Тэ авэл лашимос андо ди и тэ ладисарас. Со тэ терас, кай када тэ авэл?

АМЭ жувас андэ время, кала на ӷанас, со авэла тэся. И кай тэ авэл амэндэ драго и лашимос андо ди, амэнди трэбуй тэ стас зор. И кала амэндэ вижыля тэ стерас кадя, трэбуй тэ стас бут зор, кай тэ на хасарас када. Савэ алава анда Библия поможына, кай амэндэ андо ди тэ авэл лашимос и кай тэ фэрисарас лэс? Сар амэ тэ поможысарас андэ када аврэнди?

СО ТЭ ТЕРАС, КАЙ ТЭ АВЭЛ ЛАШИМОС АНДО ДИ?

Кай лэ манушэстэ тэ авэл лашимос андо ди, во трэбуй лэ одеса тэ полэл, кай лэс фэрин и тэ ӷанэн, со авэла тэся. Инке, кай о мануш трэбуй тэ авэн лашэ друӷоря. Но со май фартэ трэбуй тэ терэл о мануш, када, кай лэстэ тэ авэл лащи дружба лэ Дэвлэса. Сар о мануш када тэ стерэл?

Лэ Дэвлэско законо и алава, пэ савэ ритярдёлпэ лэско законо, анэн амэнди кати о лашимос. Кала амэ жувас кадя, сар андэр лэндэ пистромэ, амэ сыкавас, кай патяс лэсти и камас тэ авэл лащи дружба лэса (Иер. 17:7, 8; Иак. 2:22, 23). Ай о Иегова пэстиря ригатар пашол каринг амэндэ и поможый, кай амэндэ тэ авэл драго по ди. Андэ Исаия 32:17 ԥэнэнпэ: «Лашимос и чачимос анэна о лашимос андо ди, ай о лашимос лэ чачимастар и лашимастар анэна бах пэ вся вечность и терэла драго по ди». Амэндэ па чачимастэ авэла лашимос андо ди, кала кандаса лэ Иеговас (Ис. 48:18, 19).

Со инке поможыя амэнди, кай тэ авэл лашимос андо ди? О Иегова стердя амэнди кучутно подарко. Када лэско свынто духо (Деян. 9:31).

ЛЭ ДЭВЛЭСКО ДУХО ПОМОЖЫЙ АМЭНДИ, КАЙ ТЭ АВЭЛ ЛАШИМОС АНДО ДИ

О апостоло Павло ԥэндя, кай о лашимос андо ди и кай тэ ладисарас аврэнца, кадяжэ ужал андэ кода, со терэл лэ Дэвлэско духо (Гал. 5:22, 23). Через лэ Дэвлэско духо амэндэ авэла лашимос андо ди. Амэнди трэбуй тэ домэкас, кай лэ Дэвлэско духо тэ парувэл амэн. Акана диқаса, сар лэ Дэвлэско духо поможый, кай амэндэ тэ авэл андо ди лашимос май бут.

Пэрво. Кай тэ авэл лашимос андо ди, амэнди дэла зор кода, кай амэ адиносарас лэ Дэвлэско алав (Пс. 1:2, 3). Кала амэ гиндосарас пала кода, со проадиносардям андэ Библия, о свынто духо поможый тэ полас, сар о Дэл диқэл пэ варисавэ дилы. Амэ полас када, кала адиносарас, сар лэстэ вижал тэ на холявэл и васо о лашимос андо ди важ лэстэ фартэ куч. Ай кала амэ терас кода, со адиносардям анда Библия, андэ амаро ди май бут авэла лашимос и на авэла холи (Прит. 3:1, 2).

Дуйто. Амэнди трэбуй тэ мангаспэ пала лэ Дэвлэско свынто духо (Луки 11:13). О Иегова дэл алав, кала амэ мангаса лэстар тэ поможый амэнди, тоди «о лашимос андо ди, саво лэ Дэвлэстар, саво май баро кодэлэстар, со о мануш полэл, фэрия... [амарэ] одя и годя через о Иисус Христос» (Флп. 4:6, 7). Кала амэ мангас лэ Дэвлэстар о свытно духо, во стерэла, кай амэндэ тэ авэл драго по ди. Када исин кати кодэлэндэ, кастэ лэ Дэвлэса фартэ лащи дружба (Рим. 15:13).

