На цырдэ и время — май ӥто болдюв!

1. Васо ту можэш тэ закамэс тэ болдёс?

ТУ ЛЮБИС лэ Иеговас, саво подарисардя тути бут подаркоря, ек анда савэ — када и жызня? Сар ту можэш тэ сыкавэс лэсти, кай тожэ лэс любис? Само фэдэр — када тэ отдэс лэсти пэстири жызня и тэ болдёс. Кадя ту сможэш тэ авэс андэ лэ Иеговаско ери. Тиро Дад и Друӷо лэла вся и время тэ сыкавэл тути, каринг тэ жас, и лэла тэ фэрий тут (Пс. 73:24; Ис. 43:1, 2). Ай инке, кала ту болдёса, ту сможэш тэ надеиспэ пэ вечно жызня (1 Пёт. 3:21).

2. Со амэ уӷанаса анда кадэя статья?

² Со тути на дэл тэ болдёс? Можэт, тути трэбуй тэ парувэс пэстирэ гиндоря и кода, сар ту пэс андярэс? Если да, то ту най ек кацаво. Милионоря мануша ужэ прожылэ кадэва дром. И лэндэ вижыля тэ парудён. Вонэ болделэ и адес лошаса андярэн лэ Дэвлэстири время. Давай май бут уӷанаса пала мануша, савэ болделэ андо пэрво вико. Амэ роздиқаса, саво ԥаримос лэндэ сас и сости амэ можэм лэндар тэ сытювас.

И САМАРИТЯНОРЯ БОЛДЕЛЭ

3. Через со и самаритяноря моӷли тэ на болдён?

³ Кала о Исусо жувэлас пэ ԥув, андэ Самария и андо дэлмутно форо Шэхе́мо сас ек хохавни вера. Пэ мануша анда кодэя вера ԥэнэнас самаритяноря. Со вонэ трэбуй сас тэ стерэн, кай тэ болдён? Спэрва лэнди трэбуй сас тэ прилэн вся о Алав лэ Дэвлэстар, важ кода кай вонэ гиндонас, кай лэ Дэвлэстар сас кати пэрви панч книжки анда Библия и, можэт, книжка, сави пистросардя о Ешу́а (Исусо Навино). Кадяжэ и самаритяноря аштярэнас, кай тэ авэл о Избрано, важ кода кай патянас лэ Дэвлэстирэ алавэнди, савэ запистромэ андэ Второзаконие 18:18, 19 (Иоан. 4:25). Но кай тэ болдён, лэнди трэбуй сас тэ прижанэн, кай кадэва Избрано — када о Исусо. Бут андар лэндэ кадя и стердэ (Иоан. 4:39). Ай варикасти анда самаритяноря инке трэбуй сас тэ парашэл найдраго тэ гиндой пала евреёря (Лука 9:52—54).

4. Сар дэсавэ самаритяноря ашунэнас лэ Филипос? (Дила 8:5, 6, 14).

⁴ Со поможысардя лэ самаритянонэнди тэ болдён? О Филипо росԥэндя лэнди пала Христос, и дэсавэ андар лэндэ «прилинэ о алав лэ Дэвлэстар». (Проадинон Дила 8:5, 6, 14.) Лэн на тердярдя кода, кай лэн сытярэлас о евреё. Можэт, лэнди по гиндо авелэ и алава пала кода, кай о Дэл всаворэнца обжалпэ еқэндар (Втор. 10:17—19). И самаритяноря внимательно ашунэнас лэ Филипос и полинэ, кай лэс бишалдя о Дэл. Кадяжэ о Филипо терэлас бут чудеса, например исцэлияс лэ насвалэн и видаравэлас лэ найвужэн (Дила 8:7).

5. Сости ту сытёс кай и самаритяноря?

