После кода, сар о Соломоно ашэля царёса андо Израилё, о Иегова пушля лэстар: «Ԥэн, со тути тэ дав?» О Соломоно ԥэндя: «Мэ фартэ тэрно, мэ бут со на ӷанав. Мангав тут, дэ манди годи, кай тэ диқав пала тиро народо». О Иегова ԥэндя: «Драго, кай ту када манглян мандар. Мэ стерава, кай ту тэ авэс само годявэрно мануш пэ ԥув. Инке дава тути баро барвалимос. Кандэса ман, жувэса бут бэрша».

О Соломоно ля тэ терэл о храмо важ о Иегова. Во ля вся, со сас май лашо, када сомнак, руп, каш и кучутнэ бара. О храмо терэнас фартэ бут мурша и манушня, савэ драго ӷанэнас тэ терэн кадэя бути. Прожыля семь бэрш и о храмо дотердэ. Поджыля время, кай тэ отдэн о храмо лэ Иеговасти. О Соломоно терделя пэ чанга англа жертвеннико и мангляпэ: «Иегова, кадэва храмо важ тутэ най кацаво баро и най кацаво шукарно. Но, мангас тут, прилэ лэс и ашун амари молитва». Чалеля лэ Иеговасти о храмо и молитва? Сар кати о Соломоно домангляпэ, па нэбо сжыля яг и сԥабардя и жертвы, савэ слинэ по жертвеннико. Кадя о Иегова сыкадя, кай лэсти чалеля о храмо. Израильтяноря диқлэ, со стердя о Иегова, и линэ тэ радосавэн.

Пала лэ Соломоности годи ӷанэнас всаворэ и ко андо Израилё, и ко пала Израилё. И мануша авэнас лэстэ, кай во тэ поможый лэнди. Авеля даже и царица анда ԥув Савы. Вой камля тэ диқэл, исин со тэ ԥэнэн лэ Соломоности пэ латирэ ԥарэ алава. Кала вой ашундя лэсти дума, вой ԥэндя: «Мэ на патявас кодэлэсти, со ԥэнэнас пала тутэ. Но акана мэ диқав, кай ту инке май годявэрно, чем пала тутэ росԥэнэн! Дицол, кай кадэя годи дя тути тиро Дэл о Иегова». Кала о Соломоно диқэлас пала народо, и мануша жувэнас фартэ драго. Но прожыля время и вся паруделяпэ.

Сар о Соломоно кандэлас лэ Иеговас, андо Израилё сас мирно. Но во ля пала пэстэ бут манушнян анда авэр народоря, савэ тэлёнас хохавнэ дэвлэнди. Прожыля время и во паруделяпэ. Во кадяжэ ля тэ тэлёл хохавнэ дэвлэнди. Лэ Иеговасти када фартэ на чалеля. Во ԥэндя: «Мэ залава тутар о царство и розделисарава лэс пэ дуй царства. Май бут мэ дава тирэ слуӷости, ай май набут кодэлэнди, ко тутар жала».

О Иегова сыкадя, со камэл тэ стерэл. Еқвар па дром жалас лэ Соломоноско слуӷо о Иеровоамо и котэ диқляпэ лэ пророкоса, савэс ақарэнас Ахия. О пророко росшындя пэсти йда пэ 12 котора и ԥэндя лэ Иеровоамости: «О Иегова залэла о царство лэ Соломоностар и розделия лэс пэ дуй царства. Лэ пэсти дэш. Ту котэ авэса царё». О Соломоно уӷангля када и закамля тэ умарэл лэ Иеровоамос! Но во унашлятар андо Египто. Кала о Соломоно муля, ля тэ правий лэско шаво Ровоамо. Тоди о Иеровоамо поля, кай может тэ рийпэ андо Израилё и лэс котэ на умарэна.

Израильски барэдэра ԥэндэ лэ Ровоамости: «Драго обжапэ лэ манушэнца, тоди вонэ кандэна тут». Но лэстирэ тэрнэ друӷоря подԥэндэ кадя: «На трэбуй лэн тэ жалуис! Тер кадя, кай лэндири бути тэ авэл инке май ԥари!» О Ровоамо кангля лэн. Во фартэ найдраго обжаласпэ лэ манушэнца и вонэ вазглэпэ. Вонэ стодэ лэ Иеровоамос тэ правий племенами, савэн сас дэш. Пэ кадэва царство линэ тэ ԥэнэн Израилё. Ай дуй авэр племя ашэлэпэ лэ Ровоамоса. Пэр лэндэ линэ тэ ԥэнэн лэ Иудаско царство. Акана 12 израильски племена сас розделимэ пэ дуй царства.

О Иеровоамо на камэлас, кай лэстирэ мануша тэ тэлён лэ Иеговасти андо Иерусалимо. Васо? Котэ правияс о Ровоамо. Во даралас, кай и мануша закамэна тэ ринпэ лэстэ. Важ када во стердя дуен сомнаконэн гуруворэн и ԥэндя: «О Иерусалимо фартэ дур. Тэлён лэ Дэвлэсти катэ». О народо ля тэ тэлёл сомнаконэ гуруворэнди и парашэля тэ тэлёл лэ Иеговасти.