Диқэн тумэ кода, со диқэлас о Захария?

1. Пала сави радосно новость уӷанглэ и иудеёря?

САР дэ долӷо вонэ када аштярэнас! О Дэл Иегова побудил лэ Кирос, лэ царёс анда Персия, тэ освободий лэ израильтянонэн, савэ бут бэрша сас андо вавилонско плено. О царё ԥэнэн, кай и иудеёря тэ ринпэ пэ пэстири ԥув и тэ отстроин «лэ Иеговаско цэр, лэ Израилёстирэ Дэвлэско» (Езд. 1:1, 3). Сар дэ фартэ вонэ аштярэнас кадэя время! Акана вонэ моӷут упалэ тэ тэлён лэ чачунэ Дэвлэсти пэ ԥув, сави во дя пэстирэ народости.

2. Со линэ тэ терэн и иудеёря, кала рисайлэ андо Иерусалимо?

² Андо 537 бэрш до н. э. пэрви иудеёря ринпэ андо Иерусалимо. Варикала кадэва форо сас столица андо Иудейско царство. И иудеёря, савэ рисайлэ, ӥто лэн тэ строин о храмо, и каринг 536 бэрш до н. э. о фундаменто ужэ ӷотово!

3. Савэ трудности сас кай и иудеёря?

³ Но кала и иудеёря ваздэнас о храмо, лэндирэ противникоря линэ тэ терэн вся, кай тэ тердярэн и стройка. «И народоря, савэ жувэнас паша лэндэ, линэ тэ терэн вся, кай и иудеёря тэ умэкэн и вас и тэ на строин» (Езд. 4:4). Но вся ашэля инке май хужэ! Андо 522 бэрш до н. э царёса андэ Персия ашэля о Артаксерксоb. И противникоря додиқлэ андэ када лащи возможность тэ тердярэн и стройка через о законо (Пс. 94:20). Вонэ ԥэндэ лэ царёсти, кай и иудеёря камэн тэ зваздэнпэ против лэстэ (Езд. 4:11—16). О царё патяя лэндирэ хохаимасти и стодя запрето пэ стройка (Езд. 4:17—23). Важ када и иудеёря парашэлэ тэ строин о храмо (Езд. 4:24).

4. Со о Иегова гиндояс пала кода, кай и противникоря камэнас тэ тердярэн и стройка? (Исайя 55:11).

⁴ И народоря, савэ на служынас лэ Иеговасти, и дэсавэ персицки правителёря старыинаспэ тэ тердярэн и стройка. Но о Иегова камэлас, кай и иудеёря тэ ваздэн о храмо. Ай во всегда зритярэл пэстирэ алава. (Проадинон Исайи 55:11.) О Иегова сыкадя восемь удивительни видении еқэ манушэсти, савэс ақарэнас Захария. Кадэва пророко трэбуй сас тэ пэрэԥэнэн лэн лэ иудеёнэнди и тэ подритярэл лэн, кай вонэ тэ на даран лэ противниконэндар и тэ стерэн лэ Иеговастири задания. Андэ панчто анда кадэла видении о Захария диқля о светильнико и дуй аливкови витки.

5. Со амэ роздиқаса андэ кадэя статья?

⁵ О Иегова подритярдя лэ израильтянонэн через о панчто лэ Захариястири видения, ай значит, и амэ можэм бутэсти тэ сытювас андар латэ. Да, дэкала амэ всаворэ можэм тэ умэкас и вас. Кала амэ роздиқаса кадэя видения, када поможыя амэнди предано тэ служысарас лэ Иеговасти: 1) кала и противникоря терэн вся, кай тэ помешают амэнди, 2) кала варисо парудёл андэ жызня и 3) кала и арӷанизацыя дэл нэво руководство, саво амэнди нэпонятно.

КАЛА ТАСАВЭН

6. Сар и видения пала светильнико и дуй аливкови витки, сави запистромэ андэ Захария 4:1—3, придя лэ иудеёнэнди смилость? (Диқэн и картинка пэ обложка.)

