Sar ajutil amen o Iehova te na mechas amen?

1. Sostar na-i amenghe ușoro te jias angle ji co sfârșito, tha so va ajutila amen? (1 Petru 5:10)

ANDE CADAL palutne ghiesa, savore nachas prin but pharimata hai daștil-pe că si amenghe pharo te jias angle ji co sfârșito. Chichiva sile nasfale de but bărșa, aver sile duchade anda codoia că mulea lenghe varecon drago. Sa cadea, aver sile persecutime catar penghe neamuri sau catar o guverno. (Mat. 10:18, 36, 37) Daștil-pe că vi tu naches prin iech pharimos. Tha daștis te pachias ciaces că, prin oriso avelas te naches, o Iehova daștil te del tut o zuralimos cai trebul tut caște jias angle ji co sfârșito. (Citisar 1 Petru 5:10.)

2. Con ajutil amen te jias angle ji co sfârșito?

² So însemnol te na mechas amen? Te așias loialo le Iehovasche hai te slujisaras lesche bucuriasa, chiar cana nachas prin pharimata, sam persecutime sau amaro ilo țârdel amen te cheras vareso nasul. Sa cadea, trebul te pachias că le buchia va avena mai mișto. Iech creștino ci daștil te așel zuralo ji co sfârșito prin pesco zuralimos. Tha o Iehova daștil te ajutil-les. Vo si Codo cai daștil te del amen „o zuralimos cai si mai baro sar oriso”. (2 Cor. 4:7) Ande cado articolo, va avela te dichas ștar buchia cai o Iehova del-len amenghe caște ajutil amen te jias angle ji co sfârșito. Sa cadea, va avela te dichas sar daisaras te țârdas chichi mai but miștimata anda lende.

TE MANGAS AMEN LE IEHOVASCHE

3. Sostar si o manglimos iech baro miracolo?

³ Caște jias angle ji co sfârșito, o Iehova dea amen iech șucar daro, cai si iech miracolo anda amende. Chiar cana sam manușa păcătoși, o Iehova cărdea posibilo te das duma lesa prin o manglimos. (Evr. 4:16) Te gândisaras amen: Daisaras te mangas amen le Iehovasche oricana hai te phenas lesche oriso. Vo hachiarel amen ande orisavi șib das duma lesa hai așunel amen oricai sam, chiar cana sam corcore sau ando phandaimos. (Iona 2:1, 2; Fap. 16:25, 26) Vi cana si amen but pharimata hai ci jianas sar te phenas lesche so si amen ando ilo, o Iehova hachiarel so camleam te phenas lesche. (Rom. 8:26, 27) O manglimos si ciaces iech baro miracolo le Iehovastar prin savo daisaras te das duma lesa!

4. Catar jianas că o Iehova camel te mangas amen lesche caște ajutil amen na mechas amen?

⁴ Ande pesco Lil, o Iehova phenel amenghe că „oriso avelas te mangas lestar pala leschi voința, Vo așunel amen”. (1 Ioan 5:14) Daisaras te mangas le Iehovas te ajutil amen te na mechas amen? Da, anda codoia că vo camel te ajutil amen. Sostar phenas cadaia? Cana nachas prin pharimata hai ci mechas amen, le Iehovas siles so te phenel parpale codolesche cai prasal-les, le Satanosche. (Prov. 27:11) Mai but, i Biblia phenel că o Iehova abia ajucărel „te sicavel pesco zuralimos ando miștimos codolengo casco ilo silo întrego caring leste”. (2 Cron. 16:9) Cadea că, daisaras te pachias anda sea o ilo că o Iehova camel, tha siles vi o zuralimos te ajutil amen te așias zurale hai te na mechas amen. (Is. 30:18; 41:10; Luca 11:13)

