Av tromano, cadea sar o Țadoc!

1, 2. Con sas o Țadoc? (1 Cronici 12:22, 26-28)

GÂNDISAR tut că diches angla tute mai but sar 340 000 murșa cai chidine-pe caște cheren le Davidos rege opral sea o Israelo. Trin ghiesa iech pala aver, pe le plaina barrale anda o Hebrono așunelas-pe sar le murșa anda Israelo denas duma, asanas hai ghilabanas așarimata le Iehovasche. (1 Cron. 12:39) Code sas vi iech tărno po anav Țadoc, cai daștil-pe că ci dichiolas avri mașcar le but manușa cai sas-le code. Tha, o Iehova dichlea-les hai camlea te cheras vi amen cadaia. (Citisar 1 Cronici 12:22, 26-28.) Con sas o Țadoc?

² Vo sas-lo iech rașai cai cărdea buchi ande iech than le bare rașaiesa Abiatar. O Iehova dea le Țadocos iech baro goghiaverimos hai o zuralimos te hachiarel savi si Leschi voința. (2 Sam. 15:27) Le manușa jianas co Țadoc cana sas-len nevoia catar iech sfato goghiaver. Sa cadea, vo sas-lo iech murș tromano hai mai dur va avela te sichioas sar sicadea vo tromai.

3. a) Sostar trebun te sicaven tromai le manușa le Iehovasche? b) So va avela te dichas ande cado articolo?

³ Ande cadal palutne ghiesa, o Satan camel mai but sar oricana te covliarel o pachiamos le manușengo le Iehovasche. (1 Pet. 5:8) Trebul te sicavas tromai ji cana ajucăras ca o Iehova te chosel cadai lumea nasul hai le Satanos. (Ps. 31:24) Va avela te dichas trin buchia cai va ajutina amen te sicavas tromai cadea sar o Țadoc.

TE SICAVAS CĂ AȘIAS PAȘA O REGATO LE DEVLESCO

4. Sostar trebul te avas tromane caște sicavas că așias pașa o Regato le Devlesco? (Dich vi i imaginea.)

⁴ Sar manușa le Iehovasche, sicavas anda sea o ilo că sam de i rig le Devleschi cana așias pașa lesco Regato. Tha caște cheras cadaia, butivar trebul amenghe tromai. (Mat. 6:33) Sar exemplo, pașa amende si but manușa nasul, anda codoia trebul te avas tromane caște traisaras amari viața cadea sar camel o Iehova hai caște phenas i vestea lași anda o Regato. (1 Tes. 2:2) Sa cadea, ande cadai lumea si sea mai but nehachiarimata politico, cadea că trebul amenghe tromai caște na las partea lende. (Ioan 18:36) Bute manușen le Iehovasche sas-len pharimata le lovența, sas-le marde sau sas-le phandade anda codoia că ci camle te șion-pe andi politica sau te jian andi armata.

5. Sostar trebuisardea le Țadocosche tromai caște jial pala o David?

⁵ O Țadoc ci gălea co Hebrono numai caște dichel sar o David silo cărdo rege. Vo lea pesa pesche arme hai sas-lo gata te marel-pe. (1 Cron. 12:38) Vo camlea te jial pala o David co marimos hai te marel le dușmanen le Israelosche. Chiar cana o Țadoc ci sas-lo iech lașio soldato cai gălea butivar co marimos, lesco tromai ajutisardea-les.

6. Sostar o Țadoc daisardea te lel-pe pala o tromai cai sicadea-les o David? (Psalmo 138:3)

⁶ Castar sichilea o Țadoc, iech rașai, te avel cadea de tromano? Vo beșlea pașa murșa zurale hai tromane hai cadaia ajutisardea-les te sichiol lendar. Iech anda cadal murșa sas o David. Pherdo tromai, o David ‘îngărdea o Israelo co marimos’ hai zuriardea le israelițen te jian pala leste anda sea o ilo. (1 Cron. 11:1, 2) O David șiutea sea o timpo pesco pachiamos ando Iehova cana gălea co marimos contra pesche dușmani. (Ps. 28:7; citisar Psalmo 138:3.) O Țadoc sichilea vi catar aver manușa tromane de pașa leste – sar avelas, o Iehoiada, lesco șiavo o Benaia, iech războinico zuralo, hai le 22 conducători anda o chăr lesche dadesco, cai așenas de i rig le Davidoschi. (1 Cron. 11:22-25; 12:26-28) Cadala camenas anda sea o ilo te cheren rege le Davidos hai te ferin lesco raimos.

