Aprilia

Chichiva slujitori le Iehovasche andal ghiesa biblico nachle prin pharimata savende ci ajucărde-pe. Te dichas o exemplo le Iacobosco. Lesco dad phendea lesche te jial te lel pesche iech rromni mașcar le șeia le Labanosche, iech anda lesche neamuri cai anelas închinarea le Iehovasche. Hai mai phendea lesche că o Iehova avelas te del-les ciaces but miștimata. (Gen. 28:1-4) Cadea că, o Iacob cărdea so sas mișto. Tiliardea anda Canaan hai gălea caring o than cai beșelas o Laban. Cadales sas-les dui șeia: i Lea hai i Rahela. O Iacob astardea baro drago catar i țâni șei le Labanoschi, i Rahela, hai caște daștil te lel-la sar rromni, vo sas-lo gata te cherel buchi anda laco dad efta bărșa. (Gen. 29:18) Tha le buchia ci găle cadea sar ajucărdea-pe o Iacob. O Laban athadea-les hai dea-les sar rromni pesca șeia mai bari, i Lea. Pala iech curco, dea-la lesche sar rromni vi la Rahela, tha numai dacă avelas te cherel lesche buchi încă efta bărșa. (Gen. 29:26, 27) O Laban athadea-les vi le pochinimasa anda leschi buchi. Vo phiradea-pe cioricanes lesa 20 bărșa. (Gen. 31:41, 42) w23.04 15 ¶5

Daisaras te pașioas oricana catar o Iehova Del ando manglimos caște del amen o ajutorii cai trebul amenghe hai caște sicavel amenghe so te cheras. O Iehova acharel amen te cheras cadaia. Vo camel te mangas amen mai butivar, chiar zuriarel amen ‘te mangas amen sea o timpo’. (1 Tes. 5:17) Prin orisavi buchi avelas te nachas ande amari viața, daisaras te mangas o ajutorii le Iehovasco bi te încăras amen parpale. (Prov. 3:5, 6) Anda codoia că le Iehovas siles iech baro ilo, daisaras te mangas amen lesche ori chichivar camas. O Isus hachiardea chichi de cuci si andel iacha le Iehovasche o manglimos. Bute timpoia mai anglal te avel pi phuv, o Isus dichlea sar o Del delas răspunso ca le manglimata pesche slujitorenghe loialo. O Isus sas-lo pașa pesco Dad cana Vo dea răspunso ca le manglimata cai cărde-len i Ana, o David, o Ilie hai but aver manușa. (1 Sam. 1:10, 11, 20; 1 Regi 19:4-6; Ps. 32:5) Ita sostar o Isus sicadea pesche discipolen te manghen-pe mai butivar hai pherde pachiamos. (Mat. 7:7-11) w23.05 2 ¶1, 3

O baro rașai Iehoiada daralas le Iehovastar. Cadaia dichilea-pe cana i șei la Izabelachi, i Atalia, astardea te rail, bi te avela o drepto, sar regina andi Iuda. Voi sas-li cadea de ratavali hai camelas cadea de but te avel regina, că astardea te mudarel sea pesche nepoțen, caște așel voi corcori co raimos. (2 Cron. 22:10,11) Iech anda cadal șiavorre, o Ioas, așilea jiuvindo anda codoia că i rromni le bare rașaieschi Iehoiada, i Ioșebeat hastradea-les. Voi hai laco rrom garade le șiavorres hai ferisarde-les. Cadea, von line sama ca varecon andai familia le Davidoschi te așel jiuvindo hai te arăsăl rege. O Iehoiada sas-lo loialo le Iehovasche hai ci mechlea ca lesco ilo te izdral daratar angla i Atalia. (Prov. 29:25) Cana o Ioas sas-lo efta bărșengo, o Iehoiada sicadea încă iech data peschi loialitatea caring o Iehova. Vo cărdea pesche iech plano. Dacă avelas te înclel mișto, o Ioas, cas sas-les o drepto te rail, avelas te cărdiol rege. Tha, dacă ci înclelas, o Iehoiada daștilas te avel mudardo. Le ajutorosa le Iehovasco, le buchia găle mișto. w23.06 17 ¶12, 13

