1. Со амэ уӷанаса анда библейски пророчества?

СО ЙТО лэла тэ терэлпэ пэ ԥув? Лэ Иеговаско народо ӷанэн о атвето пэ кадэва вопросо. Андэ Библия амэ можэм тэ диқас и тэ уӷанас кода, со авэла англэ всаворэнца амэнца. Анда ек пророчество амэ уӷанаса, со лэна тэ терэн дэсавэ правительства, савэндэ со май бари власть. Кадэва пророчество запистромэ андэ Даниила 11 ӷлава. Катэ пистромэ пала дуй царёря, савэ против ек еқэстэ и пэр лэндэ ԥэнэн северно и южно царё. Бут со пистромэ андэ кадэва пророчество, ужэ стердяпэ. Важ када можно тэ патяс, кай стерэнапэ и авэр алава анда кадэва пророчество.

2. Пала со, сар запистромэ андэ Бытие 3:15 и Откровение 11:7 и 12:17, трэбуй тэ сэрас, кала уӷанас пала пророчество анда Даниила?

² Кай тэ полас о пророчество анда Даниила 11 ӷлава, амэ трэбуй тэ сэрас, со андэр лэстэ пистромэ. Андэр лэстэ росԥэнэнпэ пала кодэла правителя и правительства, савэндэ со май бари власть и савэ ӷонин лэ Дэвлэстирэ народос. Хоть лэ Дэвлэстирэ служытелёнэн най кадя бут, сар аврэн манушэн пэ люма, всаек лэн со май фартэ ӷонин. Васо? Важ кода кай о Сатана и лэско миро камэн тэ стерэн вся, кай кодэлэн, ко служый лэ Иеговасти и лэ Иисусости, никала тэ на авэл. (Адиносар Бытие 3:15b и Откровение 11:7c; 12:17d.) Инке о пророчество, саво запистромэ андэ Даниила, трэбуй тэ сжалпэ аврэ пророчествонэнца анда Библия. Амэ правильно поласа о пророчество кати тоди, кала сыстосараса лэс аврэ стихонэнца анда Библия.

3. Пала со уӷанаса анда кадэя и анда авэр статья?

³ Трэбуй тэ сэрас пала када, кала ласа тэ дас дума важ кода, со пистромэ андэ Даниила 11:25—39. Амэ уӷанаса, ко сас северно и южно царё лэ 1870 бэршэстар жы кай 1991 бэрш, ай кадяжэ уӷанаса, васо трэбуй тэ полас кадэва пророчество па аврятэ. Андэ авэр статья амэ подаса дума пала кода, со пистромэ андэ Даниила 11:40—12:1. Котэ амэ уӷанаса, со андэ кадэва пророчество пистромэ пала время лэ 1990 бэршэстар жы кай война Армагеддоно. Кала адиносараса кадэла статьи, трэбуй тэ шас сама пэ таблица «Царёря, савэ вороӷуин ек еқэса, андэ послидни деса». Но спэрва уӷанаса, сар тэ полас, ко када северно и южно царё.

САР ТЭ ПОЛАС, КО СЕВЕРНО И КО ЮЖНО ЦАРЁ?

4. Со поможый амэнди тэ полас, ко када северно и южно царё?

⁴ Спэрва «северно царё» ԥэнэнас пэ барэ мануша, савэ правинас по северо лэ Израилёстар. Ай «южно царё» ԥэнэнас пэ барэ мануша, савэ правинас по юӷо лэ Израилёстар. Васо амэ кадя гиндосарас. Шон сама, со ԥэндя о анӷело, саво пэрэдя лэ Даниилости лэ Дэвлэстирэ алава: «Мэ авелэм, кай ту тэ полэс, со авэла тирэ народоса андэ послидни деса» (Даниил 10:14). Жы каринг и Пятидесятница андо 33 бэрш лэ И. Х. лэ Дэвлэстирэ народоса сас о Израилё. Но потом о Иегова дя тэ полэн, кай кодэлэ десэстар лэско народо, када лэ Иисусостирэ ученикоря, савэ кандэн лэс. Вижал, кай май бут кода, со пистромэ андо пророчество андэ Даниила 11 ӷлава, поджал най каринг и израильтяноря, ай каринг лэ Иисусостирэ ученикоря (Деяния 2:1—4; Римлянам 9:6—8; Галатам 6:15, 16). Андэ разно время, севернонэ и южнонэ царёса ашэнас разни правителя и правительства. Но всаек вонэ варисоса шонаспэ. Пэрво, кадэла царёря чи правинас котэ, кай жувэнас бут лэ Дэвлэстирэ служытеля, чи вонэ лэн ӷонинас. Дуйто, кодэлэса, сар кадэла царёря пэс андярэнас лэ Дэвлэстирэ служытелёнэнца, вонэ сыкавэнас, кай вэрыцын лэ чачунэ Дэвлэс лэ Иеговас. И трито, кадэла царёря ритярэн бари холи ек пэ еқэстэ.

5. Сас о северно и о южно царё андэ время лэ дуйтонэ викостар жы кай 1870 бэрш? Росԥэнэн.