5. Sar ajutil amen o manglimos te avel amen pacea? (Isaia 26:3)

⁵ I Biblia phenel că, cana sam perade hai mangas amen anda sea o ilo, „i pacea le Devleschi, cai si mai bari sar orisavo hachiarimos, va ferila [amaro] ilo hai goghi”. (Filip. 4:7) So însemnol cadaia? Chichiva manușa cai ci slujin le Iehovasche roden sar te avel-len pacea cana nachen prin pharimata. Sar exemplo, si manușa cai camen te chosen sea penghe gânduri caște aven mai liniștime. Tha cana iech manuș cherel cadaia, ci mai siles controlo opral pesco gândimos hai daștil te cherel than le benghenghe ande peschi viața. Cado si iech baro pericolo. (Dich vi Matei 12:43-45.) Chiar cana chichiva manușa sile mai liniștime pala so cheren cadal buchia, len ci silen i ciaci pacea cai avel le Iehovastar hai si mai bari sar oriso. Cadea că, cana mangas amen le Iehovasche, sicavas că pachias amen cu sea ande leste hai vo va dela amen „iech pacea cai încărel”. (Citisar Isaia 26:3.) O Iehova ajutil amen te anas amenghe amintea chichiva versetea anda lesco Lil cai anen amenghe pacea. Cadal versetea ajutin amen te avas mai liniștime hai te hachiaras că o Iehova camel te ajutil amen hai iubil amen zurales but. (Ps. 62:1, 2)

6. So mai daștis te phenes cana manghes tut le Iehovasche? (Dich vi i imaginea.)

⁶ So daștis te cheres? Cana naches prin iech problema, „șiude chio pharimos po Iehova” hai mang-les te del tut leschi pacea. (Ps. 55:22) Sa cadea, mang-les te del tut goghiaverimos caște jianes so te cheres. (Prov. 2:10, 11) Hai na bâstăr te mulțumis le Iehovasche cana manghes tut lesche! (Filip. 4:6) Gândisar tut sar ajutil tut o Iehova cana naches prin pharimata hai mulțumisar lesche că silo pașa tute. Chiar cana si tut pharimata de chi zor te diches le miștimata cai del-len tuche o Iehova. (Ps. 16:5, 6)

O LIL LE DEVLESCO

7. Sar daștil te ajutil amen i Biblia te na mechas amen?

⁷ Caște ajutil amen te na mechas amen, o Iehova mai dea amen iech daro: i Biblia. Ande late daisaras te arachas but versetea cai ajutin amen te hachiaras că o Iehova si pașa amende hai va ajutila amen. Te dichas iech exemplo. Ando Matei 6:8 phenel-pe: „Tumaro Dad andal ceruri jianel so trebul tumenghe angla te manghen lestar cadaia”. O Isus phendea cadal dumes hai vo prinjianel mai mișto sar oricon le Iehovas. Cadea că, cana sam duchade daisaras te pachias ciaces că o Iehova jianel so si amen nevoia hai că vo va ajutila amen. O Iehova phenel amenghe andi Biblia but șucar buchia cai daștin te den amen zuralimos te na mechas amen andel pharimata. (Ps. 94:19)

8. a) Savo si iech sicaimos andai Biblia cai ajutil amen te na mechas amen? b) So daștil te ajutil amen te anas amenghe amintea le sicaimata andai Biblia cana si amen nevoia lendar?

⁸ Le sicaimata andai Biblia daștin te ajutin amen te na mechas amen cana nachas prin phare ghiesa. Sar? Ande late, arachas but lașe sfaturi cai ajutin amen te cheras lașe alosarimata. (Prov. 2:6, 7) Sar exemplo, andi Biblia phenel-pe te na daras anda so daștil te avel tehara, tha te șioas amaro pachiamos ando Iehova ande fiesavo ghies. (Mat. 6:34) Cana citisaras ande fiesavo ghies andai Biblia hai gândisaras amen le buchiande cai sichileam-len, va avela amenghe mai ușoro te anas amenghe amintea lache sfaturi cana si amen nevoia lendar.

9. Sar zuriaren amaro pachiamos ando ajutorii le Iehovasco le relatări andai Biblia?

⁹ Sa cadea, andi Biblia arachas but relatări anda manușa cai pachiaie-pe ando Iehova hai vo sas pașa lende. (Evr. 11:32-34; Iac. 5:17) Cana gândisaras amen sar ajutisardea o Iehova pesche manușen andal purane ghiesa, zuriarel-pe vi mai but amaro pachiamos că vo si „amaro garaimos hai amaro zuralimos, iech ajutorii cai arachel-pe ușoro ando ghies le pharimasco”. (Ps. 46:1) Le manușa le Iehovasche andal purane ghiesa sicade pachiamos hai ci mechle-pe chiar cana nachle prin pharimata. Cana gândisaras amen lende, camas vi amen te las amen pala lengo exemplo. (Iac. 5:10, 11)