O rege Nebucadnețar daisardeas te pachial că o Daniel vazdea-pe contra lesche hai daisardeas te șiol te avel mudardo. Tha o Daniel ci darailea hai phendea le regesche so însemnolas o suno, chiar cana cadaia șiutea-les ando pericolo. So ajutisardea le Danielos te avel tromano ande sea peschi viața? Daisaras te pachias ciaces că lesco dad hai leschi dei sas-le iech lașio exemplo anda leste. (Deut. 6:6-9) O Daniel prinjianelas na numai le Deș porunci, tha vi le mai țâne buchia andai Legea cai sicavenas so daștilas iech israelito te hal hai so nici. (Lev. 11:4-8; Dan. 1:8, 11-13) Sa cadea, o Daniel sichilea but anda le buchia prin save nachlea o poporo le Devlesco, vi anda so țârdine von cana ci așunde le Iehovastar. (Dan. 9:10, 11) Mai but, le buchia prin save nachlea ande peschi viața zuriarde lesco pachiamos că o Iehova hai lesche zurale îngeri sas-le pașa leste. (Dan. 2:19-24; 10:12, 18, 19) w23.08 3 ¶5, 6

I Rebeca sas iech jiuvli goghiaver, cai sea peschi viața cărdea alosarimata tromane hai jianglea cana hai so te cherel. (Gen. 24:58; 27:5-17) Tha, voi sicadea pachiv hai vi așundea catar so sas lache phendo. (Gen. 24:17, 18, 65) Dacă vi tu sicaves umilința cadea sar i Rebeca, va avela te încăres conto catar codola saven o Iehova dea-len autoritatea hai cadea, va avela te sicaves iech lașio exemplo andi familia tha vi andi congregația. I modestia sau o fapto te na pachias mai but sar trebul anda amende, si iech calitatea cai le pheia spiritualo trebun te sicaven-la. I Estera sas iech jiuvli cai anelas închinarea le Iehovasche hai cai sicadea sea peschi viața că ci del-pe bari. Pala so arăslea regina, o fapto că ci pachiaia mai but sar trebulas anda peste, ci mechlea-la te avel puchiardi barimastar. Voi sas-li gata te cherel so phendea lache laco văro, o Mardoheu. (Est. 2:10, 20, 22) Cadea sar i Estera, vi tu daștis te aves modesto dacă manghes sfaturi hai les-tu pala lende. (Tit 2:3-5) I Estera sicadea modestia vi ande aver modo. Voi „sas zurales șucar hai țârdelas i atenția savorenghi”. Cu sea cadala, voi ci dea-pe bari angla le coaver. (Est. 2:7, 15) w23.12 19, 20 ¶6-8

Te simțosaras amen doșale si iech baro pharimos anda amende. Cana phendeam amaro păcato, fal amen pharo anda so cărdeam hai leam sama te na mai cheras-les, daisaras te pachias ciaces că o Iehova iertisardea amen. (Fap. 3:19) Pala so cărdeam cadal buchia, o Iehova ci camel te mai simțosaras amen doșale. Vo jianel chichi de but daștil te duchavel amen cadaia. (Ps. 31:10) Dacă mechas ca cadai duch te phaghel amaro ilo, daisaras te arăsas te na mai nașas andi cursa anda i viața. (2 Cor. 2:7) Dacă chio ilo silo astardo catar iech bari doș, gândisar tut ca „i ciaci iertarea”, cai del-la o Del. (Ps. 130:4) Vo phenel codolenghe cai căin-pe anda sea o ilo: „Ci va mai avela te anav ande mânri goghi lengo păcato”. (Ier. 31:34) Aver varesar phendo, o Iehova ci mai gândil-pe ca le păcatea cai iertisardea-len. Na holiar tut pe tute anda codoia că arăslean te hasares che privilegii andi congregația anda le buchia nasul cai cărdean-len mai anglal. O Iehova ci mai gândil-pe ca che păcatea, cadea că nici tu ci trebulas te cheres cadaia. w23.08 30 ¶14, 15

Andi pandemia de COVID-19 le Martori le Iehovasche cai așunde catar i îndrumarea dini catar amari organizația sas-le mai liniștime sar codola cai banghiarde o can ca le hohaimata phende le manușendar. (Mat. 24:45) Le buchia ca save așel amari goghi daștin te cioren amaro timpo hai zuralimos catar ‘le buchia mai importanto’. (Filip. 1:9, 10) Dacă ci las sama, le buchia normalo la viațache, sar avelas o haben, o pimos, i destinderea hai i buchi, daștin te arăsăn po iechto than ande amari viața. (Luca 21:34, 35) Mai but, ande fiesavo ghies așunas hai citisaras anda protestea hai halimata politico. Tha, amen ci trebul te mechas ca cadala te țârden amari atenția. Dacă ci las sama, daisaras te arăsas te încăras i rig varecaschi ande amari goghi hai ilo. O Satan folosil-pe catar sea cadal buchia sicade mai opre caște covliarel amaro pachiamos hai caște cherel amen te na mai așias pașa o Iehova. w23.07 16, 17 ¶12, 13