⁵ Андо дуйто вико лэ И. Х. андэ христиански собрании ашэнас со май бут хохавнэ христианоря. Кадэла христианоря сытярэнас лэ хохаимасти и гаравэнас о чачимос анда Писания. Кадэла времятар и жы каринг 1870 бэрш лэ Дэвлэстирэ служытеля пэ ԥув на сас стидэ, сар и арӷанизацыя. Андэ кодэя время хохавнэ христианонэн ашэля май бут, кадя бут, сар бурьяноря андэ мал. Важ када ашэля фартэ ԥарэс тэ полэс, ко чачунэ христианоря (Матфея 13:36—43). Но васо трэбуй тэ ӷанэс, пэр кастэ можно сас тэ ԥэнэс, кай вонэ чачунэ христианоря? Важ кода кай андэ кодэя время пэ ԥув о Дэл инке на стидя пэско народо, пэ саво моӷли бы тэ дэн о северно и о южно царёря. Када сыкавэл, кай о северно и о южно царё нэ моӷли тэ правин андэ время лэ дуйтонэ викостар жы кай 1870 бэршe. Но йто посли 1870 бэрш можно сас тэ аштярэс, кай упалэ авэла о северно и о южно царё. Катар амэ када ӷанас?

6. Кала упалэ лэ Дэвлэско народо ля тэ стидэлпэ сар ӷруппа? Росԥэнэн.

⁶ Лэ 1870 бэршэстар лэ Дэвлэско народо линэ тэ стидэнпэ сар ӷруппа. Андэ кодэва бэрш о Чарлзо Тейзо Расселло и кодэла, ко гиндояс кадя жэ сар во, стидэнаспэ тэ сытён па Библия. О ԥрал Расселло и лэстирэ друӷоря ашэлэ кодэлэнца, пала кастэ сас ԥэндо, кай вонэ анэна и весть. Кадяжэ, кай вонэ авэна трэбуй тэ простон о дром жы каринг кода, сар лэла тэ правий лэ Христоско Царство (Малахия 3:1). Акана упалэ можно сас тэ полэн, ко авэла лэ Дэвлэстирэ народоса! Сас андэ кодэя время царёря, савэ ӷонинас лэ Дэвлэстирэ служытелёнэн? Уӷанам пала када.

КО КАДА ЮЖНО ЦАРЁ?

7. Ко сас южно царё жы каринг 1917 бэрш?

⁷ Каринг 1870 бэрш и Великобритания правияс май бутэ ҭанэнца, чем любо авэр страна. Латэ сас само зорали армия. Андо пророчество Даниила ԥэнэнпэ пала найбаро роӷо, саво победисардя лэ тринэн аврэн роӷонэн. Найбаро роӷо, када и Великобритания, ай трин авэр роӷоря, када и страны и Франция, и Испания и и Нидерланды (Даниил 7:7, 8). И Великобритания сас южно царё жы каринг 1917 бэрш. Андэ кодэя время и США ашэля само барвали страна пэ вся и люма. Вонэ линэ тэ терэн бут дила ла Великобританияса.

8. Ко ашэля южно царё андэ послидни деса?

⁸ Кала сас и Пэрво мирово война, и США и страна и Великобритания стердэ о доӷоворо, кай тэ терэн и военно дила. Сар ԥэндя о Даниило, южно царё стидя «фартэ баро и зорало войско» (Даниил 11:25). Кадя, и правителя анда кадэла дуй страны, стидэ само баро и ашунгло правительство андэ люма. Кодэла времятар о Англо-Американско правительство ашэля южно царё. И кадя авэла до концаf. Ай ко сас северно царё?

КО АКАНА СЕВЕРНО ЦАРЁ?

9. Кала упалэ ашэля о северно царё, и сар стердэпэ и алава анда Даниила 11:25?

⁹ О Расселло и лэстирэ друӷоря стидэпэ, кай май драго тэ полэн и Библия. Посли кода, сар прожыля ек бэрш, андэ 1871 бэрш упалэ появисайля о северно царё. Ко ашэля северно царё? Андэ кадэва бэрш дэсавэ области, кай дэнас дума пэ немецко шыб, сас стидэ тала ек правления. Кадэя фартэ бари власть ашэля кай и Германия. Вижал, о северно царё ашэля и Германия. Через и время Германия ля тэ диқэл пала дэсавэ страны андэ Африка и пала страны, савэ сас андо Тихо океано. Вой закамля тэ ашэл май зорали, чем и Великобритания. (Адиносар Даниил 11:25g.) И Германско страна стидя зорали армия и о флото (када бут кораблёря важ и война), и кадэва флото сас почти само зорало. Кадэла армияса и лэ флотоса и Германия жыля тэ марэлпэ андэ Пэрво мирово война.

10. Сар тердяпэ кода, со запистромэ андэ Даниила 11:25б, 26?

¹⁰ Кадяжэ о Даниило ԥэндя кода, со авэла ла Германияса и латиря армияса. Андо пророчество ԥэнэнпэ, кай о северно царё «на виритярэла». Васо? О Даниило ԥэндя: «Лэ манушэндэ авэла гиндо против лэстэ. Кодэла, ко хал лэско хамос, доандярэна лэс каринг и смэрть» (Даниил 11:25б, 26а). Кала жувэлас о Даниило, машкар кодэла мануша, ко халас «царско хамос» сас ашунглэ, барэ мануша, савэ служынас лэ царёсти (Даниил 1:5). Пала кастэ ԥэнэнпэ андэ кадэва пророчество? Катэ жал и дума пала ашунглэ мануша, савэ сас андэ Германско правления, генералоря и военни советникоря. Но важ кода, со стердэ кадэла ашунглэ мануша, о правителё андэ Германия хасардя пэстири властьh. Кадяжэ андо пророчество пистромэ, со авэла андэ война лэ южнонэ царёса. Пала северно царё котэ ԥэнэнпэ: «Лэско войско авэла одындярдо барэ паеса, и бут авэна умардэ» (Даниил 11:26б). Кадя вся и сас. Андэ Пэрво мирово война германско (када немецко) армия процэлдя и война. Ла кабута сқосля о паи и бут, кас умардэ. Андэ кадэя война умардэ май бут манушэн, чем андэ авэр войны, савэ сас.

