Referințea anda o Caieto anda i întrunirea „Amari viața sar creștini hai i predicarea”
© 2025 Watch Tower Bible and Tract Society of Pennsylvania
5-11 MAI
SUMNACAI ANDA O LIL LE DEVLESCO | PROVERBE 12
I phari buchi anel miștimata
w16.06-M 30 ¶6
Iech calitatea creștino mai cuci sar le diamantea
Poiechdata chichiva manușenghe le Iehovasche si phraro te cheren le love cai trebun-len caște train. Ando than te roden te cheren love ușoro hai bipachivales, von den penghi zor te cheren phares buchi hai te aven vreanico. Cadea, von sicaven că dichen mai cuci sar oriso, le șucar calități le Devlesche, sar avelas te phiraven-pe pachivales (Prov. 12:24; Ef. 4:28).
w15 1/2-M 5 ¶4-6
I phari buchi daștil te anel amenghe bucuria
Si importanto te gândisaras amen ca sea cadal pușimata, tha vi mai but ca o palutno pușimos, anda codoia că daștil te ajutil amen te avas mai bucurime ande amari buchi. O Isus phendea: „Si mai but fericirea te des sar te primis” (Fapte 20:35). Prin amari buchi, ci țârden miștimata numai le clienți hai le șefi, tha vi le jene anda amari familia hai codola ciore.
Le jene anda amari familia. Cana o șăro la familiaco del peschi zor te lel sama pesca familiatar, vo cherel dui buchia. Ando iechto than, vo lel sama ca lesca familia te avel-la haben, hureaimos hai cai te beșel, cadea vo cherel i buchi cai sas lesche dini le Devlestar „te lel sama pesche manușendar” (1 Timotei 5:8). Hai, ando duito than, sicavel prin pesco exemplo că si importanto te cheres phares buchi. O Shane, anda savo deam duma ando articolo cai nachlea phenel: „Mânro dad del peschi zor te cherel chichi mai mișto peschi buchi. Si iech manuș pachivalo, cai cărdea buchi sea peschi viața sar tâmplarii. Lestar sichilem chichi de cuci si i buchi cai cheras-la amare vastența hai cai ajutil vi averen”.
Le ciore. O apostolo Pavel phendea le creștinenghe ‘te cheren buchi phares, caște avel-len so te den codolen cai sile ciore’ (Efeseni 4:28). Si ciaces, cana cheras phares buchi caște las sama amara familiatar, daisaras te ajutisaras vi codolen ciore (Proverbe 3:27). Cadea, daisaras te simțosaras i bucuria cai si amen cana das vi averen.
Cuci bara anda o lil le Devlesco
ijwyp-M articolo 95 ¶10, 11
Așiav zuralo cana nachav prin pharimata?
● Dich le buchia cadea sar sile ciaces. Rode te diches save si le pharimata mai bare hai save si mai țâne. I Biblia phenel: „O dilo sicavel sigo peschi holi, tha o goghiaver nachel părdal iech duma nasul”. (Proverbe 12:16) Cadea că, ci trebul te has chio șăro orisave buchiasa.