⁶ Проадинон Захарии 4:1—3. И видения пала светильнико и дуй аливкови витки придя смилость лэ иудеёнэнди тэ на парашэн тэ терэн лэ Дэвлэстири дила, хоть пэр лэндэ и тасавэнас. Сар кадэя видения поможысардя лэнди? Тумэ шутэ сама, кай каринг о светильнико на парашэл тэ питял о вулей? О вулей анда дуй аливкови маслины спитял андэ чаша, ай андар латэ па семь трубочки попэрэл андо светильнико. Блаӷодаря кадэлэсти о светильнико на парашэл тэ ԥабол. О Захария пушэл: «Со када сыкавэл?» О анӷело ԥэнэн лэсти лэ Иеговаско алав: «Най через о войско, най через о зор, ай через мэрно свынто духо» (Зах. 4:4, 6). Со означает кадэя видения? О вулей — када лэ Иеговаско свынто духо, саво никала нэ закончица. Вся и армия андэ Персицко империя нисар на сыстояпэ лэ зорэса, саво исин кай о свынто духо. И строителя на трэбуй сас тэ даран кодэлэндар, ко пэр лэндэ тасавэлас, и вонэ моӷли тэ дотерэн пэстири дила, важ кода кай о Иегова сас пэ лэндири риг. Сар дэ фартэ лэн када подритярдя! Вся, со трэбуй сас тэ терэн и иудеёря, — када тэ надеинпэ по Иегова и тэ ринпэ каринг и бути. Кадя вонэ и стердэ, хоть о запрето инке на злинэ.

7. Со нэожыдано паруделя важ и иудеёря?

⁷ Но фартэ ӥто вся паруделя. Андо 520 бэрш до н. э. о Дариё I ашэля царёса андэ Персия. По дуйто бэрш, сар ля тэ правий, во уӷангля, кай о запрето пэ стройка стодэ най па законо. О Дариё ԥэндя, кай и евреёря тэ закончат и бути (Езд. 6:1—3). Кадэя новость сас удивительно важ всаворэ. Но када инке най вся. О царё кадяжэ приԥэндя, кай и народоря, савэ сас паша иудеёря, тэ поможын лэнди андэ стройка и тэ дэн лэнди вся, со трэбуй! (Езд. 6:7—12). Блаӷодаря кадэлэсти и иудеёря андо 515 бэрш до н. э достроисардэ о храмо (Езд. 6:15).

8. Со поможый амэнди тэ авас смили, кала пар мэндэ тасавэн?

⁸ Адес кай бут лэ Иеговастирэ служытеля тожэ исин трудности. Например, андэ дэсавэ страны и противникоря терэн вся, кай тэ помешают амэнди тэ терас лэ Дэвлэстири дила. Дэкай лэ ԥралэн моӷут дажэ тэ бэшарэн андо баруно и тэ андярэн «кай и правителёря и кай и царёря». Блаӷодаря кадэлэсти кай и свидетеля вижал тэ росԥэнэн и лащи новость кадэлэ манушэнди (Матф. 10:17, 18). Но дэкала лэ ԥралэнди и лэ ԥэянди ашэл май вушэро. Например, и власти моӷут тэ парудён или о сындомари виандярэл и справедливо ришэния. Кай дэсавэ свидетеля можэт тэ авэл авэр ԥаримос. Хоть вонэ жувэн андэ страны, кай можно свободно тэ служын лэ Иеговасти, пэр лэндэ тасавэл лэнго ери, саво на камэл, кай вонэ тэ служын лэ Дэвлэсти (Матф. 10:32—36). Обычно, кала лэнго родо диқэл, кай лэндэ на вижал тэ тердярэн амарэ ԥралэн и ԥэян, вонэ парашэн лэнди тэ мешают. Дэсавэ андар лэндэ моӷут дажэ тэ ашэн свидетеля. Важ када, если тумэндэ кацави жэ ситуацыя, на сдэнпэ! Авэн смили. Тумэнца о Иегова и лэско свынто духо. Тумэнди найсостар тэ даран!

КАЛА ВАРИСО ПАРУДЁЛ АНДЭ ЖЫЗНЯ

9. Васо дэсавэ евреёря динэ тэ ровэн, кала зашонас о фундаменто важ о нэво храмо?

⁹ Дэсавэ ԥурэ «фартэ ровэнас, кала англа лэндэ зашонас о фундаменто важ о храмо» (Езд. 3:12). Васо? Важ кода кай вонэ диқлэ, саво дэ шукарно сас о храмо, саво построисардя о Соломоно. Лэнди здэласпэ, кай о нэво храмо «нисо на ашэл, кала сыстон лэс кодэлэса, саво во сас» (Агг. 2:2, 3). Кала вонэ гиндонас, кай о нэво храмо на авэла кацаво дэ шукарно и барвало, лэнди сас фартэ ԥарэс по ди. Но лэ Захариястири видения поможысардя лэнди упалэ тэ радуинпэ. Сар?

10. Сар лэ анӷелостирэ алава анда Захарии 4:8—10 поможысардэ лэ евреёнэнди тэ на хасарэн и радость?