11. Сар андярэнас пэс о северно и о южно царёря?

¹¹ Андэ Даниила 11:27, 28 росԥэнэнпэ, со трэбуй тэ авэл англа Пэрво мирово война. О северно и о южно царё «пала ек столо... лэна тэ хохавэн». Инке о северно царё трэбуй сас тэ стидэл «бут мищимос». И упалэ о пророчество точно исполнисайля. И барэдэра мануша анда Германия и и Великобритания ԥэнэнас ек еқэсти, кай камэн тэ авэл мирно. Но и война андо 1914 бэрш сыкадя, кай вонэ хохавэнас. Каринг 1914 бэрш и Германия ашэля фартэ барвали страна, ек кати и США сас май барвали чем и Германия. Потом, сар и сас ԥэндо андэ Даниила 11:29, 30а, и Германия жыля войнаса по южно царё, но процэлдя.

И ЦАРЁРЯ ДЭН ПО ЛЭ ДЭВЛЭСКО НАРОДО

12. Со терэнас о северно и о южно царё, кала жалас и Пэрво мирово война?

¹² Лэ 1914 бэршэстар лэдуй царёря май бут и май бут линэ тэ вороӷуин ек пэ ек и по лэ Дэвлэско народо. Например, андэ Пэрво мирово война о немецко, кадяжэ и британско правительство, ӷонинас лэ Дэвлэстирэ служытелёнэн, савэ отԥэндёнас тэ жан пэ война. Ай о правительство андэ США бэшарэлас андо баруно лэ ԥралэн, савэ диқэнас пала проповедническо дила. Кадя исполнисайля о пророчество анда Откровение 11:7—10.

13. Сар о северно царё андярэлас пэс андэ 1930 бэрша и андо Дуйто мирово война?

¹³ Потом, андэ 1930 бэрша, о северно царё ля фартэ жэстоко тэ ӷоний лэ Дэвлэстирэ народос, и со май фартэ андо Дуйто мирово война. Кала андэ Германия линэ тэ правин и нацысторя, о Гитлеро и лэстирэ мануша запретисардэ лэ Дэвлэстири дила. Сотни лэ Иеговастирэ служытелёнэн умардэ, ай тысячи побэшардэ андэ концлаӷерёря. Пала вся када ԥэндясас о Даниило. О северно царё запретисардя проповедническо дила. Кадэлэса во сыкадя, кай на стол нисави патив по храмо, и стердя кадя, кай тэ парашэн тэ анэн и жэртвы лэ Иеговасти (Даниил 11:30б, 31а). О Гитлеро дажэ солахадя, кай умарэла всаворэн лэ Дэвлэстирэ манушэн андэ Германия.

НЭВО СЕВЕРНО ЦАРЁ

14. Ко ашэля северно царё посли Дуйто мирово война?

¹⁴ Посли Дуйто мирово война о Совецко Союзо и страны, савэ лэс подритярэнас, ашэлэ северно царё. Во ля тэ правий бутэ ҭанэнца, пала савэ спэрва диқэлас и Германия. О Совецко Союзо и страны, савэ лэс подритярэнас, ӷонинас всаворэн, кастэ пэ пэрво ҭан андэ жызня сас и служэния лэ чачунэ Дэвлэсти. Вонэ када терэнас, сар и фартэ жэстоко нацыско Германия.

15. Сар андярэлас пэс о северно царё, кала кончисайля и Дуйто мирово война?

¹⁵ Сразу, сар кончисайля и Дуйто мирово война, о Совецко Союзо и страны, савэ лэс подритярэнас, линэ тэ ӷонин лэ Дэвлэско народо. Андэ Откровение 12:15—17 кода, кай ӷонин лэ Дэвлэстирэ манушэн, сыстосардэ «ла лэнаса». Сар и сас пистромэ андэ кадэва пророчество, о северно царё запретисардя и проповедническо дила и бишалдя тысячи лэ Иеговастирэ свидетелёнэн андэ ссылка, по Сибирь. Кодэла времятар андэ послидни деса о царё северно на парашэлас тэ ӷоний лэ Дэвлэстирэ народос инке май фартэ. Но лэстэ кадя и на вижыля тэ тердярэл лэндири дилаi.

16. Сар пэ Совецко Союзо исполнисайлэ и алава анда Даниила 11:37—39?

¹⁶ Адиносар Даниил 11:37—39j. О Даниило ԥэндя, кай о северно царё «на полэла пэстирэ папонэндирэ Дэвлэс». Сар стердяпэ кода, со сас запистромэ? О Совецко Союзо закамля, кай тэ на авэн нисавэ веры, важ када во терэлас вся, кай тэ залэл кай и веры и власть. Важ када инке андо 1918 бэрш о Совецко правительство стердя кадя, кай андэ школы тэ сытярэн кодэлэсти, кай лэ Дэвлэс нинай. Ай сар о северно царё прославлял «лэ дэвлэс, саво диқэл пала крепости»? Кай тэ авэл инке май зорало, о Совецко Союзо тратияс фартэ барэ ловэ, кай и армия тэ ашэл инке май зорали, и кай тэ стерэн бут ядерно оружыя. Кай о северно и кай о южно царёря ашэля фартэ бут оружыя, савэса можно тэ умарэн милиардоря манушэн пэ люма.