10. Sar daștis te țârdes chichi mai but miștimata anda o Lil le Devlesco?

¹⁰ So daștis te cheres? Citisar andai Biblia ande fiesavo ghies hai cher tuche iech lista versetența cai daștin te ajutin tut ande chio pharimos. But manușa, citin o texto le ghiesesco de teharin. Cana cheren cadaia daștin te gândin-pe sea o ghies leste hai te aven zuriarde. Cadaia ajutisardea vi la pheia Mariea, vi mai but pala so așundea că lache dades hai lache deia sas-len cancero. So ajutisardea la pheia te na mechel-pe cana trebulas te lel sama pesche dadestar hai deiatar ande lenghe palutne ghiesa angla te meren? Voi phenel: „Ande fiesavi teharin, citisardem o verseto anda o liloro Te rodas ande fiesavo ghies anda o Lil le Devlesco hai gândisardem man leste. Somas sicadi te cherav cadai buchi ande fiesavo ghies. Cadea că, ando than te gândisarav man ca mânre pharimata daisardem te gândisarav man co Iehova hai ca le șucar buchia cai vo sicavel amen ande pesco Lil”. (Ps. 61:2)

AMARE PHRALA HAI PHEIA

11. Sostar sam zuriarde cana jianas că ci sam corcore cana nachas prin pharimata?

¹¹ O Iehova dea amen vi amare phralen hai pheian caște ajutil amen te na mechas amen. Cana gândisaras amen că „sea le phrala andai lumea nachen prin sa codola ducha”, sam vi amen zuriarde hai hachiaras că ci sam corcore. (1 Pet. 5:9) Si phrala hai pheia cai nachle prin sa codol pharimata sar amen hai daisarde te jian angle hai te na mechen-pe. Cadaia sicavel că vi amen daisaras te așias zurale hai te na mechas amen. (Fap. 14:22)

12. Sar daștin te ajutin amen amare phrala hai so daisaras te cheras vi amen anda lende? (2 Corinteni 1:3, 4)

¹² Le phrala hai le pheia daștin te zuriaren amen te na mechas amen prin so phenen amenghe hai cheren anda amende. O apostolo Pavel dichlea cadaia pe peschi morci. Ande pesche lila, vo phendea le anava codolenghe cai ajutisarde-les cana sas phandado ando chăr hai mulțumisardea lenghe. Le phrala sas pașa leste, zuriarde-les hai ajutisarde-les sosa sas-les nevoia. (Filip. 2:25, 29, 30; Col. 4:10, 11) Vi aghies, amare phrala hai pheia daștin te zuriaren amen hai te ajutin amen te jias angle hai te na mechas amen cana nachas prin pharimata. Tha vi amen sam gata te avas pașa amare phrala hai pheia cana silen nevoia. (Citisar 2 Corinteni 1:3, 4.)

13. So ajutisardea la pheia Maia te na mechel-pe?

¹³ Le phrala zuriarde but iecha pheia andai Rusia, cai bușiol Maia. Ande 2020 i poliția avilea andre ande laco chăr. Pala codoia, von rodenas te phandaven-la anda codoia că dea duma averența anda pesco pachiamos. Voi phenel: „Ande codol ghiesa, somas zurales peradi hai chini. Tha le phrala hai le pheia sunisarde man hai scriisarde manghe, hai cadea simțosardem lenghi iubirea. . . . Jianglem sea o timpo că mânre phrala hai pheia iubin man hai că sile mânri familia. Tha, pala so dichlem so cărde anda mande, pachiav cadaia anda sea o ilo”.

14. So daștis te cheres caște avel tut o ajutorii le phralengo hai pheiango? (Dich vi i imaginea.)

¹⁴ So daștis te cheres? Ando timpo so des chi zor te na meches tut, trebul te așes pașa che phrala hai pheia. Na lajia te manghes o ajutorii vi le phurengo andai congregația. Von sile „iech garaimos contra i barval” hai „iech garaimos contra o baro brâșând”. (Is. 32:2) Sa cadea, na bâstăr că vi che phrala nachen prin pharimata. Cana sicaves lașimos varecasche cai siles nevoia, va avela te aves fericime hai cadaia va ajutila tut te na meches tut. (Fap. 20:35)

