Con si o Isus?

O Isus si iech anda le mai prinjiande manușa anda sea le timpuri. But manușa jianen savo si lesco anav, tha ci jianen prea but anda sar silo vo. Aver pachian buchia diferime anda o Isus, tha ci jianen con si vo ciaces. So phenel i Biblia anda o Isus?

1. Con si o Isus?

O Isus si iech îngero zuralo cai beșel ando cerii. O Iehova Del cărdea-les angla te cherel sea le buchia. Anda codoia, i Biblia phenel anda leste că si „o iechto năștime anda sea i creația”. (Coloseni 1:15) I Biblia phenel anda o Isus că si ‘o Șiav unico-năștime’ le Devlesco, anda codoia că vo sas o corcoro cărdo directo le Iehovastar. (Ioan 3:16) O Isus cărdea buchi ande iech than pesche Dadeia, o Iehova, hai ajutisardea-les te cherel sea le coaver buchia. (Citisaren Proverbe 8:30.) Le Isusos siles vi aghies iech amalimos chidino le Iehovaia, hai cadaia anel lesche iech bari bucuria. I Biblia phenel că vo si „o Cuvânto”, anda codoia că o Del del duma prin leste. O Isus silo loialo hai îngărel mai dur o cuvânto le Devlesco. (Ioan 1:14)

2. Sostar avilea o Isus pi phuv?

Acana 2 000 bărșa, o Iehova cărdea iech miracolo. Prin pesco spirito sfânto vo lea i viața le Isusoschi, cai sas ando cerii, hai șiutea-la ando utero la Mariaco, cai sas iech șei bari. Hai cadea, o Isus năștisailea pi phuv sar manuș. (Citisaren Luca 1:34, 35.) O Iehova bișaldea le Isusos pi phuv caște avel Mesia, sau Cristoso, cadea sar sas phendo de mai anglal, hai caște hastravel le manușen.a Vo pherdea sea le profeții biblico anda Mesia hai cadaia ajutisardea le manușen te den penghi sama că o Isus sas „o Cristoso, o Șiav le Devlesco jiuvindo”. (Matei 16:16)

3. Cai si acana o Isus?

Pala soste o Isus mulea, vo sas jiuvindime sar spirito hai risardea-pe ando cerii. Code, „o Del vazdea-les ande iech than mai ucio”. (Filipeni 2:9) Aghies, le Isusos siles iech baro zuralimos. Numai le Iehovasco zuralimos si mai baro sar lesco.

4. O Isus ci silo o Del O Mai Zuralo

Le Isusos siles iech corpo spiritualo hai silo zuralo. Cu sea cadala, i Biblia sicavel-ame că vo așunel le Iehovastar, lesco Del hai Dad. Sostar daisaras te phenas cadai buchi? Dichen o MATERIALO VIDEO caște hachiaren sar sicavel-ame i Biblia că o Isus ci silo o Del, O Mai Zuralo.

MATERIALO VIDEO: Si o Isus Cristos o Del? (3:22)

Le versetea cai aven ajutin-ame te hachiaras so phanglimos si mașcar o Iehova hai o Isus. Citisaren fiesavo verseto hai pala codoia den duma:

Citisaren Luca 1:30-32.

• Pala sar phendea o îngero, savo si o phanglimos mașcar o Isus hai o Iehova Del, ‘Codo O Mai Baro’?

Citisaren Matei 3:16, 17.

• So așundea-pe anda o cerii cana o Isus sas boldo?

• Tu so pachias, caschi vocea sas?

Citisaren Ioan 14:28.

• Con si mai baro hai mai zuralo: iech dad sau iech șiavo?

• O Isus phendea le Iehovasche „Dade”. So sichioas catar?

Citisaren Ioan 12:49.

• Camlea o Isus te phenel că vo hai lesco dad si iech hai sa codo jeno? Tu so pachias?

5. So sicadea că o Isus sas o Mesia?

MATERIALO VIDEO: O Isus pherdea le profeții biblico (3:03)

Citisaren le profeții biblico hai pala codoia den duma:

Citisaren Mica 5:2 caște jianen cai avelas te avel năștime o Mesia.b

• Pherdilea-pe cadai profeția cana năștisailea o Isus? (Matei 2:1)

Citisaren Psalmo 34:20 hai Zaharia 12:10 caște jianen so phendea de mai anglal i Biblia anda o merimos le Mesiasco.

• Pherdile-pe cadal profeții? (Ioan 19:33-37)

• Tu so phenes, daisardea o Isus te cherel vareso ande codo momento caște întâmplon-pe cadal buchia?

• So sicavel tuche cadai buchi anda o Isus?

SO SICHILEAM

O Isus si iech spirito zuralo. Vo si o Șiav le Devlesco hai o Mesia.

So dichleam

• Sostar phenel-pe anda o Isus că si „o iechto năștime anda sea i creația”?

• So cărdea o Isus angla te avel pi phuv?

• Catar jianas că o Isus si o Mesia?

RODE MAI BUT

Sichio mai but anda catar jianas că o Isus si o Mesia.

„Sicaven le profeții mesianico că o Isus sas o Mesia?” (Articolo pa amaro site-o)

Va avela te diches dacă i Biblia phenel că o Del cărdilea dad le Isusosche cadea sar le manușa cărdion dada.

„Sostar phenel-pe anda o Isus că si o Șiav le Devlesco?” (Articolo pa amaro site-o)

Va avela te hachiares sostar o sicaimos anda i Trinitatea na-i biblico.

„Si o Isus o Del?” (O Turno de veghe, 1 aprilia 2009)

Va avela te diches sar parudea-pe i viața iecha jiuvleachi pala soste sichilea so phenel i Biblia anda o Isus.

„Iech jiuvli evreico phenel amenghe sostar parudea pesco pachiamos” (Ușten!, mai 2013)