).

4. Со о Иисусо ԥэндя важ кодэла, ко камэл тэ терэл кадя, сар камэл о Дэл?

⁴ О Иисусо ԥэндя, кай тэ терас кадя, сар камэл о Дэл, най вся и время авэла вушэро. Во ԥэндя: «Зажан через и вуськи вороты, важ кода кай баро и буӷло дром андярэл каринг и смэрть и бут жан кадэлэ дромэса. Важ кода кай и вуськи вороты и о тисно дром андярэл каринг и жызня и лэс най всаворэ виарақэн» (Матфея 7:13, 14). О тисно дром, када дром, саво андярэл каринг кода, сар трэбуй тэ тэлёс лэ Дэвлэсти и анэн каринг и вечно жызня. Ай о буӷло дром, андярэл каринг кода, кай най кадя тэ тэлён лэ Дэвлэсти и анэн каринг и смэрть. Но о Иегова на камэл, кай варико андар мэндэ тэ хасарэл и жызня. И важ када во дэл кажнонэсти тэ уӷанэн важ лэстэ (2 Петра 3:9).

СО КАМЭЛ О ДЭЛ ПЭСТИРЭ СЛУЖЫТЕЛЁНЭНДАР?

5. Сар можно тэ ӷатярас кодэлэн, кастэ чачуни вера?

⁵ О Иисусо росԥэндя, сар амэ можэм тэ полас, сави чачуни вера. Када дицола па лэ манушэндири дила и па кода, андэр со вонэ патян. Во ԥэндя: «Тумэ уӷанэна лэн па лэндирэ плодоря [дилы]». И инке ԥэндя: «Любо лащи витка анэн лашэ плодоря» (Матфея 7:16, 17). Када на сыкавэл, кай кодэла, ко тэлён лэ Дэвлэсти, никала на шылинапэ. Но вонэ старыинпэ тэ терэн кадя, сар камэл о Дэл. Давай диқаса, пар со можно тэ ӷатярас кодэлэн, кастэ чачуни вера.

6, 7. Васо тэ тэлювас лэ Дэвлэсти трэбуй кадя, сар пистромэ андэ Библия? Со амэ терас, сар о Иисусо?

⁶ Лэ Дэвлэстирэ чачунэ служытеля сытён кати па Библия. Важ кода кай андэ Библия пистромэ: «Всаворэ алава андэ Писания лэ Дэвлэстар и вонэ лашэ, кай тэ сытярэн, тэ сыкавэн, со най кадя, тэ парувэн и жызня, и тэ сытярэн, сар тэ ритярэн лэ Дэвлэско законо. Кай лэ Дэвлэско мануш вся тэ полэл и андэ вся тэ ӷанэн тэ терэл лашимос» (2 Тимофею 3:16, 17). О апостоло Павло пистросардя лэ христианонэнди: «Кала ашундэ лэ Дэвлэско алав, ашундэ лэс амэндар, и прилинэ лэс най сар о алав лэ манушэстар, но кадя, саво во и исин па чачимастэ, сар лэ Дэвлэско алав» (1 Фессалоникийцам 2:13). Тэ тэлён лэ Дэвлэсти трэбуй най па традицыи чи кадя, сар гиндон и мануша, чи па аврятэ варисар. Ай трэбуй тэ тэлён кати кадя, сар пистромэ андэ Библия.

⁷ Вся, сости сытярэлас о Иисусо, сас анда лэ Дэвлэско Алав. (Адиносар Иоанна 17:17.) Кала во сытярэлас, во ԥэнэнас и гиндоря анда Свынто Писания (Матфея 4:4, 7, 10). Чачунэ лэ Дэвлэстирэ служытеля терэн, сар о Иисусо. Вонэ сытярэн кати па кода, со пистромэ андэ Библия.

8. Со о Иисусо ԥэндя пала кода, сар тэ тэлён лэ Дэвлэсти?

⁸ Вонэ тэлён еқэ чачунэ Дэвлэсти лэ Иеговасти. Андо Псалом 83:18 пистромэ: «Ту, каско алав Иегова, ту ек Всевышнё па вся и ԥув» (Псалом 83:18). О Иисус Христос камэлас, кай и мануша тэ ӷанэн, ко чачуно Дэл и росԥэндя лэнди важ лэско алав. (Адиносар Иоанна 17:6.) О Иисусо ԥэндя: «Тэлю тирэ Дэвлэсти лэ Иеговасти и служысар кати лэсти» (Матфея 4:10). Лэ Дэвлэстирэ служытеля терэн кадя жэ, сар о Иисусо. Вонэ тэлён кати лэ Иеговасти и взвинпэ каринг лэстэ па алавэстэ. Вонэ росԥэнэн пала лэско алав аврэнди и шон лэндири сама пэ кода, со о Дэл англэ стерэла важ и мануша.

9, 10. Сар дицол, кай лэ Дэвлэстирэ служытеля любин ек аврэс?