7. a) Save exemplea de aghies zuriaren amen te sicavas tromai? b) So daisaras te sichioas anda i experiența le phraleschi Nsilu anda o materialo video?

⁷ Cana gândisaras amen sar sicade aver tromai caște așen loialo le Iehovasche hai lesche Regatosche, vi amen sam zuriarde te sicavas tromai. Sar exemplo, amaro Rege, o Isus Cristos, așilea zuralo hai ci camlea te șiol-pe andel buchia politico le Satanosche. (Mat. 4:8-11; Ioan 6:14, 15) Vo pachialas că o Iehova daștilas te del-les o zuralimos te cherel so si mișto. Vi aghies si amen but exemplea phralenghe tărne cai ci camen te jian andi armata sau te șion-pe andel buchia politico. Daisaras te dichas prin so nachle von pe amaro site-o jw.org.a

AJUTISAR CHE PHRALEN

8. Cana daștil-pe că trebun te sicaven tromai le phure de congregație caște ajutin penghe phralen?

⁸ I iubirea zuriarel le manușen le Iehovasche te ajutin-pe iech averes. (2 Cor. 8:4) Tha, poiechdata, trebul amenghe tromai caște sicavas iubirea. Sar avelas, cana astarel iech baro marimos, le phure de congregație hachiaren că trebun te aven pașa penghe phrala hai pheia caște zuriaren-len. Daștil-pe că le phralen silen nevoia catar iech Biblia sau publicații, tha vi catar haben, hureaimos hai iech than cai te beșen. Le phure len sama lendar pherde iubirea, chiar cana trebul te șion penghi viața ando pericolo. (Ioan 15:12, 13) Cadea sar o Țadoc, vi von si exemplea anda tromai.

9. Cadea sar phenel-pe ando 2 Samuel 15:27-29, so buchi dea o David le Țadocos te cherel? (Dich vi i imaginea.)

⁹ I viața le Davidoschi sas-li ando pericolo. Lesco șiav o Absalom camelas te mudarel-les caște lel lesco than sar rege. (2 Sam. 15:12, 13) O David trebulas te nașel sigo avri anda o Ierusalimo. Vo achardea pesche manușen hai phendea lenghe: „Vazden tumen hai aven te nașas, că niciech mașcar amende ci va așela jiuvindo anda o vast le Absalomosco!”. (2 Sam. 15:14) Ando timpo so tiliarenas, o David dea peschi sama că varecon trebulas te așel ando foro caște phenel lesche so camelas te cherel o Absalom. Cadea că, alosardea le Țadocos hai avere rașaien hai bișialdea-len parpale ando foro. (Citisar 2 Samuel 15:27-29.) Tha, von trebunas te len sama mișto so cherenas. I buchi cai dea-la lenghe o David te cheren-la sas phari hai daștinas chiar te hasaren penghi viața. Caște ferin le Davidos, von rodenas te jianen so cherelas o Absalom. Te gândisaras amen so daștilas te cherel lenghe o Absalom – iech murș cioricano, cai rodelas numai pesco miștimos hai cai risarelas parpale o nasulimos – dacă jianelas cadaia!

10. Sar ferisardea i viața le Davidoschi o Țadoc hai codola cai sas-le lesa?

¹⁰ O David cărdea iech plano hai alosardea le Țadocos hai avere lașe amales, o Hușai caște ajutin-les. (2 Sam. 15:32-37) O Hușai trebulas te cherel-pe că așel de i rig le Absalomoschi. Vo cărdea le Absalomos te pachial-pe ande leste hai dea-les sfaturi anda sar te marel le Davidos. Cado plano dea le Davidos mai but timpo caște avel pregătime anda o marimos. Pala codoia, o Hușai phendea caring o Țadoc hai o Abiatar so avelas te cherel o Absalom. (2 Sam. 17:8-16) Cadea, le dui murșa line sama ca o David te așunel so șiutea pesche andi goghi o Absalom te cherel. (2 Sam. 17:17) O Iehova ajutisardea le Țadocos hai le coavere rașaien te ferin i viața le Davidoschi. (2 Sam. 17:21, 22)