„Ca școala, le șiavorrenghe avelas te peren tele anda buchia țâne. Hai, anda codoia că lenghe amala pa o interneto denas-len ciacimos, mânre colegi sas-le vi mai perade hai ci mai daștinas te dichen le buchia cadea sar sas-le ciaces.” (Joanne)
12-18 MAI
SUMNACAI ANDA O LIL LE DEVLESCO | PROVERBE 13
Na mechen tumen athade catar „i lampa le nasulenghi”
it-2-E 196 ¶2, 3
I lampa
Aver hachiarimata simbolico. I lampa daștil te însemnol so alosarel iech manuș caște cherel lumina ande pesco drom. Cado simbolo si ande iech proverbo cai del duma vi anda codola orta hai vi anda codola nasul: „I lumina codolenghi orta strălucil zurales, tha i lampa le nasulenghi va merela”. (Pr 13:9) I lumina codolenghi orta cărdiol sea mai zurali. Tha, orchichi de zurales fal-pe că strălucil i lampa codolenghi nasul hai orchichi de șucar daștil te fal-pe lengo drom, o Del va cherela ca von te arăsen ando tunearico hai code ciaces lenghe pânre va dena-pe dab. Cadaia si so ajucărel codolen cai den armai penghe dades hai penga deia. (Pr 20:20)
Că „i lampa le nasulenghi va merela” camel te phenel vi că len ci silen niciech viitorii. Aver proverbo phenel: „Le nasules ci va avela-les niciech viitorii, i lampa codolenghi nasul va merela”. (Pr 24:20)
w12 15/7-M 12 ¶3
Te slujisaras le Devlesche cai anel libertatea
3 Dacă o Satan daisardea te cherel duie manușen perfecto hai vi avere jenen spiritualo te risaren o dumo le Devlesche, daștil te athavel vi amen. Lesco plano ci parudea-pe. Vo camel te cherel amen te pachias că le norme le Iehovasche sile phare hai cheren amari viața nasul (1 Ioan 5:3). Cana beșas but timpo manușența cai gândin cadea, daisaras te arăsas vi amen te pachias cadaia. Iech phei 24 bărșenghi cai cărdea buchia sexualo melale phenel: „Le amala cai sas man cărde manghe nasul, vi mai but anda codoia că ci sas man tromai te pachiav aver buchia sar von”. Daștil-pe că, vi tu simțosardean că chichiva amala cheren tuche nasul.
w04 15/7-M 31 ¶6
„O manuș cai dichel de mai anglal le buchia, phiravel-pe pala o prinjianimos”
Le manușes orta, cai dichel de mai anglal le buchia hai phiravel-pe pala o prinjianimos, va avela-les but miștimata. O Solomon phendea: „Codo orta hal ji cana ciailiol, tha codola nasul va așena bochale” (Proverbe 13:25). O Iehova jianel so si o mai mișto anda amende ande sea le buchia anda amari viața: ande sar trebul te phiravas amen amara familiasa hai avere manușența, andi predicarea hai so te cheras cana sam ortosarde. Dacă sam goghiaver hai las amen pala so phenel amenghe o Del ande pesco Lil, va avela te bucurisaras amen catar i mai lași viața.
Cuci bara anda o lil le Devlesco
it-2-E 276 ¶2
I iubirea
I iubirea daștil te avel sicadi ande iech modo nasul. Pala so dichleam cadal buchia, si claro că o manuș daștil te sicavel iech iubirea ciaci numai cana rodel hai lel-pe pala o spirito le Iehovasco hai o prinjianimos la Bibliaco. Te gândisaras amen sar exemplo ca i iubirea cai sicavel-la iech dad pesche șiavesche. O dad daștil te arăsăl te dichel avere iachența i iubirea caring pesco șiavo sau daștilas te mechel-pe îngărdo catar pesche sentimentea. Cadea, daștil te arăsăl te del pesche șiaves sea so camel lesco ilo hai te na ortosarel-les cana o șiavo cherel vareso nasul. (Pr 22:15) Iech iubirea sar cadaia, sicaven-la codola cai camen te aven mișto dichle le coaverendar, tha cadaia si iech buchi cai sicavel că gândin-pe numai pende. I Biblia phenel că iech dad sar cado, ci sicavel iubirea, tha, sicavel ura pesche șiavesche anda codoia că șiol leschi viața ando pericolo. (Pr 13:24; 23:13, 14)
19-25 MAI
SUMNACAI ANDA O LIL LE DEVLESCO | PROVERBE 14
Cuci bara anda o lil le Devlesco
it-2-E 1094
O modo gândimasco
Cu sea cadala, codo cai folosil pesco modo gândimasco, daștil te arăsăl dichlo nasul le coaverendar. Daștil-pe că cadaia camlea te phenel o verseto anda Proverbe 14:17: ‘O manuș cai gândil mișto, silo dichlo nasul averendar’. Butivar, codola cai ci folosin penghi goghi, dichen nasul iachența codolen cai gândin mișto. Sa cadea, codola cai folosin penghi goghi caște cheren so camel o Del, daștin te ajucăren te aven dichle nasul le coaverendar. O Isus phendea: „Anda codoia că ci cheren partea andai lumea, hai me alosardem tumen andai lumea, i lumea urâl tumen”. (Ioan 15:19) Si ciaces, andi șib originalo i duma ”o modo gândimasco” anda Proverbe 14:17 daștil te sicavel vi o modo gândimasco nasul. Cadea că, cado verseto daștil te sicavel că vi codo cai camel te cherel nasulimos averenghe silo urâme le coaverendar. Anda codoia aver traduceri phenen: „O manuș nasul silo urâme averendar”. (BC).
