LECȚIA 17

Sar si o Isus?

Formato tipărimasco

Cana prinjianas mai mișto le Isusos hai so cărdea vo cana sas-lo pi phuv, camas vi mai but te pașioas lestar hai lesche Dadestar, o Iehova. So cherel-ame te camas te pașioas lendar hai sar daisaras te las-ame pala o Isus ande amari viața?

1. Sar ameal o Isus pesche Dadeia?

Ando cerii, o Isus dichlea pesche Dades iubitorii miliardea bărșa hai daisardea te sichiol but buchia lestar. Anda codoia, vo gândil, simțosarel hai cherel le buchia cadea sar o Iehova. (Citisaren Ioan 5:19.) Mai but, prin so cărdea, o Isus sicadea cadea de mișto sar silo o Iehova, că daisardea te phenel: „Con dichlea-ma man dichlea vi le Dades”. (Ioan 14:9) Cana prinjianes mai mișto le Isusos, prinjianes mai mișto vi le Iehovas. Sar exemplo, o modo sar lea sama o Isus le manușendar, sicavel sar lel sama o Iehova tutar.

2. Sar sicadea o Isus că iubil le Iehovas?

O Isus phendea: „Anda codoia ca i lumea te jianel că me iubiv le Dades, cherav cadea sar phendea manghe o Dad te cherav”. (Ioan 14:31) Cana sas-lo pi phuv, o Isus sicadea iech bari iubirea caring pesco Dad prin o fapto că așundea lestar vi cana sas lesche pharo. Mai but, o Isus camlea sea o timpo te del duma anda pesco Dad hai te ajutil averen te aven amala le Devleia. (Ioan 14:23)

3. Sar sicadea o Isus că iubil le manușen?

I Biblia phenel că ‘le manușa sas-le zurales cuci’ anda o Isus. (Proverbe 8:31) Vo sicadea cadai iubirea caring le manușa cana zuriardea-le hai ajutisardea-le bi te ajucărel vareso lendar. Le miracolea cai vo cărdea-le ci sicade numai lesco zuralimos, tha vi că sas-les mila caring le manușa. (Marcu 1:40-42) Vo sas lașio savorența hai phiradea-pe șucar sea le manușența. Le buchia cai vo phendea-le line i duch anda o ilo le manușengo hai dine speranța sea codolenghe cai sas len iech ilo ujo hai așunenas-les. Vo iubil cadea de but le manușen, că sas gata te nachel prin bare ducha hai chiar vi te merel anda lende. Tha vi mai but iubil codolen cai train penghi viața cadea sar phendea vo. (Citisaren Ioan 15:13, 14.)

HACHIAR MAI MIȘTO

Va avela te prinjianes mai mișto le Isusos hai va avela te sichios sar daștis vi tu te sicaves iubirea, hai te des vi tu averenghe anda so si tut, cadea sar vo.

4. O Isus iubil pesche Dades

Anda o exemplo le Isusosco sichioas sar te sicavas amari iubirea caring o Del. Citisaren Luca 6:12 hai Ioan 15:10; 17:26. Pala so citisaren fiesavo verseto, arachen o răspunso ca o pușimos:

Sar daisaras te sicavas amari iubirea caring o Iehova, cadea sar o Isus?

O Isus manghel-pe le Devlesche. — O Isus iubisardea pesche Dades anda o cerii hai manglea-pe lesche butivar

5. Le Isusos duchal-les le manușendar

Le Isusos duchalas-les mai but le manușendar sar pestar. Vi cana sas-lo chino, o Isus dea pesco timpo hai zuralimos caște vazdel le manușen. Citisaren Marcu 6:30-44 hai pala codoia den duma:

Sar sicadea o Isus că lea sama le manușendar? (Dich le versetea 31, 34, 41 hai 42.)
So cărdea le Isusos te camel te ajutil le manușen? (Dich o verseto 34.)
So sichioas anda o Iehova, anda le buchia cai cărdea-le o Isus?
Sar daisaras te sicavas că duchal-ame le manușendar, cadea sar le Isusos?

Prin iech miracolo, o Isus butiarel panji manre hai dui mașe hai del haben mii manușenghe. Le discipoli hulaven o haben le murșenghe, le jiuvleanghe hai le șiavenghe.

6. O Isus dea le manușen anda sea o ilo so sas-les

Le Isusos ci sas-les but buchia. Cu sea cadala, vo dea le manușen anda sea o ilo, anda so sas-les. Vo sicadea-ame te cheras sa cadea. Citisaren Faptele 20:35 hai pala codoia den duma:

Cadea sar phendea o Isus, so anel amenghe fericirea?

Dichen o MATERIALO VIDEO hai pala codoia den duma:

MATERIALO VIDEO: „Si mai but fericirea te des” (iech cotor) (4:00)

Sar daisaras te das anda so si amen, chiar cana na-i amen prea but buchia?

Jianglean că?

I Biblia sicavel-ame te mangas-ame le Iehovasche ando anav le Isusosco. (Citisaren Ioan 16:23, 24.) Cana mangas-ame le Devlesche cadea, sicavas că sile cuci anda amende sea le buchia cai o Isus cărdea-le caște ajutil-ame te arăsas amala le Iehovaia.

UNII MANUȘA PHENEN: „Le Devles ci duchal-les amendar cana nachas prin pharimata”.

Prin sea so cărdea, o Isus lea-pe pala pesco Dad. Sar sicadea o Isus prin so cărdea că le Iehovas duchal-les amendar?

SO SICHILEAM

O Isus iubil le Iehovas hai iubil vi le manușen. Anda codoia că o Isus lea-pe pala pesco Dad, chichi prinjianes mai mișto le Isusos cadichi va avela te prinjianes mai mișto vi le Iehovas.