¹⁰ Проадинон Захарии 4:8—10. О анӷело ԥэндя: «Тумэ диқэна о отвесо андо вас кай о Зорова́велё и лэна тэ радуинпэ». Со во камля тэ ԥэнэн кадэлэ алавэнца? О отвесо — када инструменто, саво поможый, кай и строителя тэ ваздэн ровно стина. Сар кадэва примеро подритярдя лэ евреёнэн? О анӷело шутя сама, кай хоть о нэво храмо и на авэла кацаво жэ шукарно, сар лэ Соломоноско храмо, о Иегова всаек лэс блаӷословия, кай андэр лэстэ тэ тэлён лэ чачунэ Дэвлэсти кадя, сар лэсти уӷодно. Ай если лэ Иеговасти чалёл о нэво храмо, тоди васо лэ евреёнэнди во трэбуй тэ на чалёл? Важ о Иегова само важно сас, кай и иудеёря правильно тэ тэлён лэсти андэ нэво храмо. Если бы важ и евреёря само ӷлавно авелоп тэ радуин лэ Иеговас, вонэ на хасардоп и радость.

11. Савэ трудности моӷут тэ авэн кай дэсавэ лэ Иеговастирэ служытеля?

¹¹ Найвушэро, кала варисо парудёл андэ жызня. Дэсавэнди, ко служыяс полновремено фартэ бут бэрша, прижыляпэ тэ парувэн и назначения. Авэр трэбуй сас тэ ашавэн пэстири любимо служэния через и ԥурэ бэрша. Канешно, кадэлэстар можэт тэ авэл ԥарэс по ди. Возможно, спэрва авэла найвушэро када тэ прилас. Амэ можэм тэ гиндосарас, кай раньшэ сас май фэдэр и дажэ тэ умэкас и вас кодэлэстар, кай андэ служэния, сар амэнди здэлпэ, амэндар нинай нисаво толку (Прит. 24:10). Сар лэ Захариястири видения поможыя амэнди тэ на хасарас и радость?

12. Сар и видения, сави диқля о Захария, поможыя амэнди тэ на хасарас и радость, кала варисо парудёл андэ жызня?

¹² Если тумэндэ паруделя варисо андэ жызня, старыинпэ тэ диқэн пэ вся лэ Иеговастирэ яқэнца. Адес во терэл бари дила, и амэнди випэля бари бах тэ авас лэстирэ сотрудникоря (1 Кор. 3:9). Амэнди моӷут тэ дэн разни задании андэ арӷанизацыя, но лэ Иеговастири любовь каринг амэндэ никала на парудёл. Важ када, если варисо паруделя андэ тумари жызня, на тратин бут время и зор, кай тэ полэн, васо када тердяпэ. Вместо кода, кай вся и время тэ задэн пэсти вопросо: «Васо варикала сас май фэдэр, чем щяс?» — мангэн лэ Иеговас тэ поможый тумэнди правильно тэ диқэн пэ ситуацыя (Эккл. 7:10). Кадяжэ старыинпэ тэ на гиндон пала кода, со тумэ терэнас варикала, ай май бут шон сама, со тумэ акана можэте тэ терэн. Анда видения, сави диқля о Захария, амэ полям, пэскати дэ важно, кай амэндэ тэ авэл лашо настроё. Блаӷодаря кадэлэсти, амэ на хасараса и радость и на парашаса предано тэ служысарас лэ Иеговасти.

КАЛА НАЙВУШЭРО ТЭ КАНДАС

13. Васо дэсавэ евреёря моӷли тэ гиндон, кай най фартэ годявэрнэс упалэ тэ строин о храмо?

¹³ Погиндон пала кодэя время, кала лэ евреёнэнди нащи сас тэ строин о храмо. О само баро рашай Иешуа и о правителё Зоровавелё упалэ линэ тэ строин лэ Дэвлэско цэр (Езд. 5:1, 2). Дэсавэ моӷли тэ гиндон, кай када най фартэ годявэрнэс. Кай и евреёря на вижылоп тэ угаравэн кадэя стройка, и вонэ полэнас, кай лэндирэ вороӷоря стерэна вся, кай тэ тердярэн лэн. Важ када о Иешуа и о Зоровавелё нуждались андэ лэ Иеговастири подержка.

14. Со пала правителё Зоровавелё и пала само баро рашай Иешуа пистромэ андэ Захарии 4:12, 14 и сар кадэла алава придинэ лэнди зор?

¹⁴ Проадинон Захарии 4:12, 14. О анӷело росԥэнэн лэ Захариясти, кай и дуй аливкови витки сыкавэн пэ «дуй памазаникоря» — када о Зоровавелё и о Иешуа. Можно тэ ԥэнас, кай андэ видения кадэла дуй мануша кабута «тердён паша Ӷосподо всаворя ԥувьяко», паша Иегова. Сави када дэ бари бах! О Иегова сас уверено андэр лэндэ, и евреёря моӷли тэ патян кадэлэ дуе манушэнди и тэ кандэн лэн. Важ кода кай имено через лэндэ о Иегова дэлас о руковоцтво.