26 MAI–1 IUNIA
SUMNACAI ANDA O LIL LE DEVLESCO | PROVERBE 15
Te ajutisaras averen te avel-len iech ilo voime
w10 15/11-M 31 ¶16
Te phiras loialo!
16 O Iov sicadea lașimos averenghe. (Iov 31:31, 32) Vi amen trebul te ‘avas sea o timpo ospitalieri’. (Rom. 12:13) Sar exemplo, daisaras te acharas averen amende chăre caște has vareso simplo ande iech than. Te na bâstras că „si mai mișto te has cioro haben ande iech chăr cai si iubirea, sar te has but haben lașio ande iech chăr cai si ura”. (Prov. 15:17) Vi ieche ciore habenesa daisaras te bucurisaras amen hai te zuriaras amen iech averes.
w18.04-M 23, 24 ¶16-18
Te zuriaras amen iech averes vi mai but acana că o ghies pașiol!
16 Dacă sam lajiavune sau ci das duma prea but, ci trebul te pachias că ci daisaras te zuriaras le coaveren. O ciacimos si, că na-i cadea de pharo te cheras cadaia. Sar exemplo, cana das ghies ieche phralesche, daisaras te asas lesa. Dacă vo ci asal amența, daștil-pe că si anda codoia că siles iech pharimos hai siles nevoia te del duma varecasa. Daștil-pe că, dacă beșas hai așunas-les va avela te simțol-pe mai mișto. (Iac. 1:19)
17 Iech tărno phral cai bușiol Henri sas-lo zurales perado anda codoia că mai but jene anda leschi familia, chiar vi lesco dad cai sas-lo vi phuro de congregație, mechle o ciacimos. Iech phral cai vizitil le congregații, dichlea că o Henri sas-lo perado hai achardea-les te pien iech cafeaua. O Henri phendea so sas-les po ilo hai o phral așundea-les atento. O Henri hachiardea că numai dacă așel loialo, va daștila te ajutil pesca familia te avel parpale co Iehova. Vo sas-lo zuriardo vi cana citisardea o Psalmo 46, Țefania 3:17 hai Marcu 10:29, 30.
18 So sichioas catar o Henri hai i Marthe saveatar deam duma ando paragrafo 11? Că savore daisaras te ajutisaras codolen cai sile perade. O Rege Solomon scriisardea: „So lași si iech duma phendi atunci cana trebul! . . . Iech șucar dichimos bucuril o ilo hai iech lași vestea zuriarel le cocala”. (Prov. 15:23, 30) Dacă dichas că varecon silo perado, so daisaras te cheras? Te citisaras lesche anda O Turno de Veghe, te sicavas lesche iech materialo pa amaro site-o sau te ghilabas lesa ghilea anda o Regato. O apostolo Pavel phendea: „Sicaven tumen hai zuriaren tumen iech averes mai dur prin psalmi, prin așarimata andine le Devlesche, prin ghilea spiritualo ghilabade pherde recunoștința; te ghilaban anda sea o ilo le Iehovasche!” (Col. 3:16; Fap. 16:25)
Cuci bara anda o lil le Devlesco
ijwbq-M articolo 39 ¶3
Daștin le creștini te len iech tratamento medicalo?
