Sar daștis te țârdes miștimata anda o merimos le Isusosco?
Iechvar ande fiesavo bărș, le Martori le Iehovasche ande iech than avere jenența pa sea i phuv comemorin o merimos le Isusosco, cadea sar poruncisardea vo. (Luca 22:19) Cado evenimento ajutil-ame te hachiaras chichi de importanto si so cărdea o Isus, cana dea peschi viața sar jertfa anda sea le manușa pa i phuv. Va avela te hachiaras vi save si le miștimata cai daisaras te țârdas-le anda lesco baro sacrificio, aghies hai ando viitorii. (Ioan 3:16)
Sar daștis te țârdes miștimata andai jertfa le Isusoschi, că sanas, sau nici, ca i Comemorarea? Chiar vo phendea amenghe so te cheras:
1. Te prinjianas le Devles hai le Isusos. Ande iech manglimos caring pesco Dad cerisco, o Isus phendea: „Cadaia însemnol i viața veșnico: te arăsăn te prinjianen tut, o corcoro ciacio Del, hai codoles cai bișaldean-les tu, o Isus Cristos”. (Ioan 17:3)
2. Te cheras le buchia cai sichioas-le. O Isus phendea că lesche sicaimata trebul te dichion-pe ande amari viața. Sar exemplo, cana dea duma andi Predica pa o plain, o Isus așardea codolen ‘cai așunen lesche dumes hai cheren-le’. (Luca 6:46-48) Vi aver data, vo phendea: „Acana, că jianen cadal buchia, fericime san dacă cheren-le.” (Ioan 13:17)
Cameias te jianes mai but anda o Del hai o Isus? Cames te jianes sar te cheres le buchia cai sichios-le? Ita sar daștis te cheres cadaia.
Te hachiares i Biblia
Amen sichioas i Biblia bute jenența hai cadaia ajutisardea-le te cheren le buchia cai sichion-le hai te paruven penghi viața. Cheras cadai buchi anda ilo hai bi te mangas tutar love.
Caște jianes mai but, jia pi pagina Sar te hachiares i Biblia.
Caște jianes sar si te sichios i Biblia le Martorența le Iehovasche, dich o materialo video Bucurisaras-ame că alosardean te sichios andai Biblia.
Le întruniri le Martorenghe le Iehovasche
Le Martori le Iehovasche chiden-pe ande iech than dui-var po curco caște închinin-pe le Iehovasche ande le thana cai bușion săli le Regatosche. Cade von sichion i Biblia hai vi sar daștin te cheren ande penghi viața so sichion anda late.
Oricon daștil te avel ca amare întruniri, chiar vi codola cai nai-le Martori. Cana ci daștis te jias fizico si tut i posibilitatea te diches i întrunirea prin videoconferința.
Caște jianes mai but buchia anda amari întrunirea, dich o materialo video Sar sile amare întruniri ca i sala le Regatoschi?.
Caște araches iech than pașă tutar, jia pi pagina le Întruniri le Martorenghe le Iehovasche.
Articolea hai materialea video online
But articolea hai materialea video pa cado site-o daștinas te ajutin-tu te jianes mai but buchia anda le Isusosche sicaimata hai chichi de cuci si leschi jertfa.
Sar exemplo, caște hachiares sar daștil o merimos ieche corcore manușesche te anel miștimata milioanea manușenghe, citisar le articolea Cum ne salvează Isus? hai De ce a suferit și a murit Isus? sau dich o materialo video Sostar mulea o Isus?.