11. Sar daisaras te avas tromane cadea sar o Țadoc cana trebul te ajutisaras amare phralen?

¹¹ Tha, sar daisaras vi amen te sicavas tromai cadea sar o Țadoc cana trebul te ajutisaras amare phralen cai sile ando pericolo? 1) Te las amen pala le îndrumări. Ande cadal situații, si importanto te așias chidine hai te așunas catar le îndrumări cai del-len amenghe i filiala anda o than cai beșas. (Evr. 13:17) Le phure trebun te dichen mai butivar so te cheren caște aven mișto pregătime anda iech dezastro hai save si le îndrumări cana avel iech dezastro. (1 Cor. 14:33, 40) 2) Te avas tromane, tha te gândisaras amen de mai anglal so trebul te cheras. (Prov. 22:3) Si importanto te avas goghiaver hai te na șioas amari viața ando pericolo. 3) Te șioas amaro pachiamos ando Iehova. Vo daștil te zuriarel amen te ajutisaras amare phralen bi te șioas amari viața ando pericolo. Te na bâstras că o Iehova ci camel numai o miștimos amare phralengo, tha vi amaro miștimos.

12, 13. So sichioas catar o Viktor hai o Vitalii? (Dich vi i imaginea.)

¹² Te dichas prin so nachle o Viktor hai o Vitalii, dui phure de congregație, ando războio anda Ucraina. Von ajutisarde le phralen hai îngărde lenghe haben hai pai. O Viktor phenel: „Rodeam haben peste sea. Butivar nachleam prin thana ande save le manușa țârdenas le pușchența. Iech phral cai sas-les iech magazino dea haben bi lovengo le phralen. Anda codoia că vo dea buhle vastesa, bute phralen sas-len iech timpo so te han caște așen andi viața. Iechdata, cana șiuteamas mai but buchia ande iech camioneta, iech racheta explodisardea cam ca 20 metri pașa amende. Sea o ghies manglem man le Iehovasche te del man tromai caște ajutisarav vi mai dur le phralen”.

¹³ O Vitalii phenel: „Trebulas manghe but tromai. O iechto drom încărdea 12 ceasurea. Sea o drom manglem man le Iehovasche”. Tha o Vitalii ci sicadea numai tromai. Vo sicadea vi goghiaverimos. Vo mai phenel: „Manglem man sea o timpo le Iehovasche te cherav alosarimata goghiaver hai te avav umilo. Tradem numai pe le droma pe save le autorități phende că daisaras te jias. Mânro pachiamos sas-lo zuriardo cana dichlem sar cherenas buchi ande iech than le phrala hai le pheia. Caște daisaras te nachas la camionetasa, von dine de iech rig le buchia cai sas-le po drom. Von chidine hai șiute andi camioneta le ajutoarea. Sa cadea, von dine vi amen haben hai iech than cai te beșas ando timpo so cărdeamas o drom”.

AȘ LOIALO LE IEHOVASCHE

14. So daștil te avel ande amaro ilo cana varecon cas iubisaras-les mechel le Iehovas?

¹⁴ Iech anda le mai bare pharimata cai daștin te duchaven amaro ilo si cana iech jeno andai familia sau iech amal pașardo mechel le Iehovas. (Ps. 78:40; Prov. 24:10) Chichi iubisaras mai but codole manușes, cadichi mai pharo va avela amenghe te așias zurale. Dacă vi tu nachlean prin cadaia, o exemplo le Țadocosco hai le Davidosco daștil te zuriarel tut.

