Pușimata catar amare cititori

Referin-pe le dumes „tu va avela te feris-len”, cai arachen-pe ando Psalmo 12:7, ca codola „prasade” (verseto 5) sau ca „le dumes le Iehovasche” (verseto 6)?

O contexto sicavel că cado verseto referil-pe co manușa.

Ando Psalmo 12:1-4, citisaras că „codola cas silen pachiamos hasardile de mașcar le manușa”. Te dichas mai dur o Psalmo 12:5-7, le versetea phende ando pușimos.

Ando verseto 5, sile sicade le dumes le Iehovasche anda ‘codola prasade’. Vo phenel că va salvila-len.

O verseto 6 mai phenel: „Le dumes le Iehovasche sile uje; sile sar o rup ujiardo”. Cado verseto sicavel so si vi ande amare ile cana gândisaras amen co Lil le Devlesco. (Ps. 18:30; 119:140)

Te dichas acana o verseto 7: „Tu va avela te feris-len, o, Iehova! Va avela te ocrotis fiesaves mașcar lende catar cadai generația, anda sea o timpo”. Catar jianas că o texto andi șib ebraico referilas-pe ‘codolende prasade’ hai na ca „le dumes le Iehovasche”?

Cana dichen că o verseto de mai anglal sicavel sar si „le dumes le Iehovasche”, chichiva manușa daștinas te pachian că o verseto 7 del duma anda lende. Si ciaces că o Del ferisardea pesco Lil codolendar cai camle te duriaren-les sau te chosen-les. (Is. 40:8; 1 Pet. 1:25)

Tha vi so phenel-pe ando verseto 5 si ciaces: O Iehova ajutil hai salvil codolen prasade, savenghe si cărdo iech baro nasulimos. (Iov 36:15; Ps. 6:4; 31:1, 2; 54:7; 145:20)

Cadea că, catar daisaras te jianas ca so referil-pe o verseto 7?

Cana dichas mai atento sea o Psalmo 12 hachiaras că cado verseto referil-pe ca le manușa.

O Psalmo 12, astarel te phenel că „codola pherde pachiamos” daștil-pe că sas-le hohade manușendar nasul. Mai dur, sicavel-pe că o Iehova va cherela vareso contra codola cai folosin greșime penghi șib hai den duma buchia nasul. O Psalmo sicavel amenghe că daisaras te pachias amen ando Del că vo va ferila pesche manușen anda codoia că Lesche dumes sile uje.

Cadea că, ando verseto 7 sicavel-pe că o Iehova va ferila codolen prasade, adică codolen cai sile duchade le manușendar nasul.

Sar silo traducime o verseto 7 andi Traducerea la lumeachi nevi sicavel i ideea anda o texto demno pachiamasco scriime andi șib ebraico. Hai I Septuaginta (grecisco) folosil le dumes „amen” dui-var ando verseto 7, cadaia sicavel că referil-pe codolende prasade sau duchade averendar. Co sfârșito, o verseto 7 phenel că ‘fiesavo mașcar’ codola pherde pachiamos va avela ferime catar „cadai generația”, adică codolendar cai „roden le buchia melale”. (Ps. 12:7, 8, n.s.) Ande iech traducerea andal Scripturi ebraico andi șib arameico, o verseto 7 silo scriime cadea: „Tu, o, DEVLA, va avela te feris codolen orta, va avela te păzis-len catar cadai generația nasul anda sea o timpo”. Vi cadaia sicavel că o Psalmo 12:7 ci referil-pe ca le dumes le Devlesche.

Cadea că, cado verseto del ‘codolen pherde pachiamos’ i speranța că o Del va ajutila-len.