O mai baro ghies anda o bărș anda le manușa le Iehovasche pa sea i phuv, si o ghies cana anen penghe amintea catar o merimos le Isusosco. Si o corcoro evenimento cai o Isus poruncisardea te încăras-les. (Luca 22:19, 20) Si amen but motivea caște ajucăras i Comemorarea. Te dichas chichiva anda lende. I Comemorarea ajutil amen te gândisaras amen so bari buchi cărdea o Isus anda amende cana dea peschi viața sar jertfa. Cado ghies cherel amen te hachiaras sar daisaras te sicavas că lesco sacrificio si cuci anda amende. (2 Cor. 5:14, 15) Si vi iech ghies pherdo bucuria mașcar amare phrala, cana „zuriaras amen iech averes”. (Rom. 1:12) Ande fiesavo bărș, aven but phrala inactivi ca i Comemorarea. Cana dichen că le phrala primisaren-len anda sea o ilo, chichiva alosaren te aven parpale co Iehova. Sa cadea, but manușa interesime așen uimime catar so dichen hai așunen, hai cadea camen te astaren te phiren vi von po drom la viațaco. Te gândisaras amen vi sar i Comemorarea chidel amen ande iech than sea le phralen hai sar zuriarel amaro phralicanimos pe sea i phuv. Sea cadal buchia cheren amen te ajucăras anda sea o ilo i Comemorarea. w24.01 8 ¶1-3

O Iehova mechlea ca lesco cuci Șiavo te nachel prin bare ducha hai te merel anda savore manușa, ca amare păcatea te daștin te aven iertime hai te daisaras te arăsas Lesche amala. (1 Ioan 4:10) Chichi gândisaras amen mai but ca o baro prețo pochindo le Iehovastar hai le Isusostar, cadichi mai but daisaras te hachiaras lenghi bari iubirea anda fiesavo mașcar amende. (Gal. 2:20) I răscumpărarea si iech daro anda iubirea. Vo sicadea peschi iubirea anda amende cana dea sea so sas lesche mai cuci – pesche Șiaves iubime. O Iehova ci încărel-pe parpale te sicavel amenghe peschi iubirea. (Ier. 31:3) O Iehova țârdea amen peste anda codoia că iubil amen. (Dich vi o Deuteronomo 7:7, 8.) Chanci hai chonic ci daștil te încărel amen dur cadala iubireatar. (Rom. 8:38, 39) So si ande chio ilo cana hachiares mai mișto i bari iubirea cai si le Iehovas caring tute? w24.01 28 ¶10, 11

Le creștini machle dichen cuci lenghi speranța cerisco. Iech anda lende, o phral Frederick Franz, phendea anda sea o ilo: „Amari speranța si ciaci hai va pherdiola-pe cu sea anda fiesavo mașcar amende le 144 000 jene andai țâni turma. Amaro pochinimos va avela but mai lașio sar gândisardeam amen”. Ando bărș 1991 vo phendea: „[Anda amende] cadai speranța ci hasardea peschi valoarea. . . . Chichi ajucăras-la mai but, cadichi va avela mai cuci ande amare iacha. Meritil te ajucăras-la. Dichav amari speranța mai șucar sar oricana”. Le mai but jene cai anen închinarea le Iehovasche aghies ajucăren te pherdiol-pe iech aver speranța. Si sa codoi speranța cai sas vi le Avraamos, te traisaren anda sea o timpo pi phuv tela o raimos le Regatosco le Devlesco. (Evr. 11:8-10, 13) Indiferento că va avela te traisaras ando cerii sau pi phuv, savoren si amen iech șucar speranța, cai pherel amaro ilo bucuriatar. Hai cadai speranța daștil te bariol vi mai but. w23.12 9, 10 ¶6-8

Angla o than cai jialas-pe andre ando tabernacolo, arachelas-pe iech altarii anda harcum pe savo anenas-pe jertfe. (Ex. 27:1, 2; 40:29) Tha cadal jertfe ci daisarde te chosen cu sea le păcatea le israelițenghe. (Evr. 10:1-4) Le jertfea animalenghe andine sea o timpo co tabernacolo sicavenas caring i corcori jertfa cai daștilas te chinel parpale cu sea anda o păcato savore manușen. O Isus jianelas că o Iehova bișialdea-les pi phuv caște del peschi viața sar răscumpărarea ando miștimos le manușengo. (Mat. 20:28) Cadea că, ca lesco bolimos, o Isus sicadea-pe angla o Iehova caște cherel so phenel lesche vo. (Ioan 6:38; Gal. 1:4) O Isus dea-pe pes pe iech altarii simbolico cai reprezentilas „i voința” le Devleschi, codoia ca lesco Șiav te del peschi viața sar manuș perfecto. O Isus dea peschi viața sar jertfa „iech data anda sea o timpo”. Cadea , vo choslea, sau pachiardea cu sea, le păcatea oricasche sicavel pachiamos ande leste. (Evr. 10:5-7, 10) w23.10 26 ¶10, 11