2. Daștiv te mai pușav vi avere doctoren? Si mai mișto „cana si but sfătuitori” vi mai but cana si tut iech baro nasfalimos (Proverbe 15:22).
2-8 IUNIA
SUMNACAI ANDA O LIL LE DEVLESCO | PROVERBE 16
Trin pușimata cai ajutin amen te alosaras mișto
w14 15/1-M 19, 20 ¶11, 12
Sar te alosares mișto cana san tărno
11 I mai bari bucuria si te slujisaras le Iehovasche (Prov. 16:20). Fal-pe că o Baruc, o secretaro le Ieremiasco, bâstărdea cadaia iech timpo. Vo hasardea peschi bucuria andi buchi le Iehovaschi. Sostar? O Iehova phendea lesche: „Tha tu rodes buchia bare anda tute. Na mai rode buchia sar cadala! Anda codoia că va avela te anav iech baro necazo pe sea le manușa . . . hai tut va avela te dav-tu sar pochinimos chi viața oricai va avela te jias” (Ier. 45:3, 5). So pachias că avelas te cherel mai fericime le Barucos? Te rodel bare buchia anda peste hai te merel, sau te cherel i voința le Iehovaschi hai te așel andi viața cana o Ierusalimo avelas distrugime? (Iac. 1:12)
12 Iech phral cai sas-lo fericime anda codoia că slujisardea le Iehovasche, sas o Ramiro. Vo phenel: „Barilem ande iech ciori familia ande iech gav cai silo andel plaina Anzi. Cadea că, anda mande sas iech bari buchi cana mânro phral mai baro camlea te ajutil man le lovența caște jiav cai facultatea. Tha, na bute timposa mai anglal boldeman sar Martoro le Iehovasco hai iech pioniero achardea man te jiav lesa andi predicarea ande iech țâno foro. Gălem code, sichilem te șinav le bal hai pâtărdem manghe iech frizeria. Cadea, daisardem te lav sama corcoro mandar. But manușa anda codo foro camle te sichion andai Biblia. Pala iech timpo cărdea-pe iech nevi congregația ande savi delas-pe duma i șib de cothar hai gălem vi me te ajutiv. De deș bărșa, dav sea mânro timpo andi buchi le Iehovaschi. Niciech aver buchi ci daștil te anel manghe mai bari bucuria sar te ajutiv le manușen te sichion andai Biblia ande penghi șib”.
w13 15/9-M 17 ¶1-3
Parudean tut cu sea?
O FELO manușesco cai sam încărel catar mai but buchia. Sar exemplo, încărel catar sar samas bariarde, catar le tradiții cai sicade-len amenghe, catar le amala cai sas amen hai catar o than ande savo beșleam.
2 Tha, si aver buchia mai importanto sar so has hai so hureavas. De țâne samas sicade că chichiva buchia sile lașe hai aver sile nasul. Tha, na sea le manușa pachian sa codol buchia anda so si mișto hai so si nasul. Butivar cheras so phenel amenghe amari conștiința. I Biblia phenel că „but manușa cai ci prinjianen le Iehovas, avel lenghe te cheren le buchia la legeachi” le Devleschi (Rom. 2:14). Cadea că, so daisaras te cheras dacă o Iehova ci dea amen iech legea claro anda iech situația? Arăsăl te cheras so sichileam amara familiatar sau le manușendar anda o than cai beșas?
3 Sar creștini daisardeamas te las amen pala so alosaren le manușa andai lumea. Tha, ci cheras cadaia. Sostar? Ando iechto than i Biblia phenel: „Si iech drom cai anda o manuș fal-pe orta, tha ji la urmă vo îngărel co merimos” (Prov. 16:25). Anda codoia că sam imperfecto, ci daisaras te alosaras mișto sea o timpo (Prov. 28:26; Ier. 10:23). Ando duito than, o Satan „o del cadale sistemosco” phenel so si mișto hai nasul anda le manușa hai pala soste te len-pe (2 Cor 4:4; 1 Ioan 5:19). Anda codoia, caște avas mișto dichle le Iehovastar trebul te așunas catar so phenel-pe ando Romani 12:2. (Citisar.)