И Библия дя зор бутэнди тэ парудён. И акана вонэ лошавэн кодэлэстар, кай ладин лэ Иеговаса, пэса и аврэ манушэнца.

СО ВОНЭ СТЕРДЭ, КАЙ ТЭ ЛАДИН?

Дэсавэ мануша, сар инке на уӷанглэ о чачимос анда Библия, вишонас пэстири холи пэ мануша. Но вонэ стодэ зор, кай тэ парудён, и акана вонэ любин тэ терэн ладо машкар и мануша, тэ терэн лашимос, тэ шон сама пэ авэр и тэ на холявэн (Прит. 29:22)a. Кацаво сас дуе манушэнца, савэ парашэлэ тэ холявэн и линэ тэ ладин аврэнца.

Сар инке о Дэвидо на уӷангля о чачимос анда Библия, во бут разоря дэлас дума пала авэр найдраго и холяса дэлас дума андо ери. Прожыля время и о Дэвидо поля, кай во трэбуй тэ парудёл, ай кадяжэ тэ сытёл тэ любий тэ терэл ладо машкар и мануша. Со лэсти дя зор? Во ԥэнэн: «Андэ пэстири жизня мэ лэм тэ терав кадя, сар ԥэнэнпэ андэ алава, пэ савэ ритярдёлпэ лэ Дэвлэско законо. Тоди, андо ери, амэ лям тэ стас патив ек пэ аврэстэ».

Акэ со росԥэнэн и Рейчел. Вой пэрэлэлас кода, сар андярэнас пэс и мануша андэ лако ери. Вой ԥэнэн: «Холи андэ амаро ери сас, сар, ԥэнэса, кадя и трэбуй. И важ када, мэ и акана став зор, кай тэ улав и холи». Со лати дя зор тэ парудёл? Вой ԥэнэн: «Мэ вся время мангаваспэ лэ Иеговасти, кай тэ поможый манди».

Кода, со сас лэ Дэвидоса и ла Рейчеласа сыкавэл, состар авэла лашимос андо ди. Када кала терас, сар ԥэнэнпэ андэ алава, пэ савэ ритярдёлпэ лэ Дэвлэско законо и патяс, кай лэ Дэвлэско духо поможый. Но о Иегова инке ԥэнэн амэнди: «Терэн вся пэстиря ригатар, кай тэ авэл миро всаворэ манушэнца» (Рим. 12:18). Амэ жувас андо миро, андэ саво исин бут холинатирэ мануша. Но амэндэ вижала, кай амэ тэ на холявас. И кала амэ на холявас, када поможыя тэ ладисарас андо ери и лэ ԥралэнца и лэ ԥэянца андэ собрания. Вижала амэндэ када тэ терас? И саво лашимос анэна кода, кала амэ стас зор, кай тэ ладисарас аврэнца?

СТОН ЗОР, КАЙ ТЭ ЛАДИН АВРЭ МАНУШЭНЦА

Кала амэ росԥэнас важ лэ Дэвлэско царство, амэ поможысарас лэ манушэнди тэ ладин аврэнца (Ис. 9:6, 7; Матф. 24:14). Драго по ди, кала и мануша прилэн и лащи весть. Через када лэндэ будэр нинай андо ди, кай лэнди нико на камэл тэ поможый. Кадяжэ лэн на захал и холи, кала вонэ диқэн, со терэлпэ машкар и мануша. Вонэ линэ тэ аштярэн о лашимос, саво авэла англэ и вонэ: «Стон зор, кай тэ ладин и на парашэн када тэ терэн» (Пс. 34:14).

