„O marimos si le Iehovasco”

Ando bărș 1999, o guverno andai Franța phendea că i filiala de cothar trebulas te pochinel taxe anda le donații cai primisarde-len anda o bărș 1993 ji ando bărș 1996. Rodeam ca o stato francezo te cherel amenghe ciacimos, tha ci cărde amenghe. Pala so hasardeam o proceso, o guverno lea anda o conto la filialaco 4,5 milioanea euro. Amari palutni speranța sas o CEDO. Tha, angla te dichen sar așen le buchia, o CEDO phendea că amen, le avocați catar o guverno francezo hai iech reprezentanto catar i Curtea Europeano trebulas te dichas amen caște hachiaras amen mașcar amende angla te arăsas co proceso.

Ajucărdeam amen ca i jiuvli cai cherelas buchi sar reprezentanto te phenel amenghe te pochinas iech partea anda le love cai o guverno francezo camelas-len. Tha amen jiangleam mișto că o Iehova ci camelas ca amen te das-len niciech euro. Le phrala hai le pheia dine codola love anda i buchi le Regatoschi, na anda o guverno francezo. (Mat. 22:21) Cu sea cadala, samas te dichas amen lența caște sicavas că amen încăras le reguli catar i Curtea Europeano.

I ședința încărdea-pe ande iech bari sala catar i Curtea Europeano. Pala țâra timpo de cana astardea te del duma, i jiuvli cai cherelas buchi sar reprezentanto catar i Curtea Europeano phendea că le Martori le Iehovasche va trebuna te pochinen iech partea anda le taxe cai manghel-len o guverno andai Franța. O spirito le Iehovasco șiutea amenghe andi goghi te pușas: „Jianen că o guverno lea deja amendar mai but sar 4,5 milioanea euro?”.

Ci avilea lache te pachial cana așundea cadaia. Cana i echipa juridico anda o guverno phendea că ciaces line-pe le Martorendar le Iehovasche codola love, voi parudea-pe cu sea. Voi holiardea-pe pe codola cai reprezentinas o guverno hai phandadea sigo i ședința. Ande codo momento hachiardeam că o Iehova parudea sea le buchia caște ajutil amen te câștighisaras o proceso. Cana terminisardea-pe i ședința, samas cadea de bucurime că ci avelas amenghe te pachias so întâmplosardea-pe.

Ande 30 iunia 2011, o CEDO alosardea ande amaro miștimos. Vo phendea că i taxa ci sas legalo hai că o guverno trebulas te del parpale le love le Martorenghe le Iehovasche hai te del-len vi dobânda. Cado baro alosarimos feril vi mai dur i închinarea ciaci andi Franța. Cadea sar iech corcoro bar cai tiliardea andai praștia le Davidoschi arăslea caște paruvel sea o marimos, sa cadea, iech corcoro pușimos cai șiutea-les o Iehova ande amari goghi parudea sea o proceso ande amaro miștimos. Sostar cărdea-pe amenghe ciacimos? Anda codoia că, cadea sar phendea o David le Goliatosche, „o marimos si le Iehovasco”. (1 Sam. 17:45-47)

Ci sas i corcori data cana cărdea-pe amenghe ciacimos. Chiar cana, zurale guvernea hai religii așile amenghe contra, sas amenghe cărdo ciacimos mai butivar. Le mai bare instanțe anda 70 thema hai chichiva tribunale internaționalo cărde 1 225 alosarimata ando miștimos le Martorengo le Iehovasche. Cadal victorii juridico ferin amare drepturi mai importanto, sar avelas, te avas prinjiande legalo sar iech religia, te daisaras te predichisaras libero le manușenghe, o drepto te na las rat hai te na las partea ca le ceremonii patriotico.

Tha, sar arăslem te jiav ca iech proceso juridico andi Europa, dacă me somas co Sedio Mondialo le Martorengo le Iehovasche anda New York (SUA)?

BARIOAV ANDE IECH FAMILIA MISIONARENGHI

Mânro dad, o George hai mânri dei, i Lucille, cărde i 12-to clasa catar i Școala Galaad, hai ande 1956, cana năștisailem me, von slujinas andi Etiopia. Șiute manghe o anav Filip, pala o evanghelizatoro anda o iechto secolo. (Fap. 21:8) Pala iech bărș, o guverno așadea i predicarea andi Etiopia. Chiar cana ande codo timpo somas numai iech șiavorro, anav manghe mișto amintea că mânro dad hai mânri dei cărde mai dur buchi anda o Iehova garades. Anda mande sas vareso cadea de interesanto! Tha, le autorități phende amenghe te tiliaras anda o them ande 1960.

Amari familia muchisailea andi Wichita, Kansas (SUA), tha mânre dades hai mânra deia sas-len sa codoi iubirea anda i predicarea sar cana sas-le misionari. Von sicade man, mânra pheia mai bari, i Judy, hai mânre phrales mai țâno, o Leslie, cai vi von năștisaile andi Etiopia, te iubin le Iehovas hai te slujin lesche anda sea o ilo. Cărdem o bolimos co 13 bărșa. Pala trin bărșa, amari familia muchisailea andi Arequipa (Peru) caște slujin cai sas mai bari nevoia phralendar.