ДУЙ ВОРОӶОРЯ ТЕРЭН ЕҚЭҬАНЭ

17. Со када «гряцимос, савэстар на ашэлапэ нисо»?

¹⁷ Хоть вонэ бут бэрша вороӷуинас ек еқэса, о северно царё подритярдя лэ южнонэ царёс, кала кодэва закамля тэ стерэл и арӷанизацыя, пэ сави ԥэнэн ООН. Кадя исполнисайля о пророчество, андэ саво сас ԥэндо, кай кадэла царёря «стона о гряцимос, савэстар на ашэлапэ нисо» (Даниил 11:31).

18. Васо по ООН ԥэнэн «гряцимос, савэстар на ашэлапэ нисо»?

¹⁸ Васо андо пророчество пэ ООН ԥэнэн «гряцимос»? Кадэя арӷанизацыя дя алав, кай вой стерэла кода, со можэт тэ стерэл кати лэ Дэвлэско Царство, када, кай тэ авэл мирно па вся и люма. Ай сар тэ полас, кай кадэлэ «гряцимастар», на ашэлапэ нисо? ООН стерэла кадя, кай на ашэлапэ ни ек хохавни вера. (Диқэн и таблица «Царёря, савэ вороӷуин ек еқэса, андэ послидни деса».)

ВАСО ПАЛА КАДА ТРЭБУЙ ТЭ ӶАНАС?

19, 20. а) Васо амэнди трэбуй тэ ӷанас пала кода, со сас? б) Пала со амэ подаса дума андэ авэр статья?

¹⁹ Васо амэнди трэбуй тэ ӷанас пала вся, со сас дэлмут? Важ кода кай вся, со сас, драго сыкавэл, кай лэ 1870 бэршэстар жы кай 1990 бэрш исполнияспэ о пророчество анда книӷа Даниила пала северно и о южно царё. Через вся када амэ патяс, кай и кода, со ашэляпэ тэ исполнийпэ анда кадэва пророчество, кадяжэ исполнияпэ.

²⁰ Андэ 1991 бэрш о Совецко Союзо роспэляпэ. Ко акана северно царё? Уӷанаса пала када анда авэр статья?

1, 2. Пала со амэ уӷанаса анда кадэя статья?

АКАНА, амэ сар никала, драго диқас, кай жувас андэ послидни деса кадэла люмати. Йто о Иегова и о Иисус Христос стерэна кадя, кай на авэла ни ек правительства, савэ жан против лэ Дэвлэско Царство. Пока када на тердяпэ, о северно и о южно царё на парашэна тэ марэнпэ ек еқэса и тэ ӷонин лэ Дэвлэстирэ народос.

² Анда кадэя статья амэ май драго поласа о пророчество, саво запистромэ андэ Даниила 11:40—12:1. Амэ уӷанаса, ко адес северно царё. Кадяжэ подаса дума, васо амэ можэм тэ авас спокойни и тэ патяс лэ Иеговасти, хоть и англэ авэла ԥаримос.

ПОЯВИЙПЭ НЭВО СЕВЕРНО ЦАРЁ

3, 4. Ко ашэля нэво северно царё? Росԥэнэн.

³ Андэ 1991 бэрш о Совецко Союзо роспэляпэ. Лэ Дэвлэстирэ народостэ, саво жувэлас котэ, пэ дэсави время появисайля свобода. О Даниило ԥэндя, кай кадэя свобода сас, сар «найбари помощь». Када сыкавэл, кай дэсави время лэ Дэвлэско народо моӷ свободно тэ росԥэнэн и тэ служый лэ Дэвлэсти (Даниил 11:34). Сас время, кала пала страны андэ Восточно и Центрально Европа, диқэлас о Совецко Союзо. Андэ кодэя время котэ лэ вазвещятелёнэн ашэля фартэ бут тысячи. Через дэсавэ бэрша и Россия и страны, савэ ла подритярэн, ашэлэ севернонэ царёса. Сар росԥэнэнаспэ андэ статья, сави прожылям пэ кодэва курко, амэ можэм тэ полас, ко о северно и ко о южно царё. Сар? Пэрво, кадэла царёря правин котэ, кай жувэн бут лэ Дэвлэстирэ служытеля, чи вонэ лэн ӷонин. Дуйто, кодэлэса, сар кадэла царёря пэс андярэн лэ Дэвлэстирэ служытелёнэнца, дицол, кай вонэ вэрыцын лэ чачунэ Дэвлэс лэ Иеговас и лэстирэ народос. Трито, кадэла царёря ритярэн бари холи ек пэ ек.

⁴ Подаса дума пала кода, васо амэ гиндосарас, кай адес о северно царё, када и Россия и страны, савэ ла подритярэн. Пэрво, кай кадэла страны запретин амари проповедническо дила и ӷонин бут тысячи амарэ ԥралэн и ԥэян, савэ жувэн андэ кадэла страны. Дуйто, кода, сар вонэ пэс андярэн, сыкавэл, кай вонэ вэрыцын лэ Иеговас и лэстирэ народос. Трито, кода, кай вонэ камэн тэ авэн май зоралэ чем о южно царё, Англо-Американско правительство. Уӷанам, сар кода, со терэл и Россия и страны, савэ ла подритярэн, доԥэнэн, кай вонэ северно царё.

О СЕВЕРНО И О ЮЖНО ЦАРЁ НА ПАРАШЭН ТЭ МАРЭНПЭ ЕК ЕҚЭСА

5. Пала сави время пистромэ андэ Даниила 11:40—43 и со терэлпэ андэ кадэя время?