⁵ О Филипо сас евреё и кода, со во росԥэнэнас, сас важ и самаритяноря совсем нэво. Вся када моӷло лэн тэ одмарэл и тэ на дэл лэнди тэ ашэн лэ Христостирэ ученикоря. Но вонэ када на домэклэ. Сар кати и самаритяноря полинэ, кай о Филипо ԥэнэн чачимос, вонэ на линэ тэ цырдэн и время, кай тэ болдён. Андэ Библия ԥэнэнпэ: «Кала вонэ патяе лэ Филипости, саво росԥэнэнас лэнди пала лэ Дэвлэско Царство и пала лэ Исусоско лэ Христоско алав, тоди болделэ, и мурш, и жувля» (Дила 8:12). Ай ту ужэ полян, кай андэ Библия пистромэ о чачимос и кай лэ Иеговастирэ свидетеля любин ек еқэс кадя, сар сытярэлас о Исусо? (Иоан. 13:35). Если да, на дар тэ болдёс и патя, кай о Иегова здиқэла пэр тутэ.

6. Сости ту сытёс кай о Рубэно?

⁶ О Ру́бэно анда Германия бареля андо ери кай и свидетеля. Кала во сас подростко, лэсти ашэля ԥарэс тэ патял, кай о Иегова па чачимастэ исин. Во поля, кай дэсо на ӷанэн, и решыл кадэлэса варисо тэ стерэл. Со? Во ԥэнэн: «Мэ лэм май бут тэ розуӷанав. Пала эвалюцыя мэ адиносардэм най еқвар». О Рубэно проадиносардя и книжка «Существует ли заботливый Творец?». Вой фартэ ля лэс лэ одестар. Во погиндосардя: «Ни акада нисо! О Иегова па чачимастэ исин». Ай кала во ездияс тэ диқэл и всемирно ӷлавно управления, о Рубэно инке май драго поля, кай лэ Дэвлэско ери — када па чачимастэ чуда. Во рисайля андэ Германия и болделя. Тоди лэсти сас 17 бэрш. Если тутэ тожэ исин вопросоря пала Дэл, пала Библия или пала кода, сости вой сытярэл, виарак ответоря андэ амарэ публикацыи. Кала ту вся точно уӷанэса, ту лэса май састэс тэ патяс (Еф. 4:13, 14). Кадяжэ шув сама, сар и ԥрала и ԥэя андэ тири собрания и па вся и люма анда ди шон сама ек еқэс. И тоди ту додиқэса, кай кати андэ лэ Дэвлэско народо любин и драго полэн ек еқэс.

О САВЛО БОЛДЕЛЯ

7. Сар о Савло трэбуй сас тэ парувэл пэско гиндо?

⁷ Роздиқаса лэ Савлоско примеро. Во фартэ драго ӷанэнас иудейско законо и моӷ тэ ашэл ашунгло мануш машкар евреёря (Гал. 1:13, 14; Флп. 3:5). Андэ кодэя время бут евреёря гиндонас, кай и христианоря сытярэн лэ хохаимасти, и лэ Савлостэ тожэ сас кацаво гиндо. Во жэстоко ӷонияс лэ христианонэн. Во гиндояс, кай уӷодий лэ Дэвлэсти, но када сас най кадя (Дила 8:3; 9:1, 2; 26:9—11). Кай тэ болдёл, лэ Савлости трэбуй сас полностью тэ парувэл пэско гиндо. Акана лэсти трэбуй сас тэ авэл ӷотово, кай лэс лэна тэ ӷонин и тэ вэрыцын.

8. а) Со поможысардя лэ Савлости тэ болдёл? б) Сар о Анания поможысардя лэ Савлости? (Дила 22:12—16). (Кадяжэ диқэн и картинка.)

⁸ Со поможысардя лэ Савлости тэ болдёл? Лэ Савлоса па небо задя дума о Исусо. Кала о Савло додиқля о ярко свето, во корайля (Дила 9:3—9). Трин дес во нисо на халас и, наверно, обгиндояс кода, со лэса тердяпэ. О Савло поля, кай о Исусо — када Избрано и кай лэ Христостирэ ученикоря правильно полэн лэ чачунэ Дэвлэс. Май ӥто всаворэстар, лэс халас лажаимос, кала во згиндояс пала Стефа́но и пала кода, кай сас дошало андэ лэстири смэрть (Дила 22:20). Через трин дес каринг лэстэ авеля лэ Исусоско ученико, савэс ақарэнас Ана́ния, и ковлэс подя дума лэса. Во исцэлисардя лэ Савлос и ԥэндя лэсти тэ болдёл. (Проадинон Дила 22:12—16.) О Савло приашунделя каринг о Анания и болделя (Дила 9:17, 18).