Cuci bara anda o lil le Devlesco
it-1-E 629
Cana sam ortosarde
Cana mechas amen ortosarde sau cana ci mechas amen ortosarde. Codola nasul, codola bigoghiaco sau codola bilajiavune sicaven că urân te aven ortosarde le Iehovastar cana ci mechen-pe sicade Lestar. (Ps 50:16, 17; Pr 1:7) Tha, cadaia daștilas te îngărel-len te aven ortosarde vi mai but hai te avel opral lende iech bari pedeapsa. Cadea sar phenel o proverbo: ‘le dile sile ortosarde catar lengo dilimos‘. (Pr 16:22) Cadal manușa daștinas te arăsăn ciore, cărde lajiavestar, nasfale hai ji la urmă te meren. O phiraimos le israelițengo sicavel amen so întâmplol-pe cana ci mechas amen ortosarde. Von ci așunde cana o Del ortosardea-len prin le profeți. Von ci așunde le Iehovastar nici cana Vo lea pesco vast opral lende hai ci mai dichlea-len lașe iachența. Le israeliți dichle penghe iachența so sas lenghe phendo de mai anglal hai ji la urmă sas-le ortosarde zurales cana aver line lengo them hai îngărde-len ande aver than. (Ier 2:30; 5:3; 7:28; 17:23; 32:33; Os 7:12-16; 10:10; Țe 3:2)
9-15 IUNIA
SUMNACAI ANDA O LIL LE DEVLESCO | PROVERBE 17
Bucurin tumen paceatar andi familia
g 9/14-M 11 ¶2
Sar te naches părdal i holi
Rode te diches sar san ciaces de andral. I Biblia phenel că but manușa holiaren-pe zurales sigo (Proverbe 29:22). San vi tu cadea? Puș tut: Încărav mânri holi but timpo? Holiarav man sigo? Cherav anda iech țâni buchi vareso baro? I Biblia phenel că con del duma sea o timpo anda iech buchi daștil te duriarel le pașarde amalen. (Proverbe 17:9; Eclesiasto 7:9). Vi mașcar iech rrom hai iech rromni daștil te întâmplol-pe cadaia. Cadea că, dacă diches că încăres prea but timpo i holi, de chi zor te sicaves mai but răbdarea che rromesche sau rromniache. (1 Petru 4:8)
w08 1/5-M 10 ¶6-11 ¶1
Sar te lașiaras le nehachiarimata
1. Alosar iech lașio momento caște den duma. „Anda orisavi buchi si iech timpo alosardo, . . . iech timpo te na das duma hai iech timpo te das duma”. (Eclesiasto 3:1, 7) Cadea sar dichleam mai opre, chichiva nehachiarimata daștin te holiaren amen but. Dacă si cadea, de chi zor te încăres parpale chi holi hai phen le coaveresche te den duma mai târzio. Va ferina tumari căsnicia dacă așunen o sfato cai avel andi Biblia: „Cana astares te has-tu averența si sar cana pâtres iech barajo; tiliar angla te astarel-pe iech bari cearta”. (Proverbe 17:14, Cornilescu, 1996).
Tha, si vi „iech timpo te das duma”. Le nehachiarimata barion dacă ci das duma. Na pachia că le nehachiarimata va lașiarena-pe bi te cheres chanci. Dacă cames te ajucăres iech țâra angla te des duma che rromesa sau rromniasa, sicav lesche pachiv hai phen lesche cana si mai mișto te den duma anda cadai buchi. Dacă cheren cadea, le dui va daștina te așunen catar so phenel-pe andi Biblia: „Na mechen ca tumaro ilo te avel încă pherdo holi cana jial tele o cham” (Efeseni 4:26). Tha, o ciacimos si că, pala codoia trebul te cheres le buchia cadea sar phendean.