⁵ Адиносар Даниил 11:40—43b. Андэ кадэва пророчество ԥэнэнпэ пала время, кала залэнпэ и послидни деса жы кай амарэ деса. Кадяжэ пала кода, сар о северно царё марэлпэ андэ кадэя время лэ южнонэ царёса. Сар и ԥэндя о Даниило, о южно царё на парашэл тэ марэлпэ лэ севернонэса (Даниил 11:40).

6. Сар лэдуй царёря марэнпэ ек еқэса?

⁶ О северно и о южно царё идоси марэнпэ пала кода, ко андар лэндэ тэ авэл май ӷлавно. Уӷанам, сар вонэ када терэнас посли Дуйто мирово война. О Совецко Союзо и страны, савэ лэс подритярэнас, получисардэ власть пэ бут страны андэ Европа. Через кода, со терэлас о северно царё, о южно царё закамля тэ стерэл военно союзо, андэ саво линэ тэ ужан дэсавэ страны. Пэ кадэва союзо ԥэнэн НАТО. Андэ войны, савэ сас андэ Африка, андэ Азия и андэ Латинско Америка, о северно царё подритярэлас кодэлэн, ко вороӷуияс лэ южнонэ царёса. Кадяжэ о северно и о южно царё тратин бут ловэ, кай кажно андар лэндэ тэ стерэл само бари и зорали армия. Инке о северно и о южно царё терэн вэрыто ек еқэсти через и компьютероря. Через и компьютерни проӷраммы вонэ терэн кадя, кай авэр тэ хасарэл ловэ. Андэ послидни бэрша и Россия и и страны, савэ ла подритярэн, ашэлэ со май зоралэ па вся и люма. Ай кадяжэ, сар ԥэндя о Даниило, о северно царё на парашэл тэ ӷоний лэ Дэвлэско народо (Даниил 11:41).

СЕВЕРНО ЦАРЁ ЗАЖАЛ АНДЭ «РАЙКАНИ ԤУВ»

7. Со када «Райкани ԥув»?

⁷ Андэ Даниила 11:41 пистромэ, кай о северно царё «зажала андэ Райкани ԥув». Со када за ԥув? Андэ дэлмутни время када сас о ҭан, кай жувэнас и израильтяноря. Кадэя ԥув сас со май шукарни анда всаворэ ԥувья (Иезекииль 20:6). Соса кадэя ԥув особенно? Важ кода кай кати котэ и мануша тэлёнас лэ Иеговасти. Но посли и Пятидесятница андо 33 бэрш лэ И. Х. линэ тэ тэлён лэ Дэвлэсти най кати пэ «Райкани ԥув». Васо? Важ кода кай адес лэ Иеговастирэ мануша жувэн па вся и люма. Адес и «Райкани ԥув», када лэ Иеговастири арӷанизацыя. И мануша андэр латэ служын лэ Иеговасти, кала авэн пэ собрании, кала росԥэнэн пала лэстэ аврэнди чи терэн авэр лэстири дила.

8. Со сыкавэл, кай о северно царё зажалас андэ «Райкани ԥув»?

⁸ Андэ время, кала залинэпэ и послидни деса, о северно царё най еқвар зажалас андэ «Райкани ԥув». Со сыкавэлас, кай во кордэ зажалас? Во ӷонияс и умарэлас лэ Дэвлэстирэ служытелёнэн. Када сас, кала лэ севернонэ царёса сас нацыско Германия. Ай май фартэ о северно царё када терэлас, кала сас и Дуйто мирово война. Кадяжэ о Совецко Союзо посли Дуйто мирово война, кала во ашэля северно царё, ля тэ ӷоний лэ Дэвлэстирэ служытелёнэн и тэ бишалэл лэн андэ ссылка.

9. Сар и Россия и страны, савэ ла подритярэн, зажылэ андэ «Райкани ԥув»?

⁹ Дэсавэ бэрша палпалэ о северно царё упалэ зажыля андэ «Райкани ԥув». Сар во кадя стердя? Андо 2017 бэрш и Россия заԥандадя и дила, сави терэл лэ Иеговаско народо и бэшардя андо баруно дэсавэ ԥралэн и ԥэян. Инке вой запретисардя амари литература и и «Библия. Нэвэ мироско переводо». Потом вой заля вся, со сас андэ российско филиало, ай кадяжэ всаворэ Залоря Царства и и Залоря важ и канӷрэсоря. Посли кода, сар вся када стердяпэ андо 2018 бэрш, о Руководящё совето поля, кай и Россия и страны, савэ ла подритярэн, када о северно царё. Но лэ Иеговастирэ мануша на камэн тэ жан против нисаво правительство. Вонэ на камэн нисо тэ терэн, кай тэ парувэн о правительство, дажэ кала кадэва правительство лэн ӷоний. Насупротив, лэ Иеговастирэ служытеля прилэн о библейско совето тэ мангэнпэ пала всаворэ, ко залэл бари положэния. Ай май фартэ тэ мангэнпэ, кала вонэ витидэн, можэт лэ Дэвлэско народо свободно тэ тэлён пэстирэ Дэвлэсти чи най (1 Тимофею 2:1, 2).

ПОБЕДИЯ О СЕВЕРНО ЦАРЁ ЛЭ ЮЖНОНЭ ЦАРЁС?

10. Победия о северно царё лэ южнонэ царёс чи най? Росԥэнэн.