Corcore ci daisardeamas niciechdata te hastravas amen anda o păcato hai o merimos. (Psalmo 49:7, 8) Cadea că o Iehova dea pesche cuci șiaves te merel anda amende. Chichi beșas mai but hai gândisaras amen ca so cărde o Iehova hai o Isus caște chinen amen parpale anda o păcato, cadichi mai but dichas cuci i răscumpărarea. Cana o Adam păcătuisardea, vo hasardea i posibilitatea te trail veșnico na numai anda peste tha vi anda sea lesche șiave. Caște chinel parpale so o Adam hasardea, o Isus dea peschi viața perfecto sar răscumpărarea. Sea leschi viața sar manuș pi phuv, o Isus „ci cărdea păcato, hai ande lesco mui ci arachlea-pe athaimos”. (1 Pet. 2:22) Cadea că, cana dea peschi viața sar jertfa vo daisardea te pochinel o prețo caște chinel amen parpale anda o păcato hai o merimos. (1 Cor. 15:45; 1 Tim. 2:6) w24.01 10 ¶5, 6

Pala so sas-lo uștiado andal mule, o Isus gălea andre andi Sfânta Sfintelor anda o templo spiritualo, cai ji la urmă va arăsăna pașa leste, sea le creștini machle.Cadea că, dichiol-pe claro că le măsuri line catar o Iehova anda i închinarea uji sile but mai lașe. Cadalenghi baza si i jertfa de răscumpărare le Isusoschi hai lesco rolo sar Baro Rașai. O baro rașai anda Israelo jialas andre andi Sfânta Sfintelor, iech încăperea cărdi le manușendar, le rateia catar le jertfea andal animalea. Tha o Isus gălea andre „chiar ando cerii”, o mai sfânto than. Code vo sicadea le Iehovasche i valoarea pesca viațachi perfecto, dini ande amaro miștimos „caște chosel o păcato prin peschi jertfa”. (Evr. 9:24-26) I jertfa le Isusoschi si iech jertfa but mai bari, cai duriarel o păcato iechdata anda sea o timpo. Vi cana si amen i speranța te traisaras pi phuv sau ando cerii, savore daisaras te anas închinarea le Iehovasche ande lesco templo spiritualo. w23.10 28 ¶13, 14

Te gândisaras amen ca so cherel o Isus ando cerii sar Rege hai Baro Rașai pherdo iubirea. Prin leste daisaras te pașioas ando manglimos „le tronostar le lașimasco nemeritime” le Devlesco hai te mangas mila hai ajutorii „co momento potrivime”. (Evr. 4:14, 15) Te na mechas te nachel niciech ghies bi te beșas hai te gândisaras-ame ca so cărde hai cheren vi mai dur anda amende o Iehova hai o Isus! I iubirea cai von sicaven-la caring amende trebul te arăsăl ande amaro ilo hai te încărel jiuvindo amaro zelo ando timpo so slujisaras le Iehovasche. (2 Cor. 5:14, 15) I mai lași buchi cai daisaras te cheras-la caște naisaras anda sea so cărde o Iehova hai lesco șiavo anda amende, si te ajutisaras averen te cărdion Martori le Iehovasche hai discipoli le Isusoche. (Mat. 28:19, 20) Cadai buchi cărdea-la vi o apostolo Pavel. Vo jianglea că o Iehova camel ca „orisavo felo manușengo te aven hastrame hai te arăsăn ca iech prinjianimos exacto le ciacimasco”. (1 Tim. 2:3, 4) Cadea că, vo cărdea phares buchi caște del duma sea mai bute manușența hai ‘cărdea sea o posibilo’ caște hastravel-le. (1 Cor. 9:22, 23) w23.10 22, 23 ¶13, 14

But mașcar amende citisaras cadal versetea caște zuriaras le manușen andi predicarea hai te sicavas lenghe sar va avela i viața ando Paradiso. Sar daisaras te zuriaras averen, tha vi amen că le miștimata andai Revelația 21:3, 4 va pherena-pe ciaces? O Iehova na numai cărdea cadai promisiunea, vo vi phendea but aver buchia cai ajutin-ame te pachias ciaces că va cherela sea so promitisardea. Andi Revelația 21:5, 6, arachas mai but buchia cai zuriaren amaro pachiamos andi promisiunea le Iehovaschi anda o Paradiso. Cade citisaras: „Codo cai beșelas po trono phendea: «Ita! Me cherav sea le buchia neve!». Hai mai phendea: «Scriisar, anda codoia că cadal dumes sile demno pachiamasche hai ciace!». Hai mai phendea manghe: «Pherdile-pe! Me som o Alfa hai o Omega, o începuto hai o sfârșito»”. w23.11 3 ¶3-5