⁹ Вонэ па чачимастэ любин ек аврэс. О Иисусо сытярдя пэстирэ учениконэн тэ любин ек аврэс. И лэ Дэвлэстирэ чачунэ служытеля кадя и терэн. (Адиносар Иоанна 13:35.) Вонэ на диқэн пэ кода, барвалэ вонэ или чорорэ, андэ сави культура вибарелэ, кай вонэ арақаделэпэ. Вонэ любин ек еқэс сар ԥрала и ԥэя (Колоссянам 3:14). Важ када вонэ на жан пэ война и никас на умарэн. Андэ Библия пистромэ: «Лэ Дэвлэстирэ бэятонэн и лэ Найвужэстирэ бэятонэн, можно тэ ӷатярэс кадя. Кодэва, ко на ритярэл лэ Дэвлэско законо, най лэ Дэвлэстар, сар и кодэва, ко на любий пэстирэ ԥралэс». И инке котэ пистромэ: «Амэ трэбуй тэ любисарас ек аврэс. Амэ на трэбуй тэ авас кацавэ, сар о Каино, саво сас лэ Найлашэстар и умардя пэстирэ ԥралэс» (1 Иоанна 3:10—12; 4:20, 21).

¹⁰ Лэ Дэвлэстирэ чачунэ служытеля стон пэско зор и тратин и ловэ, кай тэ поможын ек аврэсти (Евреям 10:24, 25). Вонэ терэн лашимос всаворэ манушэнди (Галатам 6:10).

11. Васо трэбуй тэ патяс, кай кати о Иисусо спысая амэн?

¹¹ Вонэ кандэн лэ Иисусос Христос, важ кода кай кати во можэт тэ спасый. Андэ Библия пистромэ: «И нико авэр на спасый, важ кода кай никастэ пэ ԥув нинай авэр алав, саво динэ лэ манушэнди, через саво амэ можэм тэ спасысавас» (Деяния 4:12). Анда панчто ӷлава андэ кадэя книжка амэ уӷанглям, кай о Иегова бишалдя лэ Иисусос пэ ԥув, кай во тэ отдэл пэстири жызня и тэ витинэл лэ манушэн, савэ кандэн лэ Дэвлэс (Матфея 20:28). Ай инке, о Иегова стодя лэ Иисусос тэ правий ла ԥувьяса. Важ када андэ Библия пистромэ, кала амэ камас тэ жувас вечно, тоди амэ трэбуй тэ кандас лэ Иисусос. (Адиносар Иоанна 3:36.)

12. Васо лэ Дэвлэстирэ служытеля на ӷулен андэ политика?

¹² Вонэ на ӷулен андэ политика. О Иисус Христос на ӷулелас андэ политика. По сындо, кай о римско правителё Пилато, во ԥэндя: «Мэрно Царство най анда кадэва миро». (Адиносар Иоанна 18:36.) Лэ Дэвлэстирэ служытеля, сар и о Христос, на парашэн тэ подритярэн дила, сави терэл лэ Дэвлэско Царство. Важ када, кай бы вонэ тэ на жувэн, вонэ на ӷулен андэ политика. Но вонэ жувэн па законо андэ пэстири страна, важ кода кай андэ Библия пистромэ, кай трэбуй тэ кандэн лэ «манушэн, кастэ исин бари власть», када о правительство (Римлянам 13:1). Но кала варисаво законо жал против лэ Дэвлэско законо, лэ Дэвлэстирэ служытеля терэн кадя, сар и апостолоря, савэ варикала ԥэндэ: «Амэ трэбуй тэ кандас лэ Дэвлэс, сар правителёс, ай най лэ манушэн» (Деяния 5:29; Марка 12:17).

13. Пала со росԥэнэн лэ Дэвлэстирэ чачунэ служытеля?

¹³ Вонэ патян, кай кати лэ Дэвлэско Царство улэла лэ манушэндар вся о ԥаримос. О Иисусо ԥэндя, кай па вся и ԥув росԥэнэна: «Кадэя лащи весть пала царство». (Адиносар Матфея 24:14.) Ни кай ек правительство на вижала тэ дэл амэнди кода, со дэла лэ Дэвлэско Царство (Псалом 146:3). О Иисусо приԥэндя, кай амэ тэ мангаспэ, кай тэ авэл кадэва Царство: «Мэк авэл тиро царство. Мэк тири воля авэла и пэ ԥув, сар по нэбо» (Матфея 6:10). Андэ Библия сас ԥэндо, кай лэ Дэвлэско Царство улэла всаворэ правительства, ай екжэно «авэла тэ тердёл вечно» (Даниил 2:44).

14. Ко, па тумарятэ, тэлёл лэ Дэвлэсти кадя, сар во камэл?

