LECȚIA 59
Daștis te așes zuralo ando pachiamos cana naches prin persecuții
Acana sau mai târzio, sea le creștini va trebuna te așen zurale cana le manușa va avena contra lenghe sau cana va nachena prin persecuții. Trebulas te daravel-ame cadai buchi?
1. Sostar ajucăras-ame te avas persecutime?
I Biblia phenel: „Sea codola cai camen te train andi devoțiunea sfânto ando phanglimos le Isus Cristosoia va avena vi von persecutime”. (2 Timotei 3:12) O Isus sas-lo persecutime anda codoia că ci cărdea partea andai lumea le Satanoschi. Nici amen ci cheras partea andai lumea, anda codoia ajucăras-ame te avas persecutime catar le guvernea cadala lumeache sau catar le organizații religioso. (Ioan 15:18, 19)
2. So daisaras te cheras caște avas pregătime andal persecuții?
Trebul te zuriaras amaro pachiamos ando Iehova încă de acanara. Cher tuche timpo ande fiesavo ghies te manghes-tu lesche hai te citisares iech cotor anda lesco Cuvânto. Jia ca fiesavi întrunirea. Sea cadala va dena-tu o zuralimos caște naches pherdo tromai părdal orisavi persecuția, chiar cana cadaia avel catar le jene andai familia. O apostolo Pavel, cai sas-lo butivar persecutime, phendea: „O Iehova si mânro ajutorii; ci va avela te darav”. (Evrei 13:6)
Sa cadea, arăsas vi mai tromane cana phenas i vestea lași oricana daisaras. I predicarea sicavel-ame te șioas amaro pachiamos ando Iehova hai te nachas părdal i dar le manușendar. (Proverbe 29:25) Dacă bariares chio tromai caște phenes i vestea lași acana, va avela te aves gata te predichis vi cana o guverno va camela te așavel amari buchi. (1 Tesaloniceni 2:2)
3. So miștimata si amen dacă ci mechas-ame cana sam persecutime?
Ciaces, ci placial-ame cana sam persecutime. Tha, dacă ci mechas-ame, amaro pachiamos va avela vi mai zuralo. Sa cadea, pașioas mai but le Iehovastar anda codoia că dichas lesco vast cai vazdel-ame cana simțosaras că ci mai si amen zuralimos te jias mai dur. (Citisaren Iacov 1:2-4.) Vi le Iehovas duchal-les cana dichel că sam duchade, tha lesco ilo bariol cana dichel că amen ci mechas-ame. I Biblia phenel: „Cana suportin hai nachen prin ducha anda codoia că cheren so si mișto, cadai buchi si lași andel iacha le Devlesche”. (1 Petru 2:20) Dacă așias zurale ando pachiamos, o Iehova va dela-ame viața veșnico andi lumea nevi, cai chonic ci va mai așela contra i închinarea ciaci. (Matei 24:13)
HACHIAR MAI MIȘTO
Va avela te hachiares sostar daștis te așes loialo le Iehovasche chiar cana san persecutime hai va avela te diches so miștimata va dela-tu vo.
4. Daștis te așes zuralo cana chi familia așel tuche contra
O Isus jianglea mișto că na savore anda amari familia va bucurina-pe că amen camas te slujisaras le Iehovasche. Citisaren Matei 10:34-36 hai pala codoia den duma:
Cana varecon alosarel te slujil le Iehovasche, sar daștinas te phiraven-pe chichiva jene anda leschi familia?
Dichen iech MATERIALO VIDEO cai sicavel iech exemplo hai pala codoia den duma:
So va avela te cheres dacă varecon anda chi familia sau iech amal camel te na mechel-tu te slujis le Iehovasche?
Citisaren Psalmo 27:10 hai Marcu 10:29, 30. Pala so citisaren fiesavo verseto, den duma:
Sar daștil te ajutil-tu cadai promisiunea dacă varecon anda chi familia sau anda che amala așen tuche contra?
5. An mai dur închinarea le Iehovasche chiar cana san persecutime
Trebul amenghe tromai te slujisaras le Iehovasche cana le coaver camen te așaven-ame te cheras cadaia. Dichen o MATERIALO VIDEO hai pala codoia den duma:
Sar zuriaren-tu le exemplea anda cado materialo video?
Citisaren Faptele 5:27-29 hai Evrei 10:24, 25. Pala so citisaren fiesavo verseto, den duma:
Sostar si importanto te anas mai dur închinarea le Iehovasche chiar cana i lucrarea de predicare sau le întruniri sile așade?
6. O Iehova va ajutila-tu te na meches-tu
Le Martori le Iehovasche pa sea i phuv, tărne hai phure, așile loialo le Iehovasche hai slujisarde lesche mai dur chiar cana sas-le persecutime. Dichen o MATERIALO VIDEO cai sicavel so ajutisardea-le hai pala codoia den duma:
So ajutisardea cadale Martoren te na mechen-pe?
Citisaren Romani 8:35, 37-39 hai Filipeni 4:13. Pala so citisaren fiesavo verseto, den duma:
Sar daștil te ajutil-tu cado verseto te jianes că daștis te naches părdal orisavo zumaimos?
Citisaren Matei 5:10-12 hai pala codoia den duma:
Sostar daștis te aves fericime chiar cana san persecutime?
Miloanea Martori le Iehovasche așile loialo pașa o Iehova cana nachle prin persecuții. Vi tu daștis!
UNII MANUȘA PHENEN: „Ci pachiav că daștiv te așiav loialo andel persecuții”.
So versetea ajutin-le te pachian că daștin te na mechen-pe?
SO SICHILEAM
O Iehova dichel cuci cana das amari zor te slujisaras lesche chiar cana sam persecutime. Vo ajutil-ame te na mechas-ame.
So dichleam
Sostar daștin le creștini te ajucăren-pe te aven persecutime?
So daștis te cheres acana caște aves gata cana va avena le persecuții?
So pachias că va ajutila-tu te așes loialo le Iehovasche chiar cana naches prin pharimata?
RODE MAI BUT
Va avela te diches sar ajutisardea o Iehova ieche tărne phrales te așel loialo chiar cana sas phandado anda codoia că așilea neutro.
Va avela te diches so ajutisardea ieche rromes hai lesca rromnia te slujin loialo le Iehovasche but bărșa chiar cana but jene așenas lenghe contra.
Slujisardeam le Iehovasche ande iech timpo cana sas paruimata (7:11)
Va avela te diches sar daștis te aves pherdo tromai cana san persecutime.
„Te avas gata de acanara anda le persecuții” (O Turno de veghe, iulia 2019)
Sar trebulas te dichas o fapto că codola andai familia așen amenghe contra hai so daștil te ajutil-ame te așias loialo le Iehovasche hai te încăras amari pacea?
„O ciacimos ci anel «pacea, tha sabia»” (O Turno de veghe, octombria 2017)