Исин кодэла, касти на чалёл амари весть, кала вонэ ашунэн ла пэрво разо (Иоан. 3:19). Но кадя най всаворэндэ. Всаек и мануша ашунэн и лащи весть чи най, амэ патяс, кай амэнди поможыя о свынто духо. И кала амэ росԥэнас ла, андэ амари дума дицол, кай амэ стас патив пэр лэндэ. Тоди амэ терас, сар ԥэндя о Иисусо андэ Матфея 10:11—13: «Кала зажан андо цэр, ԥэнэн «дорови» кодэлэнди, ко андо цэр. И сар о цэр ашэл када, тоди мэк о лашимос, саво тумэ камэн, кай лэстэ тэ авэл, авэл андэр лэстэ, ай сар на ашэл, тоди мэк тумаро лашимос рияпэ каринг тумэндэ». Кала амэ терас кадя, сар о Иисусо подԥэндя, амэндэ ашэлапэ о лашимос андо ди. Ай инке пала амэндэ авэна драго тэ дэн дума. И пэ авэр разо, файма, о мануш виашунэла и весть анда Библия.

Кала дас дума пативалэс лэ барэ манушэнца и кадяжэ кодэлэнца, ко жал против лэ Иеговастирэ мануша кадэлэса, амэ терас, кай тэ ладисарас лэнца. Андэ ек африканско страна и барэ мануша на мэкэнас, кай лэ Иеговастирэ свидетеля тэ строин и залоря, кай вонэ тэ тидэнпэ. Кай тэ мэкэн тэ строин и залоря, еқэ ԥралэсти, саво варикала служияс котэ миссионероса, ԥэндэ тэ жал каринг о барэдэр комиссаро, саво сас андо Лондоно анда африканско страна. Кадэва ԥрал трэбуй сас тэ росԥэнэн пала лэ Иеговастирэ свидетеля и пала лэндири лащи дила, через сави и мануша андэ кадэя страна май драго ладин ек аврэса. Сар прожыля кодэя время, кала вонэ диқлэпэ?

О ԥрал росԥэнэн: «Кала мэ зажылэм кордэ, кай бэшэл о секретарё, мэ полэм па латири йда, кай вой анда племя, пэ сави шыб мэ сытювавас тэ дав дума. Мэ ԥэндэм лати «доров» пэ латири шыб. Вой дя наздив и пушля: „Сости ту авелян?“ Мэ пативалэс ԥэндэм лати, кай камав тэ диқавпэ лэ барэ комиссароса. Вой позвонисардя лэсти, и кодэва вижыля каринг мандэ и ԥэндя «доров» пэ пэстири шыб. Во драго ман виашундя. Мэ росԥэндэм лэ комиссарости, кай лэ Иеговастирэ свидетеля через и лащи весть поможын лэ манушэнди май драго тэ ладин ек аврэса.

Через кода, кай о ԥрал пативалэс подя дума лэ комиссароса, лэстэ вижыля тэ улэл и найлашэ гиндоря пала лэ Иеговастирэ свидетеля. Прожыля набут время и барэ мануша андэ кодэя африканско страна парудэ пэстирэ гиндоря и мэклэ, кай лэ Иеговастирэ свидетеля тэ строин и залоря, кай тэ тидэнпэ. Савэ слинэ дэ лошалэ и ԥрала, кала лэндэ када вижыля! Драго дицол, кала амэ стас пэ авэр патив, тоди амэндэ вижала всаворэнца тэ ладисарас и важ када и мануша терэн и амэнди лашимос.

НИКАЛА НА ПАРАШЭЛА О ЛАШИМОС АНДО ДИ И ТЭ ЛАДИН

Лэ Иеговаско народо жувэл, сар андо раё, важ кода кай ладин ек еқэса. Авелоп драго, кай кажно андар мэндэ пэстиря ригатар тэ терэл вся, кай инке май фартэ тэ ладисарас ек аврэса. Тоди, о Иегова авэла лошало важ амэндэ. Но со инке май драго, амэндэ авэла вечно лашимос андо раё (2 Пет. 3:13, 14).