Cuci bara anda o lil le Devlesco
it-1-E 790 ¶2
I iach
Prin sar mișchil iech manuș pesche iacha daștis te des chi sama so si ande lesco ilo. Andel iacha ieche manușesche daștis te diches mila sau nici. (De 19:13) Cana varecon ‘del anda i iach’ camel te sicavel că dichel de telal le coaveren sau că camel te cherel iech nasulimos. (Ps 35:19; Pr 6:13; 16:30) Anda codo cai ci camel te dichel vareso sau cai ci camel te cherel iech buchi ando miștimos le coaverengo phenel-pe că phandavel pesche iacha. (Mt 13:15; Pr 28:27) I Biblia sicavel că le iacha codolenghe bi goghiaco sile „co șăro la phuveaco” hai hasaren-pe anda iech rig ande aver, bi te jianen caring te len-la. Lenghe gânduri phiren pestea sea, tha na cai trebul. (Pr 17:24) Le iacha sicaven vi o zuralimos, o sastimos hai sar si o ilo ieche manușesco. (1 Sa 14:27-29; De 34:7; Iov 17:7; Ps 6:7; 88:9) O Rege Iosafat phendea le Iehovasche: „Amare iacha sile ortosarde caring tute”. (2 Cr 20:12)
16-22 IUNIA
SUMNACAI ANDA O LIL LE DEVLESCO
Te zuriaras le nasfalen prin amare dumes
mrt-M articolo 19, o chenarii
Sar te ajutis ieche amales cai silo nasfalo
Așun atento. Iech anda le mai lașe buchia cai daștis te cheres anda chio amal si te așunes-les cana camel te del duma tusa. Ci trebul te phenes vareso pala fiesavi duma cai phenel-la tuche. Poiechdata arăsal numai te așunes-les. De chi zor te așunes-les, na te judechis-les. Na phen că jianes so si ande lesco ilo, vi mai but cana lesco nasfalimos ci dichiol-pe cadea de but. (Proverbe 11:2)
Zuriar-les prin so phenes. Daștil-pe că ci jianes so te phenes, tha chichiva lașe dumes daștin te zuriaren-les mai but sar te na phenes chanci. Sar exemplo, daștis te phenes lesche că gândis tut ca lesco baro pharimos. Dacă ci jianes so te phenes, phen vareso simplo tha anda ilo, sar avelas: „Ci jianav so te phenav, tha camav te jianes că som pașa tute”. Te na phenes: „Daștilas te avel mai nasul” sau „Mișto că nai tut aver vareso . . .”
Daștis te sicaves că duchal tut che amalestar cana rodes te jianes mai but buchia anda lesco nasfalimos. Cadea, va avela te zuriares-les hai daștil-pe că vo va dichela lașe iachența că des chi zor te hachiares prin so nachel. (Proverbe 18:13) Cu sea cadala, na phen lesche so te cherel bi te pușel tut.
Ajutisar-les sosa siles nevoia. Na phen că jianes so trebul che amalesche, puș-les sar daștis te ajutis-les. Cu sea cadala, daștil-pe că vo ci va phenela tuche so trebules caște na șiol iech pharimos pe tute. Cana si cadea, phen lesche că daștis te chines so trebul-les, te cheres ujimos sau aver buchia. (Galateni 6:2)
Na mech tut. Daștil-pe că poiechdata chio amal ci mai camel te cheren vareso ande iech than sau ci thabol lesche te del duma tusa. Av răbdătorii hai hachiar-les. Ajutisar-les mai dur orisavea buchiasa trebul. (Proverbe 18:24).
wp23.1-M 14 ¶3-15 ¶1
Sar te ajutisaras codolen cai silen iech nasfalimos ca i goghi
„Den duma șucar codolența perade.” (1 TESALONICENI 5:14)
Daștil-pe că che amales siles anxietatea sau pachial că nai-lo lașio chancesco. Caște sicaves că duchal tut lestar daștis te aves pașa leste hai te zuriares-les, chiar cana ci jianes so te phenes lesche.