¹⁰ Андо пророчество андэ Даниила 11:40—45 май бут дума жал пала северно царё. Сыкавэл када, кай во победия лэ южнонэ царёс? Най. О южно царё инке авэла, кала о Иегова и о Иисусо лэна тэ умарэн всаворэ правительства пэ ԥув андэ война Армагеддоно (Откровение 19:20). Васо амэ андэ када патяс? Диқам, со сас ԥэндо андэ пророчества, савэ запистромэ андэ книӷа Даниила и Откровение.

11. Со можэм тэ полас анда книӷа Даниила 2:43—45? (Диқэн и картинка пэ обложка.)

¹¹ Адиносар Даниил 2:43—45c. О пророко Даниило пистрой пала фартэ бари статуя, савятэ штар части и вонэ стердэ анда разно металло. Кадэла части сыкавэн особи правительства, савэ парувэн ек еқэс, и пэ лэндири ԥув жувэн бут лэ Дэвлэстирэ служытеля. Кадэла правительства правинас андэ разно время. Пала послиднё мирово правительство пистромэ, кай во, сар и талпы и и ная анда састри и ӷлина. Када Англо-Американско мирово правительство и во авэла послиднё. Када сыкавэл, кай кадэва правительство всаек инке правия, кала лэ Дэвлэско Царство розмарэла всаворэ лэ манушэндирэ правительства.

12. Со сыкавэл о седьмо лэ зверёско шэро и васо амэ трэбуй када тэ ӷанас?

¹² О апостоло Иоанно кадяжэ пистрой пала мирови правительства, кай жувэл лэ Иеговаско народо. О Иоанно ԥэнэн, кай кадэла правительства, сар зверё, савэстэ семь шэрэ. Седьмо лэ зверёско шэро, када Англо-Американско мирово правительство. Када амэ трэбуй тэ ӷанас. Важ кода кай андо пророчество на ԥэнэнпэ, кай лэ зверёстэ авэна инке авэр шэрэ. О седьмо лэ зверёско шэро инке правия андэ кодэя время, кала о Христос и лэско небесно войско, лэла тэ умарэл кадэлэ зверёсd (Откровение 13:1, 2; 17:13, 14).

СО О СЕВЕРНО ЦАРЁ ЙТО СТЕРЭЛА?

13, 14. а) Ко када «о Гого па ԥув Магого»? б) Васо, файма, во закамэла тэ дэл по лэ Дэвлэско народо?

¹³ Исин инке ек книӷа андэ Библия, кай запистромэ и пророчества. Када книӷа Иезекииль. Андэр латэ пистромэ, со можэт тэ авэл англа кода, кала о северно и о южно царё будэр на авэна. Если амэ диқаса и пророчества, савэ запистромэ андэ Иезекииль 38:10—23; Даниил 2:43—45; 11:44—12:1 и Откровение 16:13—16, 21, амэ поласа, кай котэ ԥэнэнпэ пала ек время. Важ када амэ можэм тэ полас, со трэбуй тэ аштярас англэ.

¹⁴ Через дэсави время посли кода, сар залэлапэ и бари бида, «и царёря всаворя ԥувьятирэ», стерэна коалицыя нацый (Откровение 16:13, 14; 19:19). И Библия пэр латэ ԥэнэн «о Гого па ԥув Магого» (Иезекииль 38:2). Кадэя коалицыя нацый дэла по лэ Дэвлэско народо и стола вся пэско зор, кай лэс будэр тэ на авэл. Васо кадя авэла? Кала о апостоло Иоанно пистрояс пала кадэя время, во ԥэндя, кай пэ Дэвлэстирэ вороӷоря пэрэла «баро ӷрадо» (Откровение 16:21). Кадэва ӷрадо можэт тэ сыкавэл фартэ строӷо приӷоворо, пала саво лэна тэ ԥэнэн лэ Иеговастирэ служытеля. Файма, важ када о Гого па ԥув Магого дэла по лэ Дэвлэско народо, кай тэ сқосэл лэн па вся и ԥув.

15, 16. а) Пала сави время, файма, дэлпэ дума андэ Даниила 11:44, 45? б) Со авэла лэ севернонэ царёса и кодэлэнца, ко ужал андо Гого анда Магого?

¹⁵ Файма, пала время, кала лэна тэ ԥэнэн о фартэ строӷо приӷоворо и пала кода, кала дэна по лэ Дэвлэско народо, запистромэ андэ Даниила 11:44, 45e (адиносар). Котэ ԥэнэнпэ, кай «котар, кай ваздэлпэ о қам и па северо авэна вести, савэ лэс пэрэдаравэна [лэ севернонэ царёс], и во вижала баря холяса, кай тэ умарэл и тэ стрий бутэн». О алав «бутэн», файма, катэ сыкавэл лэ Иеговастирэ служытелёнэн. О Даниило, файма, катэ пистрой пала время, кала послиднё разо баря холяса дэна по лэ Дэвлэско народоf.

¹⁶ Кала дэла о северно царё и авэр правительства по лэ Дэвлэско народо, када фартэ холярэла лэ Иеговас. Тоди залэлапэ и война Армагеддоно (Откровение 16:14, 16). И лэ севернонэ царёсти и аврэ народонэнди, пэ савэ андэ Библия ԥэнэнпэ о Гого анда Магого, авэла конец, и нико на поможыя лэнди (Даниил 11:45).

17. а) Ко када о «баро князё» о Михаило, пала саво пистромэ андэ Даниила 12:1? б) Со во терэл акана и со во йто стерэла?

