Тэ авэл амэндэ ковло ди. Васо када кадя важно?

И Сараa росԥэнэн: «Мэ фартэ лажавни и най фартэ патяв андэр пэстэ. Важ када манди най фартэ драго лэ манушэнца, савэ фартэ андэр пэстэ патян и савэ бут пала пэстэ гиндон. Ай кодэлэнца, кастэ ковло ди, манди драго. Лэнца мэ кацави, сави исин. Мэ моӷу тэ росԥэнав, со мандэ по ди и свободно тэ дав дума лэнца. Всаворэ мэрнэ друӷонэндэ ковло и лашо ди».

Ла Саратирэ алава сыкавэн, кай лэ манушэн цырдэл каринг кодэла, кастэ ковло ди. О Иегова кадяжэ любий кацавэ манушэн. Андэ Библия ԥэнэнпэ: «Тэ авэл тумэндэ ковло ди» (Колоссянам 3:12). Но со када, кала лэ манушэстэ ковло ди? Сар кадэва качество сыкадя о Иисусо? И сар кодэлэстар, кай амэндэ ковло ди амэ аваса инке май бахталэ?

СО КАДА, КАЛА МАНУШЭСТЭ КОВЛО ДИ?

Кала кай о мануш ковло ди, во на вижал андар пэстэ. Кацаво мануш обжалпэ аврэнца ковлэс и драго, ай кала лэстэ ԥаримос андэ жызня, во на холявэл.

Если лэ манушэстэ ковло ди, када сыкавэл, кай лэстэ исин зор тэ зритярдёл. Греческо алав, саво пэрэандярдо, сар «ковло ди», поджал, кала дэн дума пала дыко грас, савэс смоӷли тэ обсытярэн. Лэ обсытярдэ грастэстэ кадя жэ бут зор, сар кай и о дыко грас, но кода, кай лэс висытярдэ, поможый лэсти тэ авэл кандино. Кадя жэ и манушэстэ вижала тэ ритярэл пэс андэ вас, если лэстэ ковло ди, ай кадяжэ тэ терэл вся, кай тэ ладий аврэнца.

Амэ можэм тэ гиндосарас: «Пэр мандэ на ԥэнэса, кай мандэ ковло ди». Амэ жувас андэ люма, андэ сави бут мануша фартэ патян андэр пэстэ и на ӷанэн тэ аштярэн. Важ када амэ на удивисавас, кай амэнди найвушэро тэ авас ковлэ одеса (Римлянам 7:19). Чаче, пэ када трэбуй бут зор, но лэ Иеговастирэ свынтонэ духоса амэндэ вся вижала (Галатам 5:22, 23). Васо амэнди трэбуй тэ терас вся, кай амэндэ тэ авэл ковло ди?

Мануша цырдэнпэ каринг кодэла, кастэ ковло ди. Сар и ла Сарати, пала сави сас пистромэ май упрэ, амэнди чалёл тэ дас дума лэ манушэнца, савэндэ ковло ди. Само лашо и само ковло ди сас кай о Иисусо (2 Коринфянам 10:1). Дажэ и бэяцэ, савэ почти на ӷанэнас лэ Иисусос, цырдэнаспэ каринг лэстэ (Марка 10:13—16).

Кала ковло ди, када фэрия амэн и кодэлэн, ко паша амэндэ. Лэ манушэстэ, савэстэ ковло ди, вижал тэ на прилэл вся пашэ каринг оди и тэ на вижал андар пэстэ, кала варисо терэлпэ (Притчи 16:32). Кала амэ зритярдюваса, тоди пар мэндэ на авэла дош, если амэ збисаваса пэ авэр, тай инке пэ кодэла, кас любисарас. Да, и лэ манушэнди май вушэро тэ авэн паша кадэва мануш, саво ритярэл пэс андэ вас.

КАЙ О ИИСУСО САМО КОВЛО ДИ

Хоть кай о Иисусо сас бут важно дила и бут, со трэбуй сас тэ стерэл, во всаек андярэлас пэс всаворэнца ковлэс. Бутэнди андэ кодэя время сас найвушэро и лэнди фартэ трэбуй сас, кай лэн варико тэ подритярэл. Файма, лэн подритярэнас лэ Иисусостирэ алава: «Авэн каринг мандэ... ... важ кода кай мэ на заваздав о шэро и мандэ ковло ди» (Матфея 11:28, 29).