Iech tărno daștil te sicavel că siles iech goghi sastevesti prin o modo sar alosarel te huriavel-pe sau te lașiarel pesche bal. Butivar, le hureaimata cai phiraven-pe aghies, sile cărde catar manușa cai ci încăren conto le Iehovastar hai cai îngăren iech viața imoralo. Lenghi gândirea melali sicavel-pe prin le hureaimata cai sile prea chidine po corpo hai cai cheren le murșen te sicaven sar le jiuvlea. Cana iech tărno alosarel sar te huriavel-pe, sicavel că siles iech gândirea spiritualo cana mechel-pe sicado catar so phenel o Iehova ande pesco Lil hai catar le lașe exemplea anda i congregația. Vo daștilas te pușel-pe: „Sicaven mânre alosarimata că si man iech gândirea sastevesti hai că încărav conto le coaverendar? Sicavel mânro hureaimos că som iech manuș le Devlesco?”. (1 Cor. 10:31-33) Iech tărno cai alosarel te lel-pe pala o gândimos le Iehovasco ci va avela cuci numai andel iacha pesche phralenghe hai pheianghe, tha vi andel iacha pesche Dadesche cerisco. w23.12 25 ¶7

Andel puraimata, „o rege le sudosco” așilea contra le slujitorenghe le Iehovasche. (Dan. 11:40) Andi dintuni partea anda o secolo 20, but phrala sas-le phandade anda codoia că ci camle te jian ando războio. Sa cadea, chichiva șiave Martori sas-le șiudine avri andal școli anda codoia că ci salutisarde o drapelo. Tha andel palutne bărșa, le slujitori le Iehovasche cai train tela o zuralimos cadale regesco, nachen prin aver zumaimata garade. Sar exemplo, cana si campanii politico, iech creștino daștilas te avel athado te încărel ca iech partido politico sau ca iech jeno cai trebulas alosardo. Daștil-pe că ci va arăsăla cadea de dur caște jial co voto, tha ande leschi goghi sau ilo, vo daștilas te încărel ca iech partido. Cadea că, si importanto te na hamisaras amen andi politica na numai prin so cheras, tha vi prin so gândisaras hai simțosaras. (Ioan 15:18, 19) w23.08 12 ¶17

So trebul te încăras ande amari goghi ando timpo so nașas andi cursa anda i viața? O Pavel scriisardea: „Nașen cadea caște câștighin [o pochinimos]”. (1 Cor. 9:24) O Isus phendea că daisaras te arăsas ca ‘amare ile te pharion bute habeneia hai bute pimaia hai le pharimatanța la viațache’. (Luca 21:34) Le versetea anda cado paragrafo, hai vi anda aver daștin te ajutil amen te hachiaras so paruimata trebulas te cheras ando timpo so nașas andi cursa anda i viața. Daisaras te pachias că va avela te câștighisaras i cursa anda i viața anda codoia că o Iehova va dela amen o zuralimos cai trebul amenghe. (Is. 40:29-31) Cadea că, te na mechas amen hai te nașas mai dur! Te las amen pala o apostolo Pavel, cai dea sea peschi zor te câștighil o pochinimos promitime. (Filip. 3:13, 14) Chonic ci daștil te nașel ande amaro than ande cadai cursa. Tha, le ajutoroia le Iehovasco, daisaras te arăsas co sfârșito. Vo ajutil amen te phiravas amare responsabilități hai te das de iech rig orisavo pharimos. Le Iehovasa pașa amende va avela te așias andi cursa hai te nașas ji cana câștighisaras! w23.08 31 ¶16, 17

Cana le Isusos sas-les 12 bărșa gălea pesche dadesa hai pesca deiasa co Ierusalimo, tha cana te risarenas-pe chăre, von ci dine penghi sama că o Isus ci mai sas-lo lența. (Luca 2:46-52) O Iosif hai i Maria trebunas te len sama ca sea lenghe șiave te aven lența cana risarenas-pe chăre. Cana o Iosif hai i Maria arachle ji la urmă le Isusos, leschi dei doșardea-les anda so întâmplosardea-pe. O Isus daisardeas te sicavel că ci sas-la ciacimos. Tha, vo dea-len iech șucar răspunso pherdo pachiv. „Tha von ci hachiarde so phendea lenghe.” Cu sea cadala, o Isus „așundea vi mai dur lendar”. Tărne, dichlean vi tumen că si pharo te așunen tumare dadendar hai deiandar cana greșin sau ci hachiaren tumen? So daștil te ajutil tumen? Gândisaren tumen so simțosarel o Iehova. I Biblia phenel că cana așunes catar chio dad hai chi dei, ‘cadai buchi si plăcuto le Raiesche. (Col. 3:20) O Iehova jianel cana chio dad hai chi dei ci hachiaren tut hai cana cheren reguli cai si tuche pharo te les tut pala lende. Cu sea cadala, cana alosares te așunes lendar, chiar cana na-i tuche ușoro, cheres voime le Iehovasco ilo. w23.10 7 ¶5, 6