¹⁷ Адиносар Даниил 12:1g. Кадэва стихо анда пророчество Даниила поможыя амэнди май бут тэ уӷанас, сар авэна умардэ о северно царё и авэр правительства. Ай кадяжэ пала кода, сар амэн спасына. Пала со дэлпэ дума андэ кадэва стихо? О Михаило, када инке ек алав лэ Иисусоско, амарэ царёско, саво правий. Во «зашолпэ» пала лэ Дэвлэско народо лэ 1914 бэршэстар, кодэла времятар, кала ашэля царёса андо небесно Царство. Йто во упалэ зашолапэ пала лэ Дэвлэско народо андэ война Армагеддоно, кала умарэла всаворэн пэстирэ вороӷонэн. Посли кадэя война кончияпэ само ԥари время, сави сас андэ лэ манушэндири жызня, пала сави и пистросардя о Даниило. Андо пророчество Иоанна, саво запистромэ андэ Откровение, пэ кадэя время ԥэнэнпэ «само бари бида» (Откровение 6:2; 7:14).

АВЭЛА ТУМАРО АЛАВ ЗАПИСТРОМЭ АНДЭ КНИӶА ЧИ НАЙ?

18. Васо амэ можэм тэ на дарас кодэлэстар, со авэла англэ?

¹⁸ Амэ можэм тэ на дарас кодэлэстар, со авэла англэ. Важ кода кай о Даниило и о Иоанно запистросардэ, кай андэ само бари бида о Иегова и о Иисусо спасына пэстирэ служытелёнэн. О Даниило ԥэндя, кай «спасыяпэ кажно, ко запистромэ андэ книӷа» (Даниил 12:1). Со амэнди трэбуй тэ терас, кай амаро алав тэ авэл запистромэ андэ кадэя «книӷа»? Амэ трэбуй тэ доԥэнас, кай амэ патяс андо Иисусо, андэ лэ Дэвлэско Бакроро (Иоанна 1:29). Амэнди трэбуй тэ дас алав лэ Иеговасти тэ жувас важ лэстэ и тэ болдювас (1 Петра 3:21). Ай инке амэ трэбуй тэ подритярас ла диласа лэ Дэвлэско Царство и тэ терас вся, кай тэ поможысарас аврэнди тэ уӷанэн пала Иегова.

19. Со амэ трэбуй тэ терас ужэ акана и васо?

¹⁹ Акана само вой и время, кай тэ терас вся, кай май фартэ тэ патяс лэ Иеговасти и лэстиря арӷанизацыяти. Акана время тэ сыкавас пэ дила, кай подритярас лэ Дэвлэско Царство. Кати кадя амэ сможэм тэ спасысавас, кала о Царство лэла тэ умарэл лэ севернонэ и южнонэ царёс.

Дэсавэ пророчества, савэ исин андэ кадэя таблица, исполнинпэ андэ ек время. Всаворэ кадэла пророчества доԥэнэн, кай амэ жувас андэ «послидни деса» (Даниил 12:4).

• 

  

  Стихоря Откровение 11:7; 12:13, 17; 13:1—8, 12

  Пророчество О зверё правий ла люмаса май бут чем 3 000 бэрш. Андэ послидни деса о седьмо шэро динэдап. Прожыля время и рана по шэро засастеля и «вся и ԥув... жыля пала зверё». О Сатана через о зверё «андярэл война лэ бэятонэнца, савэ латэ ашэлэпэ».

  Лэстири исполнения Посли Потопо и мануша стердэ правительства, савэ сас против о Иегова. Прожыля май бут чем 3 000 бэрш и о Британско правительство почти хасардя пэстири власть андэ Пэрво мирово война. О Британско правительство упалэ ашэля зорало, кала лэс ля тэ подритярэл и США. Андэ послидни деса о Сатана терэл вся, кай всаворэ правительства тэ ӷонин лэ Дэвлэстирэ народос.

• 

  Стихоря Даниил 11:25—45

  Пророчество Андэ послидни деса о северно и о южно царё марэнпэ ек еқэса пала власть.

  Лэстири исполнения И Германия и о Англо-Американско правительство сас против ек еқэстэ. Андо 1945 бэрш о Совецко Союзо и страны, савэ лэс подритярэнас, ашэлэ лэ севернонэ царёса. Андэ 1991 бэрш о Совецко Союзо роспэрэлпэ, и потом о северно царё ашэл и Россия и страны, савэ ла подритярэн.

• 

  Стихоря Исаия 61:1; Малахия 3:1; Луки 4:18

  Пророчество О Иегова бишалэл «кодэлэс, ко анэна и весть» и лэсти трэбуй тэ простол о дром жы каринг кода, сар лэла тэ правий лэ Христоско Царство. «Кодэва, ко анэн и весть» лэл тэ росԥэнэн «и лащи весть кодэлэнди, кастэ ковло ди».

  Лэстири исполнения Лэ 1870 бэршэстар о Расселло и кодэла, ко гиндояс, кадя жэ сар во, камэнас драго тэ уӷанэн и Библия, кай тэ полэн, сости па чачимастэ вой сытярэл, и кай тэ росԥэнэн када аврэнди. Андэ 1880 бэрша вонэ лэн тэ полэн, кай лэ Дэвлэстирэ служытеля трэбуй тэ росԥэнэн аврэнди пала Дэл. Линэ тэ вимэкэн и статьи «Требуется 1 000 проповедников» и «Помазаны проповедовать».

• 

  Стихоря Матфея 13:24—30, 36—43

  Пророчество О вороӷо сеий и бурьяноря машкар и пшэница. Вонэ вибарён, и через лэндэ на дицол и пшэница. Кала стидэн о зэрно, и бурьяноря отделин ла пшэницатар.