Ande 1974, cana sas man 18 bărșa, i filiala anda Peru bișialdea man hai încă ștare phralen sar pionieri speciali. Avelas te predichisaras ande thana cai ci sas predichime mai anglal. Cadal thana sas-le opre andel plaina cai bușion Anzii Centrali. Code trebulas te predichisaras le manușenghe cai denas duma le șiba quechua hai aymara. Phirdeam peste sea iecha rulotasa. Phendeam lache „Arca” anda codoia că amealas iecha barea cutiasa. Mânro ilo pherdiol bucuriatar de fiesavi data cana anav manghe amintea sar sicadeam le manușenghe că o Iehova va chosela na pa but timpo o ciorâmos, le nasfalimata hai o merimos. (Rev. 21:3, 4) But anda codol manușa astarde te slujin le Iehovasche.

ASTARAV TE SLUJIV CO SEDIO MONDIALO

Cana o phral Albert Schroeder cai sas anda o Corpo de Guvernare avilea ando Peru ando bărș 1977, zuriardea man te cherav iech cererea caște slujiv co Betelo andal State Unite. Hai cadaia cărdem. Pala țâra timpo ande 17 iunia 1977, astardem te slujiv co Betelo anda Brooklyn. Ștar bărșa cărdem buchi co Ujimos hai ca i Întreținerea.

Ande iunia 1978, prinjiandem la pheia Elizabeth Avallone ca iech congreso internaționalo anda New Orleans, Louisiana. Cadea sar me, vi ande lachi familia, laco dad hai lachi dei slujinas le Iehovasche anda sea o ilo. I Elizabeth cărelas o pionierato regularo de ștar bărșa hai camelas mai dur te del sea pesco timpo le Iehovasche. Astardeam te prinjianas amen mai mișto hai pala țâra timpo, astardeam te meras iech pala aver. Leam amen ande 20 octombria 1979, hai i Elizabeth avilea ando Betelo caște slujisaras ande iech than.

Le phrala hai le pheia anda i iechto congregația ande savi slujisardeam ando Brooklyn, cai delas-pe duma spaniola primisarde amen anda sea o ilo. Ande le bărșa cai avile slujisardeam ande aver trin congregații ande save vi code le phrala sicade amenghe iech bari iubirea hai ajutisarde amen te slujisaras mai dur co Betelo. Mulțumisaras anda sea o ilo anda lengo ajutorii, hai vi le amalenghe hai codolenghe andai familia cai ajutisarde amen te las sama catar amare părinți cai sas-le phure.

MÂNRI BUCHI ANDO DEPARTAMENTO JURIDICO

Ci avilea manghe te pachiav cana ande ianuaria 1982 le phrala phende manghe că va avela te cherav buchi ando Departamento juridico. Pala trin bărșa, von mangle man te cherav i facultatea anda o drepto hai te cărdioav avocato. Cana somas ande cadai școala așilem uimime cana dichlem că la manușa anda le State Unite tha vi anda aver thana pa sea i phuv sas-le liberi te cheren chichiva buchia anda codoia că le Martori le Iehovasche câștighisarde mai but cazuri juridico. Anda chichiva cazuri importanto deam duma mai but ande cadai școala.

Ande 1986, cana sas man 30 bărșa, somas alosardo te avav o phral cai lel sama po Departamento juridico. Anda codoia că somas tărno hai ci hachiardeam sea so însemnolas te avav o phral cai lelas sama pe cado departamento simțosardem man vi zurales voime tha vi perado.

Ande 1988, cana cărdilem avocato, ci dem mânri sama chichi de but daștilas cadai școala te rimosarel mânro amalimos le Iehovasa. Iech baro sicaimos daștil te cherel ieche manușes te avel baricano hai te arăsăl te dichel-pe mai baro le coaverendar. I Elizabeth hachiardea so si manța hai ajutisardea man te cherav pale le buchia cai zuriaren mânro amalimos le Iehovasa, cadea sar cărdem angla te jiav ca i facultatea. Pala iech timpo, simțosardem man pale pașă le Iehovastar. Daștiv te phenav tumenghe ciaces, că te avel tut iech baro prinjianimos ci si i mai importanto buchi andai viața. So si ciaces importanto si chio amalimos le Iehovasa hai te avel tut iech bari iubirea caring leste hai lesche manușa.