Iech colego catar i școala daștilas te phenel că le Martori trebun te paruven so pachian anda i homosexualitatea. Daștil-pe că va trebula te phenas lesche că sicavas pachiv caring o drepto fiesave manușesco te alosarel. (1 Pet. 2:17) Pala codoia, daisaras te sicavas lesche so miștimata si amen anda codoia că las amen pala le norme moralo la Bibliache. Cana iech manuș ci pachial sa codol buchia sar amen, ci trebul te gândisaras că jianas so si ande leschi goghi. Sar exemplo, dacă iech colego catar i școala phenel că si iech dilimos te pachias ando Del, sicavel cadaia că vo pachial zurales andi evoluția hai că prinjianel but buchia anda cadaia? Daștil-pe că phenel vi vo numai so așundea. Daștis te bișales lesche iech articolo sau iech video anda i creația pa jw.org. Si posibilo, că pala iech timpo va camela te den duma mai but anda codo materialo. Cana sicaves lesche pachiv, daștil-pe ca va camela te sichiol mai but anda so phenel i Biblia. w23.09 17 ¶12, 13

Daisaras te pachias ciaces că amaro Dad cerisco va dela amen bare miștimata hai va folosila amen ande leschi buchi, chiar cana cheras greșeli, dacă cheras sea so încărel amendar caște paruvas amen hai caște pachias amen ando Iehova vi mai dur. (Ps. 86:5; Prov. 28:13) Sar manuș imperfecto, o Samson cărdea poiechdata alosarimata nasul. Cu sea cadala, vo ci mechlea-pe hai slujisardea mai dur le Iehovasche, chiar cana greșisardea la Dalilasa. Tha, nici o Iehova ci mechlea le Samsonos, ba mai but, cărdea bare buchia lesa. O Iehova dichlea-les vi mai dur sar iech murș pherdo pachiamos, hai șiutea lesco anav ando lil Evrei, o capitolo 11, cai si scriime vi aver anava slujitorenghe cai așile lesche loialo. So but zuriarel amen te jianas că slujisaras ieche Dadesche cerisco cadea de iubitoro, cai abia ajucărel te del amen zor cana sam perade! Cadea că, vi amen sa cadea sar o Samson te mangas anda sea o ilo le Iehovas: „an tuche amintea mandar, mangav tut, hai de-man zuralimos”. (Jud. 16:28) w23.09 7 ¶18, 19

Anda codoia că încăras ande amari goghi o ghies le Iehovasco, camas te phenas vi averenghe i vestea lași. Tha, poiechdata va avela amenghe pharo te das duma le manușența. Sostar? Daștil-pe că sam astarde catar i dar le manușendar. Vi o apostolo Petru nachlea prin cadaia. Andi riat cana o Isus sas-lo judechime, le Petrosche sas lesche dar te phenel ca sas iech discipolo le Isusosco hai hohadea mai butivar că ci prinjianel-les. (Mat. 26:69-75) Tha, ando timpo, o apostolo nachlea părdal peschi dar le manușendar, hai cadea vo daisardea te phenel, pherdo pachiamos: „te na daran catar so daran von, nici te na tulburin tumen!”. (1 Pet. 3:14) Lesche dumes zuriaren amen te pachias că daisaras te nachas părdal i dar le manușendar. So daștil te ajutil amen te nachas părdal i dar le manușendar? O Petru phendea: „sfințon le Cristosos sar Rai ande tumaro ilo”. (1 Pet. 3:15) Cadaia însemnol, te gândisaras amen că o Isus si amaro Rege hai că siles iech baro zuralimos. w23.09 27 ¶6-8