  Лэстири исполнения Лэ 1870 бэршэстар май драго лэл тэ дицол, ко чачунэ, ай ко хохавнэ христианоря. Андэ послидни деса стидэн лэ чачунэ христианонэн и отделин лэн лэ хохавнэ христианонэндар.

• 

  Стихоря Даниил 2:31—33, 41—43

  Пророчество Статуя анда разно металло. Анда састри и ӷлина стердэ и ная и талпы.

  Лэстири исполнения И ӷлина, када и прости мануша, савэ жувэн андэ Великобритания и США и савэ жан против пэско правительство. Через када, кадэла правительства нащи сыкавэн вся пэско зор.

• 

  

  Стихоря Матфея 13:30; 24:14, 45; 28:19, 20

  Пророчество И пшэница стидэн андо амбаро. Годявэрно и кандино рабо стодо тэ диқэл пала кодэла, ко андэ лэско цэр. И лащи весть пала Царство лэн тэ росԥэнэн па вся и ԥув.

  Лэстири исполнения Андо 1919 бэрш сас стодо о годявэрно рабо, саво заботийпэ пала лэ Дэвлэско народо. Кодэла времятар и Исследователя Библии линэ май бут тэ росԥэнэн пала Дэл. Адес лэ Иеговастирэ свидетеля росԥэнэн пала лэстэ май бут чем андэ 200 страны и вимэкэн и литература, сави па Библия, май бут чем пэ 1 000 шыба.

• 

  Стихоря Даниил 12:11; Откровение 13:11, 14, 15

  Пророчество О зверё, савэстэ дуй роӷоря, ԥэнэн кодэлэнди, ко жувэл пэ ԥув, кай вонэ тэ стерэн лэ зверёстири статуя. Тэ авэн латэ семь роӷоря и кай о зверё тэ дэл и жызня кадэла статуяти.

  Лэстири исполнения О Англо-Американско правительство заля тэ терэл и арӷанизацыя Лига Наций. Кадэя арӷанизацыя подритярэн и авэр страны. Лэ 1926 бэршэстар жы кай 1933 бэрш о северно царё кадяжэ ля тэ терэл котэ дила, но кати пэ дэсави время. И мануша патян, кай и Лига Наций сможэт тэ стерэл мирно па вся и люма. И мануша кадяжэ патян, кай акана када стерэла ООН. Но када стерэла кати лэ Дэвлэско Царство.

• 

  

  Стихоря Даниил 8:23, 24

  Пророчество О царё, саво фартэ холинако, росԥагэл вся кадя, кай всаворэ удивинпэ.

  Лэстири исполнения О Англо-Американско правительство умардя бутэ манушэн и стердя бут найлашимос. И США сшутя дуй атомни бомбы пэ страна, савяса вороӷуияс о Англо-Американско правительство. Кацави бари бида на андя ни ек оружыя.

• 

  Стихоря Даниил 11:31; Откровение 17:3, 7—11

  Пророчество О лоло зверё, савэстэ дэш роӷоря, ваздэлпэ анда пропасть. Када восьмо царё. Андэ книӷа Даниила пэ кадэва царё ԥэнэн «гряцимос, савэстар на ашэлапэ нисо».

  Лэстири исполнения Кала жалас и Дуйто мирово война, и Лига Наций почти нисо на терэлас. Посли война лако ҭан заля и ООН. И народоря патян андэ ООН кадя жэ, сар вонэ варикала патянас андэ арӷанизацыя Лига Наций. Вонэ на полэн, кай тэ авэл мирно па вся и люма, можэт тэ стерэл кати лэ Дэвлэско Царство. Авэла время, кала и правительства, савэ подритярэн и ООН, розмарэна и хохавнэ веры.

• 

  

  Стихоря 1 Фессалоникийцам 5:3; Откровение 17:16

  Пророчество Ԥэнэн «мирно и безопасно». И дэш роӷоря и о зверё дэн пэ роспутно манушни и умарэн ла. Посли када и народоря авэна умардэ.

  Лэстири исполнения И народоря ԥэнэн, кай ашэля «мирно и безопасно». Потом и народоря, савэ подритярэн и арӷанизацыя ООН, розмарэн и хохавнэ веры. Кадя залэлпэ и само бари бида. Ай кончияпэ вой, кала авэла умардо андо Армагеддоно вся, со андэ лэ Сатанаско вас.

• 

  Стихоря Иезекииль 38:11, 14—17; Матфея 24:31

  Пророчество О Гого захутилэл лэ Дэвлэстирэ народостири ԥув. Тоди и анӷелоря стидэн кодэлэн, ко сас витидо.

  Лэстири исполнения О северно царё и авэр правительства дэн по лэ Дэвлэско народо. Сар прожала дэсави время посли када, и памазаникоря ваздэнапэ упрэ по нэбо.

• 

  Стихоря Иезекииль 38:18—23; Даниил 2:34, 35, 44, 45; Откровение 6:2; 16:14, 16; 17:14; 19:20

  Пророчество О всаднико по парно грас победий лэ Гогос и лэстирэ воинонэн. Лэ зверёс шутэ андо озеро ягаса. И фартэ бари статуя росԥаги.

  Лэстири исполнения О Иисусо, саво Царё андэ лэ Дэвлэско Царство, спасый лэ Иеговастирэ народос. О Иисусо и 144 000 и и анӷелоря умарэн всаворэ народоря, савэ ӷонин лэ Дэвлэстирэ народос. И люма, савяса правий о Сатана, будэр на авэла.