Сар кода, сар андярэлас пэс о Иисусо, поможыя амэнди, кай амэндэ тэ авэл ковло ди? Кала амэ сытювас па Библия, амэ уӷанас, сар о Иисусо обжаласпэ лэ манушэнца и сар во андярэлас пэс андо ԥаримос. Тоди, кала андэ амари жызня амэндэ ԥари время, амэ старысавас тэ терас кадя, сар о Иисусо, хоть дэкала и ԥарэс тэ андярас пэс ковлэс (1 Петра 2:21). Уӷанам, со поможыяс лэ Иисусости тэ авэл ковлэ одеса.

О Иисусо на заваздэлас о шэро. Во ԥэндя: «Мэ на заваздав о шэро и мандэ ковло ди» (Матфея 11:29). Андэ Библия часто пистройпэ пала ковло ди и кай о мануш тэ на заваздэл о шэро, еқэҭанэ. Васо? Важ кода кай лэ манушэстэ на вижала тэ обжалпэ лэ манушэнца ковлэс, если во заваздэл о шэро (Эфесянам 4:1—3).

Кала о мануш на заваздэл о шэро, тоди во бут на гиндой пала пэстэ и на холявэл, кала лэсти подԥэнэн. По о Иисусо хохавэнас и ԥэнэнас, кай во матимари и фартэ бут халас. Сар андярэлас пэс о Иисусо? Лэсти на трэбуй сас никасти и нисо тэ доԥэнэн, важ кода кай во вся сыкавэлас пэ дила. Во ԥэндя: «Но годявэрно о мануш чи най, дицол па лэстири дила» (Матфея 11:19).

Трэбуй тэ андярэс пэс ковлэс, кала варико на погиндосардя и ԥэндя обидно алав пала тири нацыя, катар ту чи пала кода, кай ту мурш чи жувли. Акэ со ԥэндя о старейшына о Питеро, саво жувэл андо ЮАР: «Кала ман холярэн варикастирэ алава, мэ пушав пэстар: „Ай со стердоп о Иисусо?“» Инке во ԥэнэн: «Мэ сытелэм тэ на гиндосарав пала пэстэ фартэ бут».

О Иисусо сэрэлас, кай и мануша найсовершэни. Лэ Иисусостирэ ученикоря камэнас тэ терэн правильно, но дэкала лэндэ када на вижалас, важ кода кай вонэ сас найсовершэни. Англа кода, сар о Иисусо тэ мэрэл, во мангля лэ Петрос, лэ Иаковос и лэ Иоаннос тэ подритярэн лэс, кай лэстэ тэ на авэл ԥарэс по ди. Но вонэ нэ смоӷли лэсти тэ поможын. О Иисусо поля лэн и ԥэндя: «Годяса о мануш полэл, кай камэл варисо тэ терэл, ай андэ тила бэзэх» (Матфея 26:40, 41). О Иисусо сэрэлас, кай лэстирэ апостолоря сас найсовершэни мануша. Через када во на холявэлас пэр лэндэ.

И Русалина фартэ бут аштярэлас аврэндар, и важ када дэлас дума пала лэндэ найдраго. Но акана вой анда вся о зор старыийпэ тэ сытёл кай о Иисусо и кай латэ тэ авэл ковло ди. Вой росԥэнэн: «Мэ ԥэнав пэсти, кай амэ всаворэ найсовершэни и старысавав тэ диқав андэ авэр лашимос, саво диқэл андэр лэндэ о Иегова». О Иисусо полэлас лэ манушэндири дук. Кода, сар во обжаласпэ лэ найсовершэнонэ манушэнца, поможыя и амэнди тэ авас ковлэ одеса.

О Иисусо вся и время патялас лэ Дэвлэсти. О Иисусо ӷанэнас пар пэстэ, со када найсправедливость. Лэстирэ алава пэрэбандярэнас, лэс вэрыцынас и дажэ умардэ. И всаек во ашэласпэ ковлэ одеса, важ кода кай во «ашавэлас када вся кодэлэсти, ко сындой па чачимастэ» (1 Петра 2:23). О Иисусо ӷанэнас, кай лэско небесно Дад заботияпэ пала лэстэ и андэ пэсти время улэла и найсправедливость.

Кала амэнца обжанпэ кадя, сар амэ на затердям, амэ можэм тэ вижас андар пэстэ. И кадэлэса терас инке май хужэ. Акэ васо андэ Библия ԥэнэнпэ: «Манушэстэ, саво вижал андар пэстэ, на вижала тэ авэл лашо англа Дэл» (Иакова 1:20). Дажэ если исин васо тэ холявас, амэ найсовершэни, и важ када амэ можэм нэправильно пэс тэ андярас.