„Iech ciacio amal iubil sea o timpo.” (PROVERBE 17:17)
Ajutisar-les sosa siles nevoia. Na phen că jianes so trebul-les, mai mișto puș-les so daștis te cheres anda leste. Dacă che amalesche si pharo te phenel tuche so trebul-les, phen lesche te cheren chichiva buchia ande iech than, sar avelas te phiraven tumen. Sau daștis te chines lesche so trebul-les, te cheres ujimos sau aver vareso. (Galateni 6:2)
‘Sicav răbdarea.’ (1 TESALONICENI 5:14)
Daștil-pe că che amalesche ci thabol te del duma tusa. Phen lesche că oricana camel te del duma tusa san bucurime te așunes-les. Lesco nasfalimos daștilas te cherel-les te phenel sau te cherel buchia cai duchaven tut. Daștil-pe te na mai camel te cheren buchia ande iech than hai te holiarel-pe anda oriso. Av răbdatorii hai hachiar-les. Sa cadea, ajutisar-les mai dur orisavea buchiasa siles nevoia. (Proverbe 18:24)
Cuci bara anda o lil le Devlesco
it-2-E 271-272
Le sorți
Andel ghiesa purane, cana le manușa trebunas te cheren iech alosarimos, șiudenas le sorți. Von lenas chichiva țâne bara sau cotora caștesche hai șiudenas-len ande iech hureaimos sau ande iech ciaro hai pala codoia hamisarenas-len. O alosardo sas codo savesche sorți încalavenas-pe. Cherelas-pe vi iech manglimos cana șiudenas-pe le sorți, cadea sar cherelas-pe cana phenenas iech solaharimos. Ande codo manglimos manghenas-pe voceasa zurali ca o Iehova te sicavel lenghe so te cheren. I duma „sorți” (ebr. gôrál) sas folosime vi caște sicavel cadaia, tha însemnolas vi „cotor” sau „porția”. (Ios 15:1; Ps 16:5; Is 17:14; 57:6; Ier 13:25; Da 12:13)
Sar folosinas-len. Ando Proverbe 16:33 phenel-pe: „Le sorți șiuden-pe andi poghin, tha o alosarimos avel le Iehovastar”. Ando Israelo, le sorți folosinas-pe caște lașiaren-pe le nehachiarmata: „Cana șiuden-pe le sorți așiavel-pe o nehachiarimos hai sicavel-pe con si o mai zuralo”. (Pr 18:18) Le sorți ci folosinas-pe andel buchia sar avelas o sporto, le jocuri de noroc sau aver. Sa cadea, na folosinas-pe nici caște chiden love anda o templo, anda le rașaia sau caște den le cioren. Cu sea cadala, cadea sar phendea-pe de mai anglal ando Psalmo 22:18 le soldați romano folosisarde le sorți anda le hureaimata le Isusosche. (Mt 27:35)
23-29 IUNIA
Cuci bara anda o lil le Devlesco
it-1-E 515
Sfato, Sfătuitorii
O Iehova silo o mai goghiaver. Vo si o corcoro cai ci siles nevoia catar iech sfătuitorii. (Is 40:13; Ro 11:34) Lesco Șiavo silo iech ”Sfătuitorii Zurales Lașio” amenghe, anda codoia că așundea catar le sfaturi pesche Dadesche hai siles lesco spirito sfânto. (Is 9:6; 11:2; Ioan 5:19, 30) Cadaia sicavel amenghe că iech lașio sfato trebul te încărel conto sea o timpo le Iehovastar. Orisavo sfato cai ci silo pala le norme Codolesco O Mai Baro nai-les niciech valoarea hai silo de ivea. (Pr 19:21; 21:30).
30 IUNIA–6 IULIA
Cuci bara anda o lil le Devlesco
it-2-E 196 ¶7
I lampa
Cadea sar phenel-pe ando Proverbe 20:27, „O phurdimos ieche manușesco si i lampa le Iehovaschi, cai dichel sar si o manuș ciaces de andral”. Cana iech manuș ”phurdel”, adică del duma buchia lașe sau nasul, si sar cana iech lumina sicavel so felo manuș silo vo ciaces. (Dich vi Fa 9:1).