15. Sostar trebulas tromai le Țadocosche caște așel loialo le Iehovasche? (1 Regi 1:5-8)

¹⁵ Caring o sfârșito le raimasco le Davidosco, o Țadoc așilea loialo le Iehovasche cana lesco pașardo amal o Abiatar alosardea te na mai avel loialo. Cana o David țârdelas te merel, lesco șiavo o Adonia camlea te cărdiol rege ando than le Solomonosco, codo alosardo le Iehovastar. (1 Cron. 22:9, 10) O Abiatar alosardea te așel pașa o Adonia. (Citisar 1 Regi 1:5-8.) Cadea, o Abiatar sicadea că ci așilea loialo na numai le Davidosche, tha nici le Iehovasche. Gândisar tut chichi de duchado sas o ilo le Țadocosco! Mai but sar 40 bărșa, vo hai o Abiatar cărde buchi ande iech than sar rașaia. (2 Sam. 8:17) Von line sama ande iech than catar „i Arca le ciace Devleschi”. (2 Sam. 15:29) Mai but, le dui așile pașa o David cana sas-lo rege hai cărde but andi buchi le Iehovaschi. (2 Sam. 19:11-14)

16. So daștil-pe că ajutisardea le Țadocos te așel loialo?

¹⁶ O Țadoc așilea loialo le Iehovasche, chiar cana o Abiatar ci cărdea cadaia. Cadea că, cana așundea-pe so camel te cherel o Adonia, o David alosardea ca o Țadoc, o Natan hai o Benaia te machen le Solomonos sar rege. (1 Regi 1:32-34) O Țadoc sas-lo zuriardo anda codoia că beșlea manușența cai așile loialo le Iehovasche, sar avelas o Natan hai codola cai așile pașa o rege David. (1 Regi 1:38, 39) Cana o Solomon arăslea rege, ‘șiutea le Țadocos rașai ando than le Abiatarosco’. (1 Regi 2:35)

17. Sar daisaras te las amen pala o Țadoc dacă iech jeno saves iubisaras-les alosarel te mechel le Iehovas?

¹⁷ Sar daștis te les tut pala o Țadoc? Dacă iech jeno saves iubis-les but alosarel te mechel le Iehovas, sicav le Devlesche că alosares te așes lesche loialo. (Ios. 24:15) Pachia anda sea o ilo că o Iehova va dela tut o tromai hai o zuralimos cai trebul tuche. Mang tut vi mai dur le Iehovasche hai aș pașa lesche manușa loialo. O Iehova dichel cuci chi loialitatea hai va pochinela tut anda sea so cheres anda leste. (2 Sam. 22:26)

18. So sichioas catar o Marco hai i Sidse?

¹⁸ Te dichas prin so nachlea o Marco hai leschi rromni, i Sidse, cana lenghe dui șeia alosarde te mechen le Iehovas. O Marco phenel: „Anda o ghies de cana năștin-pe amare șiave, iubisaras-len zurales but. Avelas te cheras oriso caște las sama pe lende. Cadea că, cana alosaren te mechen le Iehovas, amaro ilo silo phagărdo duchatar. . . . Tha o Iehova sas-lo pașa amende. Cana me som covlo, o Iehova lel sama ca voi te avel zurali, hai cana voi si peradi, man te avel man o zuralimos cai trebul manghe caște avav pașa late”. I Sidse mai phenel: „Ci daisardeamas te nachas prin cado pharimos dacă o Iehova ci avelas te del amen o zuralimos cai trebulas amenghe. Iech timpo, doșardem man but anda codoia că mânre șeia mechle o ciacimos. Cadea că, phendem le Iehovasche ando manglimos so duchavelas man. Pala țâra timpo, iech phei savea ci dichlem-la de but bărșa avilea mande, șiutea pesche vasta pe mânre phiche, dichlea ande mânre iacha hai phendea manghe: «Sidse, na bâstăr că ci san tu doșali!». Le Iehovasa pașa mande, daisardem te slujiv Lesche vi mai dur voime”.

19. So cames anda sea o ilo te cheres?

¹⁹ O Iehova camel ca sea lesche manușa te sicaven tromai andel pharimata, cadea sar o Țadoc. (2 Tim. 1:7) Cu sea cadala, vo camel te șioas amaro pachiamos ande leste, na ande amaro zuralimos. Cadea că, te rodas le Iehovas de fiesavi data cana trebul te sicavas tromai. Te pachias anda sea o ilo că va cherela amen tromane, cadea sar le Țadocos! (1 Pet. 5:10)