Amen trebul te das amari zor ande fiesavo ghies te na mai cheras „le buchia cai încăren catar o tunearico, save ci anen chanci lașio”. (Ef. 5:11) Si ciaces că cana iech manuș dichel, așunel sau del duma anda buchia neuje sau bilajiavune, va avela lesche sea mai ușoro te cherel so si nasul. (Gen. 3:6; Iac. 1:14, 15) I lumea le Satanoschi camel te cherel amen te pachias că so si neujo hai lajiavuno andel iacha le Iehovasche, si lașio. (2 Pet. 2:19) Iech anda le mai purane athaimata le Benghesche si te coriarel i goghi le manușenghi ca von te na mai hachiaren so si mișto hai so si nasul. (Is. 5:20; 2 Cor. 4:4) Cado modo gândimasco dichel-pe claro aghies andel filmea, co televizoro hai po interneto. O Satan camel te na duriaras amendar cadal buchia neuje, tha te dichas-len lașe iachența. (Ef. 5:6) w24.03 22 ¶8-10

O tabernacolo sas sar iech țărha, cai mai anglal le israeliți îngărenas-les pența ando timpo so jianas anda iech than ande aver. Cado sas-lo folosime cam 500 bărșa, ji cana sas-lo vazdino o templo anda Ierusalim. (Ex. 25:8, 9; Num. 9:22) O tabernacolosas o mai importanto than cai le israeliți anenas închinarea hai jertfe le Devlesche. (Ex. 29:43-46) Tha, o tabernacolo avelas te reprezentil vareso but mai baro. O tabernacolo andal puraimata sas iech „ucial le buchianghe cerisco” hai reprezentilas o baro templo spiritualo le Iehovasco. O apostolo Pavel phendea că „cadai țărha [sau tabernacolo] si iech reprezentarea simbolico anda amare ghiesa”. (Evr. 8:5; 9:9) Cadea că, cana o Pavel scriisardea pesco lil caring le evrei, o templo spiritualo existilas deja. Cado templo arăslea te avel iech realitatea ando bărș 29 a.e. Ande codo bărș, o Isus boldea-pe, hai astardea te slujil ando templo spiritualo le Iehovasco sar „baro rașai prinjiando”. (Evr. 4:14; Fap. 10:37, 38) w23.10 25, 26 ¶6, 7

Amen trebul te banghioas sau te sichioas te traisaras le paruimatanța anda amari viața, caște daisaras te slujisaras mai dur pherde bucuria le Iehovasche. Sicavas că mechas amendar vi cana încăras conto catar so pachian sau so alosaren le coaver te cheren. Amen camas te mechas amendar cadea sar cherel amaro Del, Iehova. Andi Biblia, o Iehova silo numime „I Stânca” anda codoia că vo așel zuralo hai ci daștil te avel perado. (Deut. 32:4) Cu sea cadala, vo jianel vi te mechel pestar. Ando timpo cai nachlea, o Iehova sicadea că daștil te „banghiol” pala le paruimata cai avile caște daștil te pherel pesco scopo. Vi amen le manușen, o Del cărdea amen sa cadea, te daisaras te traisaras le paruimatanța cai aven ande amari viața. Andi Biblia arachas principii șucar cai ajutin amen te alosaras goghiaver indiferento prin so pharimata nachas. Cadea că, o exemplo le Iehovasco hai le sicaimata cai dea-len amenghe sicaven că vo jianel te mechel pestar, chiar cana si iech Del zuralo. w23.07 20 ¶1-3

Andi Biblia phenel-pe că o Iehova si sar iech dei pherdi iubirea. (Is. 66:12, 13) Te gândisaras amen sar lel sama iech dei pe pesco șiavorro hai cherel sea so daștil caște avel lesche mai mișto. Cana sam duchade, vi amen daisaras te pachias că o Iehova silo pașa amende hai sicavel amenghe iubirea. Vo ci mechel amen cana cheras vareso nasul. (Ps. 103:8) I națiunea Israel duchadea butivar o ilo le Iehovasco. Cu sea cadala, cana le israelițen falea-len nasul anda so cărde, vo sicadea caring lende peschi bari iubirea cai ci nachel, prin le dumes: „Anda codoia că arăslean cuci ande mânre iacha, sas tuche sicadi pachiv hai me iubisardem tut”. (Is. 43:4, 5) Aghies, le Iehovas siles sa cadai iubirea loialo vi caring amende.Vo ci mechel amen nici cana cheras buchia zurales nasul. Cana sicavas căința hai risaras amen parpale co Iehova, dichas că leschi iubirea caring amende sili neparudi. Vo promitil amenghe că „va iertila anda sasto ilo”. (Is. 55:7) I Biblia sicavel că cadai iertarea anel ‘timpuri cai zuriaren le Iehovastar’. (Fap. 3:19) w24.01 26, 27 ¶4, 5