И Кэти анда Германия дэлмут гиндояс, «если екжэно на зашосапэ пала пэстэ, нико на зашолапэ». Но вся паруделяпэ, кала вой сытеля тэ патял, кай о Иегова лати поможыя. Вой ԥэнэн: «Акана мэ на гиндосарав, кай манди вся и время трэбуй пала пэстэ тэ зашавпэ. Мэ ӷанав, кай о Иегова вся диқэл, и када поможый манди тэ андярав пэс ковлэс». Если тумэнца обжанпэ кадя, сар тумэ на затердэ, тоди сытён лэ Иисусостар и патян лэ Дэвлэсти. Када поможыя тумэнди тэ ашэнпэ ковлэ одеса.

БАХТАЛЭ КОДЭЛА, КАСТЭ КОВЛО ДИ

О Иисусо росԥэндя, кай па чачимастэ бахталэ моӷут тэ авэн кати кодэла, кастэ ковло ди. Во ԥэндя: «Бахталэ, кастэ ковло ди» (Матфея 5:5). Подам дума, сар амэнди поможыя, кала амэндэ ковло ди.

Кала кай о мануш ковло ди, када поможый, кала андо ери ԥаримос. О Роберто анда Австралия росԥэнэн: «Сэрав, кай мэ росхоляйлэм и ԥэндэм бут вэрыти алава мэрня хулаяти, хоть па чачимастэ на камлэм ла тэ холярав. Но на риса кода, со мэ ԥэндэм. Манди сас фартэ найдраго, кала мэ додиқлэм, сар лати ашэля ԥарэс мэрнэ алавэндар».

Андэ Библия ԥэнэнпэ: «Всаворэ амэ бут со терас най кадя» (Иакова 3:2). Важ када амэ на удивисавас, кала о хулай чи и хулаи на камэнас тэ ԥэнэн, но всаек ԥэндэ ек еқэсти алава, савэндар ԥарэс по ди. Вижал, кала лэ манушэстэ ковло ди, када поможыя лэсти тэ на вижал андар пэстэ и тэ на подшол и яг (Притчи 17:27).

О Ӷамцэло стодя бут зор, кай тэ на холявэл и тэ сытёл тэ ритярэл пэс андэ вас. Со кадэлэстар вижыля? Акэ, со во ԥэнэн: «Акана, кала амэ хулаяса на дополас ек еқэс, мэ всаек став зор драго ла тэ виашунав, тэ дав дума ласа ковлэс и тэ на холявав. Акана амэ полас ек еқэс май драго».

Кала манушэстэ ковло ди, када поможый тэ ладий аврэнца. Кодэлэндэ, ко часто холявэл, лэндэ найбут друӷоря. Ай кодэлэнди, кастэ ковло ди, лэнди май вушэро тэ ладин аврэнца, важ кода кай вонэ камэн, кай тэ авэл мирно (Эфесянам 4:2, 3). И Кэти, пала сави дям дума май англал, ԥэнэн: «Кала и мануша ковлэс обжанпэ ек еқэса, тоди лэнди чалёл тэ проандярэн и время еқэҭанэ, и дажэ виарақэн общё шыб кодэлэнца, каса ԥарэс».

Кала о мануш ковлэ одеско, лэстэ андо ди спокойно. Сар амэ ашунас алава анда Библия, кай лэ манушэстэ мудрость лэ Дэвлэстар, тоди по гиндо авэл, кай лэ манушэстэ ковло ди и во ладий аврэнца (Иакова 3:13, 17). Кацавэ манушэстэ «андо ди нинай холи» (Притчи 14:30). О Лёша, саво сытёл тэ обжалпэ аврэнца май ковлэс, росԥэнэн: «Акана мэ на домардював, кай вся тэ авэл па мэрнятэ. Кадэлэстар манди драго по ди и мэ лошало».

Файма, амэнди прижалапэ тэ стас бут зор, кай тэ авэл амэндэ ковло ди. Ек ԥрал ԥэнэн: «Камав тэ прижандював, кай идоси исин кацаво, кай андэр мандэ вся тирёл ла холятар». Но о Иегова, саво сытярэл амэн, кай амэндэ тэ авэл ковло ди, поможыя, кай амэндэ тэ на авэл кацаво (Исаия 41:10; 1 Тимофею 6:11). Во висытярэла амэн и стерэла, кай амэ тэ авас састэ (1 Петра 5:10). Сар прожала и время, амэндэ, сар кай и о апостоло Павло, вижала ковлэс и драго тэ обжаспэ аврэнца, сар о Иисусо (2 Коринфянам 10:1).