¹⁴ Акана ԥэнэн, ко па тумарятэ, терэл кадя? Ко сытярэл па Библия? Ко росԥэнэн лэ манушэнди пала лэ Дэвлэско алав? Пала кастэ можно тэ ԥэнэс, кай вонэ па чачимастэ любин ек аврэс? Ко патял, кай кати через о Иисус Христос можэт тэ авэл спасения? Ко на ӷулел андэ политика? Ко росԥэнэн, кай кати лэ Дэвлэско Царство улэла вся о ԥаримос лэ манушэндар? Када лэ Иеговастирэ свидетеля (Исаия 43:10—12).

СО ТУ ТЕРЭСА?

15. Со тэ терэс, кай тэ тэлёс лэ Дэвлэсти кадя, сар во камэл?

¹⁵ На хутилэл просто тэ патяс, кай о Дэл исин. И найвужэ кадяжэ патян, кай о Дэл исин, но вонэ на кандэн лэс (Иакова 2:19). Кай тэ тэлёс лэ Дэвлэсти кадя, сар во камэл, када най просто тэ патяс, кай во исин, ай тэ кандэс лэс.

16. Васо тутэ на трэбуй нисо тэ авэл кода, со исин андэ хохавнэ веры?

¹⁶ Кай лэ Дэвлэсти тэ авэл уӷодно, сар ту тэлёс лэсти, тутэ на трэбуй тэ авэл нисо, со исин андэ хохавнэ веры. О пророко Исаия пистросардя: «Вижан котар... кай тэ авэн вужэ» (Исаия 52:11; 2 Коринфянам 6:17). Акэ, васо амэ трэбуй тэ отԥэндювас всаворэстар, со исин андэ хохавнэ веры.

17, 18. Со када «Вавилоно Велико» и васо трэбуй со май йто тэ вижас андар лэстэ?

¹⁷ Пэ сави вера можно тэ ԥэнэс, кай вой хохавни? Пэ кодэя, сави сытярэл тэ тэлён лэ Дэвлэсти най па Библия. И Библия ԥэнэн пэ всаворэ хохавнэ веры «Вавилоно Велико» (Откровение 17:5). Васо? Посли кода сар сас о потопо, андо форо Вавилоно линэ фартэ бут тэ сытярэн лэ хохаимасти и када розжыляпэ па вся и ԥув и кодэлэстар ашэлэ хохавнэ веры. Например, и мануша андо Вавилоно патянас тринэ дэвлэнди. Адес кадяжэ и мануша андэ бут веры патян, кай о Дэл када Троица. Но андэ Библия драго пистромэ, кай исин кати ек Дэл, када о Иегова, ай о Иисус Христос, када лэско Шаво (Иоанна 17:3). Ай инке и мануша, савэ жувэнас андо Вавилоно, патянас, кай кала о мануш мэрэл, лэско духо варикай жувэл и можэт тэ мучийпэ андо адо. Но када хохаимос. (Дик и ссылка 14, 17 и 18.)

¹⁸ О Дэл дя алав, кай йто всаворэ хохавнэ веры во улэла (Откровение 18:8). Важ када трэбуй со май йто тэ вижан анда хохавнэ веры. О Иегова камэл, кай тумэ тэ стерэн када, пока исин время (Откровение 18:4).

19. Сар о Иегова лэла тэ заботийпэ пала тутэ, если ту витидэса тэ служыс лэсти?

¹⁹ Кала ту закамэса тэ вижас анда хохавни вера и лэса тэ тэлёс лэ Иеговасти, со можэт тэ авэл? Варико анда тиро родо чи друӷоря моӷут тэ на полэн, васо ту када витидян и тэ жан против тутэ, тэ лажаварэн тут и на камэна туса тэ диқэнпэ. Но о Иегова тут на ашавэла. Кала ту залэса тэ служыс лэ Дэвлэсти, ту авэса андэ лэско ери, андэ саво милионоря ԥрала и ԥэя анда разни нацыи любин ек аврэс. Кадяжэ ту можэш тэ аштярэс о лашимос, саво авэла англэ и тэ жувэс вечно андо раё пэ ԥув, пала саво о Дэл дя алав (Марка 10:28—30). И можэт варико анда тиро родо, ко май англал сас против кода, кай ту витидян тэ служыс лэ Иеговасти, закамэла кадяжэ тэ сытёл па Библия.

20. Васо фартэ трэбуй тэ залэс тэ служыс лэ Иеговасти ужэ адес?

²⁰ Йто о Дэл улэла па ԥув вся о найлашимос и лэско Царство лэла тэ правий (2 Петра 3:9, 13). Амэ фартэ аштярас кадэя время, и тоди всаворэ мануша лэна тэ тэлён лэ Иеговасти кадя, сар во камэл. Ужэ адес залэн тэ служын лэ Иеговасти.

10. Васо и христианоря на трэбуй тэ терэн и день рождения?

¹⁰ Сар о Иегова диқэл пэ празникоря, савэ жан анда хохавнэ веры? (Исаия 65:11, 12). Вонэ лэсти на чалён. Важ када амэ на терас нисавэ день рождении, ни авэр празникоря анда хохавнэ веры.