LEM I APĂRAREA LA VESTEACHI LAȘI HAI CĂRDEM CA VOI TE ARĂSĂL LEGALO

Pala so terminisardem i facultatea, astardem te ajutisarav te lașiaren-pe le buchia legalo cai trebunas anda o Betelo, te ferisarav i organizația le Iehovaschi hai te lav sama po drepto te predichisaras i vestea lași. Mânri buchi sas șucar tha vi zurales phari poiechdata anda codoia că chichiva buchia parude-pe sigo ande amari organizația. Andel bărșa ’90, le phrala mangle o Departamento juridico te ajutin te cherel-pe iech baro paruimos: but bărșa mangleam love cana deam varecasche iech publicația tha anda codo timpo astardeam te das amare publicații bi lovengo. Cado paruimos cărdea mai ușoro i buchi anda o Betelo hai o teritorio. Mai but, cadai buchi ferisardea i organizația caște na mai pochinel de ivea chichiva taxe. Chichiva daranas anda codoia că pachianas că cado paruimos va cherela amen te hasaras but love hai ci va mai avela amen sosa te cheras cadichi de but publicații ca le manușa te prinjianen i vestea lași. Tha ci sas cadea. Anda o bărș 1990 ji acana, codola cai slujin le Iehovasche sile dui-var mai but, hai le manușen daștin te aven-len haben spiritualo bi lovengo. Dichlem mânre iachența sar daisardeam te cheras cado paruimos hai vi aver numai le ajutorosa le Iehovasco hai prin le îndrumări cai vo del-len amenghe prin o sclavo fidelo. (Ex. 15:2; Mat. 24:45)

O mai butivar ci câștighisaras le cazuri numai anda codoia că si amen lașe avocați. Cana le judecători dichen chichi de șucar phiraven-pe le manușa le Iehovasche von camen te ajutin amen. Dichlem mânre iachența cadaia ande 1998, cana trin phrala anda o Corpo de Guvernare hai lenghe rromnia găle ca le congresea specialo andai Cuba. Cana le autorități dichle că von phiravenas-pe lașimasa hai sas-le pherde pachiv, von hachiarde că amen ci șioas amen andi politica. Lengo șucar phiraimos cărdea mai but sar orisave dumes phendeam lenghe.

Cu sea cadala, poiechdata i corcori buchi cai daisaras te cheras-la caște cherel-pe amenghe ciacimos si te ‘las i apărarea la vesteachi lași hai te cheras ca voi te arăsăl legalo’ angla le bare autorități. (Filip. 1:7) Sar exemplo, but bărșa, le autorități andai Europa hai Coreea de Sud ci cample te acceptin amaro drepto te na cheras i armata. Cadea că, cam 18 000 phrala andai Europa hai mai but sar 19 000 andai Coreea de Sud sas-le phandade anda codoia că ci camle te cheren i armata.

Ji la urmă, ande 7 iulia 2011, o CEDO cărdea iech alosarimos istorico ando cazo Bayatyan contra i Armenia, cai manghel ca sea le thema andai Europa te mechen sea codolen cai ci camen te cheren i armata, te cheren aver buchi anda o them. Pala codoia vi andi Coreea de Sud cărdea-pe iech alosarimos sar cado ande 28 iunia 2018. Dacă numai chichiva anda amare tărne phrala avenas te cheren i armata, nici iech anda cadal bare alosarimata ci daștinas te aven cărde.

O Departamento juridico catar o sedio mondialo hai codola catar sea le filialea andai lumea cheren phares buchi caște ferin amaro drepto te anas închinarea le Iehovasche hai caște phenas i vestea lași. Anda amende si iech bari pachiv te ajutisaras amare phralen hai pheian cana le autorități așen lenghe contra. Chiar cana câștighisaras sau nici iech cazo, amare procesea den iech lași mărturia anda le guvernatori, anda le regi hai anda sea le thema. (Mat. 10:18) Andel lila juridico hai cana das duma angla le autorități phenas vi versetea biblico cai daștin te așunen-len vi le judecători, le bare manușa andal guvernea, mass-media hai savore manușa. Le manușa cai silen iech lașio ilo hachiaren con si le Martori le Iehovasche hai ande soste pachian. Chichiva anda lende sile acana amare phrala.

MULȚUMISARAS TUCHE, IEHOVA!

Andel palutne 40 bărșa, sas man i pachiv te cherav buchi andel cazuri juridico ande iech than le phralența catar le filialea anda sea i lumea hai te reprezentiv i organizația angla but bare instanțe hai manușa importanto. Le phrala anda o Departamento juridico catar o sedio mondialo hai anda le departamentea juridico anda sea i lumea sile zurales cuci anda mande. Si man hai sas man iech viața pherdi bucurii hai miștimata!

Nachle 45 bărșa de cana, i Elizabeth si pașa mande hai si pherdi iubirea vi andel ghiesa lașe hai vi andel ghiesa phare. Dichav-la zurales cuci anda so cherel anda codoia că sila iech nasfalimos cai rimosarel laco sastimos hai mechel-la bi zuralimasco.

Dichleam amare iachența că o zuralimos hai i victoria ci încăren le buchiandar cai daisaras amen te cheras-len. Cadea sar phendea o David, „o Iehova si o zuralimos pesche manușengo”. (Ps. 28:8) Si ciaces, „o marimos si le Iehovasco”!