O Iehova silo pașa amende, gata te ajutil amen oricana nachas prin iech pharimos. Sar exemplo, cana mangas amenghe libero catar i buchi caște jias ca iech congreso sau cana mangas iech paruimos ande amaro programo catar i buchi caște jias ca sea la întruniri, daisaras te dichas o vast le Iehovasco ande amari viața. Daștil-pe că le buchia va jiana but mai mișto sar ajucărdeam amen. Cadea că, amaro pachiamos ando Iehova va cărdiola sea mai zuralo. O Ezra manglea o ajutorii le Iehovasco pherdo umilința. De fiesavi data cana sas-lo perado anda codoia că ci daștilas te cherel sea le buchia cai sas lesche dine, o Ezra manghelas-pe le Iehovasche ieche ileia umilo. (Ezra 8:21-23; 9:3-5) Anda codoia că vo șiutea pesco pachiamos ando Iehova zuriardea le coaveren te cheren sa cadea. (Ezra 10:1-4) Cana sam perade anda codoia că si amen pharimata le lovența sau si amenghe dar anda o miștimos amara familiaco, te rodas pherde pachiamos o ajutorii le Iehovasco ando manglimos, cadea sar cărdea o Ezra. w23.11 18 ¶15-17

Caște avas arachle orta, o Iehova ci ajucărel amendar te cheras sea so cărdea o Avraam. Si but buchia cai daisaras te cheras-le caște sicavas amaro pachiamos. Sar exemplo, cana avel varecon nevo andi congregația, te cheras-les te simțol-pe mișto hai te ajutisaras amare phralen hai pheian cai silen nevoia ajutorostar. Sa cadea, si zurales importanto te las sama pe amari familia. O Del dichel cuci sea cadal buchia cai cheras-len hai va del amen but miștimata. (Rom. 15:7; 1 Tim. 5:4, 8; 1 Ioan 3:18) Iech anda le mai importanto buchia prin savi daisaras te sicavas amaro pachiamos si cana das duma pherde zelo andai vestea lași le manușența. (1 Tim. 4:16) Savore daisaras te sicavas prin le buchia cai cheras-len că si amen pachiamos că le promisiuni le Devlesche va pherena-pe hai că o drom pe savo phenel amenghe vo te jias si o mai lașio. Hai dacă cheras cadea, daisaras te pachias ciaces că va avela te avas arachle orta le Iehovastar hai va avela te arăsas lesche amala. w23.12 2 ¶3; 6 ¶15

Angla te merel, o rege David phendea le Solomonosche le dumes arachle ando texto de aghies. (1 Regi 2:1, 3) Vi ande amare ghiesa le phrala trebun te len-pe pala cado sfato. Cadea sar o Solomon, caște jial lenghe mișto, von trebun te încăren i legea le Iehovaschi hai lesche prinicipii ande sea so cheren. (Luca 2:52) Mai dur, va avela te dichas sostar si importanto ca iech tărno te arăsăl iech murș spiritualo. Ieche murșes spiritualo siles mai but roluri importanto andi familia hai andi congregația. Dacă san iech tărno phral, siguro gândisardean-tu ca so buchia cames te cheres ando viitorii. Sar exemplo, daștil-pe că cames te aves pioniero sau iech slujitorii auxiliaro hai, pala iech timpo, phuro. Sa cadea, daștil-pe că va cameia te les tuche rromni hai te aven tut șiave. (Ef. 6:4; 1 Tim. 3:1) Caște cheres sea cadal buchia trebul te aves iech murș spiritualo. w23.12 24 ¶1, 2

Le phuren creștini silen i buchi te len sama pe le cuci bacrea le Iehovasche. Cadal murșa loialo pachian că si iech bari buchi te slujin penghe phralenghe hai pheianghe, hai den penghi zor phares caște aven ‘păstori cai păstorin ciaces’. (Ier. 23:4; 1 Pet. 5:2) Amaro ilo bariol bucuriatar anda codoia că si amen phrala sar cadala ande amare congregații. Le phure daștin te sichion catar o Ghedeon. (Evr. 6:12; 11:32) Vo ferisardea o poporo le Devlesco hai lea sama pe leste. (Jud. 2:16; 1 Cron. 17:6) Cadea sar o Ghedeon, le phurenghe sas dini i buchi te len sama pe o poporo le Devlesco ande cadal ghiesa phare. (Fap. 20:28; 2 Tim. 3:1) Catar o Ghedeon daisaras te sichioas but buchia. Vo sas iech manuș cai jianelas mișto savo sas lesco than, ci sas-lo baricano hai așunelas catar so sas lesche phendo te cherel. Vo ci mechlea-pe hai așilea zuralo cana cărdea peschi buchi. Indiferento că slujisaras sar phure sau nici, savore camas te sicavas că anda amende sile cuci codola cai păstorin amen. Sa cadea, camas te așias pașa cadala murșa pherde pachiamos cai cheren phares buchi anda amende. (Evr. 13:17) w23.06 2 ¶1; 3 ¶3