15. Сар амэ можэм тэ сыкавас, кай цэнисарас лэ Иеговаско руковоцтво, саво запистромэ андэ Библия?

¹⁵ Адес о Иегова дэл пэско руковоцтво через и Библия. Андэ кадэя свынто книӷа во росԥэнэн, сар правильно тэ тэлювас лэсти. Сар амэ можэм тэ сыкавас, кай цэнисарас лэ Иеговаско руковоцтво, саво запистромэ андэ лэско Алав? Если витидас время, кай тэ порозмышляем пала кода, со котэ пистромэ. Пушэн пэстар: «Кала мэ адиносарав и Библия или варисави публикацыя, старысавав тэ терав паузы, кай тэ гиндосарав пала када? Если манди найвушэро тэ полав варисаво стихо, вижал мандэ тэ розлавпэ? Или мэ просто камав май ӥто тэ проадиносарав кадэла стихоря?» (2 Пет. 3:16). Если амэ витидас время, кай драго тэ розмышляем пала кода, сости сытярэл о Иегова, амэ аваса ӷотови тэ прилас лэско руковоцтво и тэ поможысарас лэ манушэнди тэ ашэн ученикоря (1 Тим. 4:15, 16).

16. Со поможыя амэнди тэ кандас, дажэ если амэнди нэ понятно руковоцтво, саво ԥэнэн «о годявэрно и кандино рабо»?

¹⁶ Инке о Иегова руководий пэстирэ народоса через «о годявэрно и кандино рабо» (Матф. 24:45). Можэт тэ авэл кадя, кай о рабо дэла кацаво руковоцтво, саво амэнди авэла нэпонятно. Например, погиндосарам пала тревожно чемоданчико. И ԥрала моӷут тэ ԥэнэн амэнди тэ подӷотовимся каринг и природно бида, сави, сар амэнди здэлпэ, никала на авэла пэ амарэ краёря. Или амэ можэм тэ гиндосарас, кай о рабо черезчур осторожно, пока жал и пандэмия. Со амэнди поможыя, если здэлпэ, кай о руковоцтво най фартэ годявэрно? Амэ можэм тэ погиндосарас пала израильтяноря, савэ приашунделэ каринг о алав, саво ԥэндэ о Иешуа и о Зоровавелё. Андэ Библия пистромэ и пала авэр лэ Иеговастирэ служытеля, ко приашунделя каринг лэ Дэвлэско руковоцтво, саво спэрва, можэт, сас нэ понятно, но потом спасысардя лэндири жызня (Суд. 7:7; 8:10).

СТАРЫИНПЭ ТЭ ДИҚЭН КОДА, СО ДИҚЭЛАС О ЗАХАРИЯ!

17. Сар и видения пала светильнико и дуй аливкови витки придя зор лэ евреёнэнди?

¹⁷ Панчто лэ Захариястири видения сас най фартэ бари. Но вой придя зор лэ евреёнэнди анда вся оди упалэ тэ лэн тэ терэн пэстири дила и правильно тэ служын лэ Иеговасти. И кала вонэ всаворэ одеса прилинэ лэ Захариястирэ алава, вонэ додиқлэ, кай о Иегова лэн любий и подритярэл. Через пэско свынто духо о Иегова поможысардя лэнди тэ закончат и стройка и тэ на хасарэн и радость (Езд. 6:16).

18. Сар лэ Захариястири видения можэт тэ повлияет пэр тумэндэ?

¹⁸ Лэ Захариястири видения пала светильнико и дуй аливкови витки можэт тэ повлияет пэ тумари жызня. Сар амэ ужэ уӷанглям, кадэя видения можэт тэ придэл зор, кала пэр тумэндэ тасавэн. Вой поможыя тэ на хасарэн и радость, если варисо парудёл андэ жызня, и тэ на парашэн тэ доверяете лэ Иеговасти, кала во дэл руковоцтво, саво можэт тэ авэл нэпонятно. Важ када, со тумэ лэна тэ терэн, кала андэ тумари жызня авэла ԥари время? Старыинпэ тэ диқэн кода, со диқэлас о Захария. На бистрэн, кай о Иегова заботийпэ пала пэско народо. На парашэн тэ доверяете лэ Дэвлэсти и тэ служын лэсти анда вся оди (Матф. 22:37). Если тумэ кадя терэн, о Иегова поможыя тумэнди радосно тэ служын лэсти вся и вечность! (Кол. 1:10, 11).