9. Сости ту сытёс кай о Павло?

⁹ Лэ Савлоско примеро бут сости амэн сытярэл. Лэстэ на вижылоп тэ болдёл, тэ авелоп во ӷордо или тэ дарайлоп лэ миростар. Но во сас ӷотово тэ парувэл пэстири жызня и тэ лэл тэ кандэл лэ Исусос (Дила 26:14, 19). О Савло полэлас, кай, если во ашэла христианино, лэс лэна тэ ӷонин. Но када лэс всаек на тердярдя (Дила 9:15, 16; 20:22, 23). Посли кода сар во болделя, саво бы ԥаримос лэстэ тэ на авэл, во на парашэлас тэ надеийпэ по Иегова (2 Кр. 4:7—10). Кала ту болдёса, можэт, тутэ тожэ авэла разно ԥаримос. Со бы тэ на авэл, ту можэш тэ аштярэс помощь лэ Дэвлэстар и лэ Христостар. Вонэ поможына тути вся тэ виритярэс (Флп. 4:13).

10. Сости ту сытёс кай и Анюта?

¹⁰ И Анюта вибареля андэ Восточно Европа андо курдско ери. Кала лати сас 9 бэрш, латири дэй ашэля лэ Иеговаско свидетелё. Лако дад домэкля ла Анютати тожэ тэ сытёл па Библия. Но латирэ чаченди, савэ жувэнас лэнца андэ ек цэр, када фартэ на чалеля. Вонэ ԥэнэнас, кай и Анюта лажаварэл всаворэ́ ерес. Кала ла Анютати сас 12 бэрш, вой пушля кай пэско дад, можэт вой тэ болдёл. Во пушля латар: када вой екжэни приля кацави решэния или варико лати замардя о шэро? И Анюта ԥэндя: «Мэ любисарав лэ Иеговас». Тоди лако дад дя пэстири соӷласия. Посли кода сар вой болделя, латирэ чаче на парашэлэ латар тэ приасанпэ и найдраго тэ обжанпэ ласа. Лако папо ԥэндя лати: «Фэдэр ту тэ шалыиспэ и тэ цырдэс, чем тэ авэс андэ кадэя вера». Сар и Анюта виритярдя кадэя ԥари время? Вой росԥэнэн: «О Иегова поможысардя манди тэ авав састи. Ай инке ман фартэ подритярэнас о дадэ и мама». И Анюта запистрояс случаёря, кала о Иегова дэлас лати баро зор. Дэкала вой упалэ адиной лэн, кай тэ на бистрэл, сар о Иегова лати поможыяс. Если ту дарас, кай пэр тутэ лэна тэ тасавэн, на бистэр: о Иегова тут на ашавэла (Евр. 13:6).

О КАРНИЛИЁ БОЛДЕЛЯ

11. Через со о Карнилиё моӷ тэ на болдёл?

¹¹ Андэ Библия кадяжэ росԥэнэнпэ пала Карнилиё. Во сас баро халавдо андэ римско халавдия — во хулаияс варикай пэ 100 халавдэ (Дила 10:1). Важ када во сас ашунглэ манушэса машкар халавдэ и миро. Во «поможыяс лэ чорорэнди» (Дила 10:2). О Иегова камэлас, кай о Карнилиё тэ ашунэл и лащи новость, и важ када бишалдя каринг лэстэ лэ Петрос. Но закамэла о Карнилиё тэ парувэл пэстири жызня? На дарала во тэ хасарэл пэско лашо алав англа миро?

12. Со поможысардя лэ Карнилиёсти тэ болдёл?