AMARI SPERANȚA

15. Sar ajutisardea i speranța le Isusos hai sar ajutil vi amen? (Evrei 12:2)

¹⁵ Caște ajutil amen te na mechas amen, o Iehova dea amen iech speranța ciaci. (Rom. 15:13) Te anas amenghe amintea sar ajutisardea i speranța le Isusos te așel zuralo hai te na mechel-pe ando mai pharo ghies anda leschi viața pi phuv. (Citisar Evrei 12:2.) O Isus jianglea că, dacă așel loialo, avelas te ujiarel o anav le Iehovasco. Mai but, vo ajucărdea te jial parpale pesche Dadeste ando cerii hai te rail ande iech than pesche phralența machle. Sa cadea, amen si amen i speranța te traisaras anda sea o timpo andi lumea nevi le Devleschi. Cadaia ajutil amen te na mechas amen ande niciech pharimos cai daștilas te anel-les o Satan ande cadai lumea.

16. Sar ajutisardea i speranța andai lumea nevi iecha pheia hai so daisaras te sichioas anda so phendea voi?

¹⁶ Te dichas sar ajutisardea i speranța andai lumea nevi iecha pheia andai Rusia cai bușiol Alla. Laco rrom sas-lo phandado hai ajucărelas te avel judechime. Voi phenel: „Manglem man le Iehovasche anda i speranța cai vo dea-la amenghe hai gândisardem man but late. Cadaia ajutisardea man te na mechav man peradi. Jianav că pala cadal pharimata, va avena vi miștimata. O Iehova va marela pesche dușmanen hai va pochinela amen parpale”.

17. Sar daisaras te sicavas că dichas cuci i speranța cai dea-la amenghe o Iehova? (Dich vi i imaginea.)

¹⁷ So daștis te cheres? Cher tuche timpo te gândisares tut ca o șucar viitorii cai o Iehova pregătil-les anda tute. Imaginisar tuche că arăslean andi lumea nevi le Devleschi hai gândisar tut so șucar miștimata va avena tut. Orisavo pharimos prin savo va avela te nachas aghies, andi lumea nevi, va avela sar cana ‘încărdea iech țâra hai sas-lo ușoro’. (2 Cor. 4:17) Sa cadea, cher sea so daștis caște phenes vi averenghe anda i lumea nevi. Gândisar tut chichi de pharo si le manușenghe te nachen prin pharimata bi te jianen so camel te cherel o Del ando viitorii. Vi cana phenes lenghe numai chichiva buchia, daștil-pe că va camena te jianen mai but anda o Regato le Iehovasco hai anda so va cherela vo.

18. Sostar daștil te avel amen pachiamos că o Iehova va cherela so phendea?

¹⁸ Pala so nachlea prin but pharimata hai ci mechlea-pe, o Iov phendea le Iehovasche: „Acana jianav că tu daștis te cheres sea le buchia hai că oriso șios ande chi goghi daștis te cheres bi te așavel tut chanci”. (Iov 42:2) Cadea sar hachiardea vi o Iov, chanci ci daștil te așavel le Iehovas te cherel so camel. Cadaia del amen o zuralimos te na mechas amen. Gândin tumen: Iech jiuvli cai si nasfali de but bărșa si peradi anda codoia că gălea ca but doctori, tha niciech ci daisardea te sastiarel-la. Tha, pala codoia, arachel iech lașio doctoro cai phenel lache so nasfalimos sila hai sar daștil te sastiarel-pe. Cadaia cherel-la zurales fericime, chiar cana mai trebul te ajucărel iech timpo ji cana va avela te sastiarel-pe. Voi ci mechel-pe anda codoia că jianel că va avela sastiardi. Sa cadea, vi amen așias zurale hai ci mechas amen anda codoia că pachias anda sea o ilo că o Del va anela i lumea nevi.

19. So ajutil amen te na mechas amen andel pharimata?

¹⁹ Cadea sar dichleam, o Iehova dea amen o manglimos, pesco Lil, amare phralen hai pheian hai amari speranța anda i lumea nevi. Prin cadala vo ajutil amen te na mechas amen andel pharimata. Dacă das amari zor te țârdas chichi mai but miștimata anda cadal buchia, o Iehova va avela pașa amende prin oriso va avela te nachas. Vo va zuriarela amen ji cana va arăsăla o ghies cana i lumea le Satanoschi hai sea i duch va avena chosle. (Filip. 4:13)