Pușlean-tume?

So cherenas le rașaia anda o iechto secolo le ratesa le animalengo cai sas-le dine po altarii?

ANDE fiesavo bărș, le rașaia anda o Israelo purano denas mii animalea sar jertfa po altarii anda o templo. Pala sar phenel iech evreo cai jianel mișto i istoria anda o iechto secolo, o Josephus, cana încărelas-pe i Patraghi, sas-le dine sar jertfa mai but sar 250 000 bacrișe. Cadea că, șiorelas-pe but rat. (Lev. 1:10, 11; Num. 28:16, 19) Tha cai șiorelas-pe sea cado rat?

Ando templo cai cărdea-les o Irod, le arheologi arachle mai but canalea prin save thabdelas o rat. Cadala sas-le folosime ji cana o templo sas-lo perado ando bărș 70 a.e. Pala sar fal-pe, prin cadal canalea șiorelas-pe o rat avreal o templo.

Te dichas dui buchia cai ajutinas te așel ujo o altarii:

• Iech gaura tela o altarii: Ande iech lil purano cai sas-lo scriime ando trinto secolo hai ande savo arachen-pe le legi hai le tradiții le evreinghe phenel-pe anda cadal canalea: „Ando colțo le altaresco sas dui găuri . . . prin save șiorelas-pe o rat hai o pai ji co len Chedron”.

  Vi le arheologi anda amare ghiesa pachian sa codoi buchi anda cadal „găuri”. Ando lil The Cambridge History of Judaism phenel-pe că sas arachlo „iech baro sistemo ande savo sas but canalea” pașa o templo. Cade mai phenel-pe: „Daștil-pe că cado sas folosime caște șiorel-pe avreal o templo o pai hai o rat le animalengo cai sas-le dine sar jerfta”.

• But pai: Le rașaien sas-len nevoie bute paiestar caște încăren uje o than tela o alatarii hai le canalea prin save thabdelas o rat. Caște cheren cadai buchi, len sas-len pai ujo anda o foro. Prin chichiva canalea hai apeducte, o pai avelas ji co templo. Cado sas încărdo ande bazinea hai rezervoarea. O arheologo Joseph Patrich phendea: „Cado sistemo cai anelas pai ando templo hai prin savo șiorelas-pe o rat ci mai sas ande aver templea anda codol ghiesa”.