¹² Со поможысардя лэ Карнилиёсти тэ болдёл? Амэ адиносарас андэ Библия, кай во «вся и время мангэласпэ лэ Дэвлэсти» (Дила 10:2). Кала о Карнилиё, ай кадяжэ лэстирэ чаче и пашутнэ друӷоря ашундэ лэ Петростар и лащи новость, вонэ патяе андо Христос и сразу болделэ (Дила 10:47, 48). Сар дицол, о Карнилиё сас ӷотово фартэ тэ парувэл пэстири жызня, кай вместе лэ чаченца тэ терэл лэ Иеговастири дила (Иис. Н. 24:15; Дила 10:24, 33).

13. Сости амэ сытювас кай о Карнилиё?

¹³ Сар и о Савло, о Карнилиё сас ашунглэ манушэса. И во тожэ на домэкля, кай через када во тэ на болдёл. Можэт, кай тэ ашэс христианино, тути тожэ трэбуй авэла фартэ тэ парувэс пэстири жызня. Сэр, кай о Иегова дэла тути зор андэ када. Если ту всаворэ́ одеса закамэса тэ жувэс па лэ Дэвлэско законо, во дэла тути бут лашымос.

14. Сости ту сытёс кай о Цуёси?

¹⁴ Кай тэ болдёл, о Цуёси анда Япония трэбуй сас дэсо тэ парувэл андэ пэстири бути. Во терэлас андэ ашунгли школа, кай сытярэн шукарнэс тэ стидэн и цвиторя, и сас котэ помошнико кай о директаро. Дэкала о директаро стидэлас шукарнэс и цвиторя важ и похороны, но кала во не моӷ када тэ терэл, вместо лэстэ када терэлас о Цуёси. Кадяжэ котэ лэсти прижаласпэ тэ терэл кода, со терэнас кай и будисторя. Но ӷэт май интя о Цуёси уӷангля о чачимос пала кода, со терэлпэ лэ мулэнца. Во поля: если во камэл тэ болдёл, лэсти трэбуй тэ парашэл тэ терэл кода, со терэнас и будисторя (2 Кр. 6:15, 16). О Цуёси подя дума лэ директароса, хоть и гиндояс, кай лэс вишона па бути. Со кадэлэстар вижыля? О директаро стодя патив пэр лэстэ и будэр на мангэлас лэстар тэ терэл кода, со обычно терэнас пэ похороны. Через бэршэстэ посли кода, сар о Цуёси ля тэ уӷанэн пала Иегова, во болделяa. Можэт, кай тэ болдёс, тути тожэ трэбуй дэсо тэ парувэс андэ пэстири бути. Патя: о Иегова позаботияпэ пала тутэ и пала тиро ери (Пс. 127:2; Матф. 6:33).

И КАРИНФЯНОРЯ БОЛДЕЛЭ

15. Через со и каринфяноря моӷли тэ на болдён?

¹⁵ И мануша, савэ жувэнас андо дэлмутно Каринфо, ашундёнас кодэлэса, кай андярэнас роспутно жызня и здранас пала барвалимос. Бут ко андэ кадэва форо жувэнас кадя, сар лэ Дэвлэсти на чалёл. Канешно, машкар кацаво миро сас фартэ ԥарэс тэ приашундёс каринг и лащи новость. И всаек, кала о Павло ля тэ росԥэнэн котэ пала Дэл, бут каринфяноря «патяе и болделэ» (Дила 18:7—11). Потом лэ Павлости зрисайля о Исусо и ԥэндя: «Мандэ исин бут мануша андэ кадэва форо». Важ када о Павло сас андо Каринфо бэрш епашэса.

16. Со поможысардя лэ каринфянонэнди тэ болдён? (2 Каринфо 10:4, 5).

