Geneza

7 Pala codoia o Iehova phendea le Noesche: „Jia andre andi arca, tu hai sea chio chăr, că dichlem că san orta angla mande, ando mașcar cadale manușengo. 2 Anda fiesavo animalo ujo te les tuia efta, murșicano hai jiuvlicano, anda fiesavo animalo neujo, numai dui, murșicano hai jiuvlicano, 3 hai andal ciriclea le cerosche, câte efta, murșicano hai jiuvlicano, ca cadal jiuvindimata te train mai dur pe sea i phuv. 4 Că pa numai 7 ghiesa va avela te cherav te del o brâșând pi phuv 40 ghiesa hai 40 ratia hai va avela te chosav pa i phuv sea le jiuvindimata cai cărdem-le.” 5 Hai o Noe cărdea sea so phendea lesche o Iehova. 6 Le Noes sas-les 600 bărșa cana avilea o potopo pi phuv. 7 O Noe, ande iech than pesche șiavența, pesca rromniaia hai le rromnianța lesche șiavenghe, găle andre andi arca angla so te aven le paia le potoposche. 8 Anda fiesavo animalo ujo, anda fiesavo animalo neujo, anda le ciriclea hai anda sea so mișchil-pe pi phuv 9 găle andre andi arca, co Noe, dui câte dui, murșicano hai jiuvlicano, cadea sar phendea o Del le Noesche. 10 Efta ghiesa mai târzio avile le paia le potoposche pi phuv. 11 Cana le Noes sas-les 600 bărșa, ando duito șion, ando 17-to ghies le șionesco, ande codo ghies șindile sea le paia le cerurenghe hai pâtărde-pe le udara le cerurenghe. 12 Hai o baro brâșând dea pi phuv 40 ghiesa hai 40 ratia. 13 Chiar ande codo ghies, o Noe gălea andre andi arca pesche șiavența, Sem, Ham hai Iafet, pesca rromniaia hai le trine rromnianța lesche șiavenghe. 14 Lența găle andre animalea sălbatico de orisavo felo, animalea chăresche de orisavo felo, târâtoarea de orisavo felo hai jiuvindimata cai zburin de orisavo felo, adică orisavi ciricli hai orisavi aver creatura jiuvindi phachența. 15 Hai avile andi arca, co Noe, dui câte dui, anda fiesavo felo creatura jiuvindi cai sila phurdimos viațaco. 16 Cadea, cadala găle andre andi arca, anda fiesavo felo creatura jiuvindi murșicani hai jiuvlicani, cadea sar phendea o Del le Noesche. Pala codoia o Iehova phandadea o udar pala leste. 17 Le paia le potoposche pele pi phuv 40 ghiesa. Le paia barionas hai vazdine i arca, hai voi jialas po pai but opral i phuv. 18 Le paia arăsle zurales bare hai barionas mai dur pi phuv, tha i arca jialas pe le paia. 19 Hai le paia barile cadichi de but pi phuv, că sea le plaina uce de tela o cerii sas-le pachiarde. 20 Le paia vazdine-pe cu 15 coți opral le plaina. 21 Cadea, mule sea le creaturi jiuvinde cai mișchinas-pe pi phuv: le ciriclea, le animalea chăresche, le animalea sălbatico, le jiuvindimata cai mișchinas-pe pi phuv hai sea le manușa. 22 Sea so sas po șuco than hai sas-le ando nach phurdimos viațaco mule. 23 O Del distrugisardea pa sea i phuv sea so sas ande leste viața: vi le manușes, vi le animalea, vi chiar le târâtoarea hai le ciriclea le cerosche. Sea sas-le distrugime pa i phuv; numai o Noe hai codola cai sas-le leia andi arca așile jiuvinde. 24 Hai le paia sas-le bare pi phuv 150 ghiesa.