LECȚIA 30
Codola cuci amenghe cai mule daștin te train pale!
O merimos varecasco cuci anel amenghe bari duch hai peravel-ame. Anda codoia, i Biblia phenel că o merimos si iech „dușmano”. (1 Corinteni 15:26) Andi lecția 27, deja sichilean că o Iehova va chosela cadale dușmanos. Tha so va avela le manușența cai mule ji acana? Ande cadai lecția va avela te prinjianes mai but anda i șucar promisiunea cai cărdea-la o Iehova: vo va anela pale viațate miliardea manușen, caște train anda sea o timpo. Da, va jiuvindila-le! Chiar daștil te avel ciaces cadai buchi? Cai va avena jiuvindime cadal manușa: ando cerii sau pi phuv?
1. So camel te cherel o Iehova anda codola cuci amenghe cai mule?
O Iehova abia ajucărel te uștiavel pale viațate codolen cai mule. O Iov, iech manuș pherdo pachiamos, pachiaia zurales că o Del ci va avela te bâstrel-les pala so va merela. Vo phendea le Devlesche: „Tu va achareia-ma hai me va avela te răspunzosarav tuche [anda o Mormânto]”. (Citisaren Iov 14:13-15.)
2. Catar jianas că le mule daștin te aven jiuvindime?
Cana o Isus sas-lo pi phuv, o Del dea-les o zuralimos te jiuvindil le manușen. O Isus andea pale viațate iecha șeia cai sas-la 12 bărșa hai le șiaves iecha phivleache. (Marcu 5:41, 42; Luca 7:12-15) Pala codoia, vi o Lazăr, le Isusosco amal, mulea. Chiar cana o Lazăr sas mulo hai prahome de ștar ghiesa, o Isus ușteadea-les andal mule. Pala soste manglea-pe le Devlesche, o Isus dea cingar zurales: „Lazăr, av avri!”. Hai ‘o manuș cai sas mulo avilea avri’. O Lazăr sas jiuvindime! (Ioan 11:43, 44) De chi sama so bari bucuria sas mașcar le amala hai i familia le Lazăroschi!
3. So speranța si anda codola cuci amenghe cai mule?
I Biblia phenel: „Va avela iech jiuvindimos”. (Faptele 24:15) Codola cai sas jiuvindime cana o Isus sas-lo pi phuv ci vazdile co cerii. (Ioan 3:13) Von sas bucurime că o Isus jiuvindisardea-le cade pi phuv. Sa cadea, na pa but timpo, o Isus va jiuvindila miliardea manușa caște train anda sea o timpo ando paradiso pi phuv. O Isus phendea că o Del va jiuvindila sea codolen cai sile ande leschi goghi, chiar cana niciech manuș ci mai anel pesche amintea lendar. (Ioan 5:28, 29)
HACHIAR MAI MIȘTO
Va avela te sichios andai Biblia sostar daștis te pachias că le mule va avena jiuvindime hai va avela te diches sar daștil cadai speranța te zuriarel chio ilo.
4. O Isus sicadea că daștil te jiuvindil codolen cai mule
Sichio mai but anda so cărdea o Isus anda pesco amal o Lazăr. Citisaren Ioan 11:14, 38-44 hai pala codoia den duma:
Catar jianas că o Lazăr sas ciaces mulo? (Dich o verseto 39.)
Dacă o Lazăr avileas te jial ando cerii, pachias că o Isus camelas te anel-les pale viațate pi phuv?
5. Va avena jiuvindime but manușa!
Citisaren Psalmo 37:29 hai pala codoia den duma:
Cai va traina le miliardea manușa cai va avena jiuvindime?
O Isus va jiuvindila vi avere manușen, na numai codolen cai andine închinarea le Iehovasche. Citisaren Faptele 24:15 hai pala codoia den duma:
Cas ajucăres anda sea o ilo te diches pale viațate?
Gândisar-tu: o Isus daștil te uștiavel varecas cai mulea, sa cadea de ușoro sar uștiavel iech dad anda lindr pesche șiaves
6. O pachiamos ando jiuvindimos daștil te zuriarel chio ilo hai te del-tu iech speranța
I relatarea biblico anda i șei le Iairoschi, zuriardea bute manușen duchade. Citisaren anda cadai relatarea cai sas ciaces, ando Luca 8:40-42, 49-56.
Angla te jiuvindil la șeia le Iairoschi, o Isus phendea lesche: „Na dara! Sicav pachiamos”. (Dich o verseto 50.) Sar ajutil-tu te jianes că le mule va avena pale viațate . . .
cana varecon cai si tuche cuci merel?
cana tu san ando pericolo te meres?
Dichen o MATERILAO VIDEO hai pala codoia den duma:
Sar zuriardea o pachiamos ando jiuvindimos o ilo le dadengo cai hasarde penga șeiorra, i Phelicity?
UNII MANUȘA PHENEN: „Avelas prea șucar ca le mule te aven pale viațate”.
Tu so pachias?
So verseto daștil te ajutil-tu te sicaves că va avela iech jiuvindimos?
SO SICHILEAM
I Biblia phenel că miliardea manușa cai mule va avena jiuvindime. O Iehova camel ca von te train, anda codoia dea le Isusos o zuralimos te anel-le pale viațate.
So dichleam
Catar jianas că o Iehova hai o Isus de-abia ajucăren te anen pale viațate codolen cai mule?
Cai va traina le miliardea manușa jiuvindime: ando cerii sau pi phuv? Sostar pachias cadaia?
Tu sostar pachias că codola cuci cai hasardean-le ando merimos va daștina te train pale?
RODE MAI BUT
Va avela te diches so daștis te cheres caște na mai aves cadea de duchado.
„So daștil te ajutil codolen cai sile duchade” (Ușten!, nr. 3 2018)
Daștil te ajutil-tu i Biblia cana san zurales duchado?
So daștil te ajutil le șiaven te nachen părdal o merimos varecasco cuci?
Va avela varecon jiuvindime ando cerii? Si manușa cai ci va avena jiuvindime?