¹⁶ Со поможысардя лэ каринфянонэнди тэ болдён? (Проадинон 2 Каринфо 10:4, 5.) О Алав лэ Дэвлэстар и лэско свынто зор поможысардэ лэ манушэнди андо Каринфо тэ парудён (Евр. 4:12). Дэсавэ андар лэндэ фартэ бут пэнас, чорэнас и совэнас мурш муршэса. Но кала вонэ всаворэ́ одеса приашунделэ каринг и новость пала Христос, лэндэ вижыля тэ мэкэн и найлащи жызня и тэ болдён (1 Кр. 6:9—11)b.

17. Сости ту сытёс кай и каринфяноря?

¹⁷ Хоть дэсавэ каринфянонэнди трэбуй сас фартэ тэ парудён, вонэ на гиндонас, кай када авэла най па лэнго зор. Вонэ фартэ камэнас тэ болдён, важ када пристонас бут зор, кай тэ жан па тисно дром, саво анэн каринг и вечно жызня (Матф. 7:13, 14). Можэт, тути тожэ трэбуй бут со тэ парувэс андэр пэстэ. Сар бы ԥарэс тути тэ на авэл, манг кай о Иегова свынто зор, саво поможыя тути тэ на подэспэ лэ найлашымасти, каринг саво тут цырдэл тиро ди.

18. Сости ту сытёс кай и Моника?

¹⁸ И Мо́ника анда Грузия, кала сас подростко, акушэласпэ, ай кадяжэ ашунэлас диля и диқэлас киноря, савэ на поджан важ и христианоря. Кай тэ болдёл, лати трэбуй сас вся када тэ ашавэл. Када сас найвушэро, но латэ вся вижыля. И Моника росԥэнэн: «И молитва придэлас манди баро зор. О Иегова диқэлас, кай мэ камавас тэ терав правильно, и вся и время манди поможыяс и потԥэнэнас». И Моника болделя, кала лати сас 16 бэрш. Ай исин андэ тири жызня кода, со на дэл тути тэ радуис лэ Иеговас? Если да, на параш тэ мангэс лэс тэ дэл тути зор тэ парудёс. О Дэл вся и время ӷотово тэ дэл пэско свынто зор (Иоан. 3:34).

О ПАТЯИМОС ПОМОЖЫЯ ТУТИ ТЭ ПЭРЭСТОС И ПЛАЯ

19. Со поможыя тути тэ пэрэандярэс любо ԥаримос? (Кадяжэ диқэн и картинка.)

¹⁹ Никала на бистэр: о Иегова любий тут и камэл, кай ту тэ авэс андэ лэско ери. Тути можэт тэ здэлпэ, кай тутэ никала на вижала тэ болдёс. Но о Исусо ԥэндя пэстирэ учениконэнди: «Если тумэндэ авэла патяимос дажэ сар о само цынёнё зэрницо, тоди тумэ ԥэнэна кадэлэ плаести: „Пэрэжа катар пэ авэр ҭан“, и во пэрэжала, и важ тумэндэ на авэла нисо невозможно» (Матф. 17:20). Кадэла мануша ԥирэнас лэ Христоса кати дуй бэрш. Важ када лэнди трэбуй сас тэ терэн вся, кай тэ патян инке май фартэ. О Исусо ԥэндя лэнди, кай, если вонэ лэна састэс тэ патян, тоди о Иегова поможыя лэнди тэ пэрэандярэн любо ԥаримос, саво можэт тэ здэлпэ сар баро плай. О Иегова обязательно поможыя и тути!

20. Сости ту сытелян кай лэ Дэвлэстирэ мануша, пала савэ амэ дям дума андэ кадэя статья?

²⁰ Если ту полян, со тути на дэл тэ болдёс, на цырдэ и время! Тер варисо, кай тэ улэс кода, со тути мешыий. Гиндосар пала лэ Дэвлэстирэ мануша, савэ жувэнас андо пэрво вико и савэ жувэн андэ амари время. Мэк лэнго примеро подритярэл тут и придэл тути зор, кай ту инке май фартэ тэ закамэс тэ отдэс пэстири жызня лэ Иеговасти. Тэ болдёс — када со май лащи решэния, сави ту можэш тэ